Marko 1

Kusambizga kwaku Yohane Mbatizi

(Mateyu 3.1-12; Luka 3.1-18; Yohane 1.19-28)

1Chiyambo cha evangeli waku Yesu Kristu, Mwana waku Chiuta. 2Uli ndimo kwalembeke mwaku Yesaya mchimi yo,

“Awona, ine ndituma thenga langu

paurongo pa chisku chako.

Lo likakongorenga nthowa yako;

3liu la wakukambura mu bozwa,

Rongosoni nthowa ya Ambuya

nyoroskani ŵagurwi wake.”

4Kunguŵa kuti Yohane wabatizanga mu bozwa lo, ndi wamemezanga ubatizo wa ching'anamuka cha ku chireke cha vilakwa. 5Ndipo ŵazanga kwaku iyo kutuliya charu chose cha Yuda, ndi wose ŵamu Yerusalemu: ŵabatizikanga ndi iyo mu msinji Yordane, ŵakusumuwa vilakwa vyawo. 6Kweni Yohane wavwaranga weya wa gamila, ndi likwamba la chikoŵe mu chiunu mwake, ndipo warghanga ŵazombe ndi uchi wa mumdondo. 7Ndipo wangumemeza, wakuti, “Watuza pavuli pangu wanthazi kwakuruska ine, nthambo za viyatu vyaku mweniyo kuti nditene ine cha kukotama ndi kufwatuwa. 8Ine ndikubatizani ndi maji; kweni iyo wamkubatizani ndi Mzimu Wakupaturika.”

Kubatizika kwaku Yesu ndi kweseka kwake mu mapopa

(Mateyu 3.13—4.11; Luka 3.21-22; 4.1-13)

9Ndipo kunguŵa mu mazuŵa ghenigho Yesu wangutuwa ku Nazarete waku Galile, wangubatizika ndi Yohane mu Yordane. 10Ndipo sosonukweni wati wazuwuka mu maji, wanguwona machanya kuparuka, ndi Mzimu ulaka ndi nkhunda kusikiya paku iyo, 11ndipo lingutuwa kuchanya liu, lakuti, “Iwe ndiwe Mwana wangu Wakwanjiwa, mwaku iwe ndikondwere.” 12Ndipo sosonukweni Mzimu ungumugumizgiya ku bozwa. 13Wengamo mu bozwa lo mazuŵa machumi ghanayi, wakweseka ndi Satana; ndipo wenga pamoza ndi vikoku; ndipo ŵangelo ŵamumiriyanga.

Yesu wadana ŵarovi ŵasomba ŵanayi

(Mateyu 4.12-22; Luka 4.14-15; 5.1-11)

14Kweni wati wakomboleka Yohane, Yesu wanguza mu Galile, wakumemezamemeza evangeli waku Chiuta, 15wakuti, “Nyengo yafiskika, ndipo waŵandika ufumu waku Chiuta: ng'anamukani ndi vwanani mu evangeli.” 16Ndipo wachenda mumphepete mu nyanja ya Galile, wanguwona Simoni ndi Andreya, mhurwa waku Simoni, wakupong'a mkwau mu nyanja yo; pakuti ŵenga ŵarovi. 17Ndipo Yesu wanguŵanene, “Rondoni ine, ndipo ndichitenge imwe ŵarovi ŵa ŵanthu.” 18Ndipo sosonukweni ŵangujowo mikwau, ndi ŵangumrondo. 19Ndipo wati warutiriyapo pamanavi, wanguwona Yakobe, mwana waku Zebediya, ndi Yohane, mhurwa wake, wo nawo mu ngaraŵa ŵatandanga mukwau. 20Ndipo sosonukweni wanguŵadana: ndipo ŵangumusiya uskeu Zebediya mu ngaraŵa, pamoza ndi ŵanchitu ŵamphotu ndipo ŵangumurondo.

