Mateyu 4

Yesu wateseka mu bozwa

(Marko 1.12-13; Luka 4.1-13)

1Sono Yesu wangukwezgeke ku bozwa ndi Mzimu, kwacheseka ndi diabolo. 2Ndipo wati wafunga mazuŵa machumi ghanayi ndi mausiku machumi ghanayi, pavuli wanguvwa nja. 3Ndipo wakwesa yo wanguza wangunena nayo, “Asani we Mwana waku Chiuta, nene mya iyi kuti yiŵe viŵande.” 4Kweni iyo wakwamuka wanguti, “Kwalembeka,

‘Munthu kuti wakajanga ndi umoyo ndi chiŵande pe cha,

kweni ndi nenedu lose likutuwa mu mlomo waku Chiuta.’ ”

5Sono diabolo yo wangumtole ku msumba wakupaturika; ndipo wangumumika pachisongu cha kasopi,#4.5 kasopi: ndiku kuti tempele. 6ndipo wangunena nayo, “Asani we Mwana waku Chiuta, ujipong'e pasi: chifukwa kwalembeka,

‘Waŵalanguliyenge ŵangelo ŵake vyapaku iwe,’

ndipo ‘Pa manja ghawo ŵakunyamu wenge,

vinu kokuli ungagunyuwa pa mwa phazi lako.’ ”

7Yesu wanguti kwaku iyo, “Panyake so kwalembeka, ‘Ungesanga cha Ambuya Chiuta wako.’ ” 8Pavuli diabolo yo wangumtole ku phiri litali ukongwa, ndipo wangumrongo maufumu ghose gha pasi, ndi unkhankhu wawo, 9ndipo wangunena nayo, “Vyose ivi ndikupaskenge, asani uwenge pasi ndi kundilambiya.” 10Sono Yesu watiti kwaku iyo, “Tuwapo, Satana: chifukwa kwalembeka,

‘Mbuya Chiuta wako umlambiyenge,

ndipo iyo pe umtataliyenge.’ ”

11Sono diabolo yo wangumreka; ndipo, onani, ŵangelo ŵanguza ndi ŵamteŵetiyanga.

Yesu watamba nchitu yake mu Galile

(Marko 1.14-15; Luka 4.14-15)

12Kweni Yesu wanguti wavwa kuti Yohane wamangika, wanguruta ku Galile: 13ndipo pakusiya Nazarete, wanguza ndi kuja mu Kapernaumu wapa nyanja, mu mphaka zaku Zebuluni ndi Naftali; 14alinga kuti lifiskike nenedu laku Yesaya mchimi yo, wakuti,

15“Charu chaku Zebuluni ndi charu chaku Naftali,

nthowa ya nyanja, sirgha liya la Yordane,

Galile wa ŵamitundu yo.

16Khamu lakuja mu mdima

lawona kungweruka kukuru,

ndi kuŵakuja mu charu ndi mduzi wa nyifwa,

ukweru waŵaŵaliya.”

17Kutuwa pa nyengo yeniyiya Yesu wangwamba kutaula ndi kukamba, “Ng'anamukani; chifukwa waŵandika ufumu wa kuchanya.”

Yesu wadana ŵarovi ŵasomba ŵanayi

(Marko 1.16-20; Luka 5.1-11)

18Ndipo wachenda mumphepete mu nyanja ya Galile, wanguwona ŵabali ŵaŵi, Simoni wakuzumbulika Petro, ndi Andreya mhurwa wake, ŵakupong'a mikwau mu nyanja; pakuti ŵenga ŵarovi. 19Wanguti kwaku wo, “Rondoni ine, ndipo nkhakuchitaninga ŵarovi ŵa ŵanthu.” 20Ndipo iwo ŵakusiya mikwau, sosonukweni ŵangumurondo. 21Ndipo wakwendapo wanguwona ŵabali ŵanyake ŵaŵi, Yakobe mwana waku Zebediya, ndi Yohane mhurwa wake, mu ngaraŵa pamoza ndi Zebediya uskeu ŵatandanga mikwau yawo; ndipo wanguŵadana. 22Ndipo iwo sosonukweni ŵangusiya ngaraŵa yo ndi auskeu, ŵangumrondo.

Yesu wasambizga, wauza ndi wachizga

(Luka 6.17-19)

23Ndipo Yesu wazunguliyanga Galile yose, wakusambizga mu masinagoge ghawo, ndi wakumemeza evangeli wa ufumu wo, wakuchizga nthenda yose ndi unthomboru wose mukati mu ŵanthu. 24Ndipo thenthe lake linguwanda mu Siriya yose, ndipo ŵangumtole wose ŵakutama ŵakukoreka ndi nthenda zamitundumitundu ndi maurwirwi, ŵademone ndi ŵakufuntha ndi ŵavinjenje; ndipo wose wanguŵachizga. 25Ndipo yingumrondo mizinda yikuru kutuwa ku Galile ndi Dekapoli, Yerusalemu ndi Yuda ndi sirgha liyala Yordane.

Currently Selected:

Mateyu 4: TongaMw

Highlight

Compare

Copy