Zekariya 10
10
Malamulu ku ŵaYisraele
1Pemphani ku Ambuya vuwa mu nyengo ya vuwa yakumariya,
ku Ambuya wo akulenga mitambo ya vuwa,
wo apaska vuwa, ku ŵanthu wose,
kwaku yose vyakume mu munda wake.
2Pakuti ŵangoza ŵakamba vyawaka,
ndi ŵamawula ŵawona utesi;
ndi ŵakulota ŵakamba maloto gha utesi,
ndi kusangaruska ŵaka.
Chifukwa ichi ŵanthu ŵayinga-yinga ŵaka nge ndi mberere;
ŵasuzgika chifukwa ŵalivi muliska.
3“Ukari wangu ukole kumikana ndi ŵaliska
ndipo ndilangenge ŵarongozgi;
chifukwa Ambuya ŵa maŵanja aphwere mskambu wawo,
nyumba yaku Yuda,
ndi aŵasanduskenge nge ndi kavalo wawo wakurumbika mu nkhondo.
4Kutuwenge kwaku iwo mwa wa mungodya,
kwaku iwo mzumali wakukhome hema,
kwaku iwo uta wa nkhondo,
kwaku iwo fumu ye yose.
5Ndipo pamoza ŵakaŵanga nge vinkhara vya nkhondo,
ŵakukandirizgiya pasi ŵarwani ŵawo mu mawulambwe gha miseu;
ŵapotenge chifukwa Ambuya ŵe nawo.
Ndipo ŵakamaranga ŵakukwera pa kavalo.
6“Ndipo ndikhozgenge nyumba yaku Yuda,
ndi nditaskenge nyumba yaku Yosefe.
Ndizenge so nawo; chifukwa nde nawo ndi lisungu,
ndipo ŵakaŵanga nge ndengavi kuŵajowo;
chifukwa ine nde Ambuya Chiuta wawo ndipo ndiŵamukenge.
7Ndipo Efraimu waŵenge nge ndi ngwazi,
mitima yawo yikondwenge nge ŵamwa vinyo.
Ŵana ŵawo ŵawonenge ndi ŵakakondwanga,
mitima yawo yikondwenge mu Ambuya.
8“Ndiŵambiyenge khweru, ndi kuŵawunjika,
chifukwa ndaŵawombo;
ŵakaŵanga ŵanandi nge ndimo ŵanguŵiya kali.
9Chingana ndaŵambininiskiya mu ŵa mitundu,
ndipuuli mu vyaru vyakutali ŵandikumbukenge,
ŵajenge pamoza ndi ŵana ŵawo, ndi ŵakawenga.
10Ndizenge nawo ku muzi kutuwa ku charu cha Egipiti
ndi kuŵawunjika kutuwa ku Asiriya,
ndizenge nawo mu charu cha Gileada ndi Lebanoni,
mpaka malo ghaŵaŵiye ghamana.
11Ndipo ŵaporotenge mu nyanja ya charu cha Egipiti,#10.11 Mazu ghakuti Nyanja apa ghang'anamuwa visuzgu.
ndi mayigha gha nyanja ghamupumika
ndipo ndimba zose za msinji Nile ziphwenge.
Ndipo kujikuzga kwa Asiriya kusiskikiyenge pasi,
ndipo ndodo ya ukaronga waku Egipiti yituwengeko.
12Ndipo ndiŵakhozgenge mu Ambuya
ndipo ŵakakankhuskikanga mu zina lake,”
atiti Ambuya.
Currently Selected:
Zekariya 10: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi