Taruparea̧ Ma̧ȩ 18
18
"Na̧ ja oa yürüparequedemȩ" yo̧mȩrȩ ma̧ȩ yürera̧parëremȩdejȩ Abaraa̧ ju̧i̧ Ütë tjamo̧ judi
1Japamitë chjätä ëte dorë tjomo̧ro, Jeova judi ado na̧rȩra̧parëremȩdejȩ Abaraa̧ ju̧i̧. Ma̧re quȩmȩ torë cjiamȩräpȩ cjo̧ro̧mȩ oa, i maeara̧ japea̧ oa cjiamȩ jo̧ yuroro chamȩ oa, yu̧a̧rea̧ joë ya yuroro chamȩ oa na̧rȩra̧pea̧dejȩ. 2Ado Abaraa̧ judi chiriräpȩmo̧ gatë damȩrȩ darëremȩdejȩrȩ tjarari̧ oari ji̧ri̧, jachi tjamo̧dëji̧ri̧ oa. Dae cjiaji̧ri̧ oa daea̧dejȩrȩ. Ado jo̧ȩra̧pe cjitëmȩrȩ jä cjiaeno̧a̧dejȩrȩ pio ji̧ri̧ dëbëdiäpea̧ oa, chjadëri̧ jeapea̧ oa. Ado pio ji̧ri̧iäpȩ jädärä ëte, juchatura̧ tjätjäpë china̧därärëremȩde jibëa̧ daito oa daburäpȩ yuro cjiari̧. Ado yo̧a̧dejȩrȩ:
3—Jana̧nȩrȩ. Jabechji̧ pio dibëiä chjadërä judi jëreeadëji̧ri̧rȩ chadiëno̧täreji̧ri̧renȩrȩ. Jabechji̧ dibëa̧ mu̧i̧tjoi̧mi̧ darë yo̧requededibe. 4Aja̧, pio dibëiä chjadërä judi, ui oa goa jana̧ tänȩparequedejȩrȩ ca̧ mu̧i̧tjoi̧ ji̧ri̧ mȩnȩro̧ dibëa̧ ta oa chjadëri̧ joapea̧ oa. Jabechji̧ mȩnȩro̧ dabami̧ to chja̧oeräpȩ chadieno̧täreji̧ri̧nȩrȩ järätä cjatäjärea̧ dapea̧ oa. 5Ado cüdë chja̧pe oa goa jana̧parequededibe mȩnȩro̧ to̧bape jäpea̧ oa. Ado jura ëte, järätä chjapa ëte, jabechji̧ baäeji̧ri̧nȩrȩ —yo̧mȩrȩ yo̧rëremȩdejȩrȩ Abaraa̧ judi pio jȩa goë daera̧pea̧ji̧ri̧ pio ji̧ri̧.
Ado oari judiro̧ dëbë yo̧a̧diro̧jo̧ȩ:
—Aja̧, jabechji̧de. Mȩnȩ jo̧rȩtami̧ japavä —yo̧a̧diro̧jo̧ȩ.
6Ja̧dëa̧ ji̧ pio ju̧i̧ ta̧rëa̧ oaiä, jäeno̧a̧de Abaraa̧ judi jibëa̧ bëräpȩ. Ado yu̧a̧mȩrȩ yo̧eno̧a̧dejȩ Chara ji̧:
—Jo̧ȩra̧pevä. Damȩ, 20 kilo oa mitëvä pjo̧no̧i̧ chjadë tjamo̧ oa chja̧pe japapea̧ oa. Chjadëri̧ mitë mire ëte japavä —yo̧a̧dejȩ.
7Ado jibëa̧ iei̧ pio ji̧ ja̧di yo̧ ëte, dairäpȩmo̧ go̧dümȩrȩ jäeno̧a̧de bacarë cjo̧ro̧mȩräpȩ. Ado mitëa̧dejȩ baca bo oa, chjacjiamȩ tjamo̧ oa. Ado jibëa̧ mu̧i̧tjoi̧ judi chjaodëri̧ gu̧na̧ ëte jëdano̧a̧dejȩ go̧a̧ oa, jana̧ji̧ri̧ pio judiro̧ chjadëri̧ jurapea̧ oa. 8Ado ja̧dëa ji̧ Abaraa̧ judi jura tänȩa̧dejȩrȩ baca go̧a̧ oa, yö̧ cö pënȩ oa. Yö̧ cö uibo jara tänȩa̧dejȩrȩ. Ado judiro̧ jura̧ nö̧ta, to chja̧oeräpȩ cjiadiäa̧de Abaraa̧ judi ji̧ri̧ ja̧ queri̧räpȩ.
9Ja̧dëa ji̧ jana̧ji̧ri̧ pio judiro̧ juradäräa̧ ji̧, iëno̧ë ta̧rëa̧diro̧jo̧ȩ Abaraa̧ ju̧i̧:
—¿Tjana̧räpȩnȩ na̧ iei̧ jini̧, Chara quȩyi̧ pio jini̧?
—Tjana̧räpȩdënȩ, ira̧ japea̧ bëräpȩnȩ —dëbë yo̧a̧dejȩrȩ.
10Ja̧dëa ji̧ cja̧rȩmȩrȩ yo̧a̧dejȩ:
—Danȩ, cja̧rȩmȩ ui codë chjätä ëte, pio yaba̧mi̧ gupënȩrä jana̧ ëte, ado goë daera̧parequedemȩ. Ado pio judirä ara̧ oa ëbapanȩ na̧ iei̧ jini̧ üi̧ boi̧ oa —yo̧a̧dejȩ.
Ado oari judiro̧ dairäpȩ ni̧bä chjaoa̧ nö̧ta, jabechji̧ ta̧rë cjiarëreyi̧nȩ Chara jini̧. Abaraa̧ ja̧ duriräpȩyi̧rȩ, jënȩ cjo̧ro̧mȩ joë ya cotoro ta̧rë cjiareyi̧nȩ. 11-12Ado pio jȩa chjiari ni̧bä chjaoa̧ ta̧rëa̧ oaiä, airi̧ cjiayi̧pea̧nȩ. ‘Jabo cjäri̧ maquëda, ütai̧ tjamo̧pea̧quëda, nö̧ridëyi̧pea̧quëda, bo ararea̧mi̧dëpea̧quëda, ado ca̧ üi̧ judi a̧dë chjäte ütama̧i̧pea̧ tara, goaeri̧ ëba mo̧a̧rea̧mi̧dëpea̧dida’ quëna̧ jo̧rȩtayi̧rȩ yo̧rëreyi̧nȩ, airi̧ cjiayi̧rȩ.
13Ado ja̧dëa ji̧ Jeova judi yo̧ë ta̧rëa̧dejȩ Abaraa̧ ju̧i̧:
—¿Jabo tjana̧pea̧ ji̧ airi̧ cjiayi̧pea̧nȩ Chara jini̧? 'Ütai̧ tjamo̧pea̧quëda, bo ararea̧mi̧dëquëda' quëna̧yi̧rȩ yo̧a̧ ji̧, ¿tjana̧pea̧ ju̧i̧ ja̧di dari̧ yo̧a̧nȩ? 14Danȩ, ¿yö̧ta dari̧ jo̧rȩtade Jeova judi? 'Jabo cjäri̧ maquëda, japarea̧mi̧dëquëda, pio ju̧i̧ japadai̧ daquëda' ¿quëna̧dëmȩde judi? Cjäri̧ made, ja̧di dari̧ quëna̧dëmȩde. Ja̧di tara yo̧requedemȩ ado. Cja̧rȩmȩ ui codë oa chjätä ëte goë daera̧parequededibe ado chjereno̧. Ado judirä ara̧ oa ëbaeyi̧nȩ Chara jini̧ üi̧ boi̧ oa. 15Ja̧dëa ji̧ Chara jini̧ pio ju̧i̧ ado ta̧rëa̧ oaiä uapapea̧nȩ. Ado ma̧ȩ chjádë yürüa̧nȩ:
—Jabo cjäri̧ marequede. Airi̧ cjiadëyi̧requede —yo̧a̧.
Jabo Jeova judi dëbë yo̧a̧dejȩ:
—Dëdë, airi̧ cjiareyi̧mȩ —dëbë yo̧rëremȩdejȩ Chara ji̧ Ütë tjamo̧ judi.
