MAADOCO 10
10
Töjiiñamo e’nomjadö jäcä Jesuuquidiito nowaanoma’jödö
1Yääje mma yaawä Jesuuquidiito cönääma’täi Cajeedamu ñanno; cöntämä Judheea chäcä. Joodadán mänsemjona cönä’döi yaawä. Iiña soto cöne’jummaicho dea yöiña. Töwö cönoowanooma’to yaawä, töweichö nöngeedä. 2Yaawä anejjacoomo jaadiseeo cöneejoto chäwwadäädä. Tönwanno oneejadööje mmädä cöneecamma’joicho dhanwa töjiiñamo e’nomjajai yeichö jäcä. 3Yaawä Jesuuquidiito cönä’döaacä chäwwäiñe:
—¿Aaquene Moisé adhaanontätääne? quee.
4Tönwanno cönä’döa’to:
—Moisé jajeeda tömmennäjo cönä’jaacä e’nomjaaje, töwääto’nomja töweichöcoomo ene’ju’tojo; quee cönä’döa’to.
5Jesuuquidiito cönä’döaacä chäwwäiñe:
—Töwäätuujacoone’da aweijäcäiñe Moisé yää waanontänä cömmennäi. 6Awa’deene mmaane, tameedä tödööajä naadö amoode’nädaawä, Wanaadi cönnöi dhanwa wodi acä. 7Yääje yeijäcä dhanwa tumö shancwajai ña, senö mmaja, töjiiñamo jadä töwä’dödö wetä. 8Yaawä aacä töweichaameiñe tooniño nönge naato’de. 9Yääje yeijäcä Wanaadi nejoodöjo’jödö soto änsancwajoi’che; quee cönä’döaacä Jesuuquidiito.
10Yää ’jeje ä’saca töwoomonga’comjäcä ñoowanoomadö cöneecamma’joicho yää jäcä dea. 11Töwö cönä’döaacä chäwwäiñe:
—Ñäädä töjiiñamo e’nomjanei, anejja wodi yö’tä yä’döa’jäcä yaawä, conemjönö nödööa töjiiñamo jäcä. 12Wodi mmaja töiño e’nomja’jäcä, anejja dhanwa dö’tä yä’döa’jäcä yaawä, töwö mmaja conemjönö nödööa dea töiño jäcä; quee cönä’döaacä Jesuuquidiito.
Mudeeshi’chä jäcäiñe Wanaadi wwä Jesuuquidiito wa’deuwö’jödö
13Yääje mma yaawä soto cönne’a’to mudeeshi’chä Jesuuquidiito wwadäädä, ye’cäcäiñe tamäädö tödöödö wetä chäwwä. Yaawä ñoowanoomadö cömjiiyeme’ja’to ñanno mudeeshi’chä edhaamo. 14Yää eneea’jäcä Jesuuquidiito cone’da cönä’jaacä; cönä’döaacä chäwwäiñe:
—Neejö’ña’to mudeeshi’chä öwwadäädä; monoowatäätäi. Canno nönga’como ñanno Wanaadi sotoi. 15Chäänönge yääje wä’döa äwwäiñe, mude’cä’cä tönnöe töweiye naichöje Wanaadi acaajichaanaichomooje ännö’da aweiya’comjäcä, Wanaadi sotoije eijai’cha maato; quee cönä’döaacä Jesuuquidiito.
16Yaawä töwö mudeeshi’chä tänaawä cönnöicho. Wanaadi wwä aashichaato cönnöjoi chääjäcäiñe, tamäädö ye’cäcäiñe tödööancädä.
Aäjömaanö tönsomaacato wei’jödö
17Yäätonno yääma’tädaawä dhanwa cöneeca’tömöi Jesuuquidiito wwadäädä. Tä’mudhe cönä’döi ije’taca; cöneecamma’joi:
—Owaanomaanei aashichaato, ¿ane’cäämö tödööjai wanä weichö töwaatamemjönö chaana’catoojoje? quee cönä’döaacä.
18Jesuuquidiito cönä’döaacä chäwwä:
—¿Ane’cotoojo aashichaatoje cä’taanä? Aashichaato ’je’da na soto. Wanaadi mma ñäädä aashichaato. 19Waanontänä odhoowanääcä na, yää: “Mä’masuuduijai; soto maneemai; adheememöi; jönaawä soto maneementäi; mätäncu’täi; oomo aashicha tödööcä, aanö mmaja;” quee naadö; quee cönä’döaacä Jesuuquidiito.
20Yaawä ñäädä cöneccujä’acä; cönä’döaacä:
—Owaanomaanei, tameedäädä mädä waanontä’jä woije wäänene, mude’cä’cäje weichö jonnoto’jödöödä; quee cönä’döaacä.
