Matiu 25
25
Jisu podepodeti imo toni sinaqu rusu poso
1Ni Jisu ta mata eri kiolake sekasi, “Eri nio ko kalo avo so keru aṉa maba a eveni lala a vaitou keru lekasa elole komia miduku kale. Iniseana toni sinaqu rusu seke borikeni seko juke tu kepa toraevo vo obe vairua rorotani maba. 2Ni sike madu ta sarube amu, sike madu ta nianiiomu. 3Ni se sarube amu ta ke borikake seko juke ni puliama oela ke borikake, 4melai se nianiiomu ta ke borikake seko juke ni oela seko teamuteamu kale. 5Melai vo obe vairua rorotani maba ta pui taukavole o kuevake sole sea sinaqu rusu ta keta dudeke ni keta maroṉake.
6“Ni ipu tiania kota evake nio kala ta o velavelaoke ni eri kiolake, ‘Meva! Vo obe vairua rorotani maba ta ota kueva, kuemo tu pa toraevomo!’ kiolake. 7Nio sea sinaqu rusu poso ta ke toiratake ni ke matukikake seko juke. 8Ni se sarube amu ta eri kikelake se nianiiomu kasi, ‘Katiṉelomo eṉe kama meko oela ako eṉeko juke ta kota joata sole,’ kikelake. 9Melai se nianiiomu ta ke mati tiorikake ni eri kikelake, ‘Komia oela ta pui ko male eṉeko juke ni meko juke, sole olamo kekai tatabaraovakoi ko oela tu pa tatabaraekomo me ṉaviko,’ kikelake. 10Nio sea sarube ama sinaqu rusu poso ke olake tatabaraekole ko oela, se savasi maqa inio vo obe vairua rorotani maba ta ota baroake. Nio sea sike sinaqu rusu ke inainaovini ta keta amaqeake vo sate rorotato ko bau vuato kale, ni ke tibulikake ko veutu.
11“Koko tova inio sea sike sinaqu rusu poso ta ke baroake, ni eri kikelake, ‘Lekasa! Lekasa! Ṉela veuka!’ kikelake. 12Melai nea obe vairua rorotani maba ta o mati tiorikake ni eri kiolake, ‘Tuvevo avole aṉata eri kiala mekasi, aṉata pui a melai nianiia me, tu olamo,’ kiolake. 13So inio tu meta vaitomo, ako meta pui meqai nianiia koa ṉaniu ni taku aṉa maba a eveni lala a vaitou keru sole,” kiolake vo Jisu.
Jisu podepodeti imo zouke nabulu
14Ni Jisu ta mata eri kiolake sekasi, “Eri nio ko kalo avo so keru aṉa maba a eveni lala a vaitou keru lekasa elole komia miduku kale. Inevoana kala lekasa vo o inainaovani tu ota zio vaṉama peuru kale, ni vota o nokaemake voko nabulu poso ni o katimake voko takula ni lomaloma tu kekai iruruputo. 15Ni vota o katimake se koa takula, o mati luluekake katimo seko nianiio ko kavani. Nio vota o kativake kala sike vuro takula ni mata kala ta o kativake omuqa vuro, ni mata kala ta o kativake omadeu vuro. Ni vota ota olake vaṉama peuru kale. 16Nio voa nabulu vo o kativeni sike vuro takula ta o olake ni okai iruruputake koa seleni ni o puratikake mata kama sike vuro takula. 17Omadeuvo jari voa nabulu vo o kativeni omuqa vuro takula vota mata o koake kama omuqa vuro takula. 18Melai voa nabulu vo o kativeni omadeu vuro takula ta ota olake, ni o telikake ko miduku, ni o mutakake koa vovo lekasa ko takula.
19“Nio rosi ama taku ko tova nia nabulu poso vo tanala ta ota vaitake, ni okai zariake tama lelepiko voko nabulu poso ko kai iruruputo voko takula. 20Nio vo o kativeni sike vuro takula ta o kuevake, ni eri kiolake, ‘Lekasa, ṉota ṉo qatile aṉa sike vuro takula ni aṉata mata a qoa kama sike vuro takula ni kota ṉoko toni vuro, ṉoṉo qatilema ni aṉa a buratikako,’ kiolake. 21Nio nea lekasa ta eri kiolake vokasi, ‘Matu uria laṉa ni sidopu ala nabulu ṉa, ṉota uri ṉo ereka silo ama iruruputo kale, sole aṉata raura a iṉou ṉo matuma iruruputo kale. Kua tu zomane aṉako ṉojola kale ni zolei aṉa sate,’ kiolake.
22“Ni vo o kativeni omuqa vuro takula ta mata o kuevake ni eri kiolake, ‘Lekasa, ṉota ṉo qatile aṉa omuqa vuro takula, ni aṉata mata a qoa kama omuqa vuro takula ni komi ta ṉoko ariku vuro takula,’ kiolake. 23Nio nea lekasa ta eri kiolake vokasi, ‘Matu uria laṉa ni sidopu ala nabulu ṉa, ṉota uri ṉo ereka silo ama iruruputo kale, sole aṉata raura a iṉou ṉo matuma iruruputo kale. Kua tu zomane aṉako ṉojola kale ni zolei aṉa sate,’ kiolake. 24“Ni vo o kativeni omadeu vuro takula ta mata o kuevake ni eri kiolake, ‘Lekasa, aṉata aṉai nianiia ta ṉota tapata kala maba ṉa, ako ṉota ṉo qajorani ṉa sai pui ṉoṉo bapatakoi, ni ṉo qoazatani ṉa sai pui ṉoṉo iruruputakoi. 25So inio aṉata ada ṉa ṉava, ako ada ṉa mumaeko kale kiala koa takula sole, ni aṉata aba mutake koa takula miduku kale. Ni komi ta ṉoko takula,’ kiolake.
