Mateyu 21

Yesu wasere mu Yerusalemu wakukwera pa mbunda

(Marko 11.1-11; Luka 19.28-40; Yohane 12.12-19)

1Ndipo penipo waŵandikiyanga ku Yerusalemu, wati wafika ku Betefage, ku phiri la Olivete, Yesu wangutuma ŵasambizi ŵaŵi, 2wakuŵanene, “Kaninga ku muzi wakuthyana namwe ndipo sosonukweni mwamsaniya mbunda yakumangika, ndi mwana-mbunda pamoza nayo: muzifwatuwe, muze nazo kwaku ine. 3Asani yumoza wangakamba namwe kanthu, mukatinge, ‘Ambuya atizikhumba,’ ndipo sosonukweni amkuziwezge so kuno.” 4Kweni chinguŵapo ichi, alinga kuti lifiskike nenedu la mchimi yo,

5“Ŵaneniyeni ŵanthu ŵaku Zioni,

Awonani, Karonga winu watukuziyani,

mpovu, ndi wakugara pa mbunda,

ndi pa kambunda, mwana wa mbunda.”

6Ndipo ŵasambizi wo ŵanguruta, ŵanguchita uli ndimo Yesu wanguŵalanguliya, 7ŵanguza nazo, mbunda ndi mwana-mbunda, ŵanguyarapo paku zo minjirira yawo; ndipo wanguja pachanya paku zo. 8Ndipo urapasi wa mzinda ungutandika minjirira yawo mu nthowa; ŵanyake ŵatemanga vivwati vyamiti ŵatandikanga mu nthowa. 9Ndipo mizinda yakudanjiya ndi yakurondo yabongonga, yakuti, “Hosana,#21.9 Hosana: mazu yagha ghakuti Hosana nchiHebere ghang'anamuwa kuti, “Taskani sono.” Mwana waku Davidi! Ngwakutumbikika yo watuziya mu zina la Mbuya, Hosana mu mdengwendi!” 10Ndipo wati wasere iyo mu Yerusalemu, msumba wose unguyaghayika, wakuti, “Njani uyu?” 11Ndipo yanenanga mizinda yo, “Uyu ndi mchimi Yesu, waku Nazarete waku Galilie.”

Yesu wasere mu kasopi

(Marko 11.15-19; Luka 19.45-48; Yohane 2.13-22)

12Ndipo Yesu wanguza mu kasopi waku Chiuta, ndipo wangupong'a kubwaro wose ŵakusaska ndi ŵakugula mu kasopi yo ndipo wangugadabuwa magome gha ŵakusintha-ndrama, ndi vitengo vya ŵakusaska nkhunda. 13Ndipo wanguŵanene, “Kwalembeka, ‘Nyumba yangu yidanikenge nyumba ya kuromba’: kweni imwe mwayisanduska mphanji ya ŵakupoka.” 14Ndipo ŵanguza kwake mu kasopi ŵachiburumutiya ndi ŵakuganthiya; ndipo wanguŵachizga. 15Kweni ŵazukuru ŵara ndi ŵalembi; ŵachiwona vyanthazi vyo wangutata, ndi twana twaku bongo mu kasopi, “Hosana, Mwana waku Davidi!” Ŵangukalipa, 16ndipo ŵangumnene, “Kumbi utuvwa cho yaŵa ŵakamba?” Yesu wanguŵanene, “Inya, asi mwaŵerenga kali, kuti, Kutuwa ku mlomo wa ŵamjedu ndi ŵakonkha mwarongosole thokozu?” 17Ndipo wanguŵasiya wangutuwa ku msumba, wanguruta ku Betaniya, ndipo wangugona kweniko.

Yesu wachenya mkuyu

(Marko 11.12-14, 20-26)

18Ndipo ndi mlenji, wachiwere ku msumba wo, wanguvwa nja. 19Ndipo pakuwona mkuyu umoza mu mphepete mu nthowa, wanguza kwaku wo, ndipo kuti wangusaniyamo kanthu cha, kweni mane pe, ndipo watiti kwaku wo, “Pako pangaŵa so chipasi cha muyaya!” Ndipo sosonukweni ungumira mkuyu wo. 20Ndipo ŵachiwona ichi ŵasambizi wo ŵanguzizwa, ŵatinge, “Wamira uli ruŵi mkuyu wo?” 21Kweni wakwamuka Yesu wanguti, “Nadi ndikuneneskiyani, asani mungaŵa ndi chivwanu, ndi mungadonda cha, kuti muchitenge cho cha mkuyu wo pe cha, kweni chingana munganene phiri ili, ‘Uzulike ndi upong'eke mu nyanja,’ chikachitikanga. 22Ndipo vyose vyo mungapempha mu kuromba ŵakuvwana murondenge.”

