Mateyu 27

Yesu watoreke kwaku Pilato

(Marko 15.1; Luka 23.1-2; Yohane 18.28-32)

1Ndipo kwati kwacha wose ŵazukuru ŵara ndi ŵara ŵa khamu lo ŵangupanga upu paku Yesu, kwachimbaya; 2ndipo ŵati ŵamumanga, ŵanguruta nayo, ŵangumpereka kwaku Pilato, nduna yo.

Nyifwa yaku Yuda

(Machitidu gha Ŵakutumika 1.18-19)

3Sono Yuda, yo wangumpachiya, wachiwona kuti wasuskika, wangujipezga, ndi wanguwezge ŵazukuru ŵara ndi ŵara vyasiliva vyo machumi ghatatu, 4wakuti, “Ndalakwa, ndawakupachiya ndopa zizirakalema.” Kweni iwo ŵatinge, “Nchine, kwaku ifwe? Kweniko wamweni.” 5Ndipo wati wapong'a pasi vyasiliva vyo mu kasopi, wanguruta; ndipo wakutuwako wangujigwinjiriya. 6Ndipo ŵazukuru ŵara ŵanguto vyasiliva vyo, ŵakuti, “Kuti kuyamu cha kuvipong'a mu chambiku, pakuti ndi ndrama za ndopa.” 7Ndipo ŵangupanga upu, ndi ŵangugula navyo munda wa muwumbi kwachiŵikamo ŵalendo. 8Chifukwa chenicho munda unguzumbulika, Munda wa ndopa, mpaka kuno ku le. 9Penipo lingufiskika nenedu lo lamwaku Yeremiya mchimi yo, lakuti, “Ndipo ŵanguto vyasiliva machumi ghatatu gho, mtengu waku mweniyo paku mweniyo mtengu ungutemeke ndi ŵanyake ŵamu ŵana ŵaku Yisraele, 10ndipo ŵanguvipaska pa munda wa muwumbi wo, nge ndimo Mbuya wangundilanguliya.”

Pilato wafumba Yesu

(Marko 15.2-5; Luka 23.3-5; Yohane 18.33-38)

11Ndipo Yesu wanguma paurongo pa nduna yo: ndipo nduna yingumfumba, yakuti, “Kumbi ndiwe karonga wa ŵaYuda?” Yesu wanguti kwaku iyo, “Iwe unena.” 12Ndipo wachisumulika ndi ŵazukuru ŵara ndi ŵara, kuti wangwamuka kanthu cha. 13Sono Pilato wangunena nayo, “Asi utuvwa vyose vyo ŵatukusimikizga?” 14Ndipo kuti wangwamuka cha, chingana nkhu mazu ghamoza, viyo kuti nduna yo yinguzizwa ukongwa.

Yesu wakomboreke ku nyifwa

(Marko 15.6-15; Luka 23.13-25; Yohane 18.39—19.16)

15Kweni pa dghera yinguziŵiriya nduna kufwatuliya mzinda wamkoli yumoza, mweniyo ŵangakhumba. 16Ndipo pa nyengo iyi ŵenga nayo wamkoli wathenthe, wakuzumbulika Baraba. 17Viyo ŵati ŵaunjikana iwo, wanguŵafumba Pilato, “Mukhumba ndikufwatuliyeni yani? Baraba, pamwenga Yesu yo wazumbulika Kristu?” 18Chifukwa wanguziŵa kuti nchifukwa cha chiŵinu ndichu ŵangumpereke. 19Kweni wachija iyo pa chakweruzgiyapo, muwoli wake wangumutumiya mazu, wakuti, “Uŵevi kanthu ndi murunji mweniyo; chifukwa le mu lotu ndakomwiyapo vinandi pa chifwa chake.” 20Kweni ŵazukuru ŵara ndi ŵara ŵangukakamizga mizinda yo kuti ŵapemphe Baraba ndiyo, ndi ŵamunange Yesu. 21Ndipo nduna yo yinguŵafumba, “Mukhumba ndikufwatuliyeni nunju waku wo ŵaŵi?” Ndipo wanguti, “Baraba.” 22Pilato waŵenene, “Na, ndichitengenji ndi Yesu wakuzumbulika Kristu?” Watiti wose, “Wapayikike!” 23Ndipo wanguti iyo, “Chifukwa chine? Wachita chiheni nichi?” Kweni iwo ŵangukambura ukongwa, kuti, “Wapayikike!” 24Ndipo Pilato, pakuwona kuti wengavi kovya kanthu, kweni ukongwa kuti chichitika chiwawa, wanguto maji, wangusamba mu manja paurongo pa mzinda wo, wakuti, “Nde wambura kalema ku ndopa za murunji uyu: kweniko mwaŵeni!” 25Ndipo khamu lo lose lakwamuka, linguti, “Ndopa zake ziŵe paku ifwe ndi pa ŵana ŵidu!” 26Sono wanguŵafwatuliya Baraba: kweni Yesu, wati wamukwechuwa, wangumukombo kuti wapayikike.