Abaraa̧ judi goë tuti cjo̧dërëremȩde Chodomaräpȩ cjo̧ro̧ji̧ri̧ pio ji̧ri̧ chjiari
16Ja̧dëa ji̧ jurareji̧ri̧rȩ cjitërëreji̧ri̧dirȩ oari judiro̧. Ado Chodomaräpȩmo̧ järea̧ no̧ oa mitëji̧ri̧rȩ jäa̧dirȩ. Ado pumȩ ji̧ri̧ a̧detämi̧ cjiamȩrȩ ëba jäa̧dejȩrȩ Abaraa̧ judi. 'Jachi tjamo̧dëräpȩ yuro a̧detäremȩquiji̧ri̧da' quëna̧mȩrȩ ëba järëremȩdejȩrȩ. 17Ado Jeova judi Abaraa̧ ju̧i̧ chjiari jo̧rȩtarëremȩde. Jabechji̧ jënȩ no̧mȩ tjamo̧ri ja̧ yo̧rërea̧ ma̧ȩ pio ju̧i̧ jo̧rȩtarëremȩde. ‘Aja̧, cüdë japapea̧ pio ju̧i̧ yo̧täremȩcuni̧da, goadidëtäremȩcuni̧da’ quëna̧ jo̧rȩtamȩrȩ darëremȩdejȩ. 18‘Aja̧, Abaraa̧ pio judiri ja̧ji̧ri̧ judiro̧ no̧i̧dë tjamo̧padiro̧da, orë dëbëpadärärea̧mi̧dëri̧ cjo̧ro̧padiro̧da, Abaraa̧ pio ju̧i̧iä tarupapadiro̧da, pio ju̧i̧iä chiriräpȩti̧ oa cjo̧ro̧ji̧ri̧ judiro̧ chjadëri̧ cjo̧ro̧rea̧mi̧ dari̧ cjiadiä mapadiro̧da, 19pio ju̧i̧ mitëa̧cuni̧da, jibëa̧ u̧ri̧ pio ji̧ri̧ chjadëri̧ a̧ra̧ano̧pea̧ oa mitëa̧cuni̧da, pio judiri ja̧ji̧ri̧ pio ji̧ri̧ chjadëri̧ a̧ra̧ano̧pea̧ oa mitëa̧cuni̧da, jibëa̧ pumȩ judiro̧ coëma cjiari̧ cjo̧ro̧pea̧ oa mitëa̧cuni̧da, ca̧ ma̧ȩrämo̧ cjo̧ro̧pea̧ oa mitëa̧cuni̧da, ado ja̧di dari̧ cjo̧ro̧mȩ oa chjadëri̧ yürüpacuni̧da, cüdë yo̧ë cji̧därea̧ ma̧ȩ pio ju̧i̧ yürüpacuni̧da, jabechji̧ Jeova pio judiquëda’ quëna̧ jo̧rȩtarëremȩde Jeova judi Abaraa̧ pio ju̧i̧ chjiari.
20Ja̧di tara Jeova judi, 'Aja̧, Abaraa̧ pio ju̧i̧ goadidëtäremȩcuni̧da' quëna̧ jo̧rȩtamȩrȩ ma̧ȩ yürürëremȩdejȩ, ja̧di ta̧rëri̧ yo̧mȩrȩ:
—Danȩ, Chodomaräpȩ cjo̧ro̧ji̧ri̧ judiro̧, ado Gomoraräpȩ cjo̧ro̧ji̧ri̧ judiro̧, “ji̧dë ma chjai̧dëri̧ jape chjaodirȩ” yo̧a̧ oa ta̧rë chjaorequede peadëri ja̧. A̧dë chjäte chjai̧dëri̧ jape cjiadirȩ judiro̧. 21Ja̧di tara birë jäparequede pio ji̧ri̧ dapea̧ oa. Cüdë pio ji̧ri̧ chjiari ta̧rë chjaoa̧ pio ju̧i̧ daba dapea̧ oa birë jäparequede. Ado pio ji̧ri̧ chjiari yo̧reji̧ri̧ judiro̧ tjamo̧ri̧ yo̧a̧rä judi, ‘jabechji̧ tjamo̧ri̧ yo̧a̧diro̧coada' quëna̧parequede —yo̧mȩrȩ yo̧a̧dejȩ Abaraa̧ ju̧i̧ Ütë tjamo̧ judi.
22Ja̧dëa̧ ji̧ Abaraa̧ ju̧i̧ goë daera̧pea̧ji̧ri̧ pio judiro̧ yo̧a̧ri̧rȩ a̧dë järëreji̧ri̧diro̧jȩrȩ Chodomaräpȩ jäji̧ri̧rȩ. Ado Jeova judi ëba cjiadiärëremȩdejȩ Abaraa̧ pio ju̧i̧. 23Ado Abaraa̧ judi Jeova pio ju̧i̧ ja̧ dëbëräpȩ jämȩrȩ iëno̧ iëno̧ ta̧rërëremȩdejȩ:
—Danȩ, mȩnȩ Chodomaräpȩ cjo̧ro̧ji̧ri̧ pio ji̧ri̧ ja̧bo tänȩrä, bë ma̧ri̧ üdë cjiadiädëri̧ yuroparä, ¿yö̧ta dari̧ japapea̧? Coëma cjiari̧ cjo̧ro̧ji̧ri̧ pio ji̧ri̧bo ja̧bo tänȩpea̧? 24O judiro̧ coëma cjiari̧ cjo̧ro̧rä judi, 50 pumȩrȩ quëna̧ji̧ri̧rȩ cjo̧ro̧rä judi, pio ji̧ri̧iä ¿cjiadiädëtäremȩrenȩ? Jabo coëma cjiari̧ cjo̧ro̧ji̧ri̧ pio ji̧ri̧iäbo yuropatäremȩ? 25Danȩ, coëma cjiari̧ cjo̧ro̧ji̧ri̧ judiro̧ chjai̧dëri̧ cjo̧ro̧ji̧ri̧ pio ji̧ri̧ nö̧ta cjo̧ro̧rä judi, jabechji̧ ja̧bo tänȩrea̧mi̧dëdirȩ. Ado mȩnȩ chjai̧dëri̧ cjo̧ro̧ji̧ri̧ pio ji̧ri̧ dami̧ dadëtäremȩrenȩ coëma cjiari̧ cjo̧ro̧ji̧ri̧ pio ji̧ri̧. Mȩnȩ chjai̧dëri̧ cjo̧ro̧ji̧ri̧ pio ji̧ri̧ japami̧ japadëtäremȩrenȩ coëma cjiari̧ cjo̧ro̧ji̧ri̧ pio ji̧ri̧. Jabo chjadëri̧ japaemȩ jironȩ. Jabechji̧ chiriräpȩti̧ oa cjo̧ro̧ji̧ri̧ pio ji̧ri̧ tjamo̧ ütaramȩ pio judirenȩ. Chiriräpȩti̧ oa cjo̧ro̧ji̧ri̧ pio ji̧ri̧ tjamo̧ bape chjaomȩ pio judirenȩ. Aja̧, tjamo̧i̧ cjiari̧ ütaramȩ pio judirenȩ. Ado pio ju̧i̧iä chjadëri̧ japaemȩrenȩ —yo̧mȩrȩ yo̧rëremȩdejȩ Abaraa̧ judi.
26Ja̧dëa ji̧ Jeova judi dëbë yo̧a̧dejȩ:
—Danȩ, cüdë, Chodomaräpȩji̧ri̧ oa, 50 pumȩrȩ coëma cjiari̧ cjo̧ro̧ji̧ri̧ ira̧ darä judi, jabechji̧ pio ji̧ri̧iä cjiadiämi̧ dari̧ cjiadiätäremȩrequede. Pio ji̧ri̧iä ja̧bo tänȩdëtäremȩrequedejȩrȩ o ji̧ri̧.
27Jabo Abaraa̧ judi ado yo̧ë ta̧rëa̧dejȩ Ütë tjamo̧ ju̧i̧.
