Matiu 27

Se Jiu ama tanatanamu ko vati zio vo Jisu Paelati kasi

(Maka 15:1; Luke 23:1-2; Jone 18:28-32)

1Omadeu vikale koko raneo kale se raura kama siama madu ni se Jiu amu ko tanatanamu ta keva nakanakatatake vo Jisu tu ke vouvaevo vo. 2Sole seta keta va piriekake voko ṉase ni ke vati olake ni kepa vaevake vo Romu ala Qavuna Paelati ko pade kasi.

Jiudasi ko vouvailo o ṉavi

3Nio so keru vo Jiudasi vo o saiqoriveni vo Jisu ta okai nianiiake ta Jisu ta ke vouvaevou, nio vota matu duki ota evake, ni opa vaitoekake koa zouke toni takula se raura kama siama madu ni tanatanamu kasi, 4ni eri kiolake, “Aṉata boutare a ereka ako a jaiqoriva sole nea inobe ala maba,” kiolake. Ni seta ke vati tiorikake ni eri kikelake, “Eṉeta puliako pa kiṉevou, kota ṉo ṉaviko rana inio,” kikelake, 5Ni vota okai sabailatake koa takula Jelepade kale. Ni o vaemake se, ni ota olake rouraole o ṉavi.

6Nio se raura kama siama madu ta ke niaquekake koa takula ni eri kikelake, “Komia takula ta maba ko dara ko takula, sole vo Mosese ko Bazu kale ta tabu tu animeta me vaekou komia takula Jelepade ko takula me vaekakoi,” kikelake. 7Nio seko omadeu vatolo kale nio seta ke tatabaraekake ko kekai nokaekema miduku, “Raro o Erekani ko Miduku,” tu kota ke lipiani ko niami kaqe ko elou. 8So keru azo inio seta kekai nokaekake koa miduku ta “Dara ko Miduku” ti kobeta baroa erisaṉa. 9So inio vo poropita Jeremaea ko riki kikovevo ta tuvevo ko eva, ko eri kikovema, “Se Izireli qoqono ta ke kovou koa zouke toni takula ko male tu kevai tatabaraeko voa maba ka kikevema, 10ni seta kekai iruruputou koa takula tu ke tatabaraeko vo raro o erekani ko miduku, omadeuvo vo Baṉara lati kiovevo aṉa,” kiolake.

Paelati ko kuimaevo vo Jisu

(Maka 15:2-5; Luke 23:3-5; Jone 18:33-38)

11So maqa vo Jisu ta o lojoake vo Paelati Romu ala Qavuna ko tanama kale, ni vo Paelati ta o kuimaevake vo ni eri kiolake, “Ṉo inio se Jiu amu vo Aikovakova ṉa kio?” kiolake. Nio Jisu ta o vati tiorikake ni eri kiolake, “Tuvevo ṉo kiṉolani jari,” kiolake. 12Melai so keru se raura kama siama madu ni se Jiu amu ko tanatanamu kevai kuirike keru, vota puliama voko opato. 13Nio Paelati ta mata eri kiolake vokasi, “Ṉota pui ṉoda ma viqa matu kubo quli se keṉai kuirikako quli kio?” kiolake. 14Melai Jisu ta pui o pesiake, sole vo Qavuna Paelati ta ota matu vuzeike.

Jisu ta o vouvou

(Maka 15:6-15; Luke 23:13-25; Jone 18:38—19:16)

15Kiadama Alokato ko Ṉojola keru Romu ama Qavuna ko kalo ta ke saqorivou kala pirito pade kale o evani se maba poso keva zariovo ala. 16Nio koa taku keru ta inevoana kala maba pirito pade kale o ṉi ta Jisu Barabasi ni vota kiadama maba kevai nianiiani. 17Nio so keru sea vaki ke padoiva keru, vo Paelati ta o kuimaemake se ni eri kiolake, “Lala pado inio meta mevai zaria tu aṉata a mela rupasivou, Jisu Barabasi ma Jisu vo Baṉara o soroevani Pakio keva nokaekani?” kiolake. 18Ako Paelati ta obe kai uria nianiia ta seko va konoilo kale inio se Jiu amu ko tanatanamu ta ke vati keve vo Jisu vokasi sole.

19Nio so keru vo Paelati obeta papua keru voko titizato ko papupapu topi, voko reko ta ko soroekake ko bazu vokasi ni eri kikolake. “Ṉota pulia quli ṉo erekou voa sidopu ala maba kasi, ako aṉata a uloitivala vo raisi ipu kale, ni koa uloito ta ko niumaekala aṉako kerukeru sole,” kikolake.

