Luka 7
7
Jesu Iva Velake Valeke Zazu Ia Batu Ria Vano Degara
(Matiu 8.5-13; Jon 4.46-54)
1Ṉalu Jesu iva lupo to sine na osina pataro dena de iri koego basoero ne, ia i zae Kapanaum. 2Kameka batu lavata na soldia ria vano Rom i koe de go iko ne kakia valeke zazu ia i lete mamaligara ne, valeke ne i mokoso mana i garogaro to vele le. 3Ṉalu batu ria vano soldia i gata soba de igo Jesu, iva zao qira kaki ria vano kazigarata na Jiu, go mara ria za sine ne Jesu go tina za lama, va tavoese valeke zazu ia igo. 4Iri lamae dekoe Jesu mana iri pene ia, “Valeke dena i tora mo tavisi ne iri go. 5I mamaligara ne qira basobasoero remu, mana iato valeke dena ia vadegere go Pade Lotu remu vano Jiu.”
6Iago Jesu i lulu ne qira to. Iara kaebo za doka na pade ne Jesu, valeke batu ne iva pala seko qira ria vakitaka ro ia, go tarina za sine ne Jesu, ria iri go, batu remu igo, “Batue niki vanula volomo nigo. Tanego era iki torava kaega tuna va keba qe aro pade era. 7Qa nanao era tanuqu do, iki torava kaega tuna garetu seko tabe go aro, mo seko so aro valeke zazu era mara tavoese so. 8Era tanuqu do iko nava so mazala, qa koe pola qira batubatu lavata ro remu, topu napu ria vano soldia ro iri koe polaqu era, ṉalu qa sine ne era kaki valeke, ‘Ono za,’ ia iza mana ṉalu qa koru, ‘Lamae dena qa go era,’ ia i lama, valeke zazu era ṉalu qa sine ne, ‘Ono zazu ne pata dena,’ ia i zazu ne.”
9Ṉalu Jesu i gata seko dena, inureke ne valeke dena, i tabali mana i sine ne qira basoero iri lulua ia, “Ma sine qamu, kaega kaki dia loborona Izirel qa soba ze era valeke vaogoto gerena go valeke dena.”
10Ṉalu vano pala seko iri ule za pade ia batu ria vano soldia ne, iri za mia ria velake zazu ni mokoso go, i tavoesi bana to.
Jesu Iva Too Sale Valeke Ia Qole Nanaro Na Nain
11Taramuzina nae Jesu izae kaki komala iri vitoṉo ze Nain i lulu ne qira disipoloro ia mana topu ria basoero go. 12Pasi iara doka so ia tarakenaqana komala ne iri soba qira basoero iri vagoro me sinara. 13Ṉalu Jesu i mia qole nanaro ne, i lete nanao ia mana i sine ne ia igo, “Kasi dae.” 14Gonae iza mana i siba sinara ne mana vano iri vagore go sinara ne iri noto mana Jesu igo, “Valeke gavere qa sine nigo ono koloku me.” 15Valeke ni le bana go i koloku mana i seko, mana Jesu i teke vaule ne to sinana go.
16Osiqira basoero ne iri lete sareki lupo mana iri vazaka God, iri go, “Kaki propeta lavata sivala i lama sadaka qita.” Iri go, “God i lama go tina vakavele qira basoero ia.”
17Goto nae tarama na Jesu igo lupoe to kena Judia mana osina rikisina vudu ne.
Jon Na Bapitema I Tana Ne Jesu
(Matiu 11.2-19)
18Ṉalu disipoloro ia Jon iri pepeu lupo to dego osina pataro ni zazu nego Jesu, Jon i koru qiru karua disipoloro ia, 19mana ivazao qirue dekoe Batu ne, go tiruna za tana ne ia, tana dena, “Avigo aro to tane ia tina lama go, ni sine go Jon? Ba timuna piri ne kaki basoe napu?”
20Ṉalu iru za dotkae de ikoego Jesu, iru vane dena ia, “Jon na bapitema i turine qaru raru go taruna tana nigo aro. Avigo aro to tane ia tina za lama go, ba timuna piri ne kaki basoe napu?”
21Torana to ṉalu nae, Jesu iva tavoese qira topu ria basoero i pala qira go soso mokoso ro, manuru sakata ro mana iva mimia qira ria basoero iri kodo go. 22I vataule ne qiru riru iru pala seko ia Jon igo, “Ule za mana za sine ne Jon pata qamu mia mana gata go, vano kodo iri mimia, vano taveqo iri zaza velaka, ria iri kimata ne mokoso voremake iri velaka mana vano ikiki iri ara gata pata to, vano le iri too napu me, mana Tarama Velaka ia Batu ne i tatavatae de iri koego ria vano iri situ go. 23Kula de iri koego ria iriki ruama nava kaega era.”
24Taramuzina vano pala seko ia Jon iri ule, Jesu i vatupia to sine ne qira basoero ne sauna Jon. “Ṉalu tamu zae go de ikoego Jon tepa de iki koe kaega ka basoe na avana to qamu nanao go tamuna za mia go? Seuseu i kiure go seva? 25Avana tono za mia go, valeke iva keba nego poga meno meno? Basoero iri vakeba ne poga menomeno ni gogo mana iri kova velavelaka gogo ne, tono za mia qirae pade menomeno ria batubatu ro. 26Sine nava era avana qamu za mia go? Kaki propeta? Ove to, Jon i lete lavata sivala ne ia. 27Tanego Jon ne, iato Buka tabo ne i sine go, ‘God igo, era tuna turine valeke palapala seko era tarakenaqamu, go tina papaqa vanama bana go zuka aro.’ ” 28Masine ne qamu igo napu Jesu, “Jon i lavata sivala ne basoero iri podoe go pua dena, do ia i lete suka sivale go de ikoego vari miasoka ia God, iara lete mazala sivala ne Jon.”
29Ria basoero mana vano palapala takisi iri gata go ia, iri toqe ne vatovato velaka ia God mana iri bapitema e de ikoego Jon. 30Do vano Parisio mana vano tarove na tamana, iriki soko kaega za bapitemae de ikoego Jon, tanego iriki soko kaega vatovato velaka ia God.
31Jesu i sine napua, “Avana to tuna vapadapada qirae era ria basoero na ninidena? Avana to iri gere go? 32Iri gere qira so salero iri kolokue go de iri vari va volivoli ego, mana iri korukoru aqe de iri koego kero ne sale ro ne, ‘Qimu kiu remu, do ramu qamuki veqa so kaega, qimu dae le remu do, ramu qamu ki daeso kaega.’ 33Tanego Jon na bapitema i lama, i qaniqani mana iki ge kaega vino, do qamu go! ‘I siqane manuru sakata!’ 34Era Tuna basoe qa lama, qa ṉaṉa mana qa qe loka mana ramu qamu go, ‘Mia to valeke dona, i poro ge loka, i vakitaka qira so ria vano palapala takisi mana vano vasakata pata go.’ 35Do ogoto na, tarove ia God i sadaka me de iri koego ria basoero iri toqe ne vaogoto na tarove nae.’’
Jesu Izae Pade Ia Saimon Valeke Parisio
36Kakia valeke Parisio i sinene Jesu go tina za ṉaṉa tavise igo, ṉalu Jesu iza dokae pade ne, iza koloku go tina ṉaṉa. 37Komala ni gogo ne i koe kameka qole i poro vasakata pata, ia i gata soba Jesu niza ṉaṉae pade ia valeke Parisio ne, i pala za kameka botolo iri zazu ze ipaka selesele iri vitoṉo ze alabasta, i purake tala i lete nonoli meno go. 38Iza degere taramuzina Jesu tepa makena, i dae mana iva boma ze makena Jesu soso ne na matana, mana i qusa va kadala ze uguruna, i kuna makena Jesu i zuga ze tala ni nonoli meno go. 39Ṉalu valeke Parisio ni koru valame ze go Jesu pade ia i mia pataro dena, i pala nanao dena, “Ṉalu valeke dena tara propeta ogoto go, ia i mazala so rove na akena tane qole dena, go ni siba go ia mana qole dena i vivitoṉo sakata go.”
40Jesu i seko mana igo dena, “Saimon, era i konava kaki pata tuna sine nigo aro.” Saimon igo, “I velaka valeke vari vatatana, sine nava.”
41Gonae Jesu igo, “Kaki karua valeke iru pala ze kesa de koe kaki valeke, mana tirunara kavale iru go, kakia i pala torana lima vasa dola mana varuana neqo dola go. 42Osiqiru ne i makuru lupo qiru so kavala vaule na, iago valeke ne i vakuziki ne so lelepu riru, adeke riru dena ni lete mamaligara ne ia?”
43Saimon igo, “Qa nanao keni lete pala va topua go kesa ne, igo.” Jesu i vataule ne ia igo, “Aro qo ogoto.” 44Gonae i tabali za de ikoe qole ne, mana i sine ne Saimon, “Avigo qo mia qole dena? Era qa lama kebae pade aro, do aro qoki teke nava kaega besi go tuna saboro ze makequ, do qole dena i saboro ze makequ era sosone na matana, mana i qulasa va kadala ze uguruna go. 45Aro qoki kuna ava kaega era, do qole dena iki mamanava so kaega kuna na rnakequ, pasi lama keba qa vae go era. 46Aro qoki alu ze kaega tala kuzukuqu era, do qole dena i seqe ze tala nonoli meno dena makequ era. 47Iago ma sine nigo, ia i lete mamaligara nava era, iva sadaka vasakata pataro ia iri lete topu, do ninidena era qava kuziki lupo ne. Ṉalu God i vakuziki ne vasakata pata suka de ikoe kaki basoe, basoe nae i mazala so soso ne mamaligara suka ia de qa koego era.”
48Goto nae Jesu i sine ne qole ne, “Vasakata pataro aro iri taqusa lupo.”
49Ria iri ko tavisi ze ia tevolo ne, iri vatupiana ne vari va tanatana tanuqira, “Akena tane valeke dena go tina va talupase go vasakata pata ne?”
50Do Jesu i sine ne qole ne, “Vaogoto aro i va kaveli go, ono za loborona dalo.”
Currently Selected:
Luka 7: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.