21Jesuuquidiito tujunne cöneene’maacä ñäädä dhanwa. Töwö cönä’döaacä chäwwä:
—Töweiye dea na äwwä tödööemö. Tameedä äwwono ejeemajoota, änsomaadö, anaudädö mmaja. Chääje’jödö u’jä’cä yaawä a’ca’como wwäiñe, caju ñaane tönsomaaque meiye. Ä’cäde’de yaawä; öwö umjummadö woije eichä’de yaawä. Cone’da männöi’che jääcäinchädä äwäntunamjödö, cuduusa jäcä adhaajoijodö jadä’jödöödä; quee cönä’döaacä Jesuuquidiito.
22Yää etaadö’jo ñäädä dhanwa jooje cone’da cönä’döjoi. Wentumje cöntämä yaawä jooje tönsomaaque töweijäcä, jooje tönaudäque töweijäcä mmaja.
23Yaawä Jesuuquidiito cönä’jedennacai soto wwadäädäiñe; cönä’döaacä tönoowanoomadö wwäiñe:
—Tadaawaajuje na tönsomaaca’como wwäiñe Wanaadi töcaajichaanaichomooje tödöödö, tönaudäca’como wwäiñe chäänönge mmaja; quee cönä’döaacä.
24Ñoowanoomadö cönääcatoncaicho yaawä dha’deddu eta’jäcä. Yaawä Jesuuquidiito cönä’döaacä chäwwäiñe:
—Önnacoomo’cä, tadaawaajuje na tönsomaadö ijummanei wwä Wanaadi töcaajichaanaije tödöödö. 25Macuusa dha’tadö ai wa’shadi omonque’jönö töweiye naichö naane’; töwaacö’je mma tönsomaacato wwä Wanaadi töcaajichaanaije tödööque’jönö na; quee cönä’döaacä Jesuuquidiito tönoowanoomadö wwäiñe.
26Tönwanno jooje’cä mma cönääcatoncaicho yaawä. Tönwannoje dea cönä’döa’to:
—¿Änääcööne ääwanaacajai ñai, yääje yeiya’jäcä?
27Yaawä tönoowanoomadö ene’mancädäiñe Jesuuquidiito cönä’döaacä chäwwäiñe:
—Soto woije mma ääwanaacajai’cha weiñä nai, Wanaadi woije mmaane; tameedä tödööjaiñe töwö yeiyajä; quee cönä’döaacä.
28Yaawä Peedhodo cönä’döaacä chäwwä:
—Ñaa mmaane tameedä ñaa cöne’nomjai ajaadä töweichö wetä.
29Jesuuquidiito cönä’döaacä chäwwäiñe:
—Chäänönge yääje wä’döa äwwäiñe, ñäädä, öwö jääcäinchädä tömmai ñannei, tacontomo, tuduichomo jeiñe mma, töjaadui’chomo jeiñe mma, ñäädä tumö, senö ñännei jeiñe mma, töjiiñamo, tönnacoomo jeiñe mma, tönaudädö jeiñe mma, öwö jääcäinchädä yää ñänga’jäcä, aashichaato wätunnä ecammajäätödö jäcäinchädä mmaja, 30ñäädä immai ’je’da’da na’de, dhacontomo ’je’da’da mmaja, yuichomo ’je’da’da mmaja, ijaadui’chomo ’je’da’da mmaja na’dede; senque’da’da mmaja na’dede, iiñacoomo ’je’da’da mmaja, ñaudädö ’je’da’da mmaja; töwäntunaanö’taame mma’ne. Yaawä äcuude weiñawä yeichö töwaatamemjönö nä’tua’de chäwwä. 31Eduuwa täneejuque naatoodö dhantai ema’jödööje naato’de. Ñanno eduuwa wentumje naatoodö mmaane dhantai täneejuque naato’de; quee cönä’döaacä Jesuuquidiito.
Töwäämatoojo jäcä Jesuuquidiito necammajäätö’jödö mmaja
32Yaawä tönwanno ääma tai cönta’to, Jeduusadén ña iichädööcomo. Jesuuquidiito dhowaajoiñe cöntaacä. Ñoowanoomadö töwääcatonca cönä’ja’to; inchäconcomo wötäädö tösaadeiñe cönä’ja’to dea. Yaawä Jesuuquidiito töudäje cönaadoicho tönoowanoomadö, ñanno amoojadooto de’wä aaco’como. Töwö cönaajäntäi yaawä töjääcä yeeja’do’tojo ecammajäätödö; 33cönä’döaacä:
—Jeduusadén ña cöötaato eduuwa. Iiña Soto nnedö nä’tuja’de Wanaadi wwä töwa’deuwaamo edhaajotoncomo wwäiñe, judhío owaanomannamo wwäiñe mmaja. Tönwanno emaadö na’de’taato’de. Judhíojöncomo wwäiñe nu’aato’de yaawä. 34Ñanno nenno’jä’aato’de, neta’däjä’aato’dede. Tönwanno naiju’jä’aato’de yaawä; yää ’jeje nemaato’dede. Yaawä aaduwaawä anoototo ai töwö naadonca’de; quee cönä’döaacä Jesuuquidiito.
