Maka 3
3
Jisu ko urikivo lepu ṉase ala maba
(Matiu 12:9-14; Luke 6:6-11)
1Ni Jisu ta mata ota olake ilusato ko pade kale, ni sai ta inevoana kala maba lepu ama ṉase sala. 2Ni kake maba poso ta inisiana sai se kevai zariani vai kuiriko ko ruqe vo Jisu. So sole seta ke vati vailavailaike vo Jisu tu keta va kelo esa vota o urikatou Sabati ṉaṉiu kale. 3Nio Jisu ta o nokaevake nea maba ni eri kiolake, “Ṉota kua koi tu pa loje koi kuleto,” kiolake. 4Sai kazo inio vota o kuimaemake sea maba poso, ni eri kiolake sekasi, “Loma ikio vo Mosese ko Bazu ko mela zariekake anime tu me ereko Sabati ṉaniu kale? Ko mela zarieka ko tauvezato ma ruqe ereko? Ko mela zarieka ko maba ko saevo pakieko ma niumaeko?” kiolake. Melai seta puliama kama ruku ke erekake. 5Ni Jisu ta o meake se ni omai korakoraivake, ni mata duki ota evake, ako seta matu meomeo kamu ni keta saruiva sole. Nio Jisu ta eri kiolake voa maba kasi, “Ṉota totozika ṉoko ṉase,” kiolake. Ni vota o totozikake ni kova pizatake koa ṉase. 6Ni koa taku kale inio se Parese madu ta ke vaekake koa ilusato ko pade ni kemai zomanake kake se vo Herodi#3:6 Ṉota kea Herodi Anitipasi dikisonare kale. ko poqala kale amu, ni seta ke erekake kama korokorotato tu ke vouvaevo vo Jisu.
Matu kubo maba madu ko padoilo toupa ko keta kale
7Nio vo Jisu ni voko disaipeli madu ta ke vaekake koa matu peuru ni keta olake Qalili toupa kasi, ni matu kubo vaki ta ke luluevake vo. Seta ke kuevani Qalili ni Jiudia azo, 8ni Jerusalema ni Idumia ko ketaketama sasa peuru poso kale azo, ni Jodani sukuru ko ṉaniu o peatakoi vasia ranama peuru poso kale azo, ni Taea ni Saidoni omuqa matu peuru ko ketaketama sasa peuru poso kale azo. Nia kiadama maba poso ta ke kuevake Jisu kasi ako seta ke viqake sole vo Jisu o erekako iruruputo. 9Nia maba poso ta matu kubo madu sole vo Jisu ta o bazuemake voko disaipeli madu tu keva inainaeko ka pado koaka, tu nia vaki ta pui ke zaitikiniou vokasi. 10Ako Jisu ta o urikimake matu kubo maba poso ni seke verepani ta ke ibaibaekiniake tu ke noqoevo vo sole, 11Ni kiada keru se ziolo komai onobatani ke vea keru vo Jisu, seta keva iqeiqea vo ni ke upaupata ni eri kikela, “Ṉo inio vo Baṉara vo Meqora ṉa,” va kikela. 12Melai vota o riqaekake koa ziolo poso tu pui kevai bazuto noni ala maba inio vo Jisu.
Jisu ko pitoemo toni omuqa apositolo madu
(Matiu 10:1-4; Luke 6:12-16)
13Ni vo Jisu ta ota kailake sopu kale ni vota o nokaemake se maba poso o ṉavi omai zariani, ni seta ke olake vokasi. 14Ni vota o pitoemake toni omuqa madu se vo apositolo ma kioveni, ni vota eri kiolake sekasi, “Aṉata a bitoemela me tu meta me luluelou aṉa, ni meta me bazubazutou, 15ni aṉata a qatimelou ko pizato tu me rerikou ko ziolo,” kiolake. 16Nio ni nio sea toni omuqa vo o pitoemeni ko ṉi poso. Saimone, vo Jisu ovai nokaekeni Pita. 17Jemisi ni vovo visi Jone, Zebeti ko meqora kidi vo Jisu okai nokaekeni nioqa Boanegesi, ni koko kalo ta aukale ama paka ko maba kidi, ako nioqata kapia korakoraiva nioqa sole. 18Ni Aduru, Pilipi, ni Batolomiu, ni Matiu, Tomasi ni Jemisi vo Alepiasi vo meqora, Tadiasi ni Saimone vo oka zariovini rupasimo Izireli qoqono Romu ko vailo kale azo, tu ke ṉavi ke lojolou, 19ni Jiudasi Isikarioti, vo Jisu o saiqorivo ala.
