Lucas 7
7
Bada a nosie juamobä
e lä jalomaleno wei tä a̦
1Jesúsnö bä damaö fa jödödöblalunö, Cabenao jamö a co̦blaliyoma. 2Ö̦jamö sodado 100 bä ca̦i lä cuono wei a Lomateli bada bälöoma. A nosie juamobä e wa̦lo taboma. A nofimaö dodijioma. Ö̦jö e lä cui e fa jalililalunö, e nomaö ajedeoma. 3Ö̦jö däjä bada a lä cuinö, Jesús a wa̦fa juu fa ji̦lilänö, judio bada bä shömölema, a nacabeje. A nosie juamobä e lä jaliliono wei e jalomayolubä.
4Jesús nija judio bada bä fa waloicunö, a nacablalamaje. Bä a̦ fe blacäjou ja, abinaja bä cuma.
—Ö̦jö lä a bada lä cui, wa bayeliblabä a waiquiwä. A dodijaö. ¿Ö̦jö tawä? 5Judio bämalecö malä nofimaö wei. Yamacö yododabä a yafi tablalema —bä cuma.
6Ö̦jö bä nija Jesús a nocaa showalayofälöma. Ö̦jö ma cui, Lomateli bada e yafi jamö a ajedoimaö ja, cama nofi ebä shömöa mö baquema, a wa̦no wäyäbeje. Abinaja Jesús a nowa tamaje.
—Bada tä. Sodado bä ca̦i lä cule yama a wa̦no taö. Wa yabäcaö bufiomi. Wa nö jo̦wa yafimabimi. A quilii. “Wale bayeliblabä yami”, a bufi cuu. Judio a malä mlai. 7Ö̦jö cudeenö, cama a icuo showadao mlai, camiyä yamalecö shömöa lälema. Eja culanö ma cui, wa wa̦ blajawä famaö bufii, a nosie juamobä a lä cui, a jalou showadaobä. 8¿Ö̦jö tawä? Täbä nosie lä juaö wejei tä malä dale. Cama bada ebä lä cui ebä a̦ juaö. Inaja showawä, cama a nosiemou ja, sodado ebä ca̦i lä cule ebänö a wa̦ ca̦i juaöje. Ai a shömaö ma cui, ai a nacaö ma cui, a wa̦ juaö si ijejeweje. A nosie juamobä a lä tabolenö a nosie ca̦i juaö showadao malä cui —Jesús a nowa tamaje.
9Ö̦jö bä a̦ ja, sodado 100 bä ca̦i lä cuono wei a nija, ¡bejedi lä Jesús a bufi doblaloma! A mö fa yabadalunö, bä bluca lä nocaono wei bä nija abinaja a cuma.
—Cafä bämacö nowa taö lä cule —a cuma—. Quiji Lomateli a lä cuinö wale nofi mölabou lä culenaja, Isaeli wama ecö nija, moli ma cui ya dablaö bädaami —a cuma.
10Ö̦jö däjä, bada anö bä lä shömöleno wei bä co̦a showalayoma. Bä fa co̦bonö, bada a nosie juamobä e lä jaliliono wei a lä cui, a demi dalalejelomaje.
Fiya a demi lä
jocädamaleno wei tä a̦
11Tä nö fa dedejedalunö, Naini tä a̦fa shabono lä cuono wei jamö a Jesús juu majöoma. Cama ebä lä nocamabono wei bä ma cui, ai bä bluca lä co̦caono wei bä ma cui, cama nija bä bluca yaua showalayofälöma. 12Nainiteli bä beibö yoca lä joleono wei jamö bä blacäö däjä, yafiteli bänö nomawä a ca̦i faa mö balayomaje.
A lä nomalayono wei bä fö̦ö e fa nomalönö, bä nöö e yamiblaliyoma. Ai ebä ijilu ca̦i cuonomi. Ö̦jamö bä lä bälöle bä bluca fa co̦camolunö, a nomöa bolajenö a suwä ca̦i jumaje. 13¿Ö̦jö tawä? Bada tänö a suwä fa dalalönö, a nofi ojodadalema. Abinaja e cuma.
—Ami. A ö̦cö dijä.
14Ö̦jö däjä, a fa ajedeblalunö, a besi nomawä jubama. A nomawä ca̦i lä juno wejei bä yanöcöquema. Fiya nomawä a nija abinaja Jesús a cuma.
—¡U̦asi! Cafä nija ya wa̦ faö lä cule. A da jocädalö —a cuma.
15Inaja a fa cunö, nomawä a fa jocäblalunö, a fa loalunö, a wa̦ fama. Ö̦jö däjä, bä nöö e nija Jesúsnö a demi co̦a co̦maquema. 16Ö̦jö tä ja bä bluca fa quililalunö, Yai Bada a nofi doablaöje ja, abinaja bä cuma.
