Taruparea̧ Ma̧ȩ 14
14
Chiri ütë cjo̧ro̧ji̧ri̧ pio judiro̧ jibëa̧ dëbëti̧ra̧ chia dëbëpe chjaorëreji̧ri̧dirȩ
1Pio jiro japamitërä chiri ütë cjo̧ro̧ji̧ri̧ judiro̧ acji tai̧rëreji̧ri̧dirȩ ado cja̧rȩmȩ chiri ütëti̧ pio ji̧ri̧iäpȩmo̧. Danȩrȩ, China̧ quȩmȩ chiriräpȩ cjo̧ro̧ji̧ri̧ pio ji̧ri̧ ja̧ ütë pio judi A̧marapje quȩmȩrëremȩvede. Ado Eracha quȩmȩ bë ma̧ri̧räpȩ cjo̧ro̧ji̧ri̧ pio ji̧ri̧ ja̧ ütë judi, Arioco quȩmȩrëremȩvede. Ado Era̧ quȩmȩ chiriräpȩ cjo̧ro̧ji̧ri̧ pio ji̧ri̧ ja̧ ütë judi, jabechji̧ Quedoromȩ quȩmȩrëremȩvede. Ado Goimi̧ quȩmȩ chirirä cjo̧ro̧ji̧ri̧ pio ji̧ri̧ ja̧ ütë judi, Tida quȩmȩrëremȩvede. 2Ado pio jiro chiri ütëti̧ pio judiro̧ jadüchiami̧rȩ cja̧rȩmȩ jo̧rȩtarea̧ chiaji̧ri̧rȩ järitarëreji̧ri̧dirȩ ado cja̧rȩmo̧ chiriräpȩ cjo̧ro̧ji̧ri̧ pio ji̧ri̧ ja̧ ütëti̧ pio ji̧ri̧ boadäräpea̧ oa. Aja̧, Chodoma quȩmȩ bë ma̧ri̧räpȩ cjo̧ro̧ji̧ri̧ ja̧ ütë pio ju̧i̧, Bera quȩmȩ pio ju̧i̧ boadärätämi̧ cjiarëreji̧ri̧diro̧jo̧ȩ, Gomora quȩmȩ bë ma̧ri̧räpȩ cjo̧ro̧ji̧ri̧ ja̧ ütë pio ju̧i̧bo, Biricha quȩmȩ pio ju̧i̧. Ado peaja̧di Adama quȩmȩ bë ma̧ri̧räpȩ cjo̧ro̧ji̧ri̧ ja̧ ütë oa, Chinabu quȩmȩ pio ju̧i̧bo boatämi̧ cjiarëreji̧ri̧diro̧jo̧ȩ, Chebomi̧ quȩmȩ bë ma̧ri̧räpȩ cjo̧ro̧ ja̧ ütë pio ju̧i̧bo, Chemȩbe quȩmȩ pio ju̧i̧. Ado pio ji̧ri̧ uëri Berira quȩmȩ bë ma̧ri̧räpȩ cjo̧ro̧ji̧ri̧ pio ju̧i̧ ja̧ ütë pio ju̧i̧bo boadärärea̧ jo̧rȩtarëreji̧ri̧dirȩ. Ado Berira quȩmȩ bë ma̧ri̧ üdë peaja̧di Choa quȩmȩde. 3Ado pio jiro ütëti̧ judiro̧ cja̧rȩichimo̧rȩ, 'Aja̧, acji jana̧pai̧ dadiro̧ibëda, ado pio ju̧i̧iä ibëa̧ guadia oa cja̧rȩmȩ codëpe bagari̧ a̧dopa tänȩtäreji̧ri̧a̧ro̧da, ji̧mo̧ cjiaji̧ri̧rȩ dëbëpe chjaopea̧ oa a̧dopa tänȩtäreji̧ri̧a̧ro̧da' quëna̧ jo̧rȩtaji̧ri̧rȩ a̧dopa tänȩno̧rëreji̧ri̧diro̧jȩrȩ ya̧mi̧ chjarerä chiriräpȩ ju̧ri̧, Chidi̧ quȩmȩ chiriräpȩ ju̧ri̧. Aja̧, Ja̧boa̧ quȩmȩ tja queri̧räpȩ ju̧ri̧ a̧dopa tänȩrëreji̧ri̧diro̧jȩrȩ. 4Jabechji̧ pio jiro chiri ütëti̧ judiro̧ cja̧rȩichimo̧rȩ Quedoromȩ quȩmȩ ütë pio ja̧ mu̧i̧tjoi̧mi̧ dari̧ cjo̧ro̧rëreji̧ri̧dirȩ no̧mȩ tjamo̧ri ja̧. Aja̧, 12 ui nö̧ta pio ju̧i̧ ja̧ mu̧i̧tjoi̧mi̧ dari̧ cjo̧ro̧rëreji̧ri̧dirȩ. Ado pio jiro japamitë chjätä ëte, 12 ui chjätä ëte, 'jabo cjäri̧ maa̧ro̧da, pio ju̧i̧ ja̧ mu̧i̧tjoi̧mi̧ dari̧ ji̧dë ma cjo̧ro̧dëpaa̧ro̧da' quëna̧ jo̧rȩtaji̧ri̧rȩ jiadarëreji̧ri̧diro̧jo̧ȩ. Aja̧, Quedoromȩ quȩmȩ ütë pio ju̧i̧ jiada̧diro̧jo̧ȩ, pio ju̧i̧ ja̧ mu̧i̧tjoi̧mi̧ dari̧ cjo̧ro̧dëri̧ cjiaji̧ri̧rȩ. 5Ja̧dëa ji̧ cja̧rȩmȩ ui chjätä ëte, Quedoromȩ quȩmȩ ütë judi, pio jȩa a̧doji̧ri̧ ütëti̧ pio judiro̧borë acji go̧düdärärëreji̧ri̧dirȩ Ataroto Carana̧i̧ma̧ quȩmȩ chiriräpȩ. Ado pio idëpȩ cjo̧ro̧ji̧ri̧ pio ji̧ri̧ boadärärëreji̧ri̧diro̧jȩrȩ Arepjaita quȩji̧ri̧ pumȩ pio ji̧ri̧. Ado judiri ano̧ mire boadäräa̧diro̧jȩrȩ chuchita quȩji̧ri̧ pumȩ pio ji̧ri̧. Aja̧, Ja̧ quȩmȩräpȩ cjo̧ro̧ji̧ri̧ oa boadäräa̧diro̧jȩrȩ. Ado judiri ano̧ mire boadäräa̧diro̧jȩrȩ emita quȩji̧ri̧ pumȩ pio ji̧ri̧. Aja̧, Chave Quiriamataimȩ quȩmȩräpȩ cjo̧ro̧ji̧ri̧ oa boadäräa̧diro̧jȩrȩ. 6Ado judiri ano̧ mire boadäräa̧diro̧jȩrȩ oreo quȩji̧ri̧ pumȩ pio ji̧ri̧. Jibëa̧ chiriräpȩ cjo̧ro̧ji̧ri̧ oa boadäräa̧diro̧jȩrȩ Cheri quȩmȩräpȩji̧ri̧ oa, ya̧mi̧ ji̧ra̧räpȩji̧ri̧ oa. Ado o ji̧ri̧, a̧dë bagurataji̧ri̧ pio ji̧ri̧ cho̧rë jädärärëreji̧ri̧diro̧jȩrȩ Para quȩmȩ chiriräpȩ yuro, dabu nȩgȩ ma queri̧räpȩ yuro. 7Ja̧dëa ji̧ Quedoromȩ quȩmȩ ütë judi, pio jȩa a̧doji̧ri̧ ütëti̧ pio judiro̧borë carupë baäa̧ ji̧, jabechji̧ Enemi̧chipa quȩmȩ chiri tjamo̧i̧ baärëreji̧ri̧dirȩ. Ado Enemi̧chipa quȩmȩ chiri üdë peaja̧di Cade quȩmȩde. Ado pio jiro chiri tjamo̧i̧ baärëreji̧ri̧dirȩ. Ado ju̧ri̧pȩ cjo̧ro̧ji̧ri̧ oa ano̧ mire boadäräa̧diro̧jȩrȩ amarechita quȩji̧ri̧ pumȩ pio ji̧ri̧. Ado no̧i̧dë tjamo̧ oa ja̧bo tänȩa̧diro̧jȩrȩ. Ado judiri acji jäa̧diro̧jȩrȩ amoreo quȩji̧ri̧ pumȩ pio ji̧ri̧. Ado jibëa̧ chiriräpȩ cjo̧ro̧ji̧ri̧ oa boadäräa̧diro̧jȩrȩ peaja̧di, Achecho Tamara quȩmȩ chiriräpȩ cjo̧ro̧ji̧ri̧ oa. Aja̧, ja̧di dari̧ acji tai̧mȩrȩ boadärä chjaorëremȩdejȩrȩ pumȩ buba oa Quedoromȩ quȩmȩ ütë judi, pio jȩa a̧doji̧ri̧ ütëti̧ pio ji̧ri̧ nö̧ta.
