Taruparea̧ Ma̧ȩ 16
16
Abara̧ judi bomai tänȩrëremȩdejȩ Aga quȩyi̧ ji̧
1Charai jini̧, Abara̧ pio ju̧i̧ ja̧ iei̧ pio jini̧ bo mairea̧mi̧dërë cjo̧ro̧rëreyi̧nȩ. Pio ju̧i̧iä jo̧rȩtayi̧pea̧nȩjȩ jibëa̧ mu̧i̧tjoi̧ ji̧, Aga quȩyi̧ pio ji̧. 2Ado pio ju̧i̧iä yo̧rëreyi̧nȩjȩ Abara̧ ju̧i̧:
—Danȩ, Jeova judi bo mairea̧ yürüdëa̧dique. Ja̧di tara ca̧ mu̧i̧tjoi̧ pio ji̧ ëba mo̧a̧tä earequedemȩ. Pio ji̧iä ca̧ bori̧ ji̧ri̧ ëbami̧ dari̧ ëbaparequedejȩrȩ. Pio ji̧ ëba mo̧a̧vä —yo̧yi̧rȩ jieno̧rëreyi̧nȩjȩ jibëa̧ üi̧ pio ju̧i̧.
3Ado ja̧dëa ji̧ Charai jini̧, Abara̧ ja̧ iei̧ pio jini̧ mitërëreyi̧nȩjȩ jibëa̧ mu̧i̧tjoi̧ i̧a, Aga quȩyi̧ ji̧. Ado pio ji̧, Ejito chiririyi̧ pio ji̧ yürürëreyi̧nȩjȩ Abara̧ ju̧i̧ judi ëba mo̧a̧pea̧ oa. Aja, ja̧di dari̧ yürüa̧nȩjȩ. Ado Abara̧ judi pio ji̧ a̧de ëba̧rä, jabechji̧ ichi chjö̧na̧i̧ ui goarëremȩde jënȩ Canaa̧ quȩmȩ chiriräpȩ bëpera̧pea̧ri ja̧.
4Ado pio ju̧i̧iä Abara̧ judi ëba mo̧a̧rëremȩdejȩ Aga quȩyi̧ ji̧. Ado bo maiyi̧rȩ cjo̧ro̧rëreyi̧nȩ. Ado bo maipea̧yi̧rȩ bücjü dayi̧pea̧nȩjȩ jibëa̧ ana̧yi̧ ji̧, Charai pio ji̧. Badë dayi̧pea̧nȩjȩ. 5Ado pio ju̧i̧iä Charai jini̧ yo̧a̧nȩjȩ Abara̧ ju̧i̧:
—Pio mȩnȩ chjai̧dëri̧ japea̧ oaiä badë dani̧que yaba̧ ca̧ mu̧i̧tjoi̧ jini̧ —yo̧a̧nȩjȩ—. Ca̧ mu̧i̧tjoi̧ pio ji̧ yürüa̧requedemȩ mȩnȩ bo mai tänȩpea̧ oa, jabo cjäri̧ mani̧que, pio mȩnȩ bo mai tänȩa̧ oaiä, jabechji̧ ba chia dadëyi̧pea̧ni̧que yaba̧. 'Aja̧, cüdë bo maipea̧ oaiä, ca̧ ana̧yi̧ pio ji̧iä ji̧dë u̧i̧ ba chiaquëda' quëna̧yi̧mi̧ darë badë dae chjaoni̧que. Ado pio ju̧i̧iä jabechji̧, chjai̧dëri̧ japea̧renȩ. Ado pio ju̧i̧iä Jeova pio judi chjadëri̧ ütarë datäremȩdiibe pio ibë chjadëri̧ daba tänȩpea̧ oa. Jabechji̧ pio cüdë ca̧ mu̧i̧tjoi̧ i̧a pio mȩaiäpȩmo̧ yürüa̧ oaiä chjai̧dëri̧ japea̧rä judi yo̧tädiibe. Ado pio mȩnȩ bo mai tänȩa̧ oaiä chjai̧dëri̧ japea̧rä judi, peaja̧di yo̧tädiibe —yo̧yi̧rȩ yo̧rëreyi̧nȩjȩ üi̧ oa.
6Jabo Abara̧ judi dëbë yo̧rëremȩdejȩ jibëa̧ iei̧ ji̧:
—Damȩ, Aga jini̧ na̧ mu̧i̧tjoi̧ni̧. Ana̧yi̧ pio jini̧mȩ mȩnȩ. Ado mȩa bücjü da̧ oaiä, jabechji̧ mȩnȩ jo̧rȩta̧mi̧ japaje —yo̧a̧dejȩ.
Ado Charai̧ jini̧ pio ju̧i̧ ta̧rëa̧ oaiä, ma̧i̧ dari̧ japayi̧pea̧nȩjȩ jibëa̧ mu̧i̧tjoi̧ i̧a. Chjadëri̧ ëba cjo̧ro̧dëyi̧pea̧nȩjȩ. Ado pio ju̧i̧iä a̧dë baäa̧nȩjȩ ana̧yi̧ pio ji̧ Aga jini̧ 7Chiri tjoräpȩ baäa̧nȩ. Ado Jeova ja̧ mu̧i̧tjoi̧ judi, a̧dërimȩ mu̧i̧tjoi̧ pio judi pio ju̧ri̧pȩyi̧ i̧a dadäräa̧dejȩ. Aja̧, tade puëräpȩ cjiayi̧ i̧a, Chu quȩmȩräpȩmo̧ järea̧ no̧ yuroro cjiamȩ tade puëräpȩ cjiayi̧ i̧a dadäräa̧dejȩ. 8Ado yo̧mȩrȩ iëno̧ë ta̧rëa̧dejȩ Aga ji̧:
—Damȩ Aga, Charai pio ji̧ ja̧ mu̧i̧tjoi̧mȩ. ¿Yudiri jana̧yi̧mȩ? Ado ¿yö̧tara̧pȩmo̧ baäyi̧mȩ? —yo̧mȩrȩ iëno̧ë ta̧rërëremȩdejȩ Ütë ja̧ mu̧i̧tjoi̧ judi.
