Matiu 28

Jesu I Too Ule Napu Me Tepa Le Ne

(Maka 16.1-10; Luka 24.1-12; Jon 20.1-10)

1Taramuzina Sabat, sarusaruku lolotoro na Sade, Maria Madalena mana kene Maria, iru za mia leṉa ne. 2Gonae kameka nunu lavata i vizua osina pata, mana aqelo ia God i qoqoro me tepa rani ne, i lama ikolo vakuziki ne ipaka iri kokoqu ze go leṉa ne mana i kolokue go. 3Tarakenaqana aqelo ne i gere tatavatana kapi ne, mana poga ia i lete kakasa go. 4Pasi nae vano soldia ro ne iri lete sareki, iri nenedere mana i gere to kapata iri le go.

5Aqelo ne i seko tabe qiru karua qole ne, igo, “Aburu niki sareki era qa rove, qaburu taqia Jesu iri vae vale zego koluse ne. 6Dena iki koe kaega, i too bana, gere so de i sine bana go tanuna, buru lama mana mia de iri va kekele ze go. 7Buru katikili ule za de iri koego disipoloro ia mana sine ne qira, ‘Jesu i too ule bana me tepa le ne, mana tina garetu kenaqa e Qalili, mana de goto tamuna za miasoba zego ia.’ Muna nanaotarua pata qa sine bana ne qamu go.”

8Iago karua qole ne iru katikili kasi ne leṉa ne, iru lete sareki, do iru lete kula napu so, iru teteṉe go tiruna za sine ne qira disipoloro ne tarama na Jesu.

9Do iki umata so kaega, Jesu i lama soba qiru mana igo, “Bule”, karua qole ne iru za garogaro ia, mana iru siba makena mana iru vazaka ia. 10Jesu i sine ne qiru, “Kasi sareki, za mana sine ne qira vakitaka ro era mara ria zae Qalili, de go tarina garetu mia vego era.”

Seko Ria Vano Soldia Iri Miasoka Go Lena Ne

11Ṉalu karua qole ne iru zaza ule, kakia ro vano soldia ro iri miasoka go leṉa ne iri ule za komala lavata ne mana iri za sine ne batu ria patere ro ne osina pata i sadaka go. 12Gonae batu ro ria patere ro ne iri za kameka pepeu e de iri koego vano kakazigarata ro, mana iri vanadua vatovato ria, gonae iri teke ne qira vano soldia ro topu na kesa. 13Mana iri sine ne qira, “Muna sine ne qira basoero ne, disipoloro ia iri lama kuse torana qi kamuku go remu mana iri lama siko tokamana go. 14Mana ṉalu qavuna tina gata soba pepeu ro nae, remu to timuna va pepeu ago ia, ramu tina kaega ne qamu ka siqosiqo sauna ia igogo ne.”

15Iago vano soldia ro iri pala kesa ne mana iri zazu ne pata iri sine ne qira go. Iago pepeu igogo neto i puro e de iri koego vano Jiu, gogo i doka to ninidena go.

Jesu I Sadaka Qira Disipoloro Ia

(Maka 16.14-18; Luka 24.36-49; Jon 20.19-23; Zazu Ria Apostoloro 1.6-8)

16Ria manoga kameka disipoloro ne iri zae kubolo na Qalili, de i sine bana ne qira go Jesu tarina zae go. 17Mana ṉalu iri miasoba ia, iri vazaka ia, do kakiaro ro ria iri ara ruama so. 18Gonae Jesu i ziki garogaro qira, mana sine ne qira, “Osina karaputa na rani mana pua ne, i teke lupo nava era God. 19Iago muna zae osina dia vudu pua dena, mana sine qira basoero ne mara lulu ava era. Muna bapitema qirae vitoṉo na Tamana mana Tuna mana Spirit tabo go. 20Vatatana qira, go tarina vaogote mana lulua osina ro pata qa sine bana ne qamu go. Mana era tuna ko tavisi qamu osina ṉalu, go tina za doka so ṉalu kolabana pua dena tina za lupo.”

Currently Selected:

Matiu 28: VRSNT

Highlight

Copy