Jacoowo, Juan ne’cato’jocoomo
35Yääje mma yaawä Jacoowo, Juan mmaja cöneejoto Jesuuquidiito wwadäädä; ñanno cönä’ja’to Seewedheeo nnacoomo. Tönwanno cönä’döa’to:
—Owaanomaanei, ñaa necammadö woije tödööjo’se ñaa na äwwä; quee cönä’döa’to.
36Jesuuquidiito cönä’döaacä chäwwäiñe:
—¿Ane’cäämö tödööjo’se maato öwwä? quee.
37Yaawä tönwanno cönä’döa’to:
—Cajiichaanaje äwä’döa’jäcä ännäcä ñaa nataajima’ñojo’de, ääjato; quee cönä’döa’to.
38Jesuuquidiito cönä’döaacä chäwwäiñe:
—Odhoowanoojöncomo me’ca’ato. ¿Öwö neenedööje töweiyemööje naadö emjai maato dea änwanno, yää wäntunaanö’tojo? ¿Öwö wautisaaje wä’döjootojo que mmaja ca wautisaaje ä’döjoojai maato dea?
39Tönwanno cönä’döa’to:
—Ee, ä’döjai mmaja.
Yaawä Jesuuquidiito cönä’döaacä chäwwäiñe:
—Yääje dämma na. Öwö neenödö mmaja mengato’de, öwö wautisaaje wä’döjootojo que mmaja wautisaaje mä’döjaato’dede. 40Yääje yeichaame önnäcä awaatajiimato’como ecammajai’cha wa äwwäiñe. Ñanno wwäiñe mmaane yää nä’tua’de, chääjäcäinchädäiñe tösooma naadö wwäiñe; quee cönä’döaacä Jesuuquidiito chäwwäiñe.
41Yää eta’jäcä ñanno amoojado’como Jesuuquidiito nowaanomaadö wwäiñe, tönwanno cone’da cönä’ja’to yaawä Jacoowo, Juan jäcäiñe. 42Jesuuquidiito tönoowanoomadö cöna’dejjaicho yaawä; cönä’döaacä chäwwäiñe:
—Änwanno odhoowanääcäiñe Wanaadi dhowoonojöncomo edhaajotoncomo o’jodhe töwei’she yeichöcoomo. Ñanno cajiichaanacoomo tösootoichomo jäduuje tönaanontäjä’e weneeneto. 43Änwanno mmaane yääje eijai’cha maato. Ñäädä adhantawäiñe o’jodhe töwei’shato töjimmä anoonöcoomoje eijai ña. 44Ñäädä adhantawäiñe cajiichaanaje töwei’shato töjimmä wwäiñe tödööjä’neije nei’ñojo. 45Soto nnedöödä cöneejäne’, soto anontäneichomooje’da, chäwwäiñe tödööneije mmaane, töwä’tudu wetä mmaja jooje soto ewaanacaato’comooje; quee cönä’döaacä Jesuuquidiito.
Waatimeeo enu’tä’jödö
46Yääje mma yaawä Jeedicó ña Jesuuquidiito cönä’döi tönoowanoomadö jadäiñe; jooje anejjacoomo soto mmaja chääjadäiñe cönä’ja’to dea. Yää ’jeje yäätonno töötädaawäiñe tänuuquemjönö cöneedantoicho, ääma taawä yaatajiimaajä, waateme’näje; Waatimeeoje töwö chäätö cönä’jaacä, Timeeo nnedö. 47Jesuuquidiito Naasade ñano yää ai yeeja’dätäädö eta’jäcä ñäädä wwä, töwö cönaajäntäi yaawä töcä’tömjätöödö; cönä’döaacä:
—Wentumje cäneecä Jesuuquidiito, amäädä Dawí weichö: quee cönä’döaacä.
48Dhantai yäätoncomo cöneuwa’to; cöneeta’jöichaja’to. Yääje yeichaame jooje’cä mma töwö cöncä’töngacä:
—Wentumje cäneecä, amäädä Dawí weichö; quee.
49Yaawä Jesuuquidiito cöneedennai; cönä’döaacä soto wwäiñe:
—A’dejjatääcä ñäädä tänuuquemjönö; quee.
Ñanno soto cöna’dejjaicho yaawä; cönä’döa’to:
—Ta’cwaiñe eichä eduuwa; aanöncä, adha’dejja; quee.
50Yaawä ñäädä tänuuquemjönö taiñamöi cunummichai; cönammöi yaawä Jesuuquidiito wwadäädä töwaajammödö wetä. 51Yaawä Jesuuquidiito cönä’döaacä chäwwä:
—¿Aaquene äwä’döjo’se manä öwwä?
Ñäädä cönä’döaacä yaawä:
—Äwwä wäänu’täjo’se wa; quee cönä’döaacä.
52Jesuuquidiito cönä’döaacä chäwwä:
—Äjääne eduuwa; äwwä ecamjödö weijäcä määjichö’täi; quee.
Yaawä dea mma ñäädä töneene cönä’döi. Jesuuquidiito jadä cöntaacä yaawä ääma tai.
Currently Selected:
MAADOCO 10: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
