Maka 10
10
Jesu I Vari Vatatana Ne De Igo Zazao Na Busi
(Matiu 19.1-12; Luka 16.18)
1Jesu i kasi ne de gogone izaza goza tepa kena Judia mana i kava za kene kava na uguru Jodan. Topu sasakata basoero iri lama teṉo napue de ikoego mana Jesu ivatatana qira gerena de ivane bana qira go.
2Gonae kakiaro ria vano Parisio iri lama pada ne ia. Iri go, “Avigo Tamana ita iva mao so basoe tina vaule go qole ia?”
3Jesu i vataule ne qira ria tana dena, “Avana to ka tamana i teke bana ne qamu ramu Mosese?”
4Ria iri go, “Mosese iva mao so valeke tina vaule go qole ia, do pata kenaqa ia tina karo kameka pepa na vari vaule.”
5Jesu i sine ne qira, “Mosese ikaro ne qamu tamana nae, tanego ilete makuru sasakata vatatana qamu mana i makuru qamu ramu gata rove na pata. 6Tanego Buka tabo ne i sine, ‘Tarakenaqana osina pata, God i vazaria valeke mana qole.’ 7Igo nae ia tane valeke tina kasi ne tamana mana sinana mana za ko kameka de ikoego qole ia, 8mana iru lama kameka tokama go, iruki ara karua tokama kaega, do iru kameka tokama so. 9Iago, pata God i va nadua go, kaega napu to ka basoe tinara mazala go vota na.”
10Ṉalu Jesu i keba za loborona pade ne, ria disipoloro ia iri tana ne ze ia talukasana vari vatatana dena. 11Jesu i vane qira dena, “Ṉalu kaki valeke i vaule qole ia mana za busi napua kaki qole kakavata igogo ne, valeke nae i taunata. 12Gerena napu so ṉalu kaki qole i vaule valeke ia mana za busia valeke kakavata gogo ne, qole nae i taunata napu so.”
Jesu I Vatabo Qira Salero Suka Ro
(Matiu 19.13-15; Luka 18.15-17)
13Kakiaro basoero iri pala me salero ria de ikoego Jesu go mara sapu ze karisina iri go, do disipoloro ia iri seko lavata qira basoero ne. 14Ṉalu Jesu i mia go de iri gogo na i muma ne qira disipoloro ia, igo, “Kasi vakaega qira sale ro ne lamae na de qa koego era, tanego Too ikoego vari miasoka ia God, ike ria to sale ro ne tarina za koego. 15Era ma sine ne qamu pata ogoto, ṉalu basoe iki gere go kaega sale ro iri kula ne go vazaka na God, basoe nae iki tora kaega tina za koego Too ikoego vari miasoka ia God.” 16Gonae i pala me qira salero ne de ikoego, itaru zaqe popokona kuzuku qira karisina mana i vatabo qira.
Valeke Vavagado
(Matiu 19.16-30; Luka 18.18-30)
17Ṉalu Jesu i vele zaza, kameka valeke vavagado i lama koloku tutuṉe tarakenaqana Jesu mana i tana ne igo, “Valeke vari vatatana velaka, avana to pata tuna zazu ne go era go tuna pala go too gado kutona i kaega.”
18Jesu i vane dena, “Avigo tane qo koru zave go era velaka? I kaega kaki basoe i velaka go, do tanuna so God i velaka go. 19Aro qo rove bana so Tamana ni sine go pataro dena igo, ‘Oniki vae vale basoe, oniki taunata, oniki siko, oniki poqe ne qira basoero ne, oniki tatakiu ne pala valuna pata, mana ono vamazala tamamu mana sinamu ni gogo.’”
20“Valeke vari vatatana,” igo valeke ne, “osina pataro ikoego. Tamana ro dena qa lulu meto era pasi ara sale qavae mego.”
21Jesu i reṉa velaka ne valeke ne mana ilete mamaligara ne, iago ivane ia dena, “Kameka so pata iara ko nigo tono zazu ne go. Ono za mana za volivoli ne pataro qo toṉove go, mana kesa na ne ono soso ne qira vano iri situ go, mana aro tono tonovo napua too vavagadona rani ne. Lupo nae aro ono lama mana lulu ava era.” 22Ṉalu valeke vavagado ne i gata go seko ia Jesu dena, ilete mimia maququro mana tarakenaqana ilete mimia maqata, gonae i zaza kasi ne Jesu, tanego ilete vavagado.
23Jesu i reṉa ne qira disipoloro ia, mana ivane qira dena, “I lete makuru sivala vano vavagado tanna kebae go Too ikoego vari miasoka ia God!”
24Disipoloro ne iri lete poloso ne seko ro ia Jesu dena. Do Jesu ivane qira dena, “Sale ro era, i pata makuru bana so kakia basoe go tinara za kebae go de ikoego Too ikoego vari miasoka ia God! 25I makuru kameka kamolo tina olu zago talopana kameka nila sisiria. Ba basoe vavagado ne go, i lete makuru sivala to tinara keba zago Too ikoego vari miasoka ia God.”
26Pasi nae ria disipoloro ne iri lete maququru to ṉalu iri gata go pata dena. Ria iri vari sine ne tanuqira, iri go, “Gonae iago akena to go tina za kavele go too ogoto dena kene ṉalu”, iri go.
27Do Jesu ireṉa ne qira qe mana ivane qira dena, “I makure basoe tina zazu nego pata dena, do de ikoego God osina pata i malumu ne so.”
28Pita iza seko me igo dena, “Iago, avigo tepa reremu, tanego remu qimu vanane to osina patapataro remu mana qimu teke ne to ṉalu ro remu mana qimu lulu go to aro go.”
29Jesu i vane qira dena, “Ove era masine ne qamu pata ogoto. Basoe ni nanao va mazalava era mana Tarama Velaka era dena go iara kasi ne go komala ia, ba kaena ro valeke, mana vavanina ba sinana mana tamana ba pua ia ikoego patapataro ia ni toṉove gogo ne, 30basoe nae tina pala velake to ṉalu muzi. Ia tina pala vasivala ze kameka vasa topuna ro pade ro ia, kaena ro valeke, vavanina ro, sinana, salero ia, mana pua ia ni koego patapataro ia, mana vasasakata iri vane ze, do ṉalu iara komego ia tina toṉove too gado kutona ikaega. 31Basoero iri kenaqa go ninidena, tarina za muzi kene ṉalu, ba basoero iri muzi go ninidena tarinara za kenaqa to kene ṉalu.”
Vapisana to Ṉalu Jesu I Sine Napua De Tina Gogo Le Ia Ne
(Matiu 20.17-19; Luka 18.31-34)
32Ṉalu Jesu mana disipoloro ia iri lulu za go zuka igo zago Jerusalema, Jesu i zaza kenaqa ne qira ria, mana vano iri zaza muzi ne go ia, iri lete sareki napu. Jesu i sine ne qira manoga karua disipoloro ia, go mara ria kameka zaza vamiki tanuqira mana go mara sine ne qira pata tina doka go tanuna igo. 33Ivane qira dena, “Ita qata vele zaeto Jerusalema, mana nae tarina pala vazao ve era Tuna basoe de iri koego vano batu patere mana vano vari vatatana na Tamana. Ria to nae tarina toqe nava era go tuna le mana tarina vazao ve era de iri koe go vano iriki Jiu go kaega, 34go tarina vakari nava mana damuava, tarina suelapava, tarina simava mana vae vale ava, do vapisana musaqara era tuna too napu me tepa le ne”.
Pene Riru Tamakena Jemisi Mana Jon
(Matiu 20.20-28)
35Gonae Jemisi mana Jon karua sale valeke ia Zebedi iru za lamae de ikoego Jesu, iru vane dena, “Valeke vari vatatana, raru qaru soko kameka pata dena mo zazu ne qaru aro qaru go.”
36“Ava patana to qaburu soko go tuna zazu ne qaburu go era?” i vane qiru.
37Riru iru vane dena, “Ṉalu to zakoe go de kolokoloku batubatu na Too ikoego vari miasoka aro, qaru soko ono vamao ne qaru go kaki kameka raru mara koe tepa mataumu mana kakia tepa gedemu aro go.”
38Jesu ivane qiru dena, “Pata qaburu pene go nae qaburu ki rove kaega talukasana. Avigo taburu na vokara gere vokara tuna pala go era? Mana taburu na bapitemae zuka na le tuna pala go era?”
39Riru iru go, “Ove qaru mazala so.” Jesu vane qiru dena, “Pata ogoto sivala to raburu taburu na pala go vokara igere go vokara rera, mana bapitemae zuka na le tuna pala go era. 40Do kolokue na tepa matauqu mana tepa gedequ ne, iki era kaega tuna vine go, do God iko nego velaka go tina teke ne go kolokoloko nae basoero ni vine bana ne qira go.”
41Ṉalu kero ne manoga disipoloro iri gata go pata dena iri muma ne qiru Jemisi mana Jon. 42Iago Jesu ikoru qira osiqira iri lama teṉoe de ikoego, ivane qira dena, “Ramu qamu rove bana, basoero iri batubatu ego vudu pua dena, iri lete batu ne qira basoero ria. Mana basoero kenakena ne, iri lete vapala maqata qira basoero ria go. 43Do ramu mara kasi gonae vatovato ramu de qamu koego. Ṉalu basoe i soko mara batu igogo ne, ia tina basoe zazue to de qamu koego osiqamu. 44Mana basoe i soko mara kenaqa igogo ne, ia tina lama basoe sekae to de qamu koe go osiqamu. 45Patavolomo era Tuna basoe do qaki lama ne kaega go basoero ne mara zazu nava, do qa lama ne zazu ne qira basoero go tuna teke ne too era sauna go tarina kavele go vano basoe.”
Jesu Iva Mimia Mata Na Batimasi
(Matiu 20.29-34; Luka 18.35-43)
46Jesu mana disipoloro ia iri lama dokae komala Jeriko, mana ṉalu iri kasi ne komala nae topu basoero iri lulu qira ria. Kameka valeke vitoṉona Batimasi sale valeke ia Timeas. Osina ṉalu i poro kolokue so rikisina zuka ne, mana penepene kesa qira so basoero ne ṉalu iri zaza sivale go zuka ne. 47Ṉalu ia i gata go Jesu na Nazaret iza gome go zuka ne, ia ikoru me, igo dena, “Jesu, sale ia Davita, ono nanao ava era!”
48Basoero topu iri koego nae iri seko lavate ia iri go, “Mo duduli.” Do ia ara lete koru valavata to igo, “Sale ia Davita, ono nanao ava era!”
49Jesu i lama degere i noto, mana i sine ne qira igo, “Koru me ze dena.” Ria iri za koru me ia, mana iri vane dena, “Mo kula mana degere me to aro, valeke ne i koru go to.”
50Gonae valeke kodo ne ivana ne roku loda ia i soqa za mana i lama zae de ikoego Jesu.
51Jesu i tana ne ia, “Avana qo soko go ma zazu nigo era?” Valeke kodo ne igo, “Valeke vari vatatana, era qa seko ma mimia napu” igo.
52Jesu i vane dena, “Ule zato aro, vaogoto aro i va velaki go nae.” Kameka goso nae valeke ne i mimia to mana i lulu ne zeto Jesu zuka ne.
Currently Selected:
Maka 10: VRSNT
Highlight
Share
Copy
Want to have your highlights saved across all your devices? Sign up or sign in
The New Testament in Varisi, Solomon Islands © Bible Society of the South Pacific, 1994, 2004.
