Zekariya 9
9
Kulangika kwa ŵamitundu yinyake
1Mazu gha Ambuya ghakumikana ndi charu cha Hadrake ndipo ghakajanga ndi Damasko, chifukwa ku Ambuya kwe misumba yaku Aramu, nge ndi mitundu yose yaku Yisraele;
2ndi Hamati nayo, yo wapakana nayo mphaka;
Turo ndi Sidoni, chingana mbavinjeru ukongwa.
3Turo wajizenge linga,
ndi kuwunjika siliva nge ndi fuvu,
ndi golide nge ndi dongo mu miseu.
4Kweni Ambuya amurondenge vyake vyose,
ndi kutaya usambasi wake mu nyanja
ndipo wakapirizgikanga ndi moto.
5Ashikeloni wakauwonanga ndipo wopenge;
Gaza nayo so wambwambwanthenge ukongwa;
ndi Ekroni viyo chifukwa chigomekezgu chake chatondeka.
Karonga wamarenge mu Gaza;
Ashikeloni wajenge wambura ŵakujamo;
6ŵana ŵamdondo ŵajenge mu Ashadodi;
ndipo ndimarenge kujikuzga kwa ŵaFilisti.
7Ndituzgenge ndopa zake mu mlomo wake,
ndi ukazuzi wake pakati pa minyu ghake;
ndipo nayo waŵenge wakujako waku Chiuta widu;
ndipo waŵenge nge ndi fuku mwaku Yuda;
ndi Ekroni waŵenge nge ndi ŵaYebusi.
8Viyo ndizengenge msasa ndi kuja pa nyumba yangu nge ndi mlonda,
kuti munthu wareke kwenda uku ndi uku;
ndipo kuwulevi wakuŵasuzga, kuŵapofya,
chifukwa sono ndiwona ndi maso ghangu.
Karonga wa chimangu
9Sekereni ukongwa, mwa ŵanthu ŵaku Zioni!
Kamburani ukongwa, mwa ŵanthu ŵaku Yerusalemu!
Wonani, karonga wino watuza kwinu, ndi murunji wendi utaski,
ngwakuzika, wakwera pa mbunda, pa mwana wa mbunda yinthukazi.
10Ndidumuwenge gareta lakutuwa kwaku Efraimu
ndi kavalo wankhondo wakutuwa ku Yerusalemu;
uta wankhondo nawo udumulikenge; ndipo wakambenge chimangu ku ŵa mitundu.
Ukaronga wake wambenge kutuwa ku nyanja kwachifika ku nyanja,
kutuwa ku Msinji kwachifika ku vigoti vya charu.
Wakataskanga ŵanthu ŵake
11Kweni iwe nawe, chifukwa cha ndopa za phanganu langu ndi iwe,
ndituzgenge wamagoŵa wako mu mbuna yambura maji.
12Wereni ku linga linu, imwe ŵamagoŵa ŵachigomekezgu,
msana wale ndinena kuti ndimuwezgiyeninge kaŵi.
13Chifukwa ndamupinda Yuda, nge ndi uta wangu,
Efraimu ndamuchita muvwi wake.
Ndiyuskenge ŵana ŵako, Zioni,
kukulimbana ndi ŵana ŵako, iwe Girisi,
ndikukuchita iwe nge ndi lipanga la ngwazi.
14Viyo Ambuya awonekenge pachanya pawo,
ndipo muvwi wawo utewenge nge ndi limphezi;
ndipo Ambuya Chiuta wambenge mbata
ndi kwenda mu ŵakavuruvuru ŵaku mwera.
15Ambuya ŵa maŵanja aŵavikiriyenge;
ndipo amarenge ndi kukandirizgiya pasi wo ŵapong'a mya;
ndipo ŵamwenge ndopa zawo nge ndi vinyo,
ndipo ŵazazikenge nge ndi mbali fwa,
ŵangotenge nge ndi ngodya za jochero la sembe.
16Ndipo mu zuŵa lo, Ambuya Chiuta wawo waŵataskenge
chifukwa ndi mskambu wa ŵanthu ŵake;
nge ndi mya yakuzirwa ya
mphumphu wakang'animanga mu charu chake.
17Ehe, ngukuru umampha wake, ndi kutowa kwake nkhwakuruska limu!
Vyakurgha vikondweskenge ŵanyamata
ndi vinyo mufya ŵamwali.
Currently Selected:
Zekariya 9: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi