Taruparea̧ Ma̧ȩ 15
15
Jeova judi yo̧ë cji̧dämȩrȩ ma̧ȩ yürürëremȩdejȩ Abara̧ ju̧i̧
1Ji̧dë duri oa japamitë chjätä ëte, Jeova pio judi yo̧ë cji̧dämȩrȩ ma̧ȩ yürürëremȩdejȩ Abara̧ ju̧i̧. Darämi̧ cjia tänȩmȩrȩ ma̧ȩ yürürëremȩdejȩ, ja̧di ta̧rëri̧ ta̧rërämi̧ cjia tänȩmȩrȩ:
—Abara̧, uapadëvä. Cüdë mȩa chjadëri̧ jidamȩ tara, jabechji̧ uapadëvä. Pio coaiä ji̧ra̧ri̧ mitërea̧mi̧ dari̧ cjiadiäparenȩ. Tjamo̧ davä. Ji̧ra̧ tjamo̧ra̧ pio ju̧ri̧ra̧ ba ano̧parequedemȩ —yo̧a̧dejȩ.
2-3Jabo Abara̧ judi dëbë yo̧mȩrȩ yo̧rëremȩdejȩ Jeova ju̧i̧:
—Danȩ Ano̧mȩ Ütë, ca̧ ja oa jabë ëbadëmȩrȩ cjo̧ro̧requede cüdë. Mȩnȩ yürüa̧ oa ëbadërequede. Pio mȩaiä ji̧ra̧ri̧ mitërea̧mi̧ dari̧ cjiadiäemȩ jirorequede, jabo ca̧ ja oa ëbadëmȩrȩ cjiadiärä judi, jabechji̧ badëri̧ cjiadiäparequede —yo̧a̧dejȩ—. Danȩ, cüdë ca̧ ja oa ëbadëmȩrȩ ja̧boa̧rä judi, jabechji̧ judi ca̧ea̧remȩ pio ju̧i̧ mitëtärea̧ ji̧, mitërea̧ dadëpade. Ado danȩ, mȩnȩ pio coa ca̧ ja oa jabë yürüdëa̧ tara, jabechji̧ cüdë ütëparȩa̧ pio judi tjamo̧ mitëpamȩtäde. Danȩ, Erieche quȩmȩ pio judi, Damacori pio judirimȩ pio judi mitëpamȩtäde ca̧ea̧remȩ pio ju̧i̧ —yo̧mȩrȩ dëbë yo̧a̧dejȩ Ütë tjamo̧ ju̧i̧ Abara̧ judi.
4Jabo Jeova judi dëbë yo̧a̧dejȩ:
—Cjäri̧ made, mȩnȩ ütëparȩa̧ pio judi mitëdëpade. Jabechji̧ mȩnȩ nö̧ripea̧ pio judi mitëpade davä na̧ea̧remȩ pio ju̧i̧. Mȩnȩ nö̧ridëa̧ pio judi mitëdëpade —yo̧mȩrȩ yo̧a̧dejȩ Jeova judi.
5Ja̧dëa ji̧ Jeova judi jo̧ dairäpȩmo̧ ëba go̧dürëremȩdejȩ Abara̧ ju̧i̧. Ado yo̧a̧dejȩ:
—Danȩ, a̧dëräpȩmo̧ gatë davä büë pio ji̧ri̧. Chjadëri̧ ütarë davä. Jabechji̧ ütararea̧mi̧dëde. No̧i̧dë tjamo̧de büë üdë. Ado peaja̧di dari̧ cjiadiäpadirȩ na̧ea̧ri ja̧ji̧ri̧ judiro̧. Ütararea̧mi̧dëri̧ cjiadiäpadirȩ —yo̧a̧dejȩ.
6Ado Abara̧ judi Jevoa ja̧ ma̧ȩ oa ta̧rëmȩrȩ quëna̧dejȩ. Ado quëna̧mȩ oa jabechji̧parȩrëremȩdejȩ, chjai̧dë chiadëmȩmi̧ dari̧.
7Ado ja̧dëa ji̧ Ütë tjamo̧ judi ado ma̧ȩ yürürëremȩdejȩ Abara̧ ju̧i̧:
—Danȩ, Jeova pio judirequede. U quȩmȩ bë ma̧ri̧räpȩ cjo̧ro̧rëremȩ oa go̧dü tänȩrëremȩrequedemȩ. Cadeorë cjo̧ro̧mȩ chiriri pio judiri go̧dü tänȩa̧requedemȩ mȩnȩ pio yoa chiri oa yürüpea̧ oa. Aja̧, mȩnȩ pio yoa chiri oa mitëpea̧ oa go̧dü tänȩa̧requedemȩ —yo̧a̧dejȩ.
