Génesis 22
22
Yai Bada tänö Ablaamö
a bufi lä wabano wei tä a̦
1Tä nö fa dedeblalunö, Yai Bada tänö Ablaamö a bufi wabama.
—¡Ablaamö! —a cuma.
—¡Aö!
2—Ijilufä wa moli lä tabole, Isaacö a lä cui, wa lä nofimaö wei, wa fa nocamalänö, Molia tä ulifi jamö a ca̦i da alufälö. Tä ulifi lä jefubö wei jamö wa ca̦i fa waloicunö, ya jefu lä jömaö wei jamö wa ca̦i fa dolequebofälönö, camiyä nija a da dodobojolu. Yalo bä ö̦shö dodobou lä cuaaö wejeinaja, wa dodobou cuo mö feduobä —a nowa tama.
3Inaja a nowa tama yalo, Ablaamö a la̦a fa fenalönö, Yai Bada nija a nia lä dodobono wei a ö̦shömabä, a̦yobä bälalema. Ji̦ima bulo a ja, a̦yobä yefimaquema. Cama fiya bolacabö ecöbö fa nacalänö, bei ijilubö Isaacö a ca̦i nacalema. Ö̦jö däjä, Yai Bada tänö tä a̦fa ulifi lä tano wei jamö bä jubä, Ablaamönö bä ca̦i bluca aa showalayoma.
4Bolacabö bä fa miicufälönö, bä juu lä co̦ono wei däjä, ya̦cumö Ablaamönö tä möö fa balömonö, bä jefu blajawä dalalema. 5Ö̦jö däjä, abinaja Ablaamö a cuma, fiya ecöbö nija.
—Eja bulo wafä a ca̦i loo juo däjä, quijamö u̦asimi sho, Jeobaa nija yalo yafä a ö̦shö dodobou balöojolayou. Ö̦jö däjä, eja cafä wafäcö nija, yafäcö waloa co̦queyoluu —a cuma.
6Inaja a fa cunö, co̦wa a̦yobä fa dälänö, bei ijilubö Isaacö nija a̦yobä bäshäcu o̦cama yalucumaquema. Cama Ablaamönö cowa wacö fa dälänö, sibala a ca̦i fa dälänö, cäcöbö aa co̦layoma.
7Isaacönö bä fö̦ö e wa̦lifälöma.
—Fabe.
—¿Wedi cätä, U̦asi?
—Fabe. Cafänö cowa wa wacö ma tabole ma cui, ei co̦wa ya a̦yobä ma yalucubole ma cui, bäfä a ö̦shö nia lä dodobou wei, ¿wedi jamö oweja bei a li ocalo?
8—U̦asi. Yai Bada nija oweja bäfä a wai ö̦shö nia lä dodobou wei, camanö a jöböaö wä. Cama Yai Bada tänö bäfäcö dobäö weicätä —Ablaamönö a nowa fa tanö, cäcöbö dolequea showabefälöma.
9Yai Bada tänö tä a̦fa ulifi lä wäyäno wei jamö, cäcöbö fa waloicunö, Ablaamönö maa mabä yododomaquema. Mabä fa yododomacönö, ö̦jö mabä feyaca jamö, co̦wa a̦yobä maquequea feyacalema. A̦yobä fa maquequelönö, maa mabä jamö a̦yobä lä maqueono wei jamö, bei ijilubö Isaacö a fa o̦cablalönö, a maquea feyacaquema.
10Ö̦jö däjä, Ablaamö imicö fa waliblaicunö, bei ijilubö a shäbä sibala a fa ucälönö, a yalejedalema. 11A ma yalejedaleno wei ma cui, fedu jamö culanö, Jeobaa a wa̦ a̦jele bädaliyoma.
—¡Ablaamö! ¡Ablaamö!
—¡Aö!
12—¡Ijilufä a famima dijä! ¡A taama dijä! Ijilufä wa moli lä tabole, camiyä nija wa noshi umabou fa mlacunö, bäfä bejedi malä dablale. Camiyä Yai Bada ya lä cui, wale nö quili malä taö wei —a cuma.
