Maka 7

Vari Vatatana Ria Kazigarata Ro

(Matiu 15.1-9)

1Kakiaro vano Parisio mana vano vari vatatana na Tamana iri za reqeme Jerusalema mana iri teṉoe de ikoego Jesu. 2Iri mia kakia ro disipoloro ia Jesu iri ṉaṉa ne karisi qira iki dalo go kaega. Iri vatalukasa ze iriki sabore kaega karisi qira, valulu zena pata iri soko go vano Parisio de tina gogo basoero ne iri gogo, vatovato dena go tina lulua go lotu mana vatovato ṉalu bana ria.

3Tanego vano Parisio mana basoero Jiu go iri lulua tamana ro iri pala bana meze go kazigarata bana ro ria. Ṉalu tarina ṉaṉa go, tarina saboro kenaqe karisi qira ia tarinara ṉaṉa go. 4Pata gege ro iri za voli zego de iri volivoli ze go pata gege ne, tarina saboro kenaqa ia tarinara ge go. I topu napu tamana ria iri lulua gere saborena kapu, sereke mana ebata go.

5Iago, vano Parisio mana vano vari vatatana na Tamana iri tana ne Jesu, “Avigo tane disipoloro aro iriki lulua go kaega tamana ro ria kazigarata bana ro ita, go iri ṉaṉa ne so karisi qira iki dalo go kaega?”

6Jesu ivataule ne qira igo dena, “Ramu qamu vano tatakiu! Pata i sine bana go Isaia sauqamu ramu iogoto sivala ne qamu to,

‘God igo, Basoero dena iri vazaka zave so era seko ria,

do puṉu qira iri laqalaqa nava so era.

7Iri ṉulavolomo ne so vazakava era

tanego van vatatana na iri teke ne qira go basoero ne, pata ireqeso tamana ria tanuqira!’

8Qamu taru vatarikise tamana ia God, mana qamu lulua so Tamana ṉalu bana na vano basoe.”

9Jesu igo napu dena, “Qamu lete rove to ramu tane itana vakakavata na tamana ro ia God, mana luluna tamana ro ramu tanuqamu. 10Ramu qamu rove bana Tamana ia Mosese i sine go, ‘Muna vamazala qira tamaqamu mana sinaqamu. I sine napua, ṉalu basoe itulaṉa nego tamana ba sinana, basoe nae na vae vale.’ 11Do ramu qamu vari vatatana napu ne, ṉalu ka basoe izari ne go kaki pata go mara tavisi ne ze tamana mana sinana, do basoe nae igo, ‘Pata dena qa vanama ne zeto sosone zaqe to God,’ 12iago basoe nae ne iki tavisi ne to kaega tamana mana sinana. 13Vari vatatana qamu teke ne qira basoero igogo dena zazao na, ivakuziki ne to seko ro ia God. Topu na pataro igogo dena zazao na tane qamu zazu ne go ramu.”

Pataro I Vakore Go Basoe

(Matiu 15.10-20)

14Jesu ikoru qira basoero ne go mara ria lama vavaroṉono va velaka, igo. Ivane qira dena, “Muna gata vavelaka me go tamuna nanao rove go pataro dena. 15Pataro i reqe go tepa peka dena mana keba za loborona basoe gogo ne, iki vakore kaega basoe. Do pataro i reqe me loborona basoe mana siporo me peka dena, tane ivakore go basoe. 16Ka basoe i ko qeqele na mara gata seko ro dena.”

17Ṉalu i kasi ne qira basoero ne mana keba za loborona pade igo ia, disipoloro ia iri sine ne ia, go mara sine lukasa ne qira talukasana pataro i sine go iri go. 18Jesu ivane qira dena, “Ramu do ikaega napu ne qamu so nanao rove na pata, gere napu qira so na go? Qamuki nanao rove so kaega ramu tane pata ireqe go tepa peka dena mana keba za saqe na basoe gogo ne iki za vakore kaega basoe. 19Tanego iki zakoe kaega puṉuna basoe do iza koe salana basoe.” Ṉalu i sine go pata dena Jesu ivatatavata me osina pata gege ivelaka lupo so gena.

20I sine napu ne qira, igo, “Pata i reqeme go nanao na basoe tane ivakore go basoe. 21Tanego loborona puṉuna basoe i reqeme go nanao go iara zazu ne go basoe pata sakataro mana go lara siko, vae vale basoe, 22taunata, sokona pala na osina pata, mana zazu nena soso pata sakataro, poqe, zazu ne na ba sine vasadake na pata ni lete sakata sivala go, qora, pepeu valu na basoe vazakanapu mana zazu nena pata ni lulua go too bulabulaṉoe. 23Iato osina pata ro dena to i reqeme go nanao na basoe go ni siporo me, mana ivakore go basoe go.”

Kameka Qole Iki Jiu Go Kaega I Vaogote Jesu

(Matiu 15.21-28)

24Gonae Jesu i kasi ne nae mana izae kena garogaro na komala lavata Taia, iza koe loborona kaki pade tanego iki soko kaega basoero ne mara ria rove go igo, do imakuru to tina pipika go. 25Kaki kameka qole isiqane manuru sakata sale qole ia, igata Jesu ikoego nae, gonae ilama koloku tutuṉe tarakenaqana Jesu. 26Qole dena iki qole Jiu kaega do i podoe Ponisia vudu Siria. I lama pene vamoqere Jesu go mara kakale vakuziki ne manuru sakata isiqane go sale qole ia. 27Do Jesu ivane dena, “Salero ne tane mara ria ge kenaqe go patagege ne. Tanego iki tora kaega tatana pala pata gege ria salero ne mana vanaqe ne qira sika piru ro ne go.”

28“Batu,” igo qole ne, “ipata ogoto sivala to pata qo sine go, sika ro ne, do iri ge so tamuzala ro pata gege iri sorue go, tevolo ne” igo.

29Iago Jesu ivane dena qole, “Tanego sauna to seko raro nae, iago, mo gado ule zato pade aro, mana tono za mia sale qole aro i kasi bana neto manuru sakata ne.”

30Ṉalu qole ne iza doka to pade ia, iza mia sale qole ia i kekele vesu ne do manuru ne i kasi ne to ia.

Jesu Iva Velake Valeke I Ikiki Mana Ikikibu

31Gonae Jesu mana disipoloro ia iri kasi ne kena Taia mana iri za dokae komala lavata Saidon. Lupo nae iri za napue tepa kena Dekapolis. Taramuzina iri ara za dokae go masi pipika na Qalili. 32Nae kakiaro basoero iri pala me kameka veleke i ikiki mana i kikibu go. Gonae iri pene Jesu go mara sapu ze karisina go mara velaka iri go. 33Iago Jesu ilulu vamikia valeke ne i vakasi ne ze de iri koe go basoero ne, mana i siba zaqe kakaraputuna karua qeqele na valeke ne mana isuelapa karisina i siba zaqe lomena valeke ne. 34Jesu i reṉa pokaqe rani ne mana i pala kameka marapuga lavata sivala, i sine ne valeke ne, igo, “Epata!” Talukasana, “Papaqa!” 35Kameka goso nae qeqele na valeke ne ipapaqa mana kalamiana imalumu to vizu mana iseko to go. 36Jesu iva kaega ne qira basoero ne mara ria kasi pepeu ne qira basoero pata i zazu ne go igo, do ria ara lete pepeu vasadake to iri go. 37Osiqira vano iri gata go tarama na pata dena, iri lete poloso sasakata mana iri go, “Ava pata vari vanureke na izazu ne go valeke dena! Tanego vano kikibu iri seko mana vano ikiki iri gata pata to go!”

Currently Selected:

Maka 7: VRSNT

Highlight

Copy