8Jabo Abara̧ judi dëbë yo̧a̧ ji̧, ja̧di ta̧rëri̧ yo̧mȩrȩ iëno̧ë ta̧rërëremȩdejȩ Ano̧mȩ ju̧i̧:
—Jabo danȩ ca̧ Ano̧mȩ Ütë, chjadëri̧ yo̧coe. Cüdë, pio yoa chiri oa tjamo̧ri̧ mitëpea̧ ji̧, ¿yö̧ta dari̧ dabaparequede cüdë?
9Ado dëbë yo̧a̧dejȩ Ütë tjamo̧ judi:
—Goa jana̧coe baca iei̧ i̧a, tjarari̧ ui chiayi̧ i̧a. Chivo iei̧ i̧a, tjarari̧ ui chiayi̧ i̧a goa jana̧pea̧de peaja̧di —yo̧a̧dejȩ—. Peaja̧di oveja üi̧ oa, tjarari̧ ui chiamȩ oa goa jana̧tä earequedemȩ. Ado ji̧ri̧ uëri goa jana̧coe jotoco ana̧ oa, jotoco boi̧bo, pëi̧ chja oa. Ja̧di dari̧ goa jana̧tä earequedemȩ —yo̧a̧dejȩ Ütë tjamo̧ judi.
10Ado ja̧di dari̧ japarëremȩde Abara̧ judi. Ütërë yo̧a̧mi̧ japarëremȩde. Goa jäa̧dejȩ chjö̧na̧i̧ oa. Ado ja̧dëa ji̧ Ütë ja̧ ma̧ȩrä ütëbo oa ja̧bo tänȩa̧dejȩrȩ. Ado ja̧bo tänȩ ëte, tjomo̧ përa̧dejȩrȩ yo̧a̧ri̧ pënȩpe bagari̧. Ado përa ëte dorë biramȩräpȩmo̧ a̧rȩri̧ mu̧i̧ a̧ra̧dejȩ. Ado cja̧rȩmo̧ pënȩ oa dorë cjitëmȩräpȩmo̧ a̧rȩri̧ mu̧i̧ a̧ra̧dejȩ dëbë a̧rȩri̧. Ja̧di maeari̧ japarëremȩdejȩ baca go̧a̧ oa, chivo go̧a̧ oa, oveja go̧a̧ oa. Jabo pua pio ji̧ri̧mo̧i̧ tjomo̧mi̧ përadëa̧dejȩrȩ. 11Ado mo̧cjë buba oa biradärädiätaji̧ri̧ oa jaepe ma̧ȩ chjadüa̧dejȩrȩ Abara̧ judi, go̧a̧ oa juratä järiji̧ri̧ oa. 12Ja̧dëa ji̧ dorë bira̧rä, Abara̧ judi goae tarari̧ mo̧a̧mȩpea̧de. Na̧rȩno̧rea̧mi̧dëri̧ mo̧a̧mȩpea̧de. Ado chjaodëri̧ bagönȩ tjamo̧räpȩ cjiadiämi̧ dari̧ cjiadiämȩpea̧de, uapa tjamo̧mȩrȩ. 13Ado ja̧dëa ji̧ Jeova judi ma̧ȩ yürürëremȩdejȩ:
—Chjadëri̧ dabatä earequede na̧ea̧ri ja̧ji̧ri̧ pio ji̧ri̧ chjiari. Jabechji̧ jibëa̧ chiridëräpȩ ju̧ri̧, ado cja̧rȩmo̧ pumȩ ja̧ chiriräpȩ ju̧ri̧ cjo̧ro̧padirȩ mu̧i̧tjoi̧ maearë. Pio ju̧ri̧pȩ gitoi̧ dari̧ conȩda̧ oa cjo̧ro̧padirȩ 400 ui nö̧ta. 14Jabo na̧ea̧ri ja̧ ji̧ri̧ pio ji̧ri̧ mu̧i̧tjoi̧ tänȩa̧ pio ji̧ri̧ bape chjaoparequedejȩrȩ. Ado cüdë bape chjaoa̧ duri oa, jabechji̧ chjadëri̧ go̧dürea̧ dapadirȩ, jare chjadüa̧mi̧ dari̧. Ado dami̧ti̧ ba chia ji̧ra̧ tjamo̧ oa goaji̧ri̧rȩ go̧düpadirȩ —yo̧mȩrȩ yo̧rëremȩdejȩ Abara̧ ju̧i̧ Jeova judi. 15Ado ji̧dë uëri a̧de yo̧mȩrȩ ja̧di ta̧rëri̧ yo̧a̧dejȩ:
—Ado pio mȩnȩ, jabechji̧ japamitë chjadëri̧ cjo̧ro̧ ëte, ütama̧i̧ tjamo̧padärä ëte ja̧boparenȩ na̧ ütëti̧rea̧ pio judiro̧ ja̧borërea̧mi̧. Jabechji̧ conȩdarea̧ taradëmȩrȩ, uaparea̧ taradëmȩrȩ ja̧boparenȩ, ma̧ chjupi̧ cjiari̧ jo̧rȩtamȩrȩ. 16Jabo danȩ, japamitë ana̧ chjätä ëte, na̧ea̧ri ja̧ji̧ri̧ pio judiro̧ pio yoa chiri oa ma̧na̧na̧ra̧padiro̧jo̧ȩ. Tjamo̧ davä. Na̧ jadama̧i̧ taru pio judiro̧ jibëa̧ bori̧ ji̧ri̧ nö̧rirä, jabechji̧ pio yoa chiri oa ma̧na̧na̧ra̧rea̧ dapadirȩ. Ado judirä bape chjaoparequedejȩrȩ Canaa̧ quȩmȩ chiriräpȩ cjo̧ro̧ji̧ri̧ pio ji̧ri̧. Aja̧, amoreo quȩji̧ri̧ pumȩ pio ji̧ri̧, a̧dë chjäte chjai̧dëri̧ jape cjiaji̧ri̧ pio ji̧ri̧ bape chjaoparequedejȩrȩ tjuri cjiami̧ dari̧ chjai̧dëri̧ japaji̧ri̧ oa —yo̧rëremȩdejȩ Ütë tjamo̧ judi Abara̧ pio ju̧i̧.
17Ado do üdë bira̧ duri oa, bagönȩ tjamo̧pea̧de darea̧mi̧dëri̧. Ado jabë mo̧a̧mȩ oa na̧rȩrëremȩdejȩ Abara̧ ju̧i̧ Jeova judi. Jabechji̧ cjo̧dë chiamȩ mau üdë chjätärëremȩde go̧a̧ pënȩ tjoro. Cjo̧dë chiamȩ to üdë peaja̧di chjätärëremȩde go̧a̧ pënȩ tjoro. Daburo cjo̧ro̧reji̧ri̧ pio ji̧ri̧ ja̧ go̧a̧ tjoro chjätärëremȩde. 18Pio jiro domȩ ju̧i̧iä Jeova pio judi yo̧ë cji̧därea̧ ma̧ȩ yürürëremȩdejȩ Abara̧ ju̧i̧, ano̧ mire jo̧rȩtarea̧mi̧dë ma̧ȩ oa. Ado ja̧di ta̧rëri̧ yo̧rëremȩdejȩ.
—Danȩ, pio yoa chiri oa yürüparequedejȩrȩ na̧ea̧ri ja̧ji̧ri̧ pio ji̧ri̧. Aja̧, bea Ejitori pio judiri bea ana̧räpȩ yuro yürüparequedejȩrȩ, bea Eupjateräpȩ yuro. Aja̧, pio jiro bearäpȩ yuro yürüparequedejȩrȩ chiri oa. 19Jabechji̧ cheneo quȩji̧ri̧ pumȩ pio ji̧ri̧ ja̧ chiri oa, chenȩcheo quȩji̧ri̧ pumȩ pio ji̧ri̧ ja̧ chiri oa, cadamoneo pio ji̧ri̧ ja̧ chiri oa yürüparequedejȩrȩ davä, na̧ea̧ri ja̧ji̧ri̧ pio ji̧ri̧. 20Tjamo̧ davä. Itita quȩji̧ri̧ pio ji̧ri̧ ja̧ chiri oa, pjerecheo pio ji̧ri̧ ja̧ chiri oa, erepjaita ja̧ chiri oa yürüparequedejȩrȩ na̧ pumȩ pio ji̧ri̧. 21Ado amoreo pio ji̧ri̧ ja̧ chiri oa, cananeo pio ji̧ri̧ ja̧ chiri oa, geregecheo pio ji̧ri̧ ja̧ chiri oa, jebucheo pio ji̧ri̧ ja̧ chiri oa yürüparequedejȩrȩ davä, na̧ea̧ri ja̧ji̧ri̧ pio ji̧ri̧ —yo̧mȩrȩ yo̧ë cji̧därea̧ ma̧ȩ yürürëremȩdejȩ Abara̧ ju̧i̧ Ütë tjamo̧ judi.
Currently Selected:
Taruparea̧ Ma̧ȩ 15: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