13Ö̦jö däjä, Ablaamönö tä möö fa cuaanö, yalo oweja a wa̦lo ja̦a dalalema. Baimi defi bococu ja yo̦lacö ja̦o däjä, a jucäo doblonomi. Ablaamönö a nabä icua fa showadaicunö, a juwälema. A fa shälönö, Jeobaa nija a ö̦sho dodobou showadaoma. Bei ijilubö e ö̦shö nia ma dodobono wei ma cui, yalo a yai ö̦shö dodoa majöquema.
14Inaja tä cublaliyoma yalo, Ablaamönö tä a̦fa ulifi jilaquema. Jeobaa nija täbä dobämou wä, tä a̦fa ulifi jilaa showadaquema. “Jeobaa etä balöcö jamö, täbä dobämou wä”, täbä cuu malä showai.
15Fedu jamö culanö, Jeobaa a wa̦ a̦jele bädou fa co̦lonö, Ablaamö nija a wa̦ fama. 16Abinaja a cuma.
—Jeobaa ya wa̦no wäyäö lä cule. Abinaja cafä nija a cuu. “Ya wa̦ nö wäo lä cule. Bejedi lä ya wa̦, Jeobaa ya malä cui. Inaja wa cuaama yalo, ijilufä moli wa tabou ma cule, wa noshi umabonomi yalo, 17bejedi lä bäfä bayeliblaö dodijio weicätä. Afä ya bä nodiwä fa balamalönö, bä nia blucablou dodijio. Fedu jamö shidicali bä nö wabamobimi lä culenaja, modu u casö jamö mlaca mlaca bä nö ca̦i wabamobimi lä culenaja, inaja afä bä nia nodiwä cuo mö feduo. Täbä nö lä nabämou wei täbä fa yashublalöjenö, bä nia bälöo lojodoo juo. 18Abinaja ca̦i. Camiyä wale a̦ juama yalo, bluca bä bälöjöwä lä yaiblai bä ma cui, ijilufä ebä nodiwä nija, ö̦jö bä nia bayeliblamou mö feduo”, a cuma.
19Inaja tä fa cuonö, cama fiya ecöbö nija, Ablaamönö Isaacö a ca̦i waloa co̦quema. Ö̦jö däjä, Beeseba jamö, bä bluca co̦a co̦layoma. Ö̦jamö Ablaamönö cama ebä ca̦i bälöo yanöcöa co̦aliyoma.
Nacolo bei ijilubö
ebä lä cublaliyono wei tä a̦
20Ö̦jamö Ablaamö a bälöa fa co̦icunö, Ablaamö nija bei fääshä e a̦fa wäyäjolomaje, Nacolo a lä cui. Micla nija, Nacolo bei ijilubö ebä lä cublaliyono wei bä a̦fa wäyämaje. 21Bei ijilubö jaba a lä cui, Usu a wa̦fa jo̦wa cuoma. Ö̦jö a nojamö, bei fääshä Busu a jo̦wa cublou nomöjölayoma. Ö̦jö däjä, Quemoeli a jo̦wa cublou nomöjölayoma, Alamö bä fö̦ö e lä cui. 22Ö̦jö a mabucabö jamö, ei bä bluca cublou nomöjölayoma. Quesede, Aso, Bidasi, Jidafo. Ö̦jö bä nojamö, Bedueli a wawäblou nomöjölayoma, 23Lebeca bä fö̦ö e lä cui. ¿Ö̦jö tawä? Micla nija, Ablaamö bei fääshä Nacolo bei ijilubö 8 ebä cuoma. 24Ö̦jö bä shino mlai, ai a suwä mö feduwä nija, ai ebä cublou mö fedulayoma. Leuma a lä cui nija, bei ijilubö ai ebä ca̦i taa mö feduaquema. Deba, Caamö, Daasi, Maaca bä lä cui, Leuma nija ebä cuo mö feduoma.
Currently Selected:
Génesis 22: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