Ado Aga jini̧ dëbë yo̧yi̧rȩ yo̧a̧nȩjȩ:
—Ca̧ ana̧yi̧ pio ji̧ a̧dë ma̧neno̧a̧requedejȩ —dëbë yo̧a̧nȩjȩ.
9Ja̧dëa ji̧ Jeova ja̧ mu̧i̧tjoi̧ judi ado yo̧a̧dejȩ:
—Jabechji̧, ado chjereno̧ baäje na̧ ana̧yi̧ pio ji̧iäpȩmo̧. Chjadëri̧ ta̧rëdiäjȩ. Pio ji̧ ja̧ chja̧oerä cjo̧ro̧je chjadëri̧ —yo̧a̧dejȩ.
10Ja̧dëa ji̧ pio yoa ma̧ȩbo a̧de yo̧rëremȩdejȩ, ja̧di ta̧rëri̧ yo̧mȩrȩ:
—Damȩ, no̧i̧dë tjamo̧parȩpaquiji̧ri̧ na̧ea̧ri ja̧ji̧ri̧ pio ji̧ri̧ na̧ ja pio ju̧i̧iä —yo̧a̧dejȩ—. Ütararea̧mi̧dëri̧ cjiadiäpadiro̧. 11Damȩ, bo maiyi̧mȩ mȩnȩ, ado üi̧ boi̧ arapamȩ. Ado ara̧rä, jabechji̧ Ichamae quȩra̧ quȩpaju̧i̧. Jabechji̧ Jeova pio judi daea̧dima̧ gitori̧ jo̧rȩtayi̧ i̧a. Ado pio mȩa cjäri̧ri̧ cjiamȩrȩ daea̧ oaiä, jabechji̧ ja̧di dari̧ japë yürüpadima̧. 12Ado damȩ, na̧ ja pio judi, jabechji̧ ma̧i̧ da oëadëmȩrȩ cjo̧ro̧padi. Jabechji̧ buro chjuamȩ tjamo̧mi̧ dari̧ cjo̧ro̧padi. Ado buro chjuamȩ tjamo̧ oa, jabechji̧ chjama̧i̧parȩrea̧mi̧dëde. Ado peaja̧dimi̧ dari̧ cjo̧ro̧padi na̧ ja judi. Jabechji̧ chjama̧i̧parȩrea̧mi̧dëri̧ cjiamȩrȩ ji̧dë ma dëbëpe chjaopadiji̧ri̧ eami̧ti̧ pumȩ ji̧ri̧. Ado pio jȩa dëbëpe chjaomȩ pio ju̧i̧ ba dëbëpe chjaopadiji̧ peaja̧di. Ado jibëa̧ oti̧ pio ji̧ri̧bo chjadëri̧ ëba cjo̧ro̧rea̧ dadëpadiji̧ri̧ —yo̧mȩrȩ ma̧ȩ yürürëremȩdejȩ Jeova judi Aga pio ji̧iäpȩmo̧ jibëa̧ mu̧i̧tjoi̧ pio ju̧i̧iä.
13Ado Jeova judi jibëa̧ mu̧i̧tjoi̧ pio ju̧i̧iä Aga pio ji̧iäpȩmo̧ ma̧ȩ yürüa̧ tara, jabechji̧ ado cja̧rȩmo̧ quȩmi̧ da oa ni̧bärëreji̧yi̧nȩ Jeova pio ju̧i̧ chjiari. "Aja̧, Ütë tjamo̧ pio judide coa daea̧mȩ judi” yo̧a̧nȩ. “Aja̧, ado coa daea̧räbo, jabechji̧ cjo̧ro̧parequede cüdë ja̧botärea̧ ji̧" yo̧a̧nȩ. Aja̧, ja̧di ta̧rëri̧ yo̧rëreyi̧nȩ Jeova pio ju̧i̧ chjiari. 14Ado pio ju̧i̧iä peaja̧di ta̧rëri̧ quȩ chiamȩpea̧de tade puë üdë. "Cjo̧ro̧mȩ Ütë pio judi daea̧dique" yo̧a̧ quȩ chiamȩpea̧de tade puë üdë. Ado jiro tade puë üdë, Cade quȩmȩ chiri queri̧räpȩde. Berede quȩmȩ bë ma̧ri̧ quȩri̧räpȩde.
15Ado Aga jini̧ japamitë chjätä ëte, ararëreyi̧nȩjȩ üi̧ boi̧ oa. Ëba ara̧nȩjȩ Abara̧ ju̧i̧. Ado ja̧dëa ji̧ Ichamae quȩmȩra̧ quȩparëremȩdejȩ Abara̧ pio judi. 16Ado Abara̧ judi 86 ui goamȩrȩ daea̧dejȩ jibëa̧ ja oa, pea ara̧ oa cjiamȩ oa, Ichamae quȩmȩ oa.
Currently Selected:
Taruparea̧ Ma̧ȩ 16: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
