Matiu 22

Bau vuato ko podepodeti

1Ni Jisu ta mata oma bazuekake se maba poso komia podepodeti ni eri kiolake, 2“Vo Baṉara ko lekasa puo ta eri jari. Kala lekasa ta o inainaekake vovo meqora ko bau vuato. 3Nio vota o soroemake voko nabulu madu tu kepa nokaemo se maba madu vo lula o taipazimeni tu ke zio koa ṉojola kale. Melai seta pui keka zariake zio. 4So sole vota mata o soroemake kake voko nabulu madu koa omadeuma bazu sate sea maba madu kasi ni eri kikelake, ‘Kuemo, ako vo lekasa ta lula o vouvaekala matu kubo bulumakau ni kubo vairu ama posu, ni ṉojola ta lula inaina kama. Ariamo tu pa ka zomanomo koa rorotato ko ṉojola!’ kikelake. 5Melai sea maba madu ta pui ke opatikake koa taipaza, ni keta aza aerake, kake ta seko kiaro kasi ni kake ta ke sitoa poso kasi. 6Ni kake sea maba madu ta ke noqoemake voa lekasa ko nabulu madu ni ke pazomake ni ke vouvaemake se. 7Nio voa lekasa ta ota matu korakoraivake, ni vota o soroemake voko solodia madu, tu kepa vouvaemo se voko nabulu poso ke vouvaemeni ni keta ma siqaeko seko peuru. 8Ni vota o nokaemake mata kake voko nabulu madu, ni eri kiolake sekasi, ‘Aṉata lula a inainaeka ko rorotato ko ṉojola, melai sea maba madu aṉa lula a daipazimalani ta ruqe amu sole pui ke kueva. 9Sole meta olamo matu peuru ko keve tona ni taipazimomo sai me melo ama maba poso,’ kiolake. 10Nio sea nabulu madu ta ke olake matu peuru ko keve tona ni ke odiemake kiadama maba madu sai ke meani, uri amu ni ruqe amu, ni koa rorotato ko bau vuato kekai ereivake pade ta kota sukatake ko maba.

11“Nio voa lekasa ta o olake ni o meake sea maba poso koa ṉojola kale, ni vota o veake kala maba vo pui opa kiakeni rorotato ko bau vuato ko sabosabo. 12Nio vota eri kiolake vokasi, ‘Lolo, noi sole inio ṉota koi ṉoda kuela puliama rorotato ko bau vuato ko sabosabo sate?’ kiolake. Melai voa maba ta pulia quli o kasekake voa lekasa kasi. 13Sole vo lekasa ta o soruemake voko nabulu madu, ni eri kiolake, ‘Tava piriekomo voko ṉase ni kiti ni rajaevomo vo kupele kutumana kale, sai vo o zialoa koi ni taka o roinaroinaekoa koi,’ kiolake.

14“Ni so jari nio matu kubo madu inio se vo Baṉara o taipazimani, melai silo pala madu inio se vo o pitoemani,” kiolake vo Jisu.

Takisi ko tabariko ko kuimanao

(Maka 12:13-17; Luke 20:20-26)

15Ni se Parese madu ta ke padoivake omadeukoi ni ke vatovatoekake kama vatovatolo tu ke madoevo zaraevo vo Jisu seko kuimanao kale. 16Nio seta ke soroemake Jisu kasi ke ṉaviko maba madu, ni kake Herodi#22:16 Ṉota kea Herodi Anitipasi dikisonare kale. ko poqala zuvarato ko maba madu, ni eri kikelake, “Tanala, eṉeta ṉeṉai nianiia ta ṉota sidopua laṉa ni ṉota ṉo mati nianiiekikani ṉa maba madu Baṉara ko tuvevo ama kalo, ni ṉota pui ṉoqai bazutani ṉa ko maba poso ko zolemako quli pala. 17Sole ṉota ṉela bazueka ṉoko kerukeru. Uri kio ko anime Jiu mu mela ta me buariko animeko takisi Romu ala Matu Lekasa kasi, ma pui? Noni kikola animeko Bazu?” kikelake.

18Melai Jisu ta lula obe tamai nianiia seko ruqe ama vatolo, sole vota eri ma kiolake, “Me meqai lipalipaitani mela ko sidopu! Meta mela zaria pala inio madoelo aṉa. 19Sole meta katilomo tu a qelo koa siliva seleni ko takisi meqai erekako!” kiolake. Nio seta ke kativake ka pado Romu amu ko takula, 20nio vota o kuimaemake se ni eri kiolake, “Lala ko loilo ni ṉi kio komia takula topi ko evako?” kiolake. 21Nio seta ke vati tiorikake ni eri kikelake, “Matula Lekasa Romu ala ko,” kikelake. Nio Jisu ta eri ma kiolake, “Uri, sole Romu ala Matu Lekasa ko ta kativomo vo Romu ala Matu Lekasa, Baṉara ko ta kativomo vo Baṉara,” kiolake. 22Nio so keru seke viqa keru ko quli, seta aqasiele keta evake, ni ke vaevake vo ni keta olake.

