Luka 10
10
Jesu Ituri Vazao Qira Vituṉaulu Karua Disipoloro Ia
1Taramuzina iadena, Batu ne i vine napu qira vituṉaulu karua basoe mana iva zazao tara tararua qira. Go tarina za kenaqa ne ia osina komala lavata mana komala suka ro de ivanama ne go zae na tanuna. 2I sine ne qira, “Itopu pata gegena barue iṉara bana. Do taravia ria so vano zazu tarina pala vagado go. Pene ia i toṉove go barue ne go mara valame napu qira kakia ro vano zazu tarina pala me go pata gege na barue ne. 3Za! Era qa turine qamu gerena tunana sipi ro, iri zae loboro qira sika piru ro. 4Muniki pala pata tarutaru kesa, kurama ba makebotu. Ṉalu qamu zaza go muniki noto seko tabe na ka basoe qamu soba ze go zuka ne. 5Ṉalu qamu keba za go kaki pade pata kenaqa sine, ‘Dalo ia Batu ne i na ko tavisi qamu ramu qamu koego pade dena.’ 6Ṉalu valeke na pade nae i valeke bule, seko bule ramu, tina ko tarue de ikoe ia. Do ṉalu ia iki valeke bule kaega seko bule ramu tina ule de qamu koego. 7Muna koe loborona pade nae, muna ge mana besia pataro iri tekene qamu. Tanego valeke zazu itora tina pala volina. Muniki kebae kaki pade mana siporo keba napu za kene pade. 8Ṉalu qamu zae kaki komala mana iri soko qamu gogo ria ne, muna ge pata iri teke ne qamu. 9Muna va tavoesi qira basoero iri mokosoe go komala nae mana muna sine ne qira, ‘Too ikoego vari miasoka ia God i lama garogaro qamu ramu.’ 10Do ṉalu qamu zae kaki komala mana iriki soko qamue kaega, muna siporo za zuka lavata ne, mana vane qira dena, 11Gausu na loduna pua na komala ramu dena i kapate go polana makeqemu, qimu tavoro vaule ne qamu. I gerena lalana de qamu gogo ramu. Do muna nanao tarua ia dena, de ikoego vari miasoka ia God i lama garogaro e de qamu koego ramu.’ 12Ma sine ne qamu, ṉalu musaqara muzimuzi kimata ria vano na komala nae, tina lete lavata sivala ne qira vano na komala Saidon!”
Komala Iriki Vaogoto Kaega
(Matiu 11.20-24)
13Jesu i sine napu ne qira, “Manava sakata de qo koe aro komala Korozini! Manava sakata napu de qo koego aro komala Betsaida! Zazu vari vanureke ro qa zazu bana ze go era komala ramu tara zazu ze Taia mana Saidon, ṉalu nae basoero na karua komala igogo ne, iri mazala kavale na nanao qira, tara ria koluku mana vakeba ne poga taridaka ro mana kuru ze tokama qira lodu go, tara vasadake iri manava sakata ne vasakata pata ro ria. 14Ṉalu musaqara varitanae ne, kimata tina dokae de qamu koego ramu tina sivala ne kimata i dokae go Taia mana Saidon. 15Do aro Kapanaum qo soko va popoka go tanuna, mo dokae rani ne? Aro to tina vanaqe zigoe nako ne.”
16Jesu i sine ne qira disipoloro ia, “Ka basoe igata qamu ramu, i gatava era. Ka basoe iki soko qamu kaega ramu, iki soko ava kaega era. Mana ka basoe iki soko ava kaega era, iki soko kaega ia ituri nava me era.”
Ria Disipoloro Ia Jesu Iri Kula
17Ria vituṉaulu karua basoero iri ule me, mana iri lete kula, “Batu,” iri go, “manuru sakata ro ne do, iri vaogoto qemu, ṉalu qimu kakale qirae go vitoṉo mu aro!”
18Jesu i vataule ne qira igo, “Era qa mia bana Satana i soru me rani ne, i gere kapi. 19Gata! Qa teke bana ne qamu karaputa, go ia tamuna kube poka dole pani ro mana pedepede. Mana tamuna va qoqore karaputa ria kana ro ramu, mana kaega kaki pata tina vae qamu ramu. 20Muniki kula ne manuru sakata ro iri vaogoto qamu, do muna kula ne vitoṉo qamu i karo banae rani ne.”
Jesu I Kula Mana I Seko Velake God Tamana
(Matiu 11.25-27; Maka 3.16-17)
21Ṉalu nae Spirit tabo iva puraka ze Jesu kula mana igo. Mamae Batu na rani mana vudu pua, “Qa seko velaki go, tanego qo vamia qira ria iriki va tatana bana qira go kaega, pataro pipika qo pika ne qira go vano tarove mana vano iri nanao rove go. Ove, Mamae iato dena de qo soko go tina sadaka go.”
