Matiu 18
18
Lala inio raura kala vo Baṉara ko lekasa puo kale?
(Maka 9:33-37; Luke 9:46-48)
1Koa taku kale se disaipeli madu ta ke olake Jisu kasi ni ke kuimaevake vo, ni eri kikelake, “Lala inio raura kala vo Baṉara ko lekasa puo kale?” kikelake. 2So sole Jisu ta o nokaevake kala silo ala meqora, nio o lojoevake seko tanama kale, 3ni eri kiolake, “Meta kerukeruekomo komi! Meta pui me besiekou meko saevo tu meqora poso jari me elou ta pui meba amaqeovou vo Baṉara ko lekasa puo kale. 4Nio voa maba vo o ṉavi o zarazarailo ala nea silo ala meqora jari, nio raura o elou vo Baṉara ko lekasa puo kale. 5Ni vo o baroekivani kala nea silo ala meqora jari ala voko luluelo aṉa ko kio kale ta o baroekila inio aṉa,” kiolake vo Jisu.
Balauvato tu pui me jaruevo kala voko oqu kasi azo
(Maka 9:42-48; Luke 17:1-2)
6Nio Jisu ta obeta olake bazubazuto ni eri kiolake, “Kala maba ta o saruevou kala nea meqora jari ala, vo o tuvevo puelani aṉa, ni ota va epezikou voko lai oqu aṉa, ta voa maba o saruevani vo ta ko male tu tava titieko ko matu lado o qonaqona topi ni duluevo vo kolo kale. 7Matu ruqe ama quli kio komai barolou komia peuru ma peuru kale ama maba poso ako seta ruqe ke ima maba poso sole seko oqu kale. Soama ruqe ama iruruputo ta pui kopa epezou komia peuru ma peuru kale, melai matuma koqotato ikio ke kovou sea maba poso seke saruemani edolomu!
8-9Ako kama quli ṉoko saevo kale ama ta sarueko saṉa ko iṉou ṉo, ta ṉota ṉo ṉamukou ko. Kota matu tapata tu ṉamuko ko, melai uri tu ṉamuka. Omadeuvo ṉota ṉo ṉamuka jari ṉoko ṉase ma kiti, ko ruqe ama kalo saṉa ko iṉako ṉo, ma ṉota ṉo ṉamuka jari ṉoko vilu, ko ruqe ama zario saṉa ko iṉako ṉo. Uri tu amaqeo vo Baṉara ko lekasa puo kale ama saevo kale omadeu ṉase ni kiti sate ma omadeu rana vilu sate, melai pui uri tu ke risaeṉou ṉo pado ama ṉoko tupu sate heli ko uza kale,” kiolake.
Jisu ko podepodeti ivo o saruini sipi
(Luke 15:3-7)
10Nio vo Jisu ta mata eri kiolake sekasi, “Meta balauvomo ni pui zaraemo nia meqora poso jari amu, ako seta mateana samu sole aṉavo Mama kasi aukale, seke mati vailani.#18:10 Kama lulama riki poso ta ko kati paqulika vesi 11 ‘Ako aṉa maba a eveni lala ta a quevi pakiemole seke saruivani.’
12“Eri nio o kalou voa maba vo kota va saruivani voko omadeu sipi koa omadeu paizana kale azo, vota o vaemou sea siakava toni siakava sipi sopu kale tu sai ke vuatou, so maqa inio vota o ziovou ni opa vailivou vo o saruivani sipi. 13Nio so keru o vati inota keru voa sipi vota ova matu zoleiva kobe kai paloasa voko kai zoleilo koa siakava toni siakava voko sipi ko pui kopa saruima. 14So pado jari nio mevo aukale ala Mama ta pui oka zaria tu kala nia meqora poso jari amu kale ala ta noqola tolailo o elou heli kale,” kiolake.
Tauvevo sarueko o erekani maba
(Luke 17:3)
15Vo Jisu ta obeta olake bazubazuto ni eri mata kiolake sekasi, “Kala ṉovo lolo ta sarueko o erekou ṉokasi, ta ṉota tutumazi avole ṉovai ziovou voa sarueko sala ni ṉoba sidopu puevou vo melai ṉota ṉo erekou komia sidopu puto qe kiada koi. Nio vota ota ṉa zorikou ṉoko sidopu nio vota mata ṉovo lolo o elou. 16Melai vota pui o didieṉou ṉo, nio ṉota mata ṉo ziovou omadeu ma omuqa kidi sate edoloma taku kale. Ako ko Tabu ama Riki kikolani ta eri nio sole, ‘So keru vo maba ova kuirikou keru kala edolola ta omuqa ma zouke maba ta ke tuvevo puekou vo kiolani,’ kikola. 17Melai voa maba ta obeta pikipikinio putou ni pui o didiekou se kikelani ta so keru inio ṉoqai bazutou lotu maba poso kasi, ni sai melai pui o zoripatou so keru inio vota omadeuvo kala ruqe ala ni kutumana kale ala jari o elou ṉoko kerukeru kale.