Voukale azo ama mata saevo ko kuimanao

(Maka 12:18-27; Luke 20:27-40)

23Nio koa omadeuma ṉaniu kale inio mata se Sadiusi madu se pui tuvevo ke ikani maba ko mata saevo voukale azo ta ke kuevake Jisu kasi tu ke madoevo zaraevo vo, ni eri kikelake, 24“Tanala, vo Mosese ko Bazu kikolani ta eri, ‘Kala maba ta o vouvou ni o vaekou voko reko meqora pide ama, ta vovo visi nio mata o tova raekou koa naboko tu nioqata meqora saṉa qo elou tu sea meqora poso ta vo o vovini kaka ko meqora poso kerukeruilo ke elou,’ kikelako. 25Ni iniseana koi ke eveni sikeura tamania, ni sevo kaka ta o raekake ka pado reko ni puliako tu kati keu vota ota vouvake puliako meqora saṉa elo, sole koa naboko ta mata ko raevake kovo kuleto ala lasive vo visi. 26Ni koa omadeuvo kobeta kake ko vou omuqala kasi, ti zouke ala, ti kobeta baroake sikeurala kasi, seko pui meqora kai ereko ko ni seko vou. 27Nio koko tovatova inio ko ṉavi koa reko ta kota vouvake. 28Nio sea sikeura tamania ti ke raeke muli koa reko, sole lalako reko ikio ko elou so keru se mata ke tova saevou keru voukale azo?” kikelake.

29Nio vo Jisu ta eri ma kiolake se, “Meta meda saruiva meko kerukeru kale, ako meta pui meqai nianiia ko Tabu ama Riki kikovevo, voukale azo mata saevo ko bazu, ni Baṉara ko pizato melai pui meqai nianiia sole. 30Ako so keru seke vovini ke saevou keru voukale azo, seta pui kepa rorotou, omadeuvo se aukale ama mateana madu jari. 31Melai meta pui me duvevo pueka se voumu ko mata saevo, ta meta maba pui me baqumukani mela inio vo Baṉara mela kiovevo, ko eri ka kikovema, 32‘Aṉa inio vo Ebarahami vo Baṉara lala ni vo Aisake vo Baṉara lala ni vo Jekopi vo Baṉara lala,’ kikovema. Vota saevomu vo Baṉara inio melai pui voumu, so sole Ebarahami ni Aisake ni Jekopi melai keta tova saevou,” kiolake vo Jisu. 33Nio so keru sea vaki ke viqa keru ko quli, seta aqasiele kekai evake voko nianiiekato.

Matu qulepo ama bazu

(Maka 12:28-34)

34Nio so keru se Parese madu ke viqa keru Jisu ko zaraemo se Sadiusi madu, seta keta padoivake, ni maiqu keva olake vo Jisu. 35Ni kala se azo ta vo Mosese ko Bazu okai nianiiekatani sole vo inio ovai zariake tu zaraevo ni madoevo vo Jisu voko kuimanao kale ni eri kiolake, 36“Tanala, loma ikio matu qulepo ama bazu kiadama vo Mosese ko Bazu azo?” kiolake. 37Nio Jisu ta o vati tiorikake, ni eri kiolake, “ ‘Meta roquevomo vo Baṉara mevo Lekasa pado ama meko bulo kale ni pado ama meko vatolo kale ni pado ama meko kerukeru kale.’ 38Ko ikio ko matu qulepo ama ni kuleto ama bazu. 39Ni omuqama matu qulepo ama bazu ta komi, ‘Meta roquemomo edolomu me ṉavi me roquivani jari.’ 40Koa omuqa bazu ikio ko maba raki vo Mosese ko Bazu kale ni se poropita madu ko nianiiekato kale,” kiolake vo Jisu.

Baṉara o soroevani Pakio va kuimanao

(Maka 12:35-37; Luke 20:41-44)

41Nio se Parese madu vai padoilo maqa vo Jisu inio vota o kuimaemake se, ni eri kiolake, 42“Nonia kerukeruevo ta mebe eva vo Baṉara o soroevo ala Pakio? Ta lala ko vikuvikula kale ala inio vo?” kiolake. Nio seta ke vati tiorikake ni eri kikelake, “Vota Devita ko vikuvikula kale ala inio,” kikelake. 43“Ta noi sole inio vo Devita ta vo Baṉara vo Auvana kale ‘Aṉavo Lekasa’ va kiolake voa Pakio? Ako eri kiolake sole vo Devita,

44‘Vo Baṉara ta eri vati kiolake aṉavo Lekasa:

Ṉota papi aṉako palo rana tu ṉo lekasa puo,

ti kobeta barolou so keru aṉa a vaemou keru kiadama ṉoko kana poso ṉoko pizato kale.’

45Ni vo Devita ta ova nokae voa Pakio ta o ṉavivo Lekasa, sole noi nio voa Pakio ta vo Devita ko vikuvikula kale ala inio?” kiolake. 46Ni puliala kala pado ta o opativake vo Jisu. Ni so inio koa ṉaniu kale azo seta keta matu paṉaovake tu mata ke kuimaevo vo.

Currently Selected:

Matiu 22: BLBNT

Highlight

Copy