8Ado jiadaji̧ri̧ ütëti̧ judiro̧, 'Quedoromȩ quȩmȩ ütë pio ju̧i̧ ja̧ mu̧i̧tjoi̧mi̧ dari̧ ji̧dë ma cjo̧ro̧dëpaa̧ro̧da' quëna̧ji̧ri̧ ütëti̧ pio judiro̧ a̧doparëreji̧ri̧dirȩ Chidi̧ quȩmȩ chiriräpȩ jibëa̧ guadia pio ji̧ri̧ nö̧ta. Aja̧, Chodoma quȩmȩ bë ma̧ri̧ ja̧ ütë judi, Gomora quȩmȩ bë ma̧ri̧ ja̧ ütë judi, Adama quȩmȩ bë ma̧ri̧ ja̧ ütë judi, Cheboimi̧ quȩmȩ bë ma̧ri̧ ja̧ ütë judi, ado Berira quȩmȩ bë ma̧ri̧ pio ju̧i̧ ja̧ ütë judi a̧doparëreji̧ri̧dirȩ Chidi̧ quȩmȩ chiriräpȩ ju̧ri̧ jibëa̧ guadia pio ji̧ri̧ nö̧ta oa. Ado Berira quȩmȩ bë ana̧ üdë peaja̧di Choa quȩmȩrëremȩde o ji̧ri̧iä. 9Aja̧, pio jiro chiri ütëti̧ pio judiro̧ cja̧rȩichimo̧rȩ a̧doparëreji̧ri̧dirȩ pio jibë acji jana̧paji̧ri̧ pio ji̧ri̧ goae tarari̧ dëbëpe chjaopea̧ oa. Aja̧, Era̧ quȩmȩ chiri ja̧ ütë pio ju̧i̧, Quedoromȩ pio ju̧i̧ dëbëpe chjaopea̧ oa, ado Goimi̧ quȩmȩ chiri ja̧ ütë pio ju̧i̧, Tida pio ju̧i̧, ado China̧ quȩmȩ chiri ja̧ ütë pio ju̧i̧, A̧ma̧rapje pio ju̧i̧, ado Eracha quȩmȩ bë ma̧ri̧ ja̧ ütë pio ju̧i̧, Arioco pio ju̧i̧ dëbëpe chjaopea̧ oa a̧dopa marëreji̧ri̧dirȩ. Aja̧, a̧doparëreji̧ri̧ ütëti̧ judiro̧, jadüchiami̧dirȩ. Ado jibë acji jana̧rëreji̧ri̧ ütëti̧ judiro̧ cja̧rȩichimo̧dirȩ. 10Jabo cjäri̧ madiro̧jȩrȩ. Dëbëpe chjaotaji̧ri̧ pio judiro̧ nö̧tadëa̧diro̧jȩrȩ acji jana̧ji̧ri̧ pio ji̧ri̧. Pio ju̧i̧iä Chodoma ja̧ ütë judi, Gomora ja̧ ütë judi a̧dë bagureno̧a̧dirȩ jibëa̧ guadia pio ji̧ri̧ nö̧ta. Jabo cjäri̧ madirȩ, ërami̧ daräpȩ, ji̧chja̧ chiamȩ puë ana̧räpȩ choë cjatäa̧dirȩ. Chidi̧ quȩmȩ chiri üdë ërami̧ da oa chiamȩ puë ana̧ ji̧ra̧ri̧ chiade. Ja̧di tara coere cjatäa̧dirȩ puëräpȩ. Jabo chiri ütëti̧ pio judiro̧ orëmo̧rȩ chjadëri̧ a̧dë bagurarea̧ darëreji̧ri̧dirȩ, ya̧mi̧räpȩmo̧ goae tarari̧ baguaji̧ri̧rȩ.
