Zefaniya 2
2
1Zaninga pamoza, ndi unganani,
imwe mtundu wambura soni,
2mwenga mundadikiskike nge ndi mwere wakuputa,
wenga undamuziyeni ukari wa Ambuya,
lenga lindakuziyeni zuŵa la ukari wa Ambuya.
3Penjani Ambuya, mose mwa ŵakuzika ŵamu charu,
imwe mwachita malangulu ghake;
penjani urunji, penjani kuzika;
pamwenga mungabisika mu zuŵa la ukari wa Ambuya.
Kuparghanika kwa mitundu yakuzunguriya Yisraele
4Chifukwa Gaza wasandukenge mahame,
ndi Ashikeloni wakapasukanga.
Ŵanthu ŵaku Ashidodi ŵakatuzgikanga ndi msana,
ndi Ekroni wasapulikenge.
5Soka kwaku imwe mwakuja
mumphepete mu nyanja, imwe mtundu wa Kerete!
Mazu gha Ambuya ghamikana nawe,
iwe Kanani, charu cha ŵaFilisti,
ndikuparghang'enge mpaka penipo mulive nanga njumoza wakujamo.
6Ndipo imwe vyaru vya mumphepete mu nyanja, muŵenge mauliska;
madambo gha ŵaliska ndi makhola gha mberere.
7ŴaYuda ŵakujako ŵaŵenge
ndi charu cha mumphepete mu nyanja,
kweniko ŵaliskenge vyakuŵeta vyawo,
ndipo mu nyumba za Ashikeloni ŵagonenge ndi mazulo.
Chifukwa Ambuya Chiuta wawo waŵakumbukenge,
ndi kuwezga umampha wawo.
8“Ndavwa kulenga kwaku Moabu
ndi kutuka kwa Amoni,
mo walenge ŵanthu ŵangu,
ndi kujikuzga ku mphaka zawo.
9Chifukwa ichi mo ndilili wamoyo,”
atiti Ambuya ŵa maŵanja,
Chiuta waku Yisraele,
“Moabu waŵenge nge ndi Sodomo,
ndi ŵana ŵaku Amoni nge ndi Gomora,
charu cha ukasi ndi mazenje gha mche
ndi chipululu cha muyaya.
Ŵakujako ŵa ŵanthu ŵangu ŵaŵaskoŵenge,
ndi ŵakujako ŵa mtundu wangu ŵaŵaŵetenge.”
10Ichi ŵaŵenge nacho mu malo ghakujikuzga kwawo,
chifukwa ŵadumbizganga ndi kujitumbwiya
pa ŵanthu ŵa Ambuya ŵa maŵanja.
11Ambuya aŵenge akofya kwaku iwo;
awondeskenge ŵachiuta wose panu pasi,
ndipo kwaku iyo ŵangwadiyenge ŵanthu ŵa mitundu yose
mu charu chawo ndi chawo.
12Imwe namwe ŵaEtiopia,
mubayikenge ndi lipanga langu.
13Wanyoroskiyenge janja lake ku nkhonde,
ndi kuparghang'a Asiriya;
ndipo wachitsenge Nineve kuŵa chipululu ndi chiparantha nge ndi bozwa.
14Ndipo vyakuŵeta vigonenge pasi mukati mwake,
vinyama vyose vyamu dondo, nthipita,
ndi kataŵa vijenge pachanya pa nchindamila zawo;
phururu wambenge pa dangazi,
chahole pakuserere;
chifukwa milanji yake yakusema yiwiskikenge kubwalo.
15Uwu ndi msumba wakujikuzga wo wafwasanga,
wo unguti mu mtima wake,
“Ine ndiliko, ndipo kulivi munyake pade paku ine.”
Nako nkhupasuka uku wapasuka, mphanji ya vikoko!
Yose yo wadumuwapo
wajuma ndi kupukung'a mutu wake.
Currently Selected:
Zefaniya 2: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi