MAADOCO 3
3
Dhamäädö töwaamo’mongato wei’jödö
1Yääje mma yaawä Jesuuquidiito cönoomomöi chea we’jummatoojo taca. Yäätä cönä’jaacä dhanwa dhamäädö töwaamo’mongato. 2Yäätoncomo soto Jesuuquidiito cöneene’ma’to; ¿adoncatai ’ja, wäädeetatoojo anooto yeichaame? quee töucwadööcomooje, chääjäcä cone’da töwa’deuto’como ejoodödö wetä yaawä. 3Yaawä Jesuuquidiito cönä’döaacä dhamäädö töwaamo’mongato wwä:
—Aanöncä, ä’cäde sadäädä.
4Töwö Jesuuquidiito ñanno soto cöneecamma’joicho:
—¿Ane’cäämö wäädeetatoojo anooto awä tödööemööje necammaanä waanontänä imennaajä? ¿Aashichaato ’ja, conemjönööne’ ? ¿Ewaanacaadö, emaadööne’ ? quee cönä’döaacä.
Äucwätä’da mma ñanno soto cönä’ja’to. 5Yaawä Jesuuquidiito ñanno cöneene’ma’to cone’da töweichö que. Töwö wentumje cönä’jaacä eta’se’da yeichomjäcä. Töwö cönä’döaacä dhamäädö töwaamo’mongato wwä:
—Änwojoocä; quee.
Ñäädä cönänwojoi; dhamäädö aashicha cönä’döi yaawä. 6Yaawä ñanno jaadiseeo cöneeja’caicho. Tönwanno cöna’deuwa’to yaawä Edoodhe sotoi jadäiñe Jesuuquidiito emaatojo jäcä.
Tuna jawä jooja’como soto wei’jocoomo
7Yääje mma yaawä Jesuuquidiito cöntämä chu’jä döiña tönoowanoomadö jadäiñe. Jooje soto Caadideea ñancomo chääjadä cöntonto dea. 8Aashichaato Jesuuquidiito nödö’jödö eta’jäcä jooje soto cöneejoto yöiña, Judheea ñancomo, Jeduusadén ñancomo mmaja, Iduumea ñancomo mmaja, Joodadán mänsemjoncomo mmaja, Tiido ñancomo mmaja, Sidhón ñancomo mmaja. 9Jooje soto weichomjäcä Jesuuquidiito tönoowanoomadö cönaanontoicho cudiiyada eseecajo, töwä’totoojoje, soto wwä tädennu’jodö queiñe. 10Jooje soto adonca’jocoomo weijäcä Jesuuquidiito wwä tameedä cädäija’como töwaatadiimajä’ene chäwwadäädä töötä cönä’ja’to, ajoojodö wetä. 11Odo’shancomo wwä Jesuuquidiito eneea’jäcä tönwanno tä’mudhe töwä’döe töweiye cönä’ja’to ije’taca. Töca’tömjä’e töweiye cönä’ja’to:
—Wanaadi nnedö amäädä; quee.
12Jesuuquidiito Wanaadi nnedööje töweichö ätä’täjo’da töweiye cönä’jaacä chäwwäiñe.
Amoojadooto de’wä aaco’como anonta’como
13Yääje mma yaawä Jesuuquidiito cöntämä jöö de’cäi. Töwö cöna’dejjaicho ñanno tumjummadö dea mma. Ñanno cöne’jummaicho yöiña. 14Töwö cöne’toicho amoojadooto de’wä aacä töjaadä töweiyaamoje, ecammajä’e tanontaamoje mmaja. 15Chäwwäiñe cuntui ijääduduucomo cädäija’como adoncato’como, odo’shancomo ija’canö’joto’como mmaja. 16Ñanno eetöcoomo cönä’jaacä: Simón, ñäädä Peedhodooje cöne’täichö; 17Jacoowo mmaja, Seewedheeo nnedö; Juan mmaja, Jacoowo acoono. Ñanno Jesuuquidiito cöne’toicho Wooaneedejeeje; Yeetötöömadö nönga’como; quee töwä’dö’se yeichö. 18Antedé mmaja cönä’ja’dea; Jediipe mmaja; Waadotoodomé mmaja; Mateo mmaja; Tomá mmaja; Jacoowo mmaja, ñäädä Aadeujeeo nnedö; Taadheo mmaja; Simón mmaja, ñäädä jäduujato dha’deddu; 19Juudha Icaadiyoote mmaja, ñäädä Jesuuquidiito u’nei’jödö dea.
