MAADOCO 1

Juan Wautiita necammajäätö’jödö

1Edä yää Jesuuquidiito wätunnäi aashichaato waajäntädö, ñäädä Wanaadi nnedö.

2Edääje cömmennäi Isaía, ñäädä Wanaadi wa’deuwödö ecammanei:

Öwö, Wanaadi, yaanonö wanonta’de odhoowajo,

adheemadö choonecaaneije.

3Töcä’de dha’deddu nääta’de jata ’jemjönö aca:

“Choonecaatäcä Cajiichaana eemadö; chäämadö sha’duminchatääcä;” quee dha’deddu nääta’de; quee cömmennäi Isaía.

4Mädääje Juan Wautiita cönä’jaacä jata ’jemjönö aca, wautisaaje soto tödöödöcoomoje. Töwö töwä’döe cönä’jaacä:

—Wautisaaje ä’döjootäcä; ätö’tajäätödööcomo sha’duminchatääcä, ocoone’nadiiyöcoomo ätäncwanno’joiye; quee töwä’döe cönä’jaacä.

5Tameedä Judheea ñancomo, Jeduusadén ñancomo mmaja, töötä cönä’ja’to Juan döiña, ñeecammajäätödö eta. Tönwanno wautisaaje töwä’döjo cönä’ja’to chäwwä Joodadán ’cwawä, töcoone’nadiiyöcoomo ecammadö’jo.

6Juan womö cönä’jaacä cameeyu ’jotö töca’ajä. I’ya’mötö cönä’jaacä odoocojaato ji’jämjödö. Dhotö cönä’jaacä cödaatai. Yoocödööje cönä’jaacä wanä weccudui. 7Edääje töneecammajä’e cönä’jaacä soto wwäiñe:

—Öncäcä ne’a jäduujato, öwö ye’jodhaato. Shaajatui shaacaneije jadä’jödöödä eijai’cha wa, ye’jodhe töwö yeijäcä. 8Öwö wautisaaje männöaato tuna que; töwö mmaane Epíiditu Santo que wautisaaje ayöödöaato’de; quee töneecammajä’e cönä’jaacä Juan Wautiita.

Wautisaaje Jesuuquidiito wä’döjo’jödö

9Yääje mma yaawä Jesuuquidiito cönääma’täi Naasade ñanno, yää Caadideea nono de’wono jata. Töwö wautisaaje cönä’döjoi Juan wwä, Joodadán ’cwawä. 10Na’cwacanno töwäncudaawä Jesuuquidiito cöneeneaacä yaawä caju wata’ducaadö. Epíiditu Santo wä’tädö cöneedantäi yaawä jaduuma nönge, töde’wä yä’tädö. 11A’deu cönäätaacä yaawä caju ña:

—Önnedö umjummadö amäädä; ta’cwaiñe wa äjääcä; quee cönäätaacä.

Jesuuquidiito wä’yunaacajo’jödö

12Yääje mma yaawä Jesuuquidiito cöntämä jata ’jemjönö aca, Epíiditu Santo nanontädö woije. 13Yäätä töwö cönä’jaacä aacä soto anooto, odoocoja’como jadäiñe. Yaawä Caajuushawa cuiñunaacaacä. Yää ’jeje Wanaadi amoodedö cöni’wa’ta’to.

Jesuuquidiito waajäntä’jödö tötaadawaajui tödöödö

14Yääje mma yaawä jedeesoje Juan wä’döja’jäcä, Jesuuquidiito cöntämä Caadideea ña, aashichaato wätunnä ecammajä’ancädä Wanaadi töcaajichaanaije tödöödö jäcä. 15Töwö töwä’döe cönä’jaacä:

—Chu’nädö aca nä’döi eduuwa. Amoinche’da nä’döi eduuwa Wanaadi acaajichaanaichomooje yä’dötoojo. Ätö’tajäätödööcomo sha’duminchatääcä; ecaanö’täcä aashichaato wätunnä; quee töwä’döe cönä’jaacä.

Jesuuquidiito wwä na’cwacancomo i’yännamo a’dejja’jödö

16Caadideea cu’jäi jacääcä töötädaawä Jesuuquidiito cöneejodöi Simón, tacoono Antedé acä. Jaji emaajätöödöje cönä’ja’to na’cwaca, na’cwacancomo i’yännamooje töweijäcäiñe. 17Yaawä Jesuuquidiito cönä’döaacä chäwwäiñe:

—Ma’chomo jaadä, soto owaanomannamooje männötäiye.

18Yaawä dea mma töjaajiyööcomo cöneetömaicho; Jesuuquidiito jadä cöntonto yaawä.

19Mänseedä’cä Jesuuquidiito wöta’jäcä Jacoowo daja cöneejodöi yaawä, Seewedheeo nnedö, dhacoono Juan mmaja. Cudiiyada awä cönä’ja’to töjaajiyööcomo coneecadööje. 20Ñanno daja Jesuuquidiito cöna’dejjaicho dea. Yaawä tumöötoncomo cönnämäicho cudiiyada aca, shootoi jadä; Jesuuquidiito jadä cöntonto yaawä.

