Mateyu 3

Yohane Mbatizi watamba nchitu yake

(Marko 1.1-8; Luka 3.1-18; Yohane 1.6-8, 19-28)

1Ndipo mu mazuŵa ghenigha wanguza Yohane Mbatizi yo, wakumemeza mu bozwa laku Yuda, wakuti, 2“Ng'anamukani; chifukwa waŵandika ufumu wa kuchanya.” 3Chifukwa mweniyo ndiyo wanguneneka ndi Yesaya mchimi yo, kuti,

“Liu la wakubongo mu bozwa,

Rongosoni nthowa ya Ambuya,

Nyoroskani miseu yake.”

4Kweni mweniyo Yohane wenga ndi chakuvwara chake cha weya wa gamila, ndi likwamba la chikopa lo wamanganga mu chiunu chake; ndipo chaukurgha chake chenga ŵazombe ndi uchi wamu dondo. 5Ndipo kungutuliya kwaku iyo Yerusalemu ndi Yuda yose ndi charu chose chakuzunguliya Yordane; 6ndipo ŵabatizikanga ndi iyo mu msinji Yordane, ŵakusumuwa vyakulakwa vyawo.

7Kweni wachiwona ŵanandi ŵa ŵaFarisi ndi ŵaSaduki ŵakuza ku ubatizo wake, wanguŵafumba, “Mwa mphapu za vipi, njani wangukucheŵeskani kuthaŵa kandundu ko katuza? 8Viyo pasani vipasi vyakwenere ching'anamuka, 9ndipo mungapimanga cha kunena mwaku mwaŵeni, ‘Uskefwe te nayo Abrahamu,’ chifukwa ndikuneniyani kuti ngwanthazi Chiuta ku mya yeniyi kumyuskiya Abrahamu ŵana. 10Ndipo sono nako mbavi yajikika ku nkhorozu za miti, chimuti chose chakureka kupasa vipasi vyeneko chitemeka ndipo chipong'eka mu moto.

11“Ine nadi ndikubatizani ndi maji ku ching'anamuka: kweni yo watuza pavulipangu ngwanthazi ndi ine, viyatu vyaku mweniyo kuti nde wakwenere cha ine kufwatuwa. Iyo wamkukubatizani ndi Mzimu Wakupaturika ndi moto. 12Mweniyo chipepeteru chake che mu janja lake, wakatoweskanga mbuli wake; ndi kuwunjika trigu wake mu nkhokwe, kweni wamukocha mwere ndi moto wambura mazimwika.”

Yesu wabapatizika ndi Yohane mu msinji wa Yordane

(Marko 1.9-11; Luka 3.21-22)

13Sono wanguza Yesu ku Yordane kwaku Yohane kutuwa ku Galile kwachibatizika ndi iyo. 14Kweni Yohane wamkaniyanga, wakuti, “Ine ndikavuka kubatizika ndi imwe, ndipo kumbi imwe mutuza kwaku ine?” 15Kweni wakwamuka Yesu wangumunene, “Inya kuŵi viyo: chifukwa nkwakwenere ifwe kufiska urunji wose.” Sono wangumzomerezga. 16Ndipo wachibatizika Yesu wati wazuwuka mu maji, ruŵi, machanya ghangumjurikiya, ndipo wanguwona Mzimu waku Chiuta, usiku ulaka ndi nkhunda, ndi kubota paku iyo. 17Ndipo, wonani, liu linguvwika kutuwa kuchanya, lakuti, “Mweniyo ndi Mwana wangu, nkhwanjiwa, mwaku mweniyo ndikondwere.”

Currently Selected:

Mateyu 3: TongaMw

Highlight

Compare

Copy