Odo’sha ’je Jesuuquidiito e’tä’jödö
Yääje mma yaawä Jesuuquidiito cönoomomöi ä’saca, tönoowanoomadö jadäiñe. 20Yaawä soto cöne’jummaicho dea yöiña, aneewashinchäjo’daiñe tödööene. 21Yää eta’jäcä Jesuuquidiito jimmä wwäiñe tönwanno cöneejoto yöiña adäädö wetä, tö’jeta töwwäiñe Jesuuquidiito tö’tadö weijäcä.
22Judhío owaanomannamo, ñanno Jeduusadén ñancomo we’a’como, cönä’döa’to:
—Weesewú ’je määdhä na, ñäädä odo’sha edhaajotoncomo. Ñäädä jäduuduje odo’shancomo tömja’canö’jo weneene; quee cönä’döa’to.
23Yaawä Jesuuquidiito cöna’dejjaicho ñanno. Töwö yö’seeno joi cöna’deuwöi chäwwäiñe; cönä’döaacä:
—¿Aaquene mmaja Caajuushawa töwwäädä ääja’canö’jodö deeade’ ? 24Yää jataawoncomo dea wewäänä’ta’comjäcä, töwaatame mma ataamejai ñaato. 25Yää maa tawoncomo dea töwwäädäiñe yä’tu’de’ta’comjäcä, ataamejai mmaja. 26Mädääje mmaja Caajuushawa, töwwäädä yä’tu’de’ta’jäcä, töwwäädä yeewänä’ta’jäcä mmaja, numa jäduujeedä eijai’cha yaawä; töwaatame mma ataamejai ña.
27“Anejja omomjai’cha na jäduujato mmai chaca inshomaadö que enwajiiña, imööjätöödö’jo’da. Imööjätöödö’joone adääjai ña inshomaadö.
28“Chäänönge yääje wä’döa äwwäiñe, tameedä soto cone’nadiiyöcoomo ätäncwanno’jojai ña, tameedä cone’da ya’deuwödööcomo mmaja. 29Epíiditu Santo jäcä cone’da wa’deunä mmaane ätäncwanno’jojai’cha na; yeichöje choone’nadiiyö na’de; quee cönä’döaacä Jesuuquidiito.
30Töwö yääje cönä’döaacä odo’sha ’je tä’tä’jödö weijäcä chäwwäiñe.
Jesuuquidiito dhenö weejö’jödö, dhacontomo mmaja
31Yää ’jeje Jesuuquidiito acontomo cöneejoto yöiña, yeenö mmaja. Tönwanno jödo’na cönä’ja’to; Jesuuquidiito cöna’dejjaja’to. 32Ñanno soto, Jesuuquidiito awoodhecääcä cönä’ja’todö, cönä’döa’to chäwwä:
—Aanö adha’dejja, adhaacontomo mmaja; jödo’na naato; quee cönä’döa’to.
33Yaawä Jesuuquidiito cönä’döaacä:
—¿Änääcö ñäädä aanö, quee ’ja? ¿Änä’camo ñanno adhaacontomo, quee ’ja?
34Töwö cöneene’ma’to tawoodhecooconcomo wataajimaadö; cönä’döaacä yaawä:
—Canno ñanno maama, yaacontomo mmaja. 35Ñäädä Wanaadi woije tödöönei, ñäädä ñäädä yaacono, jaaduichö mmaja, maama mmaja; quee cönä’döaacä Jesuuquidiito.
Currently Selected:
MAADOCO 3: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
