Taruparea̧ Ma̧ȩ 13
13
Abara̧ judi, jënȩ cjo̧ro̧rërea̧räpȩ ado chjereno̧ baärëremȩde
1Ado Abara̧ judi Ejito quȩmȩ chiriri pio judiri go̧dürërea̧ ji̧, jibëa̧ oa goamȩrȩ go̧dürërea̧ ji̧, jibëa̧ iei̧ pio ji̧ ëbamȩrȩ go̧düa̧ ji̧, jabechji̧ ado chjereno̧ baärëremȩde Negebo quȩmȩräpȩ. Ado Oto pio judiborë cho̧rë baärëremȩdejȩ. 2Ado Abara̧ judi ji̧ra̧ri̧ goamȩpea̧de. Baca no̧i̧dë oa, parata chëre ji̧ra̧ tjamo̧ oa, oro chëre ji̧ra̧ oa goamȩpea̧de. 3Ado japamitë chjätä ëte, Negebo quȩmȩ chiriri pio judiri go̧düa̧dirȩ. Jënȩro̧ cjo̧ro̧rërea̧ chiriräpȩ baäpea̧ oa go̧dürëreji̧ri̧dirȩ. Aja̧, Bete quȩmȩ bë ma̧ri̧ queri̧räpȩ ju̧ri̧, Ai quȩmȩ bë ma̧ri̧ queri̧räpȩ ju̧ri̧ baäpea̧ oa go̧dürëreji̧ri̧dirȩ pio jiro chiriräpȩ ju̧ri̧, bë ma̧ri̧ tjoräpȩ bëpapea̧ oa. 4Ado go̧düdäräa̧dirȩ. Aja̧, Abara̧rȩ gu̧na̧rea̧ mechja oa pearä cji̧därërea̧räpȩ go̧düdärärëreji̧ri̧dirȩ ado chjereno̧. Ado ja̧dëa ji̧ Abara̧ judi ado chjereno̧ chjacjiamȩri̧ jo̧rȩtamȩrȩ ni̧bärëremȩdejȩ Jeova ju̧i̧, jënȩ japarërea̧mi̧.
Oto judi a̧dë baärëremȩdejȩ Abara̧ ju̧i̧
5Ado Oto judi, Abara̧ pio ju̧i̧ nö̧ta baäa̧mȩ pio judi peaja̧di ji̧ra̧ri̧ goamȩpe bagarëremȩde. Jibëa̧ ama̧i̧ Abara̧ pio judi goami̧ goamȩpea̧de. Baca no̧i̧dë oa, oveja buba oa goamȩpea̧de ji̧ra̧ tjamo̧ oa. Ado jibëa̧ mu̧i̧tjoi̧ ji̧ra̧ oa goamȩpea̧de peaja̧di. 6Jabo cjäri̧ made, chiri üdë nö̧tadëa̧de. Abara̧ ja̧ üdë, ado Oto ja̧ üdë a̧dë chjäte ji̧ra̧ tjamo̧pe baga̧ oaiä, jabechji̧ nö̧tadëa̧de chiri üdë. Ëba cjo̧ro̧rea̧mi̧dëri̧ goarëreji̧ri̧diro̧jo̧ȩ jibëa̧ baca oa. 7Ado pio ju̧i̧iä Abara̧ ja̧ mu̧i̧tjoi̧ judiro̧, ado Oto ja̧ mu̧i̧tjoi̧ judiro̧ ba dëbë goëdëri̧ cjiape baga chjaorëreji̧ri̧dirȩ chiri pio ju̧i̧ chjiari. Aja̧, goaedë yo̧ chjaoji̧ripea̧dirȩ jibëa̧ dëbëti̧ra̧ chia. Ado pio jiro japamitërä, peaja̧di cjo̧ro̧rëreji̧ri̧dirȩ Canaa̧räpȩ cjo̧ro̧ji̧ri̧ pio judiro̧. Ananeo judiro̧, ado pjerecheo judiro̧ peaja̧di cjo̧ro̧rëreji̧ri̧dirȩ. Pio ji̧ri̧iäbo nö̧tadëa̧de chiri üdë.
8Ja̧dëa ji̧ japamitë chjätä ëte, Abara̧ judi ma̧ȩ yürürëremȩdejȩ Oto ju̧i̧, ja̧di ta̧rëri̧ yo̧mȩrȩ:
—Danȩ uima̧i̧, jimo̧ ja̧rea̧rȩ. Cja̧rȩmȩ pumȩrea̧rȩ. Ado pio ju̧i̧iä a̧ro̧rȩ dëbëpe chjaomi̧ dari̧ cjo̧ro̧dëtäreji̧ri̧rea̧rȩ chiri pio ju̧i̧ chjiari. Ado ibëa̧ mu̧i̧tjoi̧ judiro̧ peaja̧di dëbë goëdëri̧ cjiape bagadë matäreji̧ri̧dirȩ. 9Ado pio ju̧i̧iä yo̧requedemȩ uima̧i̧. Jabechji̧ mitëvä na̧ chiri oa. Boi̧dëde chiri üdë. Mitëvä mȩnȩ jo̧rȩta̧mi̧. Mȩnȩ yaboräpȩmo̧ a̧rȩmȩ chiri oa mitërä judi, jabechji̧ chjiaräpȩmo̧ a̧rȩmȩ chiri oa mitëparequede. Jabo mȩnȩ chjiaräpȩmo̧ a̧rȩmȩ chiri oa mitërä judi, chja jabechji̧ yaboräpȩmo̧ a̧rȩmȩ chiri oa mitëparequede cüdë. Jaevä. Mitëvä mȩnȩ jo̧rȩta̧mi̧. Ji̧mo̧ cjo̧ro̧rea̧mi̧dëde baca ji̧ra̧ tjamo̧pe baga̧ oaiä —yo̧mȩrȩ yo̧rëremȩdejȩ Abara̧ judi jibëa̧ uima̧i̧ ju̧i̧.