Acji jana̧ji̧ri̧ pio judiro̧ bae goa baärëreji̧ri̧diro̧jo̧ȩ Oto ju̧i̧, jibëa̧ pumȩbo oa
11Ja̧dëa ji̧ o ji̧ri̧ boadäräa̧ji̧ri̧ pio judiro̧, jadüchiami̧ chiri ütëti̧ pio judiro̧, jabechji̧ dami̧ti̧ oa mitërëreji̧ri̧dirȩ bae goa baäpea̧ oa. Jurarea̧ oa, chjibo oa, dami̧ti̧ ba chia oa bae mitëa̧diro̧jo̧ȩ. Ado bae goa baärëreji̧ri̧diro̧jo̧ȩ Chodomaräpȩ cjo̧ro̧ji̧ri̧ ja̧remȩ pio ju̧i̧, Gomoraräpȩ cjo̧ro̧ji̧ri̧ ja̧remȩ pio ju̧i̧. 12Ado Abara̧ ja̧ uima̧i̧ judi Chodomaräpȩ cjo̧ro̧mȩpea̧mȩ pio ju̧i̧bo bae goa baärëreji̧ri̧diro̧jo̧ȩ Oto pio ju̧i̧. Aja̧, pio ju̧i̧ ja̧ cjo̧ro̧rea̧ chjö̧na̧i̧därä oa, jibëa̧ pumȩ ütëbo oa bae goa baärëreji̧ri̧diro̧jo̧ȩ cjiadiärea̧ decjiari̧.
13Jabo üi̧ cja̧rȩmȩrȩ goadi jä cjiaëno̧mȩrȩ ma̧ȩ yürepea̧dejȩ Abara̧ ju̧i̧, ebereo quȩmȩ pumȩ pio ju̧i̧. Ma̧re quȩmȩ pio ju̧i̧ ja̧ torë cjiamȩräpȩ cjo̧ro̧mȩ pio ju̧i̧ ma̧ȩ yürepea̧dejȩ. Ado Ma̧re quȩmȩ judi amoreo quȩmȩ pumȩrëremȩde. Ado jibëa̧ oti̧ ji̧ri̧ ëbarëremȩdejȩrȩ. Eco quȩmȩ pio ju̧i̧, Ane quȩmȩ pio ju̧i̧ ëbarëremȩdejȩrȩ. Ado pio judiro̧ Abara̧ pio ju̧i̧ ja̧ jadümi̧ dari̧ cjo̧ro̧rëreji̧ri̧dirȩ. Jabechji̧ jibëa̧ dëbëti̧ra̧ chia a̧doji̧ri̧rȩ cjo̧ro̧rëreji̧ri̧dirȩ.
Abara̧ judi tuti japamȩrȩ chjadëri̧ go̧dü tänȩrëremȩdejȩ Oto ju̧i̧, jibëa̧ pumȩbo oa
14Ado Abara̧ judi ma̧ȩ ta̧rëa̧rä, jibëa̧ uima̧i̧ pio ju̧i̧ baë goa baäa̧ pio ju̧i̧ chjiari ta̧rëa̧rä, jabechji̧ chjaodëri̧ a̧dopa tänȩrëremȩdejȩrȩ jibëa̧ pumȩ ji̧ri̧. Aja̧, jënȩ ütëparȩa̧ pio ji̧ri̧, jënȩ dabapa tänȩa̧ oaiä acji tai̧rea̧ dabapea̧ji̧ri̧ pio ji̧ri̧, jibëa̧ bëräpȩ ara̧ oa cjo̧ro̧reji̧ri̧ pio ji̧ri̧ a̧dopa tänȩrëremȩdejȩrȩ ütëbo oa. Ado pio ji̧ri̧ ëba järëremȩdejȩrȩ 318 oari ji̧ri̧. Aja̧, bae goa baäa̧ji̧ri̧ ütëti̧ pio ji̧ri̧ goae tarari̧ cho̧rë jäpea̧ oa järëreji̧ri̧diro̧jȩrȩ Da̧de quȩmȩ bë ma̧ri̧räpȩ yuro. 15Ja̧dëa ji̧ gȩnȩpea̧rä, Abara̧ judi chjaraparëremȩdejȩrȩ jibëa̧ pumȩ ji̧ri̧ tjarari̧ bubape bagari̧. Aja̧, judiro̧ tjaoëri acji jäpea̧ oa ja̧di dari̧ japarëremȩde. Ja̧dëa ji̧ chiri ütëti̧ judiro̧ daba quëna̧dë maea oa chjaodëri̧ acji järëreji̧ri̧diro̧jȩrȩ. Ado boadärärea̧ daea̧diro̧jȩrȩ. Ado a̧dë bagurataji̧ri̧ pio ji̧ri̧ cho̧rë jäa̧diro̧jȩrȩ Oba quȩmȩräpȩ yuro. Ado Oba quȩmȩräpȩ üdë jabechji̧ Damaco bë ma̧ri̧ queri̧räpȩde. Aja̧, pio jiroräpȩ yuro cho̧rë järëreji̧ri̧diro̧jȩrȩ. 16Ado judiro̧ bae garütea̧ chjö̧na̧i̧däräti̧ oa ado chjereno̧ goa baärëremȩdejȩ Abara̧ judi ana̧ji̧ri̧ pio ji̧ri̧iäpȩmo̧ ado chjereno̧ yürüpea̧ oa. Ado judiro̧ bae goa baäa̧ pumȩ ütëbodärä oa chjadëri̧ ëba baärëremȩdejȩrȩ peaja̧di. Aja̧, ja̧di dari̧ japamȩrȩ chjadëri̧ go̧dü tänȩrëremȩdejȩ jibëa̧ uima̧i̧ oa, Oto pio ju̧i̧. Pio ju̧i̧ ja̧ cjo̧ro̧rea̧ chjö̧na̧i̧ oa mitërea̧ daea̧de ado chjereno̧. Oto pio ju̧i̧ ja̧ pumȩ ji̧ri̧, Chodomaräpȩ cjo̧ro̧ji̧ri̧ pio ji̧ri̧, ivi pio ji̧ri̧bo go̧dü tänȩrëremȩdejȩrȩ ütëbodärä oa, ütëti̧ judiro̧ bae goa baätea̧ pio ji̧ri̧.
