Zekariya 4
4
Chiwona cha chikoleru-nyali
1Ndipo mungelo wa Ambuya yo wakambanga nane wanguza so, wangundiyuska, nge ndi munthu yo wayuskika mutulo twake. 2Ndipo wanguti kwangu, “Kumbi uwona chine?” Ndinguti, “Ndiwona ehe, chikoleru-nyali cha golide chose, ndi mbali pachanya pake ndi nyali zinkhonde ndi ziŵi paku cho, ndi milomo yinkhonde ndi yiŵi pachanya paku zose. 3Ndipo pe miti ya maolivi penipo, umoza kuchili ku marghe gha mbali, ndi unyake ku maze.” 4Ndipo ndinguti ku mungelo yo wakambanga nane, “Kumbi ivi vine, mbuyangu?” 5Ndipo mungelo yo wakambanga nane wangwamuka wanguti, “Kumbi uziŵa cha kuti ivi vyakuti viyo?” Ndinguti “Awa, mbuyangu.” 6Viyo wangunena nane, “Yagha ndi mazu gha Ambuya kwaku Zerubabele; ndi nkhondo cha, pamwenga ndi nthazi cha, kweni ndi Mzimu wangu, atiti Ambuya ŵa maŵanja. 7Ndiwe yani, iwe phiri likuru? Panthazi paku Zerubabele usandukenge chidika; wazenge nawo mwa wapachanya mu kudanirizga, ‘Chimangu, chimangu kwaku wo!’ ” 8Ndipo kunguŵa kuti mazu gha Ambuya ghanguza so kwangu, ghakuti, 9“Manja ghaku Zerubabele ghazenga chiŵanja cha nyumba iyi; manja ghake ndigho ghamumatizga so.” Ndipo uziŵenge kuti Ambuya ŵa maŵanja andituma kwaku imwe. 10Chifukwa yose yo wanguyeya zuŵa la tunthu tumana wakasekeriyanga, ndipo wawonenge chingwi chakupimiya cha muzengi mu janja laku Zerubabele.
“Yagha ghankhonde ndi ghaŵi ndi maso gha Ambuya gho ghalereska mu charu chose chapasi.” 11Viyo ndinguti kwaku iyo, “Kumbi miti iyi yiŵi ya maolivi nchine, kuchiri ku marghe ndi ku maze kuchikoleru nyali?” 12Kachiŵi ndinguti so kwake, “Kumbi mphanda zo ziŵi za miti ya maolivi nchine zo ze pafupi ndi vyakupunguliya vya golide vyo mafuta ghatuwamo?” 13Iyo wanguti, kwaku ine, “Kumbi uziŵa cha kuti ivi ndi vyakuti viyo?” Ndinguti, “Awa, Ambuya.” 14Ndipo wanguti, “Yaŵa mbakupakika ŵaŵi wo ŵatuma pafupi ndi Ambuya ŵa charu chose chapasi.”
Currently Selected:
Zekariya 4: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
