Jon 6

Jesu I Va Ṉaṉa Qira Lima Mao Valeke Ro

(Matiu 14.13-21; Maka 6.30-44; Luka 9.10-17)

1Taramuzina pataro dena, Jesu mana disipoloro ia iri kava za kene tepa na masi pipika na Qalili, iri vitoṉo napu ze so Taberiasi. 2Topu sasakata basoero iri kale muzi ne ia, tanego iri mia bana zazu vari vapolosoro ia, i vatavoisi qirae go vano mokoso ne. 3Jesu i popoka za kaki kubolo suka mana i koloku tavisi qira disipoloro ia. 4Torana ṉalu nae ne, igarogaro to musaqara kelo na Pasova ria vano Jiu. 5Gonae Jesu i reṉa mana i mia qira topu sasakata basoero iri lamae de iri koego, iago i tana ne Pilipi, “Adepa tane qata mazala go voli ze na pata gege, go tatana va ṉaṉa qirae go basoero topu dena na?” 6Jesu i tana ne Pilipi tanego i soko so pada ne ia, ba ia ne, i rove bana pata tina zazu ne go.

7Pilipi ivataule igo, “Patavolomo tara kone qita go torana karua vasa kesa, tata voli ze patagege, do tara ki tora qira so kaega.”

8Kakia disipolo ia Jesu vitoṉona Aduru, kaena Saimon Pita igo, 9“Kaki sale valeke suka i ko go dena, i kone kalima bureri suka mana karua iṉana go, do tiniki tora kaega bago, tanego basoero dena iri lete topu.”

10Do Jesu i sine ne qira, “Muna sine ne qira basoero ne, mara koloku,” de go i topu seseu na, iago basoero ne iri kolokue, topu qira ne torana lima mao valeke ro. 11Gonae Jesu i pala kalima bureri ne, i seko velaka zaqe God, mana i kenakena ze de iri koego basoero iri kolokue de igogo ne. Iva gere napu ze so karua iṉana ne go, mana osiqira basoero ne iri kuma lupo go. 12Ṉalu osiqira ne iri kuma lupo, Jesu i sine ne qira disipoloro ia, “Soqe lupo pata gege i ko sivala go, mata kasi valeqiso ne na pata gege ne.” 13Iago iri soqe lupo pata gege i ko sivale go kalima bureri suka ne mana karua iṉana ne, mana iri vapurake manoga karua ebata.

14Ṉalu basoero ne iri mia go zazu vari vapoloso izazu nego Jesu, iri go de, “Pata ogoto bana, valeke Propeta dena to, i sine bana go Buka tabo ne tina lama go!” 15Pasi nae Jesu i rove, nanao qira basoero ne iri soko vatutubo ze ia tina batu lavata ria, do i kasi ne qira mana ipopoka miki za kubolo ne go.

Jesu I Goe Popokona Loka Ne

(Matiu 14.22-33; Maka 6.45-52)

16I raravi to ia disipoloro ia Jesu iri qoqoro za masi pipika ne, 17iri age mola ria mana iri kava ule za Kapanaum. Iri zaza ria za kuse to igo, do Jesu iki lulu qira kaega. 18Torana nae kameka seva lavata i pala qira mana loka ne i sakata go. 19Disipoloro ne iri valua torana kalima ba kaonomo kilomita, ṉalu iri mia zaqe Jesu i goe me popokona loka ne, iri lete sareki. 20Do Jesu i sine ne qira, “Muniki sareki, era so dena!” 21Pasi nae disipoloro ne iri ara kula, mana iri va age Jesu, goto nae iri doka eto de iri soko go vele zae na.

Basoero Ne Iri Taqia Jesu

22Bakubaku na ne, basoero iri ko sivale go kene tepa na masi pipiki ne, iri rove kameka so mola ikoego de go. Iri rove napua Jesu iki lulu ne qira kaega disipoloro ia pasi kava iri vaego. 23Do kakiaro napu mola iri reqe me Taberiasi iri lama dokae de i seko velaka ze go God Batu ne bureri, i va ṉaṉa qirae go basoero ne zako na ne, 24pasi iriki miasoba kaega Jesu mana disipoloro ia iri age mola ro ne, mana iri kava za Kapanaum tanego iri taqia ia.

