Markus 9

1Yesus bilang lagi pa dorang, “Dengar bae-bae yang Kita bilang pa ngoni. Dari antara ngoni yang ada di sini, ada yang tara akan mati sebelum dorang lia Tuhan Allah Berkuasa sebagai Raja deng Dia pe kuasa yang basar.”

Yesus bacahaya luar biasa di atas gunung

(Mat. 17:1-13; Luk. 9:28-36)

2 # 2Ptr. 1:17-18 Pe lewat anam hari, Yesus bawa pa Petrus, Yakobus, deng Yohanes, dorang sama-sama nae di gunung satu yang tinggi. Di situ tarada orang laeng. Kong dorang lia Yesus pe rupa so beruba jadi laeng. 3Dia pe baju jadi puti mangkilat. Di dunia ini tarada satu orang yang bisa biking pakeang yang puti bersi sama deng itu. 4Kage-kage, dorang dapa lia nabi Elia deng nabi Musa ada bacarita deng Yesus.

5Pe lia itu, Petrus bilang pa Yesus, “Guru, torang sanang skali ada di sini! Jadi lebe bae torang tiga kase badiri tenda kacil tiga: satu untuk Guru, satu untuk nabi Musa, deng satu lagi untuk nabi Elia.” 6Petrus bilang bagitu, karna dia so tara tau mo bilang apa. Barang, dorang tiga tako skali.

7 # Mat. 3:17; Mrk. 1:11; Luk. 3:22; 2Ptr. 1:17-18 Turus, awan turung tutu pa dorang. Kong, dorang dengar dari dalam awan itu ada suara yang bilang bagini, “Ini Kita pe Anak yang Kita sayang. Dengar suda pa Dia!”

8Kage-kage, waktu dorang balia kasana-kamari, so tara lia orang laeng lagi di situ deng dorang, cuma tinggal Yesus sandiri saja.

9Turus, waktu dorang sementara turung dari gunung itu, Yesus pasáng pa dorang bagini, “Jang dulu ngoni kase carita pa sapa-sapa, apa yang ngoni so lia tadi e. Nanti kalu Anak Manusia yang dari sorga so mati kong so hidup ulang, baru ngoni bole kase carita.” 10Jadi dorang tara kase carita pa sapa-sapa, tapi waktu dong tiga sandiri, dorang baku tanya apa yang Yesus pe maksut “mati kong hidup ulang.”

11 # Mal. 4:5; Mat. 11:14 Turus dorang tanya pa Yesus bagini, “Bikiapa kong guru-guru agama yang ahli lima kitab Musa bilang, nabi Elia musti datang lebe kamuka dari Mesias, Raja yang Tuhan Allah janji mo kase slamat pa manusia?”

12Yesus bilang pa dorang bagini, “Memang, nabi Elia itu akan datang kamuka supaya kase siap samua-samua. Tapi ada lagi tatulis, to? Anak Manusia yang dari sorga akan banya menderita deng akan dapa tolak. 13Tapi dengar bae-bae yang Kita bilang ini, orang yang sama deng nabi Elia#9:13: Yang Yesus bilang, orang yang sama deng nabi Elia, itu Dia pe maksut Yohanes Pembaptis. itu so datang, kong orang-orang biking siksa pa dia iko dorang pe mau, sama deng yang so tatulis di Kitab Suci tentang dia.”

Yesus user setang dari ana laki-laki satu

(Mat. 17:14-21; Luk. 9:37-43)

14Waktu Yesus, Petrus, Yakobus deng Yohanes bale pa murit-murit yang laeng, dorang lia banya orang bakumpul pa murit-murit itu. Guru-guru agama Yahudi yang ahli lima kitab Musa ada baku malawang deng murit-murit itu. 15Bagitu orang banya dapa lia pa Yesus, dorang kage kong ka sana capat-capat pa Dia.

16Yesus tanya pa dorang bagini, “Ngoni baku malawang apa deng guru-guru agama Yahudi yang ahli lima kitab Musa?”

17Ada satu dari orang banya itu bilang, “Guru, tadi kita ada bawa kita pe ana laki-laki pa Guru, barang setang ada maso pa dia kong dia jadi mou. 18Tiap kali setang maso pa dia, setang itu banting pa dia di tana, sampe dia pe gabu-gabu me kaluar dari mulu, deng dia pe gigi bababunyi, kong dia pe badan takancing. Kita so minta tolong pa Guru pe murit-murit supaya user setang itu dari kita pe ana, tapi dorang tara mampo.”