—Camiyä yamacö nija, ¡Yai Bada a wa̦no wäyälewä a bada waloqueyoluu lä cufe! ¡Yai Bada tänö bejedi lä cama ebä bayeliblaö dodijilayoyoluu lä cufe! —bä cuma.
17Jesús a lä cuaano wei tä a̦fa wäyämou blaucuolaliyoma. Judea jamö bä bluca lä bälöblai bä nija ma cui, bä bälöa fe lä dolejeono wei bä nija ma cui, tä a̦fa wayoamoma.
Fe ojomalewä Juan a lä
cuinö Jesús a wa̦limaö
lä bufino wei tä a̦
18Ö̦jö däjä, Juannö bä lä nocamabono wei bä lä cuinö, Jesús a lä cuaano wei tä bluca ja, a yömölamaje. 19A fa yömölajenö, Juan a wa̦no wäyämobä, cama bolacabö ecöbö fa nacalänö, Bada tä nijamö cäcöbö shömölema. Jesús a wa̦liböö ja, abinaja cäcöbö nia cuma. “A nia jo̦wa lä juno wei, ¿ö̦jö cafä wa waiquiwä tawä?”, bä nia cuma. “Ma, cafä mlai, ¿ai a nia yai lä juu wei yama a nö dabou showaobä daanö?”, cäcöbö nia cuma. ¿Ö̦jö tawä? 20Jesús nija cäcöbö fa waloicunö, inaja showawä cäcöbö cuyoluma.
—Bä fe ojomalewä Juan a lä cui, ö̦jö yafä a wa̦no taö lä cule. A nia jo̦wa lä juno wei, ¿ö̦jö cafä wa waiquiwä tawä? Ma, cafä mlai, ¿ai a nia yai lä juu wei yama a nö dabou showaobä daanö? —cäcöbö cuma.
21Ö̦jamö cäcöbö cuo showao däjä, jalili bluca bä jalomalema. Bluca tä wayu shomitawä mö feduwänö bä nö lä bleaano wei bä ma cui, bä lä feculaböono wei bä ma cui, bä bluca jalomalalema. Bä lä jubäböono wei bä ma cui, bä mamocu bluca dodijidablaö co̦layoma. 22Ö̦jö cudeenö, abinaja Jesúsnö cäcöbö nowa tama.
—Wafä tä lä dalalufe, wafä tä a̦ lä ji̦liläfe, Juan nija tä a̦fa bluca da wäyäbödu. Bä lä jubäbö wei bä lä cui, bä mamocu dodjidablou co̦o. Bä juu dao lä mlai bä lä cui, bä jublou. Täbä sicö lä jodemaö wei tä wayunö bä nö lä bleaaö wei bä lä cui, bä dodijidablou co̦o. Bä yömöca lä comi wei bä lä cui, bä yömöca walalablou co̦o. Bä lä nomaö wei bä lä cui, bä demi jocädou co̦o. Bä lä jo̦li wei bä lä cui, dodijidawä tä a̦ ja, bä yömölamou. 23¿Ö̦jö tawä? Camiyä wale nofi mölabou fe lä yadio wei a lä cui, ö̦jö a bufi nia yai doblalou —cäcöbö nowa tama.
24Juannö cäcöbö lä shömöleno wei cäcöbö co̦a fa co̦lunö, bluca bä lä co̦camono wei bä nija, Jesúsnö Juan a wa̦fa wayoaö juoma.
—Ulifi bloque a jamö, ¿wedi wama tä möbä wamacö li juma? ¿Wadoli anö cau cau bä lä yalälaö wei wama bä möö bädaobä daanö? Mlaicätä. Wamacö juu buonomi.
25’Ja̦o. ¿Wedi wama tä yai nia fa mönö, wamacö li juma, ö̦jö lä? —a cuma—. Camishi dodijidawä bä ja a lä didio wei a lä cui, ö̦jö wama a nia fa mönö, ¿bei wamacö juma daanö? Ma, camishi dodijidawä bä ja bä lä didio wei bä lä cui, bä nö lä madofibö wei bä lä cui, ulifi bloque a jamö ö̦jö bä nia cuomi. Bada bä bälöo lä dodijio wei bä nija, ö̦jö bä li bälöo.