Ŵankhondo ŵanyoza Yesu

(Marko 15.16-20; Yohane 19.2-3)

27Ndipo ŵankhondo ŵa nduna, ŵati ŵamtole Yesu ku mphara ŵanguwunganiska liŵanja lose. 28Ndipo ŵati ŵamuzuwa, ŵangumuvwarika raya lichesamu. 29Ndipo ŵati ŵapika ndumbu ya minga ŵanguyiŵika pa mutu wake ndi dete mu janja lake lamarghe: ndipo pakumulambiya paurongo ŵangumtoza ŵakuti, “Mauleni, karonga wa ŵaYuda!” 30Ndipo ŵangumfunyiya mata, ndipo ŵangulito dete, ŵangumkoso ku mutu. 31Ndipo ŵati ŵamtoza ŵangumzuwa raya lo, ndi ŵangumvwarika minjirira yake, ndipo ŵangumgumizga kwachipayikika.

Yesu wapayikika pa mphinjika

(Marko 15.21-32; Luka 23.26-43; Yohane 19.17-27)

32Ndipo ŵachituwa ŵangusaniya munthu mKurene, zina Simone: ŵangumkakamizga mweniyo kuti wanyamuwe mphinjika. 33Ndipo ŵati ŵaza ku malo ghakuzumbulika Golgota (cho ching'anamuwa malo gha bwaza), 34ŵangumpaska kumwa mphereska zakusazgamo nduru: ndipo wati walaŵa kuti wangukhumba kumwapo cha. 35Ndipo ŵati ŵampayika ŵangugaŵana minjirira yake, pakupong'a mphenduzga: 36ndipo pakuteka pasi ŵamlindizganga penipa. 37Ndipo ŵanguŵikapo pachanya pa mutu wake kafukwa kake kakulembeka, MWENUYU NDI YESU, KARONGA WA ŴAYUDA. 38Penipo ŵangupayikika pamoza nayo ŵakupoka ŵaŵi, yumoza ku marghe ndi yumoza ku maze. 39Ndipo ŵarutanjiya ŵamtukanga, ŵakupukung'a mitu yawo, 40ŵakuti, “Wakubwanganduwa kasopi we, ndi wakumuzenga mu mazuŵa ghatatu, jitaske: asani we Mwana waku Chiuta, sika ku mphinjika yo.” 41Kwakulingana nako ŵazukuru ŵara ŵangumuyeya, pamoza ndi ŵalembi ndi ŵara, ŵatinge, 42“Wangutaska ŵanyake; walive nthazi kujitaska yija. Ndiyo karonga waku Yisraele! Wasike sono ku mphinjika yo, ndipo tivwanenge mwake. 43Wangugomekezga mwaku Chiuta, wamtaske sono, asani watumukhumba: chifukwa wanguti, ‘Ndine Mwana waku Chiuta.’ ” 44Ŵakupoka nawo ŵakupayikika pamoza nayo ŵamtozanga ghenigho pe.