26“Ni vovo lekasa ta o vati tiorikake ni eri kiolake vokasi, ‘Ṉota matu ruqea laṉa ni lupalupa kala nabulu ṉa! Ṉota ṉolai nianiia ta aṉata a qajorani lala sai pui aṉa a bapatakoi, ni a qoazatani lala sai pui aṉa a iruruputakoi. 27Ta noi sole inio ṉota pui ṉoba la amaqike koa omadeu vuro takula baṉa kale, tu aṉako vaito keru aṉata a qovou koa omadeu vuro takula ni koko puratiko ama sate?’ 28Ni voa lekasa ta eri kiolake voko nabulu poso kasi, ‘Ni meta tava komo koa takula nea ruqe ala nabulu ni kativomo vo toni vuro takula sala. 29Ako vo uria kai iruruputo o evani vo o koako ta vovo lekasa ta mata o kativou vo mata kama, tu kota kubo kova elo. Melai vovo lekasa ta ota va kovou vo pui okai uria iruruputani voko puaro koa silo pala melai. 30Tu meta rajarajaevomo voa ruqe ala nabulu kupele kutumana kale sai o zialoa koi ni taka o roinaroinaekoa koi,’ ” kiolake vo Jisu.
Vo maba o eveni ko titizimo kiadama maba poso
31Ni Jisu ta mata eri kiolake sekasi, “So keru aṉa maba a eveni lala a vaitou keru, aṉata a qilou a bizato ni ṉaṉaidara sate ni kiadama aṉako mateana madu sate, ni aṉata a bapuvou vo Baṉara ko lekasa puo ko papupapu topi. 32Ni kiadama maba madu komia peuru ma peuru kale amu ta ke padoilou aṉa kasi, ni aṉata a bitasimou se omuqa poqala kale, omadeuvo vo vijaro ko maba ta o pitasika ko sipi qouti kasi azo jari. 33Nio aṉata a vaemou se sidopu amu aṉako palo rana ni se pui sidopu amu ta aṉako made rana. 34Ni aṉa voa Lekasa lala ta eri kiavou sea maba poso aṉako palo rana mu kasi, ‘Me inio aṉavo Mama mauru o imeloa mela, sole meta kuemo tu vo Baṉara inio o katimelou voko lekasa puo ko mauruto, ko o mela inainaekema puliako komia peuru ma peuru ereilo. 35Ako so keru aṉa a luape keru meta me niaele aṉa, ni aṉa kabare a eve keru meta me qatile ko ju, ni so keru aṉa a lipilipite keru meta me baroekile meko pade kasi, 36ni so keru aṉa solemauru a eve keru meta me ditivi puele aṉa, ni so keru aṉa a verepe keru meta me lati vaile aṉa, ni aṉa pirito pade kale a eve keru meta me joipile aṉa,’ kiavou. 37Nio se sidopu amu ta eri kikevou, ‘Lekasa, noi keru inio ṉota ṉo luape ni eṉeta ṉe niaeṉe ṉo, ni noi keru inio ṉota kabare ṉo eve inio eṉeta ṉe qatiṉe ṉo ko ju, 38ni noi keru inio ṉota ṉo lipilipite inio eṉeta ṉe baroekiṉe ṉo eṉeko pade kasi, ni lai nio solemauru ṉo eve inio eṉeta ṉe ditivi pueṉe ṉo? 39Ni noi keru inio eṉeta ṉe ṉeve verea laṉa ni pirito pade kale inio eṉeta ṉeba soipiṉe? Ako eṉeta pui ṉeqai nianiia sole komia kiadama quli ṉoṉo qasekako,’ kikevou. 40Nio so keru inio aṉa voa Lekasa lala ta eri kiavou, ‘Tuvevo avole aṉata a bazuemela me, so keru meme ereke keru komi quli kala aṉavo olaquala baerebaere kasi meta me ereke inio aṉa kasi,’ kiavou.
41“Melai aṉata eri kiavou aṉako made ranamu kasi, ‘Meta levelevezia mela Baṉara kasi, tu olamo koa noqola kama uza kale vo Baṉara ova inainaekema vo Setani ni voko mateana madu! 42Ako aṉa a luape keru ta pui meba niaele sole, ni aṉa kabare a eve keru ta pui meba katile sole ko ju. 43Ni aṉa a lipilipite keru ta pui meba baroekile sole pade kasi ni solemauru a eve keru ta pui meba titivi puele ni a verepe keru ni pirito pade kale a eve keru ta pui meba soipile sole,’ kiavou. 44Ni seta eri kikevou aṉa kasi, ‘Lekasa, noi keru inio eṉeta ṉe ṉeve ṉoko luapo, ni kabare elo, ni lipilipito ni solemauru elo ni verepo ni pirito pade kale elo, ni pui ṉeba tauveṉe?’ kikevou. 45Nio aṉa voa Lekasa lala ta a mati tiorikou ni eri kiavou sekasi, ‘So keru me meda va lupaovi keru tauvevo kala olaquala maba, meta meda la lupaovi inio tauvelo aṉa,’ kiavou. 46Nio soama ruqe ama maba poso inio ke kovo amu ko noqola kama tolailo, melai se sidopu amu ta ke ziovou noqola kama saevo kale,” kiolake vo Jisu.
Currently Selected:
Matiu 25: BLBNT
Highlight
Share
Copy
Want to have your highlights saved across all your devices? Sign up or sign in
The New Testament in the Bilua language, Solomon Islands © The Bible Society of the South Pacific, 1995.