Jesu I Bureri Na Too

25Basoero ne iri za soba, ze Jesu kene tepa na masi pipika ne, mana iri vane de ia, “Valeke vari vatatana, ade torana bana tane qo lama dokae dena?”

26Jesu i vataule ne qira igo, “Masine ne qamu pataogoto, ramu qamu taqia va era, tanego qamu ṉaṉa mana kuma ne bureri ne go, ba zazu vari vapoloso qa zazu ne go era zakone, ramu qamuki nanao rove so kaega. 27Iago muniki zazu vokara ne patagege i sakata katikili go, do muna zazu vokara ne patagege i mazala go tekene qamu go too iki rove go kaega za lupo. Era Tuna basoe na tekene qamu patagege igogo ne, tanego God Tamaqita i vasadaka bana, i soko ava era.”

28Gonae iri tana ne ia, “Ava patana tane timuna zazu ne go remu i soko go God na?”

29Jesu i vataule ne qira, “Pata i soko God ne, muna vaogoto ava era, tanego God i turi nava go era.”

30Do iri vataule ne ia, iri go, “Ava lalana tono zazu ne go aro, go remu timuna mia mana vaogote go seko ro aro? Avana to tono zazu nego na? 31Vanovano ṉalu bana ro remu, iri ge ma-ana loborona ulana ne, gere so i sine go Buka tabo ne, igo de, “I teke ne qira bureri na rani ne tarina ge go!”

32Jesu igo de, “Masine ne qamu pata ogoto, bureri i teke ne qamu go Mosese iki reqeme kaega rani ne, tanuna so Mamae i teke ne qamu go bureri ogoto na rani ne. 33Tanego bureri i soso nego God iato i qoqoro mego tepa rani ne, mana i tekene too osina basoero na vudu pua dena.”

34Gonae iri pene ia, “Batu tekene qemu bureri igogo ne osina ṉalu.”

35Do Jesu i sine ne qira igo, “Era to qa bureri na too, ka basoe i lama va era tiniki ara saqo kaega, mana ka basoe i vaogoto ava era tiniki ara kaṉoso kaega go. 36Era, qa sine bana ne qamu, patavolomo qamu mia banava do, qamuki vaogoto ava so kaega. 37Osiqira ria i teke bana nava go era Mamae tarina luluava era, mana ka basoe i lama va era, era tuniki turi vaule kaega. 38Tanego era qa qoqoro me tepa rani, go tuna zazu ne pata i soko go iani turi nava go, era tuniki zazu ne kaega pata qa soko go tanuqu. 39Mana pata i soko go Mamae ne, era na miasoka vavelake, niki go varore kakia basoero i teke bana nava go. Do ṉalu musaqara muzimuzi era tuna va too qira. 40Tanego pata i soko go Mamae ne, osiqira ria iri mia mana vaogote go Tuna gogone, tarina pala too iki rove go kaega lupo, mana tuna vatoo qira musaqara muzimuzi go.”

41Pasi nae basoero ne iri vari valegu tanuqira, tanego Jesu igo, “Tanuna tane i bureri reqe mego rani ne.” 42Iago iri go de, “Valeke dena Jesu sale ia so Josepo. Ita qata rove tamana mana sinana go. Iago avigo tane i sine go tanuna i qoqoro ne tepa rani igogo na?”

43Gonae Jesu i sine ne qira igo, “Kasi vari valegu tanuqamu. 44Mamae tane i turi nava go era, iago kaega ka basoe tina mazala go lama va era, do ṉalu Mamae tina turine mego ia de qa koego, era tuna vatoo ze ia tepa le musaqara muzimuzi go. 45Seko ro iri karo bana go propetaro ne igo de, ‘God tina vatatana qira basoero topu,’ iago ka basoe i gata vari vatatana ia Mamae mana i lulua gogo ne, basoe nae to i lama va era. 46Kaega ka basoe i miasoba go Mamae, do era qa kotavise ia mana qa lama go de, qa miasoba go ia. 47Ma sine ne qamu pata ogoto, ka basoe i vaogoto ava go era, ia i toṉove too iki rove go kaega lupo. 48Era to qa bureri na too. 49Vanovano bana ramu ne iri ge ma-ana loborona ulana ne, do iri le so. 50Do bureri i reqe mego rani ne, ka basoe i ge go, ia tiniki le kaega. 51Era to ga bureri na too qa reqe mego rani ne. Ṉalu ka basoe i ge go, ia tina ko osina ṉalu. Bureri qa soso ne go, iato tokamaqu, qa soso ne qira go basoero na vudu pua dena go basoero ne tarina za kavele.”