Nyifwa yaku Yesu

(Marko 15.33-41; Luka 23.44-49; Yohane 19.28-30)

45Kweni kutuwa ku ora lachinkhonde ndi chimoza kunguŵapo mdima pa charu chose mpaka ku ora lachinkhonde ndi chinayi. 46Ndipo akhumba pa ora lachinkhonde ndi chinayi wangubongo Yesu ndi mazu ghakuru, wakuti, “Eli, Eli, lama sabakatani?” Lo lititi, “Chiuta wangu, Chiuta wangu, chifukwa chine mwandisiya?” 47Ndipo ŵanyake ŵaku wo ŵangumapo, ŵachivwa, ŵatinge, “Mwenuyu wadana Eliya.” 48Ndipo sosonukweni yumoza waku wo wanguchimbiya, wanguto buwura wangumuzaza ndi vinyo wakusasa, ndipo wangumuŵika ku dete, ndi wamumweskanga. 49Kweni ŵakujapo ŵanguti, “Reka; tiwone vinu Eliya wazenge kwazimtaska.” 50Kweni Yesu wati wakambura so ndi mazu ghakuru, wangukombo mzimu wake. 51Ndipo onani, chijaru cha kasopi chinguparuka pakati, kutuwa pachanya pasi mbwitu. Ndipo charu chingundengandenga; ndi majarawi ghangusweka, 52miunda yingubanuka; ndipo mathupi ghanandi gha wakupaturika wo ŵangura, ghanguyuskika, 53ndipo wakutuwa mu masano pavuli pa chiyuka chake ŵangusere mu msumba wakupaturika, ndipo ŵanguwoneke ŵanandi. 54Kweni kenturione yo, ndi wo ŵapamoza nayo ŵakulindizga Yesu, wachiwona chiyeuyeu ndi vyo vinguŵapo ŵangopa ukongwa, ndipo ŵanguti, “Nadidi mwenuyu ndi Mwana waku Chiuta.” 55Ndipo kwengako kweniko ŵanthukazi ŵanandi, ŵakulereske patari, ŵeniwo ŵangurondo Yesu kutuwa ku Galile, ŵakumteŵete; 56mwaku wo mwenga Mariya Magdala, Mariya, anyinawo ŵaku Yakobe ndi Yose, ndi anyinawo ŵa ŵana ŵaku Zebediya.

Yesu waŵikika mu muunda

(Marko 15.42-47; Luka 23.50-56; Yohane 19.38-42)

57Kweni kwati kwaŵa mazuro wanguza munthu msambasi waku Arimataya, zina lake Yosefe, mweniyo nayo wenga mzambizi waku Yesu. 58Wanguza kwaku Pilato, ndipo wangupempha thupi laku Yesu. Sono Pilato wangulangula kuti liperekeke. 59Ndipo Yosefe wanguto thupi lo, wangulifunga mu bafuta wakutowa, 60ndi wanguliŵika mu muunda wake ufya, wo wanguchonga mu jarawi: ndipo wati wagadabuliyako mwa ukuru ku khomu la muunda, wanguruta. 61Ndipo kwenikuwa, kwenga Mariya Magdala ndi Mariya munyake yo, ŵakuja pasi pakuthyana ndi muunda wo.

Ŵaŵika ŵaronda pa muunda

62Ndipo ndi mlenji, weniwo wenga zuŵa la pavuli pa Chirongosole, ŵazukuru ŵara ndi ŵaFarisi ŵanguwunjikana kwaku Pilato, 63ŵakuti, “Abwana, takumbuka kuti mrandizgi yo weche wamoyo wanguti, ‘Pavuli pa mazuŵa ghatatu ndiyukenge.’ 64Viyo langulani kuti muunda wo ukhozgeke mpaka zuŵa lachitatu, vinu kokuli ŵasambizi ŵake ŵangaza ndi kumuba, ndi ŵangakambiya khamu lo, kuti, ‘Wayuka ku ŵakufwa’: ndipo urandizgi wakumariya wo ukaŵanga uheniku ku wakudanga wo.” 65Pilato wanguŵanene, “Mwe nawo ŵaronda ŵankhondo; kaninga muwokhozge mo muziŵiya.” 66Ndipo ŵanguruta, ŵangukhozga muunda ŵakuuzighiriya mwa, ndipo ŵanguŵikako ŵaronda.

Currently Selected:

Mateyu 27: TongaMw

Highlight

Compare

Copy