Zekariya 8
8
Vitumbiko viziŵiskika ndi Ambuya
1Ndipo mazu gha Ambuya ŵa maŵanja ghanguza so kwaku ine, kuti, 2“Viyo atiti Ambuya ŵa maŵanja: Nde ndi sanje chifukwa chaku Zioni, sanje yikuru, ndipo nde ndi sanje chifukwa chaku iyo ndi kutundiya kukuru. 3Viyo atiti Ambuya: Ndawere ku Zioni ndipo ndijenge mukati mu Yerusalemu, ndipo Yerusalemu wakadanikanga msumba wamagomekezgeka, phiri la Ambuya ŵa maŵanja, phiri lakupaturika. 4Viyo ndimo anene Ambuya ŵa maŵanja; Madoda ndi nchembere ŵakajanga so mu ŵagurwi ŵaku Yerusalemu, yose ndi ndodo yake mu janja lake chifukwa cha ukhongwe. 5Ndi miseu ya msumba yizazenge ŵahurwa ndi ŵasungwana kusoŵe mwenimo. 6Viyo ndimo anene Ambuya ŵa maŵanja: Asani kuŵenge kwakuziziswa mu maso gha ŵakujako ŵamtundu uwu mu mazuŵa yagha, kumbi kuŵenge kwakuziziswa mu maso ghangu atiti Ambuya ŵa maŵanja? 7Viyo ndimo anene Ambuya ŵa maŵanja: Nadi, nditaskenge ŵanthu ŵangu ku charu chakuvuma ndi ku charu chaku zambwe; 8ndizenge nawo ndipo ŵajenge mukati mu Yerusalemu; ŵaŵenge ŵanthu ŵangu, Ine ndiŵenge Chiuta wawo, mu uneneska ndi mu urunji.”
9Viyo ndimo anene Ambuya ŵa maŵanja; “Manja ghinu ghakhome, imwe mu mazuŵa yagha mwavwa mazu mu mlomo wa ŵamchimi, kutuwa ku zuŵa lo chiŵanja cha nyumba ya Ambuya ŵa maŵanja chinguzengeke; kuti kasopi wazengeke. 10Chifukwa ghandafike mazuŵa gha kwengavi mphoto ku munthu pamwenga mphoto yose ku chakuŵeta, pamwenga wakutaskika ku murwani kwaku yo wangutuwa pamwenga wangusere; chifukwa ndinguŵika munthu yose kulimbana ndi mwanase wake. 11Kweni sono kuti ndiŵachitiyenge ŵakujako ŵa ŵanthu cha nge ndi mu mazuŵa ghakudanga, atiti Ambuya ŵa maŵanja. 12Pakuti kuŵenge kumija kwa chimangu; mphereska yipasenge vipasi vyake, ndipo nyata yiperekenge kwandana kwake, machanya nagho ghakaperekanga dungwi lake; ndipo nkhachitanga kuti ŵakujako ŵa ŵanthu yaŵa, ŵaŵe ndi vyose ivi. 13Ndipo kuŵenge kuti, nge ndimo munguwiya thembo mukati mu mitundu, iwe nyumba yaku Yuda ndi nyumba yaku Yisraele, viyo ndimo ndimtaskiyeninge ndipo muŵenge ŵakutumbikika. Mungopanga, kweni manja ghinu ghakhome.”
14Chifukwa viyo atiti Ambuya ŵa maŵanja: “Nge ndimo ndingughanaghaniya kuchita chiheni kwaku imwe po auskemwe ŵangundisosomole ku ukari; ndipo kuti ndingugowoka cha, atiti Ambuya ŵa maŵanja, 15viyo so ndaghanaghana mu mazuŵa yagha kuchitiya umampha Yerusalemu ndi nyumba yaku Yuda; mungopanga; 16vinthu vyo muchitenge ndi ivi: Kambani uneneska munthu yose ku munyake, chitani mu malikomo ghinu vyeruzgu vya uneneska ndi vyakupanga chimangu, 17rekani kughanaghaniyana uheni yumoza ndi munyake mu mtima winu, munganjanga kurapa utesi, chifukwa vinthu ivi vyose nditinkha, atiti Ambuya.”
18Ndipo mazu gha Ambuya ŵa maŵanja ghanguza kwangu, ghakuti, 19“Viyo atiti Ambuya ŵa maŵanja: Kufunga kwa mwezi wachinayi, ndi kufunga kwa wachinkhonde, ndi kufunga kwa wa chinkhonde ndi chiŵi, ndi kufunga kwa wa chumi, kukaŵanga ku nyumba yaku Yuda mu nyengo za likondwa ndi chimwemwe, ndi madghera ghakusangaruska; viyo mwanje uneneska ndi chimangu.
20“Viyo atiti Ambuya ŵa maŵanja: Kukaŵanga so kuti ŵanthu ŵazenge, ŵanthu ŵamu misumba yinandi. 21Ŵanthu ŵamu msumba umoza ŵarutenge ku msumba unyake, ndi kuti, ‘Tiyeni tendeske tikapemphe wezi wa Ambuya, ndi kupenja Ambuya ŵa maŵanja; ine nane so ndiruta.’ 22Ŵanthu ŵanandi ndi mitundu yanthazi yikazanga, kupenja Ambuya ŵa maŵanja mu Yerusalemu ndi kupempha wezi wa Ambuya. 23Viyo atiti Ambuya ŵa maŵanja: Mu mazuŵa gho, ŵanthu ŵakutuwa ku mitundu ya karongoroledu kose ŵakonge saru ya muYuda, ndi kuti, ‘Utizomerezge tirutenge, nawe, chifukwa tavwa kuti Chiuta we ndi iwe.’ ”
Currently Selected:
Zekariya 8: TongaMw
Highlight
Share
Compare
Copy
Want to have your highlights saved across all your devices? Sign up or sign in
Bible Society of Malawi