18“Aṉata mata a bazuemela me, ko quli meme qaitiko ama quli miduku kale ta Baṉara ta o melati tiorikou ni o melati vinaekou aukale. Ni ko quli meme zarieko ama quli miduku kale ta mata Baṉara ta o melati tiorikou ni o melati vinaekou aukale.
19“Aṉata mata a bazuemela me, kainioqa ta omadeu vatolo qo elou ni qo pasekou kama quli ta aṉavo aukale ala Mama ta o kati tiorikou ko quli ko nioqa qo pasekako quli. 20Ako sai kama zouke maba poso pala ke padoiloa koi aṉako ṉikale, melai aṉata a zomanou sekasi,” kiolake.
Pui odouvikinio ko podepodeti
21Nio vo Pita ta o olake Jisu kasi ni o kuimaevake vo ni eri kiolake, “Lekasa, aṉavo lolo ta pui o epezou ruqe ereko aṉa kasi, ta latau taku inio aṉata a vati odouvikiniou vo? Sikeura taku kio?” 22Nio vo Jisu ta o vati tiorikake ni eri kiolake, “Pui sikeura taku ko kiada, melai sikeura toni vole sikeura, 23ako vo Baṉara ko lekasa puo ta eri jari nio sole. Inevoana kala lekasa vo oka zariani lelepiko voko nabulu poso ko lipulipu vokasi ke erekema. 24Nio so keru vo obe tanieka keru ereko koa iruruputo seta ke vati amaqeake kala vovo nabulu vo o kativeni toni milioni dola. 25Nio voa nabulu ta pui o rovea besieko mata koa takula. So sole voa lekasa ta o soruemake kake voko nabulu poso tu seta kevai tatabarao voa maba, ni voko reko ni voko meqora poso mabaku kaqe. 26Melai voa nabulu ta ota iqeiqeake vovo lekasa ko tanama kale, ni ota ziake ni eri kiolake, ‘Lekasa ṉota roquela aṉa, tu katila mata kama taku tu aṉata aṉa besiekou ṉoko takula!’ kiolake. 27Nio vo lekasa ta o matu roquevake vo sole vota ota va ukaka puekake voko lipulipu ni vota o soroevake voa nabulu ruparupasi ala.
28“Melai voa maba ta o saqorake ni o toraevake kala vovo baerebaere vo o kativeni sike dola, nio vota o olake ni o noqoevake vo ni eri kiolake, ‘Ṉota taukavo besieka noko lipulipu,’ va kiolake. 29Melai nea maba ta ota iqeiqeake kuleto ala pado maba ko tanama kale ni ota ziake ni eri kiolake, ‘Ṉota roquela aṉa ni katila mata kama taku tu aṉata a besiekou ṉoko lipulipu,’ kiolake. 30Melai nea kuleto ala maba ta pui okai zaria taruano, so sole vota o bazuemake se maba poso tu ke vaevo nea omuqala maba pirito pade kale tu vota sai o elou ti kobeta barolou ko taku voko besieko voko lipulipu. 31Ni so keru kake voko lolo poso ke kea keru ko quli voa kuleto ala nabulu o erekako nio seta matu duki keta eve ni ke olake voa lekasa kasi vai bazuekole ko quli koko ereivake quli. 32So sole vo lekasa ta mata o tova nokaevake voa maba tu o tova vaito vokasi ni vota eri va kiolake, ‘Ṉota matu ruqea laṉa! Aṉata ada ṉati odouvikinia koa ṉoko matuma lipulipu ako ṉota ṉo basele aṉa tu aṉata a ṉati odouvou ṉo sole. 33Melai noi nio ṉota pui ṉo vati odouva ṉovo lolo omadeuvo aṉata a ṉati odouvikinia ṉo jari?’ kiolake. 34So sole vo lekasa ta ota matu korakoraivake ni vota o soroemake se tu seta ke vaevou vo pirito pade kale tu sai nio vota o koqotailo, ti kobeta barolou ko taku voko besieko voko matuma lipulipu.
35“Omadeuvo so jaria koqotaemelo inio o elou aṉavo aukale ala Mama so keru me pui me mati odouvikiniou keru meko lolo poso meko pado ama bulo kale,” kiolake vo Jisu, nio o paikake voko bazubazuto.
Currently Selected:
Matiu 18: BLBNT
Highlight
Share
Copy
Want to have your highlights saved across all your devices? Sign up or sign in
The New Testament in the Bilua language, Solomon Islands © The Bible Society of the South Pacific, 1995.