19Kong Yesus bilang pa dorang bagini, “Bukang maeng ngoni orang-orang skarang ini yang tara percaya! Barapa lama lagi Kita musti sama-sama deng ngoni? Deng sampe barapa lama lagi Kita musti basabar deng ngoni? Bawa suda ana itu kamari!”

20Turus dorang bawa ana itu pa Yesus. Bagitu setang itu lia pa Yesus, setang itu langsung goyang pa ana itu sampe tabanting di tana kong tataguling. Deng dia pe gabu-gabu me kaluar dari mulu.

21Turus Yesus tanya pa ana itu pe papa, “So barapa lama dia jadi bagini?”

Ana itu pe papa jawab, “Dia jadi bagini dari kacil. 22Baru setang itu me, laeng kali jaga bawa pa dia dalam api, laeng kali di dalam aer, mo kase mati pa dia. Jadi kalu Guru dapa kase sembu, tolong, deng kasiang pa torang.”

23Tapi Yesus bilang bagini, “Jang ngana bilang ‘kalu Kita dapa kase sembu!’ Samua bisa jadi kalu orang percaya pa Kita!”

24Turus ana itu pe papa langsung bilang kuat-kuat bagini, “Tuhan, kita percaya, tapi masi kurang. Jadi tolong pa kita la kita lebe percaya lagi.”

25Yesus lia orang banya so mulai datang bakumpul pa Dia di situ, jadi Dia parenta deng karas pa setang yang ada maso pa ana itu bagini, “Woe setang yang biking orang jadi mou deng pongo. Ngana kaluar dari ana ini deng jang maso lagi pa dia!”

26Turus setang itu kaluar iko bataria deng goyang-goyang pa ana itu. Waktu setang itu kaluar, ana itu so tara bagará lagi, sama deng orang mati, kong orang banya yang ada di situ bilang bagini, “Ya, dia so mati!” 27Tapi Yesus pegang ana itu pe tangan deng kase bangun pa dia, kong ana itu bangun langsung badiri.

28Abis itu, Yesus deng Dia pe murit-murit maso di ruma. Waktu Yesus deng Dia pe murit-murit sandiri di situ, Dia pe murit-murit tanya pa Dia, “Bikiapa kong torang tara bisa user setang itu, e?”

29Yesus bilang pa dorang, “Setang macam itu bisa kaluar cuma deng berdoa.”

Yesus kase tau yang kedua kali, Dia akan mati

(Mat. 17:22-23; Luk. 9:43-45)

30Yesus deng Dia pe murit-murit pigi dari situ kong kase turus dorang pe perjalanan iko di daera Galilea. Yesus tara mau orang laeng tau Dia ada di situ, 31karna Dia ada mangajar pa Dia pe murit-murit. Dia bilang pa Dia pe murit-murit bagini, “Nanti Anak Manusia yang dari sorga mo dapa serakan pa orang-orang, kong mo dapa bunu, tapi mo hidup ulang di hari ketiga.” 32Yesus pe murit-murit tara mangarti apa yang Yesus bilang itu, tapi dorang tara barani tanya pa Dia.

Sapa yang paling hebat

(Mat. 18:1-5; Luk. 9:46-48)

33Yesus deng Dia pe murit-murit sampe di kota Kapernaum. Waktu dorang sampe di ruma, Yesus tanya pa dorang, “Tadi waktu masi di tenga jalang, ngoni bacarita apa?” 34#Luk. 22:24 Dorang samua badiam, karna di tenga jalang dorang ada baku malawang sapa yang jadi orang yang paling hebat dari dorang samua.

35 # Mat. 20:26-27, 23:11; Mrk. 10:43-44; Luk. 22:26 Yesus dudu kong pangge pa Dia pe dua blas murit itu, turus Dia bilang bagini, “Sapa yang suka mo jadi orang yang paling hebat pa Tuhan Allah pe muka, dia musti jadi sama deng orang yang paling tara penting di dunia ini, kong dia lagi musti jadi sama deng orang yang biasa-biasa saja yang layani pa samua orang.”

