Luka 14
14
Jesu Iva Velake Kameka Valeke I Mokoso Ṉalu Sabat
1Kameka musaqara Sabat, Jesu iza ṉaṉae pade ia valeke kenaqa ria vano Parisio, mana ṉalu nae basoero iri lete mia tarua ia. 2Kaki valeke i pala mokoso, ipuraka lupo karua karisina mana makena i lamae de ikoego Jesu. 3Gonae Jesu i seko me mana i tana ne qira vano tarove na tamana, mana vano Parisio, “Avigo Tamana ita, iva mao vari vole ṉalu Sabat, ba kaega?”
4Do ria iriki sine kaega kapata, gonae Jesu i pala tarua valeke ne iva velake, mana i turi vazao ia. 5Gonae i sine ne qira, “Tara go kakia ramu sale valeke ia ba buluka ia tara za sorue bolu ṉalu Sabat. Avigo tono za toqo va sipore kaega ṉalu musaqara Sabat nae ba?”
6Do ria iriki sine vaule so kaega kapata de ikoego ia sauna pata dena.
Vari Kitaki Mana Ko Qoqoro
7Jesu i mia rove kakiaro ria basoero iri koru qira mego ṉaṉa ne. Iri vine de kolokoloku velaka tanuqira. Gonae i sine ne qira basoero ne vapadapada dena, 8“Ṉalu kaki basoe i koru qamue sauna ṉaṉa tavisi na vari vabusi ia, oniki za kolokue de koko velaka, niki go kakia valeke i koru napua go ia i sivala nigo aro. 9Tina lama valeke i koru qamu go tina sine nigo, ‘Tekene valeke nae de kolokoloku velaka nae.’ Aro tono agava ṉalu tono za kolokue de kolokoloku taramuzina ne. 10Do ṉalu kaki basoe i koru zigo ṉaṉa ono za kolokue so taramuzi, go ia valeke i koru gogo ne tina lama sine nigo, ‘Lama kolokue vesu velaka zakazaka dena vakitaka era.’ Mana ria basoero iri za kolokue go vesu tarakenaqa ne tarina mia valeke ne i nanao va mazali go aro. 11Gerena napu so basoe ni vazaka go tanuna, God tina va qoqore, mana basoe niva qoqore go tanuna, God tina va zakazaka.”
12Taramuzina Jesu i sine ne valeke i zazu nego pata gege ne, “Ṉalu qo zazu nego pata gege lavata ba, pata gege suka, oniki korua so vakitaka ro aro mana sinaqe aro, ba togamu, ba valeke vavagado. Tanego ria tarina koru napu go aro gonae soka lupo bana to iri go pata gege qo zazu nego aro. 13Iago, ṉalu qo zazu ne pata gege, ono koru qira vano situ, vano eqoqo, vano taveqo mana vano kodo. 14Aro tono pala makaolo, tanego ria tina makuru qira soka vaule nigo, do God tina soka vaule nigo aro ṉalu basoero velaka tarina too napu mego tepa le ne.”
Seko Vapadapada Na Kelo Lavata
(Matiu 22.1-10)
15Kaki kameka valeke i koloku tavisi qirae go tevolo ne, i gata pataro i sine ne Jesu, igo, “Avana to ka kula qira basoero tarina za koloku mana ṉaṉa tavisi go Too ikoego vari miasoka ia God.”
16Jesu i sine ne valeke ne, “Kaki kameka ṉalu kaki valeke, izazu ne pata gege lavata mana i koru me qira topu ria basoero. 17Ṉalu musaqara na kelo ne i lama doka to ia i turi ne valeke zazu ia go mara za sine ne qira basoero i rave bana qira go igo. Gonae valeke zazu ia ne, iza sine ne qira basoero ne, ‘Lama to ramu osina pata i nama lupo banato, i vane qira.’ 18Do osiqira iri vatupia sine na pataro ivariqo qira. Valeke kenaqa ne i sine ne seka ia batu ne igo, ‘Era qara volia kameka takoboro na pua era, iago maza miasoka. Ono sine ne batu aro seko maqata era.’ 19Valeke varuana ne igo, ‘Era qara volia so manoga tunana boko voru era, iago, tuna za zazu ne bara na. Ono sine ne batu aro seko maqata era dena.’ 20Mana valeke vapisana ne igo, ‘Era qara busi so go, i makuru ava tuna garetu go.’ 21Valeke zazu ne i ule za mana i sine ne batu ia osina pataro iri sine go ria. Gonae batu ne i lete muma mana i sine ne seka ia. ‘Ono katikili zae loborona zuka lavata ro, mana zukazuka ro na komala lavata ne, mana lulu me qira vano situ, vano taveqo, vano i le makeqira, mana vano kodo.’ 22Iki umata kaega valeke seka ne iule me mana i sine ne batu ne, ‘Osina pataro qo sine go aro qa zazu lupo neto, do pade ne iara kaebo so puraka.’ 23Gonae batu ne i sine ne seka ia, ‘Ono za napue zuka sasaniqa mana zuka na barue ro pala me qira basoero go mara vapurake pade ne. 24Ma sine ne qamu, kaega so kakia ria basoero qa koru kenaqa qira go tarina qe go kelo rera.’ ”
Basoe Mara Nanao Velaka Tarinara Lulua Jesu
(Matiu 10.37-38)
25Topu sasakata basoero iri lulua go Jesu. Gonae Jesu i tabali mana sine ne qira, 26“Ṉalu ka basoe i lamae de qa koego era, do mamaligara ia iara koe de koego tamana, sinana, qole ia, salero ia, kaena ro mana vavanina ro mana too ia tanuna i sivale ne deqa koe go era basoe nae iki disipolo era kaega. 27Ṉalu ka basoe i soko luluava era, do iki vagore kaega koluse ia gogo ne, basoe nae iki disipolo era kaega go. 28Ṉalu kakia basoe i soko go zazu ne na pade, pata kenaqa ia tina koloku mana zazu ne tekere volina pade ne. Avigo itora kesa ia go tina valupo go pade ia, ba kaega. 29Tanego ṉalu iki zazu ne kaega pataro nae, pata volomo iva degere go pade ia, do tiniki valupo kaega. Gonae basoero ne tarina karia ia. 30‘Valeke dena iva degere pade, do i makure valupo na zazu ia tarina vane.’ 31Ba ṉalu kaki batu lavata i lulu qira za manoga mao basoero varitara iago mara za varitarae dekoe kene batu lavata igo. Mana kene batu lavata i lulu me qira karabete mao vano varitara ia, batu kenaqa ne tina koloku mana nanao zaqe avigo i mazala varitara mana sivala ne na kene batu lavata, ba kaega. 32Ṉalu i nanao iki karaputa sivala ne kaega kene batu lavata, ia tina vazao kakia basoero ia, go tina za pene bule de ikoego batu lavata nae torana iara ko laqalaqa mego. 33Gerena napu so ramu,” igo Jesu, “kaega kaki kameka ramu tina disipolo era ṉalu iki tarua kaega pataro i toṉove go.”
Keno Sakata
(Matiu 5.13; Maka 9.50)
34Jesu igo, “Keno i pata velaka do ṉalu i lupo go gagaemanana i kaega ka pata tina va velaka napua go. 35Iago, iki mazala kaega va velaka na pua, ba vou palu ze vosuvosu go tina va velake go pua, ne, iago i tora so vanaqe na. Ramu izari qeqele qamu muna gata velake!”
Currently Selected:
Luka 14: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.