Wafumbika ndi mtufu wake

(Marko 11.27-33; Luka 20.1-8)

23Ndipo wati waza mu kasopi, ŵanguza kwaku iyo, ŵazukuru ŵara ndi ŵaraŵa khamu lo, wachisambizga, wakuti, “Uchita vyenivi ndi mtufu nuwu? Ndipo yo wakukupaska mtufu wo njani?” 24Kweni wakwamuka Yesu wanguŵanene, “Nane ndikufumbeninge mazu ghamoza, ghenigho asani mungandinene, nane ndineniyenge imwe nthazi mwaku yeniyo ndichitiya vyenivi. 25Ubatizo waku Yohane ungutuliya nunkhu? Kutuwa kuchanya, pamwenga ku ŵanthu?” Kweni iwo ŵangususkana mwaku ŵija, ŵakuti, “Asani tititi, ‘Kutuwa kuchanya’; watineniyenge, kuti, ‘Na chifukwa chine mungureka kuvwana mwake?’ 26Kweni asani tititi, ‘Kutuwa ku ŵanthu’; titopa mzinda wo; chifukwa wose ŵe nayo Yohane nge ndi mchimi.” 27Viyo ŵakumwamuka Yesu ŵanguti, “Kuti tiziŵa cha.” Nayo so wanguŵanene, “Chingana ndine kuti ndineniyenge imwe cha nthazi yo ndichitiya vyenivi.

Ntharika ya ŵana ŵaŵi

28“Kweni imwe murunguruka uli? Munthu wenga ndi ŵana ŵaŵi: ndipo wati waza ku wakudanga, wanguti, ‘Wamwana, kanga, katate nchitu le mu munda wa mphereska.’ 29Ndipo iyo wakwamuka wanguti, ‘Kuti ndikhumba cha’: kweni pavuli wangung'anamuka ndi wanguruta. 30Ndipo wati waza ku wachiŵi, wangukamba kwakukozgana. Ndipo iyo, wakwamuka, wanguti, ‘Ndirutenge, ambuya’: kweni kuti wanguruta cha. 31Mwaku wo ŵaŵi njani wanguchita khumbu la awiske?” Watiti, “Wakudanga yo.” Yesu wanguŵanene, “Nadidi ndikuneniyani kuti ŵamsonkhu ndi ŵanthukazi ŵareŵi ŵakudanjiriyeninge mu ufumu waku Chiuta. 32Chifukwa Yohane wanguziya imwe mu nthowa ya urunji, ndipo kuti munguvwana mwake cha; kweni ŵamsonkhu ndi ŵanthukazi ŵareŵi ŵanguvwana mwake: kweni imwe, chingana munguchiwona, kuti mungung'anamuka cha kuvwaniya mwaku iyo.

Ntharika ya ŵalimi-munda

(Marko 12.1-12; Luka 20.9-19)

33“Avwani ntharika yinyake. Kwenga munthu, mweni-nyumba yo wangupanda munda wa mphereska, wanguwusitiya lisitu, wangukumba chakukandiyamo mphereska, ndi wanguzenga chigongwe ndipo wanguwupazgiya ŵalimi, ndipo wangamtembeya ku charu chinyake. 34Kweni penipo yingufika nyengo ya vipasi, wangutumizga ŵaŵanda ŵake ku ŵalimi wo, kwachironda vipasi; 35ŵalimi wo ŵanguko ŵaŵandaŵake, ŵangumpuma yumoza, munyake ŵangupong'a mya. 36Wangutumizga ŵaŵanda ŵanyake kwakuruska ŵakudanga wo: yaŵa nawo ŵanguŵachitiya kwakulingana. 37Kweni pavuli wangutumizga kwaku wo mwana wake, wakuti, ‘Ŵamuphwerenge mwana wangu.’ 38Kweni ŵalimi wo, ŵachiwona mwana yo, ŵangukambirana mwaku ŵija, ‘Mwenuyu ngwakuhara; tiyeni tibaye, ndipo tito chihara chake.’ 39Ndipo ŵangumko, ŵangumpong'a kubwaro ku munda wa mphereska, ndipo ŵangumbaya. 40Viyo penipo wazenge mwenimunda wamphereska yo, waŵachitiyenge chine ŵalimi munda ŵa?” 41Ŵamnene, “Waŵanangenge uheni ŵaheni ŵa, ndipo munda wa mphereska wapazgiyenge ku ŵalimi ŵanyake, ŵeniwo ŵamuwezgiyenge vipasi vyo mu nyengo zawo.” 42Yesu watiti kwaku wo, “Kumbi kali kose mundaŵerenge mu malembo:

‘Mwa wo ŵakuzenga nyumba ŵanguwukana,

weniwo waŵa mutu wa nyondu:

ichi ndi nchitu ya Ambuya.

Ndipo nchakuziziswa mu maso ghidu?’

43“Chifukwa chenichi ndikuneniyani, ukwamphulikenge kwaku imwe ufumu waku Chiuta, ndipo upaskikenge ku mtundu wakupasa vipasi vyake. [44Ndipo yo wangawapo pa mwa wenuwu watikinyikenge: kweni pakumweniyo umuwiyenge, umuthibuskenge.”]

45Ndipo ŵazukuru ŵara ndi ŵaFarisi, ŵati ŵavwa ntharika zake, ŵanguteska kuti wanenanga iwo. 46Ndipo pakupenja kuti ŵamuko, ŵangopa mizinda yo, pakuti yenga nayo nge ndi mchimi.

Currently Selected:

Mateyu 21: TongaMw

Highlight

Compare

Copy