Maka 15

Jesu I Degere Tarakenaqana Pilato

(Matiu 27.1-2,11-14; Luka 23.1-5; Jon 18.28-38)

1I sarusaruku lolotoro me batu lavata ria vano patere iri katikili za pala pepeue de iri koego vano vari vatatana na tamana mana vano gatagata pepeu go. Ṉalu iri vanama lupo to pepeu ria, iri qolo ze seni karisina Jesu mana pala vazao ze de ikoego Pilato. 2Gonae Pilato itana ne Jesu, “Aro toqo batu lavata ria vano Jiu ba?” Jesu i vataule igo, “Aro so qo sine go nae.”

3Vano batu lavata ria vano patere iri vapala zeto Jesu topu pata. 4Iago Pilato i tana napu ne Jesu igo, “Avigo ikaega nigo to kapata tono vaule ze go pataro iri vapala zigoe nae?”

5Do Jesu kameka seko suka iki sine to kaega. Gonae Pilato i lete poloso sasakata ne to ia.

Pilato I Toqe Ne Jesu Tina Le

(Matiu 27.15-26; Luka 23.13-25; Jon 18.39—19.16)

6Osina musaqara lavata na Pasova, Pilato tina vasiporo bana qira so kakiaro ria vano iri taru qirae go bara ne, ke iri pene go basoero ne. 7Ṉalu nae kameka valeke vitoṉona Barabasi iri taru tavisi qirae vano iri varitarae go de ikoego qavuna, mana ria nae iri vae vale basoe ṉalu iri varitara go. 8Gonae basoero topu iri lama teṉo, mana iri pene Pilato mara teke ne qira pata iri soko go, gerena ni zazu bana mego ave ro i lupo bana za go. 9Iago, Pilato itana ne qira, “Avigo qamu soko mava siporo ne qamu batu lavata ria vano Jiu?” 10Pilato irove velake ia tane batu lavata ria vano patere iri valame go Jesu, tanego iri lete qora ne so ia.

11Do vano batu lavata ro ria vano Jiu iri vagatagata seko qira go vano iri teṉo, go mara vasiporo ne qira Barabasi iri gogo. 12Pilato gonae i sine napu ne qira basoero ne, “Avana to qamu soko vego era tuna zazu ne ze go valeke qamu koru zego batu lavata ria vano Jiu dena na?”

13Basoero ne iri za koru me iri go, “Paqipaqi ze ia koluse ne!”

14Pilato itana ne qira, “Ava pata sakatana tane i zazu ne go?” Do iri koru valavata me, “Paqipaqi ze ia koluse ne.”

15Pilato i soko mara vakula qira basoero topu ne igo, iago, iva siporo ne qira to Barabasi, mana i sine ne qira soldia ro tarina sima Jesu, taramuzina iteke qira go tarina za paqipaqi ze ia koluse ne.

Vano Soldia Iri Va Kari Ne Jesu

(Matiu 27.27-31; Jon 19.2-3)

16Vano soldia iri pala za Jesu vari lobori na pade ro ne mana pade batubatu ia qauna ne mana iri koru teṉo qira soldia topu ro ne de iri koego. 17Iri vakeba ze Jesu kameka roku qore mana iri zazu vatopatopa ne qolo na qolo paqo ne mana iri vatopa ze kuzuku na Jesu. 18Iri votoro kazara ne karisi qira tarakenaqana Jesu, mana iri go, “Batu lavata ria vano Jiu.” 19Iri puda ze moki kuzuku na, iri sue lapa mana iri posare ia mana iri koloku tutuṉu mana vakari ne ia. 20Ṉalu iri valupo to pataro iri zazu ne zego ia, iri ozuke roku qore iri varoku zego ia, iri vakeba ule napu ze ia roku bana ia ne, lupo nae iri pala vazao ia, go tarina paqipaqi ze go koluse ne.

Iri Paqipaqi Ze Jesu Koluse Ne

(Matiu 27.32-44; Luka 23.26-43; Jon 19.17-27)

21Ṉalu iri zazae go zuka ne, iri soba kameka valeke vitoṉona Saimon ireqe me komala sasaniqa ne mana mara zae komala lavata ne igo. Vano soldia ro ne iri vatutubo ze ia go mara vegoro tavise koluse ia Jesu iri go. Saimon dena i valeke na Saerina mana i tamaqiru Alekzada mana Rupus. 22Iri pala vazao ze Jesu kaki dia iri vitoṉo ze Qolqota, talukasana seko dena, “Kovila na kuzuku.” 23Iri teke ne Jesu vino iri lomiri ze vabesi iri paraze kapotona kaki moki, do Jesu i kasi besi na. 24Iri paqipaqi ze Jesu koluse ne, mana iri kenakena roku ia. Iri va qiso daisi iri kudokudo akena to tina pala lupo go poga ro dena. 25Torana kaia koloko sarusaruku iri paqipaqi zego ia koluse ne. 26Iri karo kameka seko igo, “Batu lavata ria vano Jiu.” Sauna seko dena to in vae vale ze go Jesu. 27Iri paqipaqi tavisi ze ia karua valeke sakata, kaki kameka tepa matauna mana kameka tepa gedena go.

28-29Basoero iri lama zaza sivale go zuka ne iri vivinuquru mana seko vakari ne ia, iri go dena, “Iato nae, qo ara soba to pata qo sine, tono pero vasakate Pade Lotu ne mana vadegere vaule napua so kapisa musaqara noqo gogo! 30Aria mo siporo kasi ne me to koluse nae go mo vakaveli go tanumu.”

31Gerena napu so batu lavata ria vano patere mana vano van vatatana na Tamana, m seko vakan napu neso Jesu. In go, “Go vakavele qira basoero ne, do avigo imakuri go vakavele na tanuma? 32Aria to aro batu lavata na vano Izirel, siporo kasi ne meto koluse nae aro go timuna vaogoti go remu! Karua valeke sakata in paqipaqi tavisi ze go Jesu, do iru seko vaqoqoro napua so iago.

Lena Jesu

(Matiu 27.45-56; Luka 23.44-49; Jon 19.28-30)

33I manoga karua koloko to vari lobonna musaqara, rodoko i sapua to kolaba mana iza dokae to kqpisa koloko. 34I kapisa koloko to ia Jesu i koru valavata igo, “Eloi, Eloi lama sabatani.” Talukasana, “God erae, God erae, avigo tane qo vana nava go?”

35Kakiaro basoero iri degere go de gogo ne iri go, “Gata i korua to Ilaiza!” 36Kameka valeke i teteṉe za i pala pata mosumosu i some ze moki, i posu ze vino pani mana iva siba zaqe pepesuna Jesu go mara besia igo. I sme ne qira na, “Mata pin go mata mia Ilaiza tina lama sipa vasiporo ze ia koluse ne.”

37Jesu gonae i kameka koru valavata mana i le to igo.

38Poga lavata iri vaidoko ze go Pade Lotu lavata ne itandaka me zakazaka dokae so sokasoka nane. 39Torana nae kameka batu ria vano soldia i degere go tarakenaqana koluse ne, i mia Jesu i le go, igo dena,

“I pata ogoto bana to, valeke dena i Tuna ogoto bana to God.”

40Kakiaro ria qole ro in degere valaqalaqa meso, do in mimia taru napu me so de ikoego koluse ne. Qole ro nae Maria Madalena, Mana sinaqiru Jemisi suka mana Josepo mana Maria Salome. 41Kapisa qole dena iri lulu bana me Jesu zaza ro ivae mego Qalili mana ria to iri tavisi ne go ia. Kakiaro napu ria qole ro dena go iri lulu bana me so Jesu Jerusalema mana iri kotavisi napu so ṉalu nae go.

Josepo Valeke Na Arematia I Vovua Sinarana Jesu

(Matiu 27.57-61; Luka 23.50-56; Jon 19.38-42)

42I garogaro meto raravi mana musaqara nae i ṉalu vanama na to bakubaku tina musaqara Sabat go. 43Josepo valeke na Arematia, ikaki valeke velaka mana i tavine tavise gatagata na pepeu, mana basoero ne in lete vamazale ia. Valeke dena i pin ne to ia tane lama na Too ikoego van miasoka ia God. Ia iza mana pene sinara na Jesu. 44Pilato i lete poloso sasakata ni gata go Jesu i le katikili go. Iago i korua batu ria vano soldia ne mana i tana ne, “Avigo i ogoto Jesu i le bana go?” 45Ṉalu Pilato i gata sekoro ia batu na vano soldia ne, i vamao neto Josepo tina pala go tokamana Jesu. 46Gonae Josepo iza volia kameka poga kakasa mana i sipa ze tokamana Jesu koluse ne, i kade ze ia poga kakasa ne mana iva kekele zaqe tokamana Jesu kameka ipaka lavata in ura va leṉa go, mana ivaitolo me kameka ipaka mana ikokoqu midiki ze siporaṉa na ne. 47Torana nae Maria Madalena mana Maria sinana Josepo iri mia tavise go de iri taru zaqe go tokamana Jesu.

Currently Selected:

Maka 15: VRSNT

Highlight

Copy