52Vano Jiu iri muma mana iri vari valegu tanuqira, iri go, “Ava tina go tane valeke dena tina va ge qitae go ita tokamana na?”

53Jesu i sine ne qira igo, “Ma sine ne qamu pata ogoto, ṉalu qamuki go go kaega tokamaqu ba besia kaega parasaqu gogo ne, ramu tina kaega ne qamu too ogoto de qa koego era. 54Do ṉalu ka basoe i ge tokamaqu era mana i besia parasaqu gogo ne, ia tina pala too iki rove go kaega lupo. Mana era tuna va too ia musaqara muzimuzi go. 55Tanego tokamaqu ne, i pata gege ogoto mana parasaqu ne, i besi ogoto go. 56Ka basoe i ge tokamaqu mana besia parasaqu, basoe ne i koe loboro qu era, mana era qa koe loborona iago. 57Mamae ni soso ne go too iki rove go kaega lupo, ia to i turi nava go era, mana era qa pala too tanego iato iteke nava go. I gere na napua so, ṉalu ka basoe i ge go tokamaqu era ne, ia tina pala too iki rove go kaega lupo, tanego era tuna teke ne ia. 58Iato de pata gege i reqe mego rani ne, iki gere kaega ma-ana iri ge bana go vanovano bana ramu, mana iri le go, do ka basoe i ge go bureri dena ia tina too osina ṉalu.”

59Jesu i sine ze pataro dena loborona Pade Lotu na komala Kapanaum.

Seko Na Too Iki Rove Go Kaega Lupo

60Topu ria basoero iri lulua Jesu, iri gata seko ro dena, iri go de, “Vari vatatana dena i lete makuru luluna mana basoero ne do, tariniki toqe ne kaega gata na go.”

61Patavolomo Jesu iki gata qirae kaega, do ia i rove ria iri vari sine ne vari vatatana ia, iago i tana ne qira, “Avigo sauna to vari vatatana rera dena tane ramu qamu soko go vele kasi nava era? 62Ṉalu igogo nae nanao qamu, ava tamuna go ṉalu tamuna mia va era Tuna basoe na popoka ule za go de qa ko banae go? 63Spirit tabo ia God i sosovolomo nego too, karaputa ia basoe i makurua. Iato go sekoro era i va mazala qamue ramu toṉove na Spirit tabo i soso nego too. 64Do kakiaro ro ramu qamuki vaogote so kaega.” Kokoso tupiana me, Jesu i rove bana qira ria tariniki vaogote go kaega mana akena tina vabesa ne go. 65Iato go qa sine go, “Kaega ka basoe i mazala go lulua va era, ṉalu Mamae iki vamao ne go kaega ia.”

66Sauna to iade, kakiaro vano iri lulua go Jesu, iri kasi ne ia, mana iriki ara lulua kaega Jesu go. 67Iago Jesu i tana ne qira manoga karua disipoloro ia, “Avigo ramu, qamu soko zaza napu ba?”

68Saimon Pita i vataule igo, “Batu, akena to timuna zae go? Aro to qo toṉove go seko ikoego too iki rove go kaega lupo. 69Remu qi vaogote mana qi rove aro to qo tabo qo reqe mego de ikoego God.”

70Gonae Jesu i vataule ne qira igo, “Manoga karua ramu tane qa vine qamu go ba? Do kaki kameka ramu ne i gere ogote to manuru sakata ne!” 71Jesu ivatalupasa ze Jiudas, sale ia Saimon Iskariot, ia i kakia to ria manoga karua ne, tanego taramuzina tinara va besa ne ia.

Currently Selected:

Jon 6: VRSNT

Highlight

Copy