Munthurumi yo wenga ndi mzimu wauyu

(Luka 4.31-37)

21Wangusere mu Kapernaumu; ndipo sosonukweni pa Sabata wangusere mu sinagoge, ndipo wasambizganga. 22Ndipo ŵarwitanga pa chisambizgu chake: pakuti wawasambizganga nge ngwakuŵa ndi mazaza, nge mbalembi#1.22 mbalembi: uku ndiko kuti ŵasambizgi ŵa marangu. wo cha. 23Ndipo mu sinagoge mwenga munthu wakuŵa ndi mzimu wawiyu; 24ndipo wangukambura, kuti, “Te ndi chine ndi iwe, Yesu waku Nazarete? Kumbi waziya kuzachitinanga? Nditukuziŵa mo uliri, Wakupaturika we, waku Chiuta.” 25Ndipo Yesu wanguwuchenya, wakuti, “Chetama, tuwamo mwake.” 26Ndipo Mzimu wo wawiyu wati wamziririska, ndi kuliya ndi mazu ghakuru ungutuwamo mwake. 27Ndipo wose ŵanguzizwa, viyo kuti ŵangufumbana mwaku ŵija, “Nchine chenichi? Nchisambizgu chifya! Ndi mtufu wayichenya chingana ndi mizimu yawiyu, ndipo yitumvwiya.” 28Ndipo sosonukweni thenthe lake lingutuliya kosekose mu charu chose chakuzunguliya Galile.

Yesu wachizga ŵanthu ŵanandi

(Mateyu 8.14-17; Luka 4.38-41)

29Wati watuwa mu sinagoge lo, wanguza mu nyumba yaku Simoni ndi Andreya, pamoza ndi Yakobe ndi Yohane. 30Ndipo mpongozi waku Simoni wangura wakutama ndi mu liŵavu. Ndipo ŵangumnene vya pakuiyo. 31Ndipo wanguza, wangumko janja, wangumuyuska; sono muliŵavu mungumtaya, ndipo waŵateŵetiyanga. 32Ndipo ku mazuro, pakusere kwa dazi, ŵangumtole wose ŵakuŵa ndi matenda ndi ŵa ŵademone. 33Ndipo muzi wose unguwunjikika pa khomu lo. 34Ndipo wanguchizga ŵanandi ŵakutama ndi matenda ghakupambanapambana, wangutuzga ŵademone ŵanandi ndipo kuti wanguzomerezga ŵademone wo kurongoro cha, pakuti ŵangumziŵa.

Yesu wasambizga mu Galile

(Luka 4.42-44)

35Ndipo ndi mlenji, kweche usiku, wanguyuka ndi kutuwa, wanguruta ku malo gha bozwa, warombanga kweniko. 36Ndipo ŵangumundondoloska mvuli Simoni ndi ŵapamoza nayo, ŵakumpenja. 37Penipo ŵangumusaniya ŵanguti, “We yose wakulembeni.” 38Ndipo watiti kwaku wo, “Tiyeni tiye ku mizi yakuthoŵezgana, mwakuti kweniko nako nditauleko; pakuti chenichi ndicho ndikuziya.” 39Ndipo wangusere mu masinagoge ghawo mu Galile yose, wakutaula ndi wakutuzga ŵademone.

Yesu wachizga munthu wamakhati

(Mateyu 8.1-4; Luka 5.12-16)

40Ndipo ŵangumziya ŵamakhate, ŵakumuŵeyere ndi ŵakumlambiya, ŵangunena nayo, “Asani mukhumba, mwe ŵanthazi kunditozga.” 41Ndipo ŵakufwiya lisungu, Yesu wangutambaruwa janja ndi wangumukwaska, ndipo wanguti, “Ndikhumba; utozgeke.” 42Ndipo sosonukweni makhate gho ghanguzirimitiya, ndipo wangutozgeka. 43Ndipo wanguti wamuchinyiya limu, wangumunene warutenge. 44Ndi watiti kwaku iyo, “Awona, unganeniyapo munthu cha: kweni kanga, kajirongo ku mzukuru, ndipo pa chifwa cha kutozgeka kwako kapereke vyo Mosese wangulangula, nge nchisimikizgu ku ŵanthu wo.” 45Kweni wachituwa iyo, wangwamba kumemeza ukongwa ndi kubuska makani gho, viyo Yesu kuti wanguziŵa so cha kusere pakweru mu muzi, kweni wajanga kubwaro mu malo gha bozwa: ndipo ŵanthu ŵamziyanga kutuwa kosekose.

Currently Selected:

Marko 1: TongaMw

Highlight

Compare

Copy