10Ja̧dëa ji̧ Oto judi gatë damȩrȩ chjiaräpȩmo̧ a̧rȩmȩ chiri oa dae ja̧bo darëremȩdejȩ, Joroda̧ quȩmȩ bea yuroro a̧rȩmȩ chiri oa. Choa quȩmȩ bë ma̧ri̧ yuroro a̧rȩmȩ chiri oa daea̧dejȩ chjacjiamȩ tjamo̧ oa. Uchja cjia oa, chjadëi̧ oa, Jeova ja̧ tjadomi̧ damȩ oa darëremȩdejȩ, Ejito chirimi̧ da oa. Aja̧, Jeova judi Chodoma quȩmȩ bë ma̧ri̧räpȩ jabë cäadëa̧rä, Gomora quȩmȩ bë ma̧ri̧räpȩ jabë cäadëa̧rä dae ja̧borëremȩdejȩ chiri oa Oto judi. 11Ado pio jiro chiri chjacjiamȩ oa dae ja̧bomȩrȩ mitërëremȩdejȩ. Aja̧, Joroda̧ quȩmȩ bea yuroro a̧rȩmȩ chiri oa mitëa̧dejȩ. Ado pio jiro chiri oa mitëmȩrȩ baärëremȩde dorë cjitëmȩräpȩmo̧. Jibëa̧ baca oa, jibëa̧ oveja oa ma̧ȩ baäa̧de, jibëa̧ ama̧i̧ pio ju̧i̧ a̧dë baämȩrȩ.
12Ado Abara̧ judi jabechji̧ jojaui pio ju̧i̧ a̧dë cjiadiärëremȩdejȩ Canaa̧ quȩmȩ chiriräpȩ cjo̧ro̧pea̧ oa. Jabo Oto judi Chodoma bë ma̧ri̧ queri̧räpȩ baärëremȩde. Ado ju̧ri̧pȩ cjo̧ro̧mȩpea̧de. Aja̧, bea Joroda̧ yuroro a̧rȩmȩ chiri oa, bë ma̧ri̧ tjoro cjo̧ro̧mȩpea̧de. 13Jabo pio jiro bë ma̧ri̧räpȩ cjo̧ro̧ji̧ri̧ pio judiro̧, cjäri̧ madirȩ, Jeova pio ju̧i̧iäpȩmo̧ a̧dë chjäte chjai̧dëri̧ jape cjiaji̧ri̧rȩ cjo̧ro̧rëreji̧ri̧dirȩ. Chjai̧dëti̧ oa jape cjiaji̧ri̧rȩ cjo̧ro̧rëreji̧ri̧dirȩ.
Jeova judi ma̧ȩ yürürëremȩdejȩ Abara̧ ju̧i̧ jibëa̧ chiri pio ju̧i̧ chjiari
14Ado ja̧dëa ji̧ Oto judi baäa̧ duri oa, Jeova judi ma̧ȩ yürürëremȩdejȩ Abara̧ ju̧i̧. Ja̧di ta̧rëri̧ yo̧mȩrȩ yo̧rëremȩdejȩ:
—Danȩ, mȩnȩ cjiamȩri pio judiri oëra̧ti̧ oa daba davä chiri oa —yo̧a̧dejȩ—. Jabechji̧ yaboräpȩmo̧ a̧rȩmȩ chiri oa ütarë davä. Ado chjiaräpȩmo̧ a̧rȩmȩ chiri oa peaja̧di davä. Ado dairäpȩmo̧ a̧rȩmȩ chiri oa peaja̧di ütarë davä. 15Jabechji̧ mȩnȩ da̧ chiri pio ju̧i̧ yürüparequedemȩ bucho ana̧. Na̧ea̧ri ja̧ji̧ri̧ pio ji̧ri̧bo yürüparequedejȩrȩ bucho ana̧. 16Ado danȩ, pio cüdë tänȩa̧ oa na̧ea̧ri ja̧ji̧ri̧ pio judiro̧ no̧i̧dë tjamo̧pe bagapadirȩ. Jabechji̧ dabu pjo̧no̧i̧rȩ china̧mi̧ dari̧ cjiadiäpadirȩ ütararea̧mi̧dëri̧. 17Aja̧, mȩnȩ chjadëri̧ daba dapea̧ oa oëra̧ti̧ oa chjätäti̧ cjiavä cüdë mȩa yürüa̧ chiri pio ju̧i̧. Jabechji̧ pio mȩa yürüa̧requedemȩ —yo̧mȩrȩ ma̧ȩ yürürëremȩdejȩ Abara̧ ju̧i̧ Jeova judi.
18Ado pio ju̧i̧iä Abara̧ judi ano̧ mire cjo̧ro̧tämi̧ cjiamȩrȩ coëchärëremȩdejȩ jibëa̧ jo̧ oa, ira̧ japea̧ oa cjiaremȩ jo̧ oa. Ado baärëremȩde Mamare quȩmȩ pio ju̧i̧ ja̧ torë cjiamȩräpȩ, Eboro̧ quȩmȩ bë ma̧ri̧ queri̧räpȩ. Ado ju̧ri̧pȩ baä ëte, gu̧na̧rea̧ mechja oa cji̧därëremȩde Jeova pio ju̧i̧ chjacjiamȩri̧ jo̧rȩtapea̧ oa.
Currently Selected:
Taruparea̧ Ma̧ȩ 13: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