Merequichede judi chjadëri̧ cjo̧ro̧pea̧ ma̧ȩ oa yürürëremȩdejȩ Abara̧ ju̧i̧, judi chjadëri̧ cjo̧ro̧rea̧mi̧ dari̧
17Ado Abara̧ judi Quedoromȩ ütë pio ju̧i̧ boadäräa̧ duri oa, pio ju̧i̧ nö̧ta acji tai̧reji̧ri̧ ütëti̧ pio ji̧ri̧bo boadäräa̧ duri oa, jabechji̧ baärëremȩde. Ado judi baäa̧ ji̧ Chodomaräpȩ cjo̧ro̧mȩ ütë pio judi järëremȩde Abara̧ pio ju̧i̧ dëbëdiäpea̧ oa. Aja̧, Chave quȩmȩ chiriräpȩ ju̧ri̧, ya̧mi̧ chjarerä a̧rȩmȩ chiriräpȩ ju̧ri̧ järëremȩde Abara̧ pio ju̧i̧ dëbëdiäpea̧ oa. Ado Chave quȩmȩ chiri üdë peaja̧di "Chiri Ütë cjo̧ro̧ji̧ri̧ ja̧ chiri" quȩmȩde peaja̧di. Ado ja̧dira̧ järëremȩde Abara̧ pio ju̧i̧ dëbëdiäpea̧ oa.
18Ado cja̧rȩmo̧rȩ peaja̧di järëremȩde Abara̧ pio ju̧i̧ dëbëdiäpea̧ oa. Aja̧, Charȩ quȩmȩ bë ma̧ri̧räpȩ cjo̧ro̧ji̧ri̧ ja̧ ütë pio judi, Merequichede quȩmȩ pio judiborë järëremȩde. Ado Merequichede pio judi o ji̧ri̧ chjiari goë tuti ja̧bepamȩrȩ cjo̧ro̧rëremȩde a̧dë chjäte ju chiamȩ Ütë pio ju̧i̧ ja̧ oa ja̧bepamȩrȩ. Ado pio judi järëremȩde Abara̧ ju̧i̧iäpȩmo̧ uva ui oa goa jäpea̧ oa, cha̧pe oa goa jäpea̧ oa. 19Ado ja̧dëa ji̧ Abara̧ pio ju̧i̧ chjadëri̧ cjo̧ro̧pea̧ ma̧ȩ oa yürürëremȩdejȩ, jënȩ chjadëri̧ cjo̧ro̧rea̧mi̧ dari̧. Ja̧di ta̧rëri̧ yo̧mȩrȩ ma̧ȩ yürürëremȩdejȩ:
"A̧dë chjäte bachiamȩ Ütë pio judi chjadëri̧ a̧dotädimȩ mȩnȩ chjadëri̧ cjo̧ro̧rea̧mi̧ dari̧. Aja̧, a̧dë oa Pareapamȩ pio judi, dabu oa Pareapamȩ pio judi chjadëri̧ a̧dotädimȩ. 20Ado a̧dë chjäte bachiamȩ Ütë pio ju̧i̧ chjacjiamȩri̧ jo̧rȩtatäro̧jo̧ȩ. Jabechji̧ pio judi tjamo̧de mȩa eadëji̧ri̧ pio ji̧ri̧ boadärärea̧ yürüa̧mȩ judi. Pio judi tjamo̧de davä pio mȩa chjiari chjadëri̧ tuti japea̧mȩ judi. Pio ju̧i̧iä chjacjiamȩri̧ jo̧rȩtatäro̧jo̧ȩ."
Aja̧, ja̧di ta̧rëri̧ yo̧mȩrȩ ma̧ȩ yürürëremȩdejȩ Abara̧ ju̧i̧ Merequichede pio judi. Ado ja̧dëa ji̧ Abara̧ judi, jënȩ chiri ütëti̧ pio ji̧ri̧iä mitëa̧ pio ju̧i̧ yürürëremȩdejȩ. Ütëbo oa yürüdëa̧dejȩ jabo o oamo̧i̧ yürüa̧dejȩ. Jabechji̧ ichi chjö̧na̧i̧mi̧ da oa goaremȩrȩ cja̧rȩmȩmi̧ da oa yürürëremȩdejȩ Merequichede pio ju̧i̧.