22Jesu igo napu dena, “Mamae i teke lupo bana nava era osina pataro. Kaega ka basoe i rove go Tuna, do tanuna so Tamana, mana kaega ka basoe i rove go Tamana, do tanuna so Tuna mana ria qa vine napu qira era, tina va rove girae go.”
23Gonae Jesu i tabali qira disipoloro ia, mana i sine vamiki ne qira, “Avana to ka lete maṉana qamu ramu, qamu mia go pataro qamu mia go ninidena. 24Masine ne qamu, topu propeta ro mana batu lavata ro iri lete soko miana pataro qamu mia go ramu, do iriki mia kaega mana gata na pataro qamu qata go ramu, do iriki gata bana so kaega.”
Va Padapada Na Valeke Samaria
(Matiu 22.34-40; Maka 12.8-31)
25Kaki kameka valeke vari vatatana na Tamana, i lamae de i koe Jesu mana i soko pada va soru ze na ia tana dena. “Valeke vari vatatana,” igo, “avana tuna zazu ne era go tuna pala go too gado kutona i kaega?”
26Jesu i vataule ne ia igo, “Avana i sine go Buka tabo ne? Avana igo nanaomu ṉalu qo toere go?”
27Valeke ne ivataule igo, “Ono mamaligara ne God Batu aro, osina puṉumu, osina madaumu, osina karaputa aro, mana ono mamaligara ne qira vano kakavata iriki garogaro go kaega, gerena qo mamaligara nigo tanumu.”
28Qo ogoto igo Jesu, “Ono zazu ne to ianae go tono pala too go.”
29Do valeke vari vatatana na Tamana ne i soko va totoloṉo na tanuna, gonae i tana napu ne Jesu, “Akena tane i onotoqu go?”
30Jesu i vataule ne ia igo, “Kaki kameka valeke i reqe me Jerusalema go mara zae Jeriko igo, do iri lama vano sikosiko iri vae vatapudoke ia, mana iri vana ze zuka ne. 31Gonae kaki kameka patere i lulu napue so zuka igogo ne, do ṉalu i mia valeke ne i kekele go zuka ne i kavae kene tepa zuka mana zaza sivala so. 32Gerena napu so kaki kameka valeke zazu lotu, i lulu napu me so zuka ne i mia velake i kekele go zuka ne, i kavae kene tepa zuka ne mana sivala napu so igo. 33Do kaki kameka valeke Samaria i lama i mia valeke ne i kekele go zuka ne, i lete nanao vasakate ia. 34I zae de ikoego valeke ne, i zele ze tala mana vino de i paleka go mana i kade ze poga. Gonae i taru ze valeke ne popokona donki ia, i pala za pade ziṉoziṉo mana iza miasoka ze ia. 35Bakubaku na ia, i pala karua kesa siliva i teke ne valeke itoṉove go pade ne mana i sine ne, ‘Ono miasoka valeke dena, ṉalu na ule napu me ṉara volia pataro qo vavana ze go ia.’ ”
36Valupolupo na Jesu igo, “Loborona nanao mu aro, adeke kameka ria tarapisa basoe dena, iva gere ze go onotona valeke iri vae go vano sikosiko ne.”
37Valeke vari vatatana ne iva taule igo, “Iato valeke i tavisi ne go ia.” Jesu i vataule ne valeke ne igo, “Aro ono za mana zazu napu neso gerena pata i zazu nego valeke nae.”
Jesu Iza Tove Qiru Mata Mana Maria
38Jesu mana disipoloro ia iri lulua zuka ne lama dokae kaki komala. Kaki qole vitoṉo na Mata, i lama lulua Jesu mana vakeba ze pade ia. 39Mata iko ne kameka kaena qole vitoṉo na Maria. Gonae i lama koloku garogaro Batu ne mana igata vari vatatana ro ia. 40Mata gonae i lete nanao vokara ne topu na pataro tina zazu nego. Gonae i lama sine ne Jesu, “Batu qoki nanao kaega aro kaequ i koloku volomo, mana era tanuqu so tuna zazu ne go osina pataro? Iago sine ne aro mara lama tavisi ava.”
41Batu ne i vataule ne ia igo, “Mata, Mata! Aro qo lete nanao vokara neso topu na pata, 42do kameka so pata itora go. Maria i vine pata ni totoloṉo go, mana kaega ka basoe tina pala vakuziki ne ze go ia.”
Currently Selected:
Luka 10: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.
