Mateyu 28

Chiyuka cha Ambuya ku ŵakufwa

(Marko 16.1-10; Luka 24.1-12; Yohane 20.1-10)

1Ndipo lati laruta Sabata, pa matanda kucha pa zuŵa lachimoza la lisabata, ŵanguruta Mariya Magdala, ndi Mariya munyake yo kwachiwona muunda. 2Ndipo onani, kunguŵapo chiyeuyeu chikuru; chifukwa mungelo wa Ambuya wangusika kuchanya, ndipo wanguza ndi wangugadabuwa mwa wo, ndipo wanguja ndeku pachanya pake. 3Ndipo kawonekedu kake kenga nge ndi limphezi, ndi kavwaridu kake kangutowa nge ndi matarara: 4ndipo pakumopa ŵaronda wo ŵangutenthema, ndipo ŵanguwa nge mbakufwa. 5Kweni mungelo yo wakwamuka wanguŵanene ŵanthukazi, “Mungopanga cha, chifukwa ndiziŵa kuti mupenja Yesu yo wangupayikika. 6Kuti walipo panu cha; wayuka uli ndimo wangunene. Zani, muwone malo po wangura. 7Ndipo rutani ruŵi, ŵaneniyeni ŵasambizi ŵake, kuti, Wayuka ku ŵakufwa; ndi, onani, wakudanjiriyani ku Galile, kweniko mwamkumuwona: onani, ndakuneniyani.” 8Ndipo ŵangutuwako ruŵi ku muunda ndichopu ndi chimwemwe chikuru; ŵanguchimbiya kwachitauliya ŵasambizi ŵake. 9Ndipo, onani, Yesu iyo wangukumana nawo, wakuti, “Mauleni!” Ndipo Wanguza, ndi ŵanguko marundi ghake, ndipo ŵangumlambiya. 10Sono Yesu watiti kwaku wo, “Mungopanga cha; kaninga, katauliyeni ŵabali ŵangu kuti ŵakenge ku Galile, ndiko ŵamukundiwona.”

Makani gha ŵaronda

11Ndipo ŵachiruta iwo, onani ŵanyake ŵa ŵaronda ŵanguza mu msumba, ndipo ŵangutauliya ŵazukuru ŵara vyakuŵapo vyose. 12Ndipo ŵachiwunjikana pamoza ndi ŵara, ŵangupangana fundu, ŵangupaska ndrama zinandi ku ŵankhondo wo, 13ŵakuti, “Nenani, ‘Ŵanguza ŵasambizi ŵake ndi usiku, ndipo ŵamuba po ifwe tenga mutulo.’ 14Ndipo asani ichi chingavwika ku nduna yo, wakhorwenge nafwe ndipo imwe timutuzgeningimo mu suzgu.” 15Ndipo iwo ŵakuronde ndrama zo ŵanguchita uli ndimo ŵangusambizgikiya: ndipo makani ghenigho ghanguwandiskika mu ŵaYuda mpaka kuno kule.

Yesu wawoneka ku ŵasambizi ŵake

(Marko 16.14-18; Luka 24.36-49; Yohane 20.19-23; Machitidu gha Ŵakutumika 1.6-8)

16Kweni ŵasambizi wo chumi ndiyumoza wanguruta ku Galile, ku phiri lo Yesu wanguŵateme. 17Ndipo ŵachimuwona, ŵangumlambiya: kweni ŵanyake ŵangukangang'a. 18Ndipo Yesu wanguza, wangurongoro nawo, wakuti, “Wapaskika kwaku ine mtufu wose kuchanya ndi panupasi. 19Viyo rutani, sambizgani mitundu yose, ŵakuŵabatiziya mu zina la Dada ndi la Mwana ndi la Mzimu ŵakupaturika: 20ŵakuŵasambizga kuroreze vyose vyo ndalanguliya imwe: ndipo onani, ine nde namwe mazuŵa ghose mpaka ku umari wa mgonezi wo.”

Currently Selected:

Mateyu 28: TongaMw

Highlight

Compare

Copy