20Melai se raura kama siama madu ni se Jiu amu ko tanatanamu ta ke zuruzuruemake sea vaki tu ke bazuevo vo Paelati tu oma rupasivo vo Barabasi, ni Jisu inio ke vouvaevou. 21So keru inio Paelati ta mata o kuimaemake sea vaki ni eri kiolake, “Lala pado nioqi azo inio meta meva zaria tu aṉata a mela rupasivou?” Nio sea kiadamu ta ke vati tiorikake, ni eri kikelake, “Barabasi!” kikelake. 22Nio Paelati ta mata o kuimaemake se ni eri kiolake, “Loma quli kio aṉata a erekou vo Jisu vo keva nokaekani vo Baṉara o soruevani Pakio?” Melai seta eri kikelake “Patoevomo!” kikelake. 23Nio vota mata o kuimaekake, “Melai loma quli sarueko ikio nea maba o erekako?” Nio seta mata ke matu upaupatake ni eri kikelake, “Patoevomo korosi topi tu o vou!” kikelake. 24Ni vo Paelati ta o keake ta pui opa roveovou dokolimo se ni seta keta matu korakorailou ni keta niumaniumatou, sole vota opa koake ko ju, ni o pusaekake voko ṉase sea vaki ko ubutiania, ni eri kiolake, “Aṉata pui kuiripato salala aba elou nea maba ko voukale avo! Melai kota me ṉaviko vatolo ikio,” kiolake. 25Nio sea vaki ta eri kikelake, “Uri, vaeka tu koko tapata nea maba ko vou ko ta eṉe ni eṉeko meqora poso melai komai kuirizio,” kikelake. 26Sole vo Paelati ta oma rupasivake vo Barabasi. Ni vota o katimake vo Jisu se solodia madu tu kepa pazovo vo ni kepa patoevo korosi topi.

Se solodia madu vai balebaleito vo Jisu

(Maka 15:16-20; Jone 19:2-3)

27Ni vo Paelati ko solodia madu ta ke vati olake vo Jisu Qavuna ko matu pade ko tianiama vota kale, ni sea kiadama solodia madu ta ke aramuvake vo. 28Ni seta keta va ivikake voko sabosabo ni kevai kiakake rosi ama diri sabosabo, 29ni seta keva viriviriekake ko tarapae kada sama siakona kale ni kevai kiakake voko lezu topi, ni ke kativake ko daṉa tu o noqoeko voko palo rana ṉase kale. Sai kazo seta keva iqeiqeake ni keva balebaleitake vo ni eri va kikelake, “Raurai se Jiu amu vo Aikovakova ṉa,” kikelake. 30Ni seta kevai supatake ni keta va pazokake o lezu daṉa kale. 31Nio ke paikake vai balebaleito saita inio seta mata keta va ivikake koa rosi ama sabosabo ni kevai kiakake mata o ṉaviko sabosabo. Ni ke vati olake tu kepa patoevo korosi topi.

Seko patoevo vo Jisu korosi topi

(Maka 15:21-32; Luke 23:26-43; Jone 19:17-27)

32Ni so keru seke vati ola keru, seta ke toraevake kala maba Sairini ala o ṉi ta Saimone, ni se solodia madu ta ke zuruzuruevake vo tu o boriko Jisu ko korosi. 33Ni seta ke baroake kama pado zaekale koko ṉi ta Qoloqota, ni koko kio ni kalo ta “Reikareika kama Lezu ko Zae.” 34Ni sai nio seta ke kativake vo Jisu ko vaini ko ju, meresini ke kati valuvaluekema, tu siru kota va naitiko voko tupu, tu pui o lainikou koa matuma tola kikelake. Melai vota o madoekake pala ti ota lupaoke nozueko.

35Ni sai nio seta ke patoevake vo Jisu korosi topi. Koko tova inio seta kekai puarikiniake vo Jisu ko suma seko kai daisimato kale. 36Ni koko tova inio seta keta papuake sai ni ke vati vaitake vo Jisu. 37Ni seta ke vaeke ka pado bazu, ko quli se kevai kuirikako, voko korosi topi. Ni koa bazu kikolani ta eri, “Nei nio vo Jisu se Jiu amu vo Aikovakova.” 38Ni seta ke patoekake omuqa kuilokuiloa nioqa omuqa korosi topi Jisu sate, kala ta voko palo rana ni kala ta voko made rana.

39Ni so keru se maba poso ke alokata keru sai, seta keva uriuriana putake, ni kevai balebaleitake vo Jisu, 40ni eri kikelake, “Ṉo inio ṉo biresukou ko Jelepade ni zouke ṉaniu kale mata ṉo dova orumukou kiṉolani ṉa! Sole pakiovi ṉo ṉavi, vo Baṉara vo Meqora ṉa ṉo elou ta! Ni saqore koa korosi topi azo!” kikelake. 41Ni omadeuvo jari mata se raura kama siama madu ni se Mosese ko Bazu kekai nianiiekateni ni se Jiu amu ko tanatanamu melai keva balebaleitake 42ni eri kikelake, “Edolomu inio o pakiemani, ta noi sole inio pui o pakia o ṉavi! Melai vota o saqora koa korosi topi azo tea animeta eri nio kimevou, ‘Koe, tuvevo vota se Izireli amu vo Aikovakova,’ nio kimevou. 43Ako vota tuvevo o ivani vo Baṉara, kiolani, ni okai nokaivani Baṉara vo Meqora. Sole me velo, Baṉara ta obe pakievou vo ma pui,” kikelake. 44Ni omadeuvo jari pado nioqa omuqa kuilokuiloa nioqa ke patoekeni nioqa Jisu sate nioqako omuqa korosi topi melai qo ruqeruqe kasevake vo.