36Turus Yesus ambe ana kacil satu kong kase badiri ana itu pa dorang pe tenga-tenga. Yesus polo ana itu, deng Dia bilang pa dorang bagini, 37#Mat. 10:40; Luk. 10:16; Yoh. 13:20 “Sapa yang tarima pa orang biasa-biasa saja sama deng ana kacil ini karna orang itu percaya pa Kita, itu sama deng dia so tarima pa Kita. Deng bukang cuma tarima pa Kita, tapi dia me so tarima pa Tuhan Allah yang utus pa Kita.”

Sapa yang tara malawang pa torang, dia itu torang pe tamang

(Luk. 9:49-50)

38Yohanes kase tau pa Yesus bagini, “Guru, torang lia ada satu orang user setang pake Guru pe nama. Turus torang larang pa dia, barang dia itu bukang torang pe tamang.”

39Tapi Yesus bilang pa dorang bagini, “Jang ngoni larang pa dia! Barang, sapa yang biking mujizat pake Kita pe nama, tara mungkin dia mo bale langsung biking busu Kita pe nama. 40#Mat. 12:30; Luk. 11:23 Sapa yang tara malawang pa torang, dia itu torang pe tamang. 41#Mat. 10:42 Jadi ngoni inga bae-bae: sapa yang bantu pa ngoni karna ngoni iko pa Kristus, biar dia cuma kase ngoni aer satu galas saja, orang yang bantu itu pasti dapa upah dari Tuhan.”

Jang biking sampe orang jadi berdosa

(Mat. 18:6-9; Luk. 17:1-2)

42Yesus bilang lagi pa dorang bagini, “Kalu ada orang yang biking sampe orang biasa-biasa sama deng ana kacil ini jadi tara percaya pa Kita lagi, lebe bae ika orang itu pe leher deng gantong batu basar satu pa dia, kong buang pa dia di dalam laut. 43#Mat. 5:30 Kalu ngoni pe tangan sabla biking sampe ngoni jadi berdosa, potong suda ngoni pe tangan itu! Karna lebe bae ngoni maso sorga cuma deng tangan sabla, daripada ngoni pe dua tangan lengkap tapi ngoni maso di neraka, dalam api yang tara perna mati. 44[Di neraka, gai tara mati. Deng dia pe api me tara mati-mati.]

45Bagitu lagi, kalu gara-gara ngoni pe kaki sabla sampe ngoni jadi berdosa, lebe bae ngoni potong suda ngoni pe kaki itu. Barang, lebe bae maso sorga cuma deng kaki sabla daripada ada dua kaki lengkap kong ngoni maso neraka. 46[Di neraka, gai tara mo mati. Deng dia pe api me tara mati-mati.]

47 # Mat. 5:29 Kalu gara-gara ngoni pe mata sabla biking ngoni jadi berdosa sampe jadi tara percaya lagi, cungkel suda ngoni pe mata itu. Karna lebe bae ngoni maso di Tuhan Allah pe tampa Berkuasa sebagai Raja cuma deng mata sabla, daripada ada dua mata kong Tuhan Allah buang pa ngoni di neraka. 48#Yes. 66:24 Di neraka, gai tara mati. Deng dia pe api me tara mati-mati.

49Ambe conto, orang taru garam di daging la tahang lama. Bagitu me, Tuhan Allah tes pa samua orang supaya dorang pe percaya pa Tuhan itu jadi lebe sunggu-sunggu deng tahang lama.#9:49: Di teks asli bahasa Yunani pake, alisthesetai, yang pe arti, ‘dapa kase garam’, yang pe maksut, cobaan dari Tuhan Allah tara datang satu kali, tapi sadiki-sadiki sama deng orang pe cara taru garam di makanang. 50#Mat. 5:13; Luk. 14:34-35 Ngoni yang iko pa Kita musti ada guna sama deng garam. Garam pe guna untuk biking makanang jadi sadap, tapi kalu garam itu so jadi tawar, so tara mungkin lagi mo barasa garam. Bagitu lagi deng ngoni pe hidup di dunia ini, musti ada dia pe guna untuk orang di dunia ini deng ngoni me musti hidup baku bawa bae-bae satu deng yang laeng.”

Currently Selected:

Markus 9: PB MMU

Highlight

Copy