Matiu 23
23
Jesu I Seko Vaqoqore Vatovato Ria Vano Kazigaratana Jiu
(Maka 12.38-39; Luka 11.43,46; 20.45-46)
1Gonae Jesu i sine ne qira basoero ne mana disipoloro ia, mana igo, 2“Vano vari vatatana na Tamana mana vano Parisio, i ko ne qira karaputa sauna sine vasadake na talupasana Tamana ro ia Mosese. 3Iago osina pata iri sine go ria, muna vaogote mana lulua go. Do too mana vatovato ria muniki lulua. Iri vari vatatana ne topu na tamana, do tanuqira iriki lulua so kaega. 4I gere ṉalu iri taru ze avarana basoe topuna pata maqata go na vagore go, do tanuqira iriki kaega vagoro tavisi na pata maqata nae. 5Iri zazu ne topu pata go basoero ne tarina mia qirae go, pata i qolo ego Tamanaro iri qolo ze go tokama qira iri lete valavate. Mana qolo i idoke go tumutumuna roku ro ria, i lete lavata go. Iri zazu ne iadena go tanuqira iri lete mamaligara ne God mara vane qira basoero iri go. 6Ṉalu na kelo mana ṉalu na lotu gogo ne, iri soko so kolokue na vesu vela velaka ro. 7Ṉalu iri zae go loborona de iri vari va volivoli ego, iri soko basoero mara vamazala qira, tarina koru qirae vano vari vatatana. 8Do ramu muniki vamao ne qira basoero ne, tarina koru qamue vano vari vatatana. Kameka basoe so i valeke vari vatatana ramu, mana ramu qamu tamakenaro so go. 9Muniki koru ze kaki basoe na vudu pua dena, tamaqamu, kameka so basoe i Tamaqamu go, iato ikoego rani ne. 10Mana basoe ne mara kasi koru qamue batu tanego kameka so basoe i Batu go, iato era to Mesia, 11ia i lete lavata sivala e de qamu koego, mara gere valeke zazu ramu. 12Ka basoe iva zakazaka go tanuna, God tinara vaqoqore ia, do ka basoe i vaqoqore go tanuna, God tinara vazakazaka ia.”
Jesu I Seko Lavata Qira Batubatu Ria Vano Jiu
(Maka 12.40; Luka 11.39-42,44,52; 20.47)
13-14Jesu igo napu dena, “Ramu vano vari vatatana na Tamana mana ramu vano Parisio, muna miasoka! Qamu vano poqepoqe, tanego ramu to qamu midiki ne qira go basoero ne keba zana Too ikoego vari miasoka ia God. Ramu tanuqamu do qamuki nanao bana so kaega keba zana, mana qamu midiki ne qira basoero iri pada ne go vele keba zana go!
15Ramu vano vari vatatana na Tamana mana vano Parisio, muna miasoka! Qamu vano poqepoqe, qamu goe masi mana piqata kava e sasaniqa go mamu soba ka basoe i soko go mara basoe Jiu qamu go. Mana ṉalu basoe nae i lama basoe Jiu, qamu lete vatora zeto ia zae na nako ne gere qamu so ramu, mana tina lete sakata sivala ne qamu ramu.
16Ramu qamu kenaqa ne qira go basoero ne, muna miasoka! Qamu lete kodo, tanego qamu vatatana qirae basoero ne, qamu go, ‘Ṉalu kaki basoe i vanadua nanao na mana i odo odo e Pade Lotu, i pata volomo so qamu go, do ṉalu i vanadua nanao na mana i odo odo ne qolu i koego Pade Lotu, ianae to niki ara vae go basoe i zazu ne go odoodo ia,’ qamu go. 17Qamu vano bulaṉoe! Adeke tane i lete mazala go, qolu ba Pade Lotu go i va tabo go qolu ne? 18Qamu vari vatatana napu ne, ‘Ṉalu kaki basoe i vanadua nanao na, mana i odo odo ne sara ipaka ne, i patavolomo so qamu go. Do ṉalu i vanadua nanao na mana i odo odo ne sosovolomo ro ikoego popoka sara ipaka, ianae to niki ara vaego basoe i zazu ne go odoodo ia,’ qamu go. 19Qamu vano bulaṉoe! Adeke tane i lete mazala go, sosovolomo ne, ba sara ipaka i vatabo go sosovolomo ne? 20Iago, ka basoe i vanadua nanao na mana i odo odo ne sara ipaka ne, i gere napua so i odo odo napu neso sosovolomo ro ikoego sara ipaka ne, 21mana ṉalu ka basoe i vanadua nanaona mana i odo odo ne pade lotu ne, i gere napua so i odo odo ne Pade Lotu ne mana, vitoṉona God ikoego loborona ne go. 22Mana ṉalu ka basoe i vanadua nanaona mana i odo odo ne rani ne i gere napua so i odo odo ne de ikoego God mana i odo odo ne God go.
23Ramu vano vari vatatana na Tamana mana vano Parisio, muna miasoka, qamu vano poqepoqe! Qamu teke zaqe God osina vamanoga na, pata suka ro i gagaemana velake go patagege ne, qamu pala zego barue ro ramu. Do qamuki vaogote so kaega vari vatatana ia Tamana ro, gere na varitara ne pata ni ogoto, varinanao mana vatovato velaka. Pata suka ro dena to tamuna zazu kenaqa ne, do muniki nanao kasupe ne pataro lavata go. 24Ramu qamu kenaqa ne qira basoero ne, qamu lete kodo, qamu kima vakuziki ne pata babauku suka ro ikoego loborona dao ramu, do kamolo lavata ne, qamu kalakunu neso.
25Ramu vano vari vatatana mana ramu vano Parisio, muna miasoka! Qamu vano poqepoqe, qamu va dalo kakamuna kapu mana ebata ro ramu, do loborona ne i purake poṉo, ianae i gere to too ramu tanego qamu vaqalo qira basoero ne mana qamu soko pala na topuna pata sauna tanuqamu go. 26Ramu vano Parisio qamu lete kodo sakata, vadalo kenaqe loborona kapu ne, go kakamuna kapu ne, do tina dalo napu go.
27Ramu vano vari vatatana na Tamana mana vano Parisio, muna miasoka, qamu vano poqepoqe! Qamu gere kukubo iri peda va kakase go, i mia velavelaka go kakamuna, do loborona i purake uri mana tokama noli na basoe i le go ikoego loborona bolu ne. 28I gere napua so de qamu gogo ramu, tanego pataro qamu zazu ne, i mia velaka qira to basoero ne, do loborona nanao qamu i purake de go poqepoqe mana vasakata pata go.”
Jesu I Sine Dego God Tina Va Lepulepu Qira Vano Vari Vatatana Na Tamana Mana Vano Parisio Go
(Luka 11.47-51)
29Jesu igo napu dena, “Ramu vano vari vatatana na Tamana mana vano Parisio, muna miasoka! Qamu vano poqepoqe, qamu zazu va velavelake kukubo qira propeta ro mana qamu malemale kukubo qira basoero i velaka go too ria, 30mana qamu go ṉalu tamu ko tavisi go torana ko iri vaego vano ṉalu bana ro ramu qamu go, tamuki mazala kaega tavisi gere qira ria, iri vae vale qira go propeta ro ne. 31Iago ramu qamu lete vasadake, qamu sinaqe bana ria vano iri vae vale qira go propeta ro ne. 32Iago, zazu soma ne mana valupo pata iri zazu bana mego vanovano bana ro ramu! 33Qamu gere dole ne, tuna ro dole pani! Avigo? Tamuna paqa nego ramu kimata ia God i vanama ne qamue go nako ne? 34Masine ne qamu, tuna turine qamu me kakiaro propeta, vano tarove mana vano vari vatatana go, do kakiaro ria tamuna vae vale qira, mana kakiaro tamuna paqipaqi qirae koluse, kakiaro tamuna sima qirae loborona pade pepeu mana Pade Lotu, mana kakiaro ria tamuna kakale qira e komakomala ro ramu go. 35Urena ianae, God tina vakimata qamu ramu, sauna le qira basoero velaka ia, tupi me valeke totoloṉo Ebolo, lama dokae le na Zakaria, tuna Beretia qamu vae vale ze ia vari lobori na Pade Lotu mana sara ipaka ne. 36Ma sine ne qamu pata ogoto, God tina va kimata lupo qamu, tanego sauna vatovato sakata ro qamu zazu ne go ramu mana vanovano ṉalu bana ramu go!”
Jesu I Mamaligara Ne Jerusalema
(Luka 13.34-35)
37Jesu igo napu dena, “Ke Jerusalema, Jerusalema! Qo vae vale qira propeta ro mana vano palapala sekoro i turi ne qira atu go God! Topu ṉalu qa soko bara nigoe karisiqu, gere kokorako i opo qira e tuna ro polana babalakuru na, do aro qoki soko ava kaega! 38Iago God, tina siporo kasi ne Pade Lotu nae, go tina kakaere, mana tina kaega kapatana. 39Mana ma sine ne qamu, pasi dena tamuniki mia napu ava kaega era, go na doka so ṉalu osiqamu tamuna sine, ‘God i va makaole valeke dena i reqe mego vitoṉo na Batu ne.’ ”
Currently Selected:
Matiu 23: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.