26’Ja̦o —a cuma—. ¿Wedinaja a wa̦lo cuwä wama a yai nia fa mönö, wamacö juma, ö̦jö lä? ¿Yai Bada a wa̦no wäyälewä wama a möbä mlai daanö? Awei, ö̦jö wama a möbä lä. Cafä bämacö nowa taö lä cule. Juan a lä cui, Yai Bada a wa̦no wäyälewä ai a bädawä mlai, ö̦jö bei a shino yai bada dodijiwä. 27Yai Bada etä a̦ oni jamö, Juan a wa̦fa ca̦i wäyäö balöomaje. Abinaja tä a̦ cuu.
Bei. Wa nia juu lä cuaafälöö wei jamö, wa wa̦no taö balöafälöbä, iba ya nia shömaö balöo, wa wa̦ ji̦liaö dodijidaobeje.
’Einaja tä a̦ cuu —Jesús a cuma—. 28Cafä bämacö nowa taö lä cule. Bluca bä lä bälöblai bä ma cui nija, bä jaba lä bälöjono wei bä ma cui nija, Juan nija a bada fe biyäjäobä a cuami. ¿Ö̦jö tawä? Ö̦jö ma cui, Yai Bada tänö cama ebä ca̦i lä cuo wei bä lä cui, ö̦jö bä nofi shino yai tabobeje cäbä. Ö̦jö bä nijamö a cua lä bäle a ma cui nija, Juan a nojablaliyo.
29’¿Ö̦jö tawä? —a cuma—. Täbä yömölabä, Juan a jaba wawäblou däjä, Lomateli bada bä befi bä blada lä doano wejei bä ma cuinö, ai bä bluca ma cuinö, Juan a wa̦ julemaje. Bä fe bluca ojoblamolayoma, Yai Bada tänö bä taamaö lä bufino weinaja showawä. 30Ö̦jö ma cui, faliseo bä bada lä cui bä fe ojoblamonomi. Moisesi tä a̦ ja täbä lä damaö wejei bä ma cui, inaja showawä. Yai Bada tänö bä taamaö lä bufino wei tä a̦ wailemaje.
31’Wamacö fei däjä lä bälöblai, ¿wedi tä cuwä lä dodijiinaja, bei wamacö cuwä dodijiwä? —a cuma—. ¿Wedinaja ya cubä? Wamacö a̦ juomi fe balojowä. 32Ijilu bä i̦liyamobä jamö, bä a̦ juayou lä mlainaja showawä. Nii bä luluabeje jamö, ijilu bä i̦liyamou däjä, abinaja bä cuaaö. Ai bä mashi i̦liyamou fa shomitaicunö, abinaja bä nowa taöje. “Uo. ¿Wedi tabä yamalecö a̦ li juaimi dicowä? Amowa yama fi jolaö däjä ma cui, wamacö blaö blaömoimi. Jole jole yamacö ma ö̦cöö däjä ma cui, wamalecö a̦ ca̦i bayeliblaimi”, bä nowa taöje. Ijilu bä i̦liyamobä jamö, showadi einaja bä li taamayou.
33’¿Ö̦jö tawä? —a cuma—. Cafä wamacö ma cui, inaja showawä wamacö cuaaö. Wamacö a̦ juomi fe balojowä. Fe ojomalewä Juan a lä cui, ö̦jö wama a wa̦ juano malä mlai. Ö̦jö a fa waloiquiyonö, nii a ja, a wasöoma. Nashiwä toubä ca̦i ja. A waiyoma cudeenö, “A li feculabö”, wama a nofi li taboma. 34¿Ö̦jö tawä? Juan a lä cuaano weinaja ya cuaaö ma mlai ma cui, inaja showawä camiyä ya lä yanowamöblaleyoluno wei ya lä cui, wamale a̦ ca̦i ji̦liblaimi cuwä mö feduwä. Camiyä ya fa waloiquiyonö, ya ca̦i waiyo mlai ja ya iyaö showawä. Bei ya toubä ca̦i coaö. Ö̦jö ma cui, wamale a̦fa ca̦i wayoaö mö feduwä showawä. “Showadi a iyadii”, wamacö cuu. “A shi wa̦lii bufi fa doblaonö, toubä coadii”, wamacö cuu. “Lomateli bada bä befi bä blada lä doaö wejei bä ma cui, wa̦lidiwä talewä ai bä ma cui, ö̦jö bä shino nofimadii”, wamacö cuu. ¿Ö̦jö tawä?
35’Inaja wamacö ma cuu däjä ma cui, Yai Bada a wa̦ moyawe. Ö̦jö a wa̦ lä cadidibou wejei bä bluca lä cuinö, a bejedi dablamaöje —a cuma.
Suwä a nija tä nowa
lä mladamaleno wei tä a̦
36Cama nija a nö liyobä, faliseo ai a badanö Jesús a nacalema. Ö̦jö cudeenö, ö̦jö e yafi ja a fa falönö, bä iyaö ca̦i loobä jamö a cuquema.
