Zefaniya 3
3
Ulakwi wa Yerusalemu ndi kutaskika kwake
1Soka ku mugaruki, wakukazuzgika,
muzi wakusuzga!
2Kuti uvwiya mazu cha,
ukana kususkika.
Ugomezga mwa Ambuya cha,
kuti undere kwaku Chiuta wake cha.
3Nduna zake mukati mwake
ze nge ndi nkharamu yakukoroma;
ŵeruzgi ŵake ndi mphumphi za mazulo
zo kuti zisiya kanthu cha mpaka ndi mlenji.
4Ŵamchimi ŵake mbanthu ŵakupusika;
ŵambura magomekezgeka;
ŵazukuru ŵake ŵafipiska malo ghatuŵa,
ŵabendezga dangu.
5Ambuya mukati mwawo mbarunji, kuti achita kaheni cha;
mlenji wose arongo cheruzgu chawo,
pa matandakucha ghe ghose kuti atondeka cha.
Kweni ŵambura urunji ŵalivi soni.
6“Ndananga mitundu ya ŵanthu;
malinga ghawo ghapasuka.
Ndaparghang'a miseu yawo,
viyo palivi yumoza watendamo;
misumba yawo yapasuka,
mulivi munthu, mulivi wakujamo.
7Ndinguti nadi, ‘Wakandiwopanga, wakalondiyanga visambizgu,
kuti wakaruwanga cha vyose vyo ndamulanguliya.
Kweni kwakuruska ukhumbiska kuvundiska milimu yawo.’
8“Viyo ndilindizgeni,” atiti Ambuya,
“mpaka zuŵa lo nkhaŵiyanga nge ndi kaboni.
Chifukwa ndaŵika mtima wangu pakuwungang'a mitundu ya ŵanthu,
kuwunjika ŵakaronga,
kuti ndipunguliye pawo kundundu kangu,
chifundizi chose cha ukari wangu;
chifukwa mu moto wa kandundu kangu ka
sanji charu chose chazamukufya.
9“Pa nyengo yo nding'anamuwenge karongororedu ka ŵanthu kuŵa kamampha,
mwakuti wose ŵadanenge pa zina la Ambuya ndi kumuteŵete iyo ndi mtima umoza.
10Kutuwa ku sirgha kwa misinji yaku
Etiopia ŵasopi ŵangu, ŵakundipenja ŵangu ŵa
ŵakuparghanika ŵangu ŵazenge ndi mpasku kwangu.
11“Mu zuŵa lo kuti ulengeskekenge cha,
chifukwa cha nchitu zako zakundigarukiya,
chifukwa penipo ndituzgengeko mukati mwako,
ŵeniwo ŵakondwa ndi kujikuzga kwako,
kuti ŵajithamiyenge so cha mu phiri langu lakupaturika.
12Chifukwa ndisiyenge mukati mwako
ŵanthu ŵakuzika ndi ŵakujiyuyuwa.
Ŵakapenjanga chiphokwelu mu Ambuya.
13Ŵakujako mu Yisraele;
kuti ŵachitenge kanthu kaheni cha,
pamwenga kukamba utesi,
chingana ndi mu mlomo mwawo kuti lisanirikengemo lilime la utesi cha.
Chifukwa ŵarghenge ndi kugona pasi,
ndipo pakaŵangavi wakuŵawofya.”
14Mbani ukongwa imwe, mwa ŵanthu ŵaku Zioni;
kamburani mwa ŵaYisraele!
Kondwani ndi sekereni ndi mtima wose,
imwe mwa ŵanthu ŵaku Yerusalemu!
15Ambuya atuzgako vyeruzgu
vyakumikana nawe; apong'a kubwalo ŵarwani wako.
Karonga waku Yisraele, Ambuya, ŵe mukati mwako; kuti,
uwopenge kaheni so cha.
16Mu zuŵa lo kukambikenge ku Yerusalemu kuti,
“Ungopanga, iwe Zioni;
manja ghako ghareke kulopwa.
17Ambuya Chiuta wako, we mukati
mwako, wanthazi yo wapaska upundi.
Wakondwenge paku iwo ndi chimwemwe,
wakusanduskenge mufya mu chanju chake.
18Wakondwenge ndi iwe ndi kumba,
nge mpha zuŵa la dghera.”
“Ndituzgengeko phasulu kwako,
mwakuti ureke kupinga lilengu chifukwa chake.
19Pa nyengo yo ndimarizgenge wose wo ŵatikusuzga.
Nditaskenge ŵakuganthiya,
ndi kuwunjika ŵakudikiskika,
ndipo nding'anamuwenge soni zawo kuŵa marumbu
ndi mbiri mu charu chose chapasi.
20Pa nyengo yo ndikuwezgiyenge kwako,
mu nyengo yo ndikuwunjikenge pamoza.
Inya ndikuchitenge kuŵa wambiri,
ndi wamarumbika mukati mu ŵanthu wose ŵa panu pasi,
po ndiwezgiyenge umampha wako paurongo pako,”
atiti Ambuya.
Currently Selected:
Zefaniya 3: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi