Zekariya 6
6
Chiwona cha magareta ghanayi
1Ndinguyunuska so maso ghangu, ndipo ndinguwona, ehe kungutuwa magareta ghanayi pakati pa mapiri ghaŵi; ndipo ghenga mapiri gha mkuŵa. 2Ku gareta lakudanga kwenga ŵakavalo ŵayera, lachiŵi ŵakavalo ŵafipa, 3lachitatu ŵakavalo ŵatuŵa, lachinayi ŵakavalo ŵakuŵaraŵata. 4Penipo ndinguti ku mungelo yo wakambanga nane, “Kumbi ivi ndi vine, mbuyangu?” 5Ndipo mungelo wangwamuka wanguti, “Ivi viruta ku mphepo zinayi za machanya, vinguti vyajirongo pa maso gha Ambuya ŵa charu chose chapasi. 6Gareta ndi ŵakavalo ŵafipa liruta ku charu chaku nkhonde, ŵatuŵa ŵaruta ku charu chaku zambwe, ŵakuŵaraŵata ku charu chaku mwera.”
7Ŵanguti ŵatuwa ŵakavalo, ŵenga pa ruŵi kuruta mwakuti ŵende uku ndi uku mu charu. Ndipo wanguti, “Rutani, mwe nde uku ndi uku mu charu.” Viyo ŵangwenda uku ndi uku mu charu. 8Ndipo wangudanirizga kwangu wanguti, “Nadi, wo ŵaruta ku charu chaku nkhonde ŵapumuzga Mzimu wangu mu charu chaku nkhonde.”
Langulu kumika Yoswa nge ndi mrongozgi
9Ndipo mazu gha Ambuya ghanguza kwangu kuti, 10“Toko ŵaŵanda Heldai, Tobiya, ndi Yedaya, wo ŵaza kutuwa ku Babiloni ndi murute zuŵa lenilo ku nyumba yaku Yosiya mwana waku Zefaniya. 11Utoko kwaku iwo siliva ndi golide, uchite mphumphu ndi uyiŵike pa mutu waku Yoswa, mwana waku Yehozadaki, mzukuru mura; 12ukambe nayo kuti, ‘Viyo atiti Ambuya ŵa maŵanja, “Wona, munthu yo zina lake ndi Mphanda; chifukwa wakakuwanga mu malo ghake, ndipo wakazenganga kasopi wa Ambuya. 13Ndiyo wakazenganga kasopi wa Ambuya, wakaŵanga ndi chitumbiku cha ufumu, ndipo wajenge ndi kuwusa pa chitengo chake cha ufumu. Ndipo pakaŵanga mzukuru pafupi ndi chitengo cha ufumu wake, ndipo chimangu, ndi chinjeru vikaŵanga pakati paku wose ŵaŵi.” ’ 14Mphumphu yijenge mu nyumba ya Ambuya nge nchikumbusko kwaku Heldai, Tobiya, Yedaya, ndi Yosiya mwana waku Zefaniya.
15“Wo ŵe kutali ŵakazanga ndi kovya kuzenga nyumba ya Ambuya; ndipo mukaziŵanga kuti Ambuya ŵa maŵanja andituma kwaku imwe. Ndipo ichi chichitikenge nadi, asani mukavwiyanga ndi phamphu mazu gha Ambuya Chiuta winu.”
Currently Selected:
Zekariya 6: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi