Jone 10
10
Sipi o kati vailani maba kale ama podepodeti
1Ni Jisu ta eri kiolake sea vaki kasi, “Tuvevo avole aṉata a bazuemela me, voa maba vo pui o amaqeani sipi ko qara ko veutu kale kude, melai vo o koitani edoloma keve kude, vota kala kuilokuilo ala ni niumaniuma kala. 2Melai voa maba vo o amaqeani sidopu avole veutu kale kude, vo inio se sipi poso o mati vailani maba. 3Vo veutu o kati vailani ta o nianiieva vo ni ova veuka vo ko tibulu, ni o ṉaviko sipi poso ta keta va viqa voko kora ota ma nokaeka keru seko ṉi poso tu o saqorimo qara kale azo. 4Voko se saqorimo ko tova, vota oma kuleta ni se sipi poso ta ke lulueva vo, ako seta ke nianiieka voko kora sole. 5Seta pui kepa luluevou kala edolola maba, melai seta keta va soqoilou vo, ako seta pui ke nianiieka voko kora sole.”
6Jisu ta omai bazuekake koa podepodeti, melai seta pui ke paqumukake vo o kasekema quli sekasi.
Jisu ta uri ala sipi o kati vailani maba
7Sole Jisu ta mata eri kiolake, “Aṉata a bazuemela me tuvevo avole, aṉa inio ko sipi ko veutu lala. 8Kiadama edoedoloma maba poso se lula ke purateni aṉa puliako kilo ta kuilokuilo amu ni niumaniuma kamu, ni se sipi poso ta pui kepa nianiieme ni pui kepa zorime se. 9Aṉata veutu lala. Voa maba o amaqeani aṉa kale ta o pakiovou, ni vota amaqeo ni saqoroa kovo o elou ko saevo ko sailao. 10Vo kuilokuilo ala maba ta o kueva tu kuilole, vouvatole, ni niumaniumatole. Melai aṉata a queva tu seta ke kovou ko saevo, koa pado ama saevo, uri ama quli kokai sukatako.
11“Aṉata uri ala sipi ko vailo ko maba lala. Vo uri ala vailo ko maba ta oka vouvou ko sipi poso. 12Vo o tabariani maba ta o vaema ni ota ma soqoiva sea sipi vo o vea keru kala kade ala biana ko kilo, ako vota pui vailo ko maba ni sea sipi poso melai pui voko madu sole. So sole voa kade ala biaṉa ta ota kueva ni o qiqaruma ni o birebirema sea sipi poso. 13Vo tabara o koani ta ota soqoiva ako vota o tabariani pala sole ni vota pui o kerukeruema sea sipi poso. 14-15Aṉata uri ala sipi ko vailo ko maba lala. A Mama olai nianiiani jari inio aṉata avai nianiia a Mama. Ni so jari inio aṉata amai nianiia aṉako sipi poso ni se melai kelai nianiia aṉa. So inio aṉata ama vouvou se. 16Ni inisiana mata kake aṉako sipi poso se pui nio sipi ko qara kale ke evani. Se melai keta la viqou aṉako kora, ni aṉata a amaqimou se, tu sea kiadamu ta omadeu rovaṉa ke elou omadeu vailo ko maba ko vailo kale.
17“Aṉavo Mama ta o roquela aṉa ako aṉata zarizaria lala tu a vaekou aṉako saevo, tu aṉata mata a dova kovou koa saevo. 18Puliala ta o rovea tala kovo aṉako saevo aṉa kasi azo. Melai aṉata a buarika aṉako saevo aṉako tuvevo ama zario kale. Aṉa inio koko raki lala tu a vaeko, ni aṉa inio koko raki lala tu mata a dova kovo. Ko ikio aṉavo Mama o lati soruekema tu aṉata a ereko sole,” kiolake.
19Sai nio se Jiu amu ta mata omuqa pitasa keta evake seko kerukeru kale koa voko pesio tava viqo kale. 20So sole kubo madu se azo ta eri kikelake, “Koe, vota ziolo kovai onobatani! Vota sarube ala! Noi sole inio animeta me didieva vo?” kikelake.
21Melai kama volei maba madu ta eri kikelake, “Vo ziolo kovai onobatani maba ta pui opa roveovou soa pesio elo! Ni mata ziolo ko pizato ta pui kopa leqosikou se maba poso ko vilu!” kikelake.
Jiu amu vai kedu vo Jisu
22Ni Tabu iko ni Bulebule iko ko Jelepade ko Ṉojola ko mamola pueko ta kota baroake Jerusalema zaekale ni koa taku ta sarosaroro ko taku. 23Ni Jisu ta o amaqeake ni obeta lipilipitake Solomone ko pado sebesebe ka kikelako kale Jelepade kale. 24Ni sai nio se Jiu amu ta kevai uburake ni ke qoloevake vo ni eri kikelake, “Noi tinia niuniala inio ṉo iṉela eṉe? Uria ṉelai bazueka, ṉota vo Baṉara o soroevani Pakio ṉa inio kio?” kikelake.
25Ni Jisu ta o tiorizatake, “Lula aṉata a bazuemele, melai meta pui meba tuvevo puele aṉa. Ko aqasiele ama iruruputo poso aṉa a erekako a Mama ko pizato kale ta aqai kaseiva a ṉavi, 26melai meta pui me duvevo puta ako meta pui aṉako tuvevo ama sipi mela sole. 27Aṉako sipi poso ta keta la nianiieka aṉako kora, ni aṉata amai nianiia se, ni seta ke luluela aṉa. 28Ni aṉata a qatima se noqola kama saevo, ni seta pui kepa vouvou, ni puliala ta opa rapemou aṉa kasi azo. 29Aṉavo Mama vo o katileni aṉa se ta obe kai paloasa kiadama quli, so sole puliala ta opa roveovou kuilimo se vo Mama ko vailo kale azo. 30Ako vo Mama ni aṉa ta omadeu qela sole,” kiolake.
31Nio se Jiu amu ta mata ke niaquekake kama lado tu ke taivo kikelake. 32Nio Jisu ta eri kiolake sekasi, “Meta lula me qea kubo uri ama iruruputo aṉavo Mama o katilema aṉa tu a ereko, melai lama pado ko azo ta matu ruqe ama inio meta melai taikou aṉa kimela?” kiolake.
33Nio se Jiu amu ta mata ke vati tiorikake vo, “Eṉeta pui ṉeṉa zaria taiṉo ṉo kama pado koa uri ama iruruputo kale avo, melai ṉoko ruqe kasevo vo Baṉara ṉoko aṉararailo sama pesio kale inio! Ako ṉota miduku kale ala maba ṉa sole, melai ṉota ṉoqai rairizia ṉo ṉavi ta Baṉara ṉa kiṉola!” kikelake.
34Nio Jisu ta o mati tiorikake ni eri kiolake, “Kota lula ko rikiziovi meko Bazu kale ko Baṉara eri ka kiovema, ‘Meta baṉara poso mela.’ 35Animeta me baqumuka ta ko Tabu ama Riki kikolani ta tuvevo avo kiada keru, ni koa riki kikolani ta vo Baṉara ta omai nokaeke seta baṉara poso, sea maba poso seke koeni voko bazubazu. 36So sole aṉa kale avo, vo Mama ta o pitoele aṉa ni o soroele aṉa peuru ma peuru kale. Sole noi nio meta eri kimela aṉata a ruqe kaseva vo Baṉara kimela, aṉako aṉata Baṉara vo Meqora lala kio kale? 37Aṉata pui a ereka tea ko quli aṉavo Mama oka zariako tu aṉata a ereko, ta uri tu pui tuvevo puelo. Melai aṉata abe ereka ko, sole meta tuvevo puekomo koa uri ama iruruputo poso ko kasekako kale, pui mebe tuvevo puelou aṉa melai, 38tu meko kelo kale koa iruruputo meta me uria paqumukou vo Mama ta aṉa tonala, ni aṉa melai vo Mama tona lala kio,” kiolake.
39Ni seta mata keva zariake noqoevo vo Jisu voko so kio kale avo, melai seta pui ke roveake.
40Nio Jisu ta o vaekake koa Jelepade ko sebesebe ni mata ota vaitake ni o pakekake ko Jodani sukuru, ni ota olake sai lulavo Jone o bapitaiso puemekoi se maba poso, ni vota ota evake sai. 41Ni matu kubo maba madu ta kevai olake vo sai, ni seta eri kikelake ke ṉavio kude, “Jone ta pui opa ereke ko aqasiele ama iruruputo poso, melai kiadama quli vo ota va kasekema nea maba ta tuvevo ama,” kikelake. 42Nio matu kubo maba madu koa zaekale amu ta ke tuvevo puevake vo Jisu.
Currently Selected:
Jone 10: BLBNT
Highlight
Share
Copy
Want to have your highlights saved across all your devices? Sign up or sign in
The New Testament in the Bilua language, Solomon Islands © The Bible Society of the South Pacific, 1995.