37Faliseo e yafi jamö Jesús a wa̦fa iyaö fa ji̦lilänö, ö̦jöteliyoma a doblou lä mlai a waloquema. ¿Ö̦jö tawä? Toubä nö lä cle̦deli wei toubä ca̦i besi waloquema, toubä nowa bluca lä dodijii. 38Jesús matacö mö cuobä jamö a ublaqueyoluma. Ö̦jamö a ö̦cölanö a möfe boquema. Bei mabu ubänö Jesús mamicö jelemalalema. Ö̦jö däjä a fa loicunö, cama suwä fe̦ta ucu showawänö mamicö ya̦jöblalema. Mamicö buyucadima. Toubä nö lä cle̦deli wei toubänö mamicö fe löblalema.
39¿Ö̦jö tawä? Jesús a lä nacano wei a faliseo lä cuinö, ö̦jö tä fa dalalönö, abinaja a bufi bada cudaliyoma. “Yai Bada a wa̦no wäyälewä ei a yai cuo fa cunoja, a lä jubamole a doblou lä mlai etä nö ö̦jöböabö wei. Fei suwä a doblou lä mlai, etä nofi daimi dodijiwä yai”, a bufi cudaliyoma. 40A wa̦ juo ja, abinaja Jesús a cuma.
—Simón, cafä nija ya tä a̦ nia wäaö.
—A wa̦ da fabla, tä a̦ wäyäle —e cuma.
41Abinaja Jesús a cuma.
—Blada showadi bä lä majöaö wei anö, bolacabö cäcöbö nija bä blada majöquema. Ai a nija 500 bä bluca majöquema, bä nowa lä blucai. Ai a mö feduwä nija 50. 42Tä nowa nö co̦amabimi waiquiwä ja, bolacabö cäcöbö nija etä nowa mladamaö showalayoma. ¿Ö̦jö tawä? Cafä ¿wedinaja wa bufi cuu? ¿Wedi jamö a lä cuinö a nia yai nofimaö fe balojowä? —Jesús a cuma.
43—Abinaja ya bufi cuu —Simón a cuma—. Blada ebä co̦amabä ebä lä blucaono wei a lä cuinö a nia shino yai nofimaö fe balojoo, etä nowa bluca mladamalema cudeenö —a cuma.
—Bejedi lä wa wa̦. Wa wa̦ cadidou —Jesús a cuma.
44Ö̦jö däjä, suwä nija a mö fa yaiblalunö, Simón nija abinaja Jesús a cuma.
—¿Ei wa suwä dablaö cule? Cafänö dodijidawä wale yafimabä, ya mamicö ya̦lömobä, mau wa ubä jöböabä wa ma cui, wa ubä jöböanomi. Ö̦jö ma cui, ei a suwä lä cuinö, bei mabu ubänö wale mamicö fa jelemalalönö, bei fe̦ta ucunö wale mamicö ya̦jöblalei lä cufe. 45Dodijidawä wale yafimabä, cafänö wale nofimaö mö baono ma mlai ma cui, ei a suwänö wale mamicö malöcaö malä showale. 46Dodijidawä wale yafimabä, dabö dabö ubänö wale fe liyäyabä wa ma cui, wale fe liyäyanomi. Ö̦jö ma cui, toubä nö lä cle̦deli wei toubänö, ei a suwänö wale mamicö fe löblalei lä cufe.
47’Ö̦jö cudeenö cafä bäfä nowa taö lä cule —a cuma—. Tä doblou lä mlai ya etä nowa bluca mladamaö yalo, ei a suwä lä cuinö wale nofimaö fe balojowä. ¿Ö̦jö tawä? Ö̦jö ma cui, Yai Bada tänö wiisibö etä nowa mladamaö lä buo wei, wiisibö a nia nofimaö bädao —Simón nija Jesús a cuma.
48Suwä nija abinaja a Jesús cuu nomöjöoma.
—Wa doblou lä mlai ya tä nowa mladamaö waiquiwä —a cuma.
49Ö̦jö däjä, bä iyabä jamö bä ca̦i lä jilaono wei, abinaja bä nowa tayoma.
—¿Wedinaja cama a nofi li tamamou dicoa cule? Bä doblou lä mlai, ¿camanö bei tä nowa nia mladamaö daanö?
50Suwä nija abinaja Jesús a cuu showaoma.
—Wale nofi mölabou yalo, Yai Bada tänö wa jucäaö waiquia lä cule. A bufi yanöcöwä ca̦i da cu̦jamö.
Currently Selected:
Lucas 7: GUU
Highlight
Share
Copy
Want to have your highlights saved across all your devices? Sign up or sign in
©2012, All Rights Reserved