Jisu ta piza kama pizato sala ovai paloasa vo Setani
(Matiu 12:22-32; Luke 11:14-23; 12:10)
20Ni vo Jisu ta mata ota vaitake pade kasi. Ni so keru inio matu kubo vaki ta kevai kuevake ni ke aramuvake vo. Sole Jisu ni voko disaipeli madu ta puliama taku ke koake tu ke vuato. 21Ni so keru Jisu ko saidi kale amu ke viqa keru voko pui vuato sama bazu, nio seta ke olake tu kepa odievo vo, ako seta “Ota sarube puta inio vo,” kikelake sole. 22Ni kake vo Mosese ko Bazu kekai nianiiekatani seke kuevini Jerusalema azo ta eri kikelake, “Nea maba ta vo Setani#3:22 Setani: Quriki pesio kale ama riki kale ta edoloma ni ‘Bielzebulu’ kekai nokaeke vo Setani. inio ovai onobata. Vo Setani ziolo poso vo lekasa inio o kativa vo ko pizato inio o rerika ko ziolo,” kikelake.
23So sole vo Jisu ta o nokaemake sea maba poso tu ke kilo voko sipole, ni vota o nianiiekimake se podepodeti kale ni eri kiolake, “Noni kale inio vo Setani ta o ṉamumou voko vaki? 24Ni kama pado toutou kale ama maba poso ta omuqa pitasa ke elou ni ke pazopazokiniou ke ṉavio kude, ta koa toutou ta pui kopa pizatou. 25Ni kama saidi ta ke pazokiniou ke ṉavio kude ta koa saidi ta pui kopa uria elou. 26So jari nio vo Setani ko lekasa puilo kale amu ta ke pazokiniou ke ṉavio kude ta koa lekasa puo ta pui kopa pizatou, melai keta pitasiovou. 27Ni puliala maba inio opa roveovou amaqeo kala piza kala maba ko pade kale tu ota va kuilikou voko lomaloma, melai vota o pirievou voa piza kala maba kuleto, saita inio vota ota va kuilikou kiadama voko lomaloma. So jari nio aṉa. Aṉata pizato salala tu koqo a ivo vo Setani ni voko vaki. 28Aṉata a bazuemela me, vo Baṉara ta ota roveovou tamela akoeko meko boutare poso, ko meme erekako, ni ko ruqeruqe ama pesio ko meme rukuekako. 29Melai vo ruqe kasevo o elo ala vo Tabu ala Auvana ta pui kopa tava akoilou koa sarueko, ni vota noqola kama sarueko sala.” 30Vo Jisu ta so ma kiolake se ako kake ta kevai kuirikake ta kala ziolo inio ovai onobata vo sole.
Jisu ko niania ni visi poso
(Matiu 12:46-50; Luke 8:19-21)
31Ni Jisu ko niania ni visi poso ta ke baroake sai ni ke lojoake pade ko kupekupe, ni ke soroekake ko bazu tu o saqoro vo Jisu sekasi. 32Ni matu kubo vaki nio kebe vati papuake vo Jisu, ni seta eri kikelake vokasi, “Keatini ṉoko niania ni ṉo visi poso ta kupele ni keṉai zaria ṉelo ṉo,” kikelake.
33Nio vo Jisu ta o mati tiorikake se ni eri kiolake, “Lama ikio aṉako niania? Ni lave inio aṉako visi poso?” 34Ni vota o toiritoirimake sea maba poso o mati papuani ni eri kiolake, “Nia maba poso, se inio aṉako niania ni visi poso. 35Ni kala vo o ereko ala vo Baṉara oka zariani tu vota o ereko, vo inio aṉavo lasive ala visi, ni aṉako reko ama visi, ni aṉako niania,” kiolake vo Jisu.
Currently Selected:
Maka 3: BLBNT
Highlight
Share
Copy
Want to have your highlights saved across all your devices? Sign up or sign in
The New Testament in the Bilua language, Solomon Islands © The Bible Society of the South Pacific, 1995.