Odo’sha ’jano wei’jödö

21Yääje mma yaawä Cajeedamu ña cönä’döicho. Wäädeetatoojo anooto awä Jesuuquidiito soto cönoowanooma’to we’jummatoojo taca. 22Ñanno soto cöneeta’jöjäätöicho yaawä jäduuje owaanomaadö weijäcä chäwwä, cajiichaana nowaanomaadö nönge, judhío owaanomannamo nowaanomaadö nönge’da. 23Yäätä we’jummatoojo taca cönä’jaacä dhanwa odo’sha ’jano. Töwö töcä’de cöncä’tömöi:

24—¿Ane’cotoojo ñaa aquiima’se mannea, Jesuuquidiito, Naasade ñano? ¿Ñaa acoichajo ca meejä? Yoowanääcä dajaane ma, Wanaadi anoonö aashichaatoje aweichö; quee cönä’döaacä ñäädä odo’sha ’jano.

25Jesuuquidiito odo’sha cöneeta’jöichajoi yaawä; cönä’döaacä chäwwä:

—Äucwätä’da eichä; adheeja’cacä dhacanno; quee cönä’döaacä.

26Yaawä odo’sha ñäädä dhanwa tumjunne’da cöneenönnäi’chäi. Dhacanno cöneeja’cai yaawä töcä’tömjä’ancädä. 27Tameedä soto cönääcatoncaicho yaawä. Tönwannoje dea cönä’döa’to:

—¿Aaqueneeto mädä? ¿Ane’cäämö nöngato wätunnä mädä? Töwö odo’shancomo jadä’jödöödä nanontaato; tönwanno töneeta dha’deddu; quee cönä’döa’to.

28Yaawä Jesuuquidiito ecaadö cöneecatai tameedä Caadideea weichö wadaadäädä.

Peedhodo wo’jödö adonca’jödö

29Yääje mma yaawä we’jummatoojo tacanno töweeja’ca’comjäcä Jesuuquidiito cöntonto yaawä Simón, Antedé mmai chacaiñe. Jacoowo mmaja, Juan mmaja, cöntonto chääjadä. 30Simón wo’jödö cönä’jaacä tä’wötö jo, wedö’näje. Tönwanno cöneecammaicho Jesuuquidiito wwä. 31Yaawä Jesuuquidiito cöntämä chäwwadäädä; dhamäädö jäcä cönannäjöi. Yaawä dea mma eccö’da cönä’döi ñäädä wodi. Chääwanshiñööcomo cöneejodöi yaawä.

Jooje soto adonca’jocoomo

32Yaawä cho’momöödawä, tööje yä’döa’jäcä, Jesuuquidiito döiña soto cönne’a’to tameedä cädäija’como, odo’sha ’ja’como mmaja. 33Tameedä yää jataawoncomo cöne’jummaicho mönaatajo. 34Töwö Jesuuquidiito cönaadoncaicho jooje cädäija’como, anejjeja’como chäädäichöcoomo. Jooje odo’shancomo mmaja cömja’canö’joicho dea. Töwö odo’shancomo ana’deujotäiñe’da cönä’jaacä, dhowaanäcäiñe töweijäcä.

Caadideea ña ecammajäätö’jödö

35Yaawä jenaadäädä, tööje yeichö dea Jesuuquidiito cönä’jäi; cöntämä jata tö’cäi. Yäätä Wanaadi wwä cöna’deuwacä. 36Yaawä Simón töjimmä jadäiñe Jesuuquidiito ujiiye cöntonto. 37Töwwäiñe ejoodöa’jäcä cönä’döa’to chäwwä:

—Tameedä soto adhuujiyaato; quee.

38Jesuuquidiito cönä’döaacä chäwwäiñe:

—Ma’chomo aneiñaja, jata amoinchemjönö aca; iiña daja wecammajäätöiyede, mädääjatooje we’eetö’da; quee cönä’döaacä Jesuuquidiito.

39Yaawä Jesuuquidiito cönäämannä’acä tameedä Caadideea weichö wadaadäädä, we’jummatoojo taca ecammajä’ancädä, odo’shancomo ija’canö’jancädä mmaja.

Woi ’jano ejiichö’tä’jödö

40Yääje mma yaawä dhanwa woi ’jano cöneejä Jesuuquidiito wwadäädä. Tä’mudhe cönä’döi; cönä’döaacä:

—Yeejichö’tä’se aweiya’jäcä yeejichö’täjai ma; quee cönä’döaacä.

41Jesuuquidiito wentumje cöneene’macä; tamäädö que cönaajojoi; cönä’döaacä chäwwä:

—Adheejichö’tä’se wa; nännamjö’ñojo mädä owoichö; quee.

42Yaawä dea mma yoichö cöne’jöi; aashicha cönä’jaacä yaawä. 43Yaawä Jesuuquidiito cönenno’jai; cönä’döaacä chäwwä:

44—Soto wwäiñe maneecammajäätöi’che mädä äjääcä wödöichö. Wanaadi wwono wa’deuwödö wwä mmaane äänejoota. Moisé necamma’jödö nönge Wanaadi wwä tu’emö änu’cä’de, töwääjichö’tä aweichö ene’ju’to’me, soto dhowaanäcäiñe yeichö wetä yaawä töwääjichö’tä aweichö; quee cönä’döaacä Jesuuquidiito.

45Yääje Jesuuquidiito wä’dö’jödö weichaame ñäädä dhanwa cöneecammajäätöi tameedä soto wwäiñe. Yääje yeijäcä soto neneedöcoomoje Jesuuquidiito täjai’cha cönä’jaacä jataaca. Jata tö’cäcä mmaane töwäämannä’e cönä’jaacä, soto ’jemjönö ai. Yääje yeichaame tameedä jata waadoinchomo töötä dea cönä’ja’to yöiña.

Currently Selected:

MAADOCO 1: MCH

Highlight

Copy