21Ado ja̧dëa ji̧ ji̧dë duri oa Chodomaräpȩ cjo̧ro̧mȩ ütë pio judi yo̧rëremȩdejȩ Abara̧ ju̧i̧, ja̧di ta̧rëri̧ yo̧mȩrȩ:
—Danȩ, ca̧ pumȩ pio ji̧ri̧mo̧i̧ yürücoe, jabo jabechji̧ mitëvä ibëa̧ cjo̧ro̧rea̧ oa. Ibëa̧remȩ chjö̧na̧i̧ oa, judiro̧ bae goa baätea̧ pio ju̧i̧ chjö̧na̧i̧ oa jabechji̧ mitëvä. Pio ju̧i̧ yürütämi̧ cjiarequedemȩ. Jabo danȩ, judiro̧ bae goa baätea̧ pumȩ pio ji̧ri̧mo̧i̧ yürücoe —yo̧mȩrȩ yo̧rëremȩdejȩ Chodomaräpȩ cjo̧ro̧mȩ ütë pio judi Abara̧ pio ju̧i̧iäpȩmo̧.
22Jabo Abara̧ judi dëbë yo̧mȩrȩ yo̧a̧dejȩ:
—Cjäri̧ marequedemȩ. Na̧ea̧ pio ju̧i̧ mitëdëparequede. Jabechji̧ jabërä tjamo̧i̧ cjiari̧ yo̧mȩrȩ ma̧ȩ yürüa̧reconȩ Jeova pio ju̧i̧ teracabari̧ yo̧rea̧ decjiari̧. Aja̧, a̧dë chjäte Ano̧mȩ Ütë pio ju̧i̧, a̧dë oa, ado dabu oa Pareapamȩ pio ju̧i̧ jabërä tjamo̧i̧ cjiari̧ ma̧ȩ yürüa̧reconȩ. 23'Aja̧, Chodomaräpȩ cjo̧ro̧mȩ ütërë yürüa̧ oa mitëdëpaquëda, cja̧rȩmȩ chjiboto cara oa mitëdëpaquëda, cja̧rȩmȩ ta joë yurarea̧ cä oa mitëdëpaquëda, jabechji̧ pio ju̧i̧iä eami̧ mitëdëpaquëda' quëna̧mȩrȩ yo̧a̧reconȩ Ütë tjamo̧ pio ju̧i̧ jabërä. Jabechji̧ mȩnȩ ji̧dë duri oa yo̧rea̧ dachea oa, "Aja̧, pio cüdë yürüa̧ oa ji̧ra̧ tjamo̧ri̧ goamȩpea̧de Abara̧ judi" yo̧rea̧ dachea oa, jabechji̧ pio mȩaiä eami̧ oa mitëdëparequede. 24Ja̧di tara na̧ea̧ pio ju̧i̧ mitëdëparequede. Jabo danȩ, pio coa nö̧ta jäa̧ji̧ri̧ judiro̧, cüdë ütëparȩa̧ pio judiro̧ jabëtari̧mi̧ maea oa mitëa̧dirȩ pio yabo no̧ro jurapea̧ oa. Pio ju̧i̧mo̧i̧ mitërequede. Ado judiri mitëdëa̧. Ado danȩ, ca̧ jadü judiro̧, tjamo̧ ëba tai̧ji̧ri̧ pio judiro̧, jabechji̧ peaja̧di mitëtäreji̧ri̧dirȩ na̧ pumȩ pio ji̧ri̧ chjadëri̧ a̧doa̧ ba oa. Aja̧, Anȩ quȩmȩ judi, Eco quȩmȩ judi, ado Ma̧re quȩmȩ judi, jabechji̧ chjadëri̧ mitëtäreji̧ri̧dirȩ jibëa̧ oa. Jabo cüdë eami̧ oa mitëdëparequede —yo̧mȩrȩ yo̧rëremȩdejȩ Chodoma̧ ja̧ ütë oa Abara̧ judi jibëa̧ oa mitëdëri̧ cjiamȩrȩ.
Currently Selected:
Taruparea̧ Ma̧ȩ 14: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