Jisu ko vou

(Maka 15:33-41; Luke 23:44-49; Jone 19:28-30)

45Ni ṉadale inio kutumana ta ko boulukake koa Jerusalema ko pado ama levoano,#27:45 koa Jerusalema ko pado ama levoano: Komi ko Quriki pesio ta ikoana mata omuqama koko pepepepeli ta ‘kiadama peuru ma peuru kale.’ zouke aoa tiniavo, ti kobe kai baroake matu sebiviuru keru. 46Ni matu sebiviuru keru inio Jisu ta ota velavelaoke ni eri kiolake, “Eloi, Eloi, lama sabakatani?” Koko kio ni kalo ta, “A Baṉara ṉa, a Baṉara ṉa, noi sole inio ṉo vaela aṉa?” kiolake. 47Ni kake maba poso sai ke lojoani ta keta va viqake vo kiolani, ni eri kikelake, “Koe! Vota o nokaeva vo Haija,” kikelake. 48Ni kala se azo ta o rereake, ni opa koake ko kuna zaute ni o duluekake paza kama vaini jukale, ni o ikake ore ko kata topi ni ova okekake vo Jisu tu vota o kuzueko kiolake. 49Melai kake ta eri va kikelake, “Taruane saita, tu me velo esa Ilaija inio o kilou nio opa tauvevou,” kikelake.

50Ni Jisu ta mata ota tova velavelaoke ti obeta vouvake inio.

51Nio ko Jelepade kale ama suma otu ta omuqa teze kota evake, koko okate azo ko tanita ti ko raki kale. Ni ko miduku ta kota vezovezokatake, ni ripi ta kota potapotasiake, 52ni ko niami poso ta kota veukaziake, ni kubo madu vo Baṉara ko maba madu ta keta tova saevake. 53Ni seta ke vaekake ke ṉaviṉavi ko niami, ni Jisu ko mata saevo voukale azo ko tova inio seta ke olake Jerusalema, Baṉara ko Tabu ama Peuru kale, ni kubo madu ta ke uria meake se.

54Ni so keru se solodia madu ni sevo kuleto ala kebe vati vailani vo Jisu ke kea keru ko nunu ni kiadama quli sai ko ereima, seta keta matu ṉavaike ni eri kikelake, “Koe, matu tuvevo nei ta vo Baṉara vo Meqora tivoine!” kikelake. 55Ni kake rekoreko melai sai ke vati vaitake vo Jisu vaṉʼazo, ni se inio ke lulueveni vo Jisu Qalili ni ke tauveveni. 56Ni kake sea rekoreko azo ta Maqidalama Mere, ni Mere Jemisi ni Josepa ko niania, ni vo Zebeti ko reko.

Josepa Arimatiala ko mutavo vo Jisu

(Maka 15:42-47; Luke 23:50-56; Jone 19:38-42)

57Ni inelala kio keru inio kala batiro ala maba Arimatiala ta o baroake Paelati kasi, o ṉi ta Josepa, ni vo melai kala vo Jisu o lulueveni. 58Ni vota o amaqeake Paelati ko kuleto ni opa pasekake vo Jisu ko tupu vokasi. Ni vo Paelati ta ova zariekake ni o bazuemake voko solodia madu tu ke kativo Jisu ko tupu vo Josepa. 59So inio Josepa ta opa saqorikake Jisu ko tupu, ni o sudekake vairu ama matu uri ama suma kale, 60ni opa vaekake o ṉaviko niami keaka kale, ko ikio koa keaka o ṉaviko ka kiovema, ko o roitikema lado kale. Saita inio vota o bekolikake ka pado matuma lado koa niami keaka ko veutu tona ni ota olake. 61Ni ko Maqidalama Mere ni ka pado Mere ta qopeta papuake sai koa kea ko veutu ko ijatinia.

Se solodia madu ko kati vaito ko kea

62Ni koko raneo kale Sabati ṉaniu kale nio se raura kama siama madu ni se Parese madu ta ke padoivake Paelati kasi, 63ni eri kikelake, “Lekasa, eṉeta ṉebe kerukerueko nea lipalipa kala maba kiovevo vo saevola keru, ako eri nio kiovevo sole, ‘Aṉata mata a jaevou zouke ala ṉaniu kale,’ kiovevo sole,” kikelake. 64“So sole ṉota ṉo bazuemou ṉoko pazokinio ko maba madu tu seta ke kati vailou koa kea ti zouke ama ṉaniu kobeta barolou, ako voko disaipeli madu ke ziokale sole kuilikole voko tupu, ni ke lipalipaemo kale sole se maba poso ta vota ota saevala voukale azo. Ako komia lipalipato ko ruqe ta kokai paloasou inio voa maba ko kuleto ama lipalipato sole,” kikelake. 65So inio vo Paelati ta o bazuemake voko solodia madu tu kepa kati vaito koa kea. 66Ni se solodia madu ta ke olake ni kepa vinaekake koa lado tibulu ni ke kati vailake koa kea.

Currently Selected:

Matiu 27: BLBNT

Highlight

Copy