—Cjäri̧ri̧ cjia dacoe. Oëadëmȩmi̧ dari̧ ni̧bämȩ oa cjäri̧ri̧ cjia dacoe. Jabomo̧ pumȩrequede cüdë. Dabu pjo̧no̧i̧ pio judirimȩrequede. Jabo ju̧i̧mȩborë ni̧bärequedemȩ ca̧ Ütë oa. 28Danȩ, bë ma̧ri̧räpȩ coëma cjiari̧ cjo̧ro̧ji̧ri̧ judiro̧ ji̧ra̧ tjamo̧dërä judi, 50 pumȩdërä judi, jabomo̧ 45 pumȩrä judi, ¿yö̧ta dari̧ japapea̧de? Cja̧ȩta̧ra̧ ichimo̧ pumȩ maearë jabëdiäa̧rä judi, 45 pumȩ marä judi ¿ütëbodärä oa ja̧bo tänȩpea̧?
Ado Ütë tjamo̧ judi dëbë yo̧a̧dejȩ:
—Cüdë coëma cjiari̧ cjo̧ro̧ji̧ri̧ pumȩ ji̧ri̧ darä judi, 45 pumȩ maea oa darä judi, jabechji̧ pio ji̧ri̧iä bë ma̧ri̧ oa cjiadiädëri̧ yuropadëtäremȩreconȩ. Ütëbodärä oa ja̧bo tänȩdëtäremȩrequedejȩrȩ. 29Ado ja̧dea̧ ji̧ Abaraa̧ judi ado iëno̧ë ta̧rëa̧dejȩ:
—Jabo coëma cjiari̧ cjo̧ro̧ji̧ri̧ judiro̧ 45 pumȩdërä judi, jabomo̧ 40 darä judi, coëma cjiari̧ cjo̧ro̧ji̧ri̧ judiro̧ jabomo̧ 40 pumȩ darä judi, ¿tjana̧ japapea̧?
Ado Ano̧mȩ judi dëbë yo̧mȩrȩ yo̧a̧dejȩ:
—Tjana̧ japadëpea̧, danȩ, cüdë 40 pumȩ oa darä judi, coëma cjiari̧ cjo̧ro̧ji̧ri̧ pumȩ oa darä judi, jabechji̧ ütëbodärä oa ja̧bo tänȩdëtäremȩrequedejȩrȩ. Pio jiro 40 pumȩ pio ji̧ri̧iä, jabechji̧ ütëbodärä oa ja̧bo tänȩdëtäremȩrequedejȩrȩ.
30Jabo Abaraa̧ judi cjiadiädëmȩrȩ ado yo̧ë ta̧rëa̧dejȩ:
—Jabo Ano̧mȩ, ërecjiadëcoe. Cjäri̧ri̧ cjia dacoe. 'Ado iëno̧ë ta̧rëtäcuni̧da' quëna̧requede. Danȩ, coëma cjiari̧ cjo̧ro̧ji̧ri̧ judiro̧ ji̧ra̧dërä judi, jabomo̧ 30 pumȩrä judi, ¿yö̧ta japapea̧? ¿Ütëbodärä oa ja̧bo tänȩpea̧? ¿Jabechji̧ pumȩ ji̧ri̧ yuropapea̧?
Ado Ano̧mȩ judi ado dëbë yo̧a̧dejȩ:
—Cüdë 30 pumȩ i̧ra̧ darä judi, coëma cjiari̧ cjo̧ro̧ji̧ri̧ i̧ra̧ darä judi, jabechji̧ pio ji̧ri̧iä ütëbodärä oa ja̧bo tänȩdëtäremȩrequedejȩrȩ. Pio ji̧ri̧iä cjiadiätäremȩrequede.
31Ado ja̧dëa̧ ji̧ Abaraa̧ judi cjiadiädëmȩrȩ ado yo̧ë ta̧rëa̧dejȩ Ano̧mȩ ju̧i̧:
—Danȩ ca̧ Ano̧mȩ, oëadëmȩmi̧ dari̧ ni̧bäa̧requedemȩ. Jabo danȩ, jiro bë ma̧ri̧räpȩ cjoëma cjiari̧ cjo̧ro̧ji̧ri̧ judiro̧ ji̧ra̧dërä judi, ta chjö̧na̧i̧ pumȩ marä judi, ¿yö̧ta japapea̧? Jabechji̧ pumȩ ji̧ri̧ yuropapea̧? ¿Ütëbodärä oa ja̧bo tänȩpea̧ coëma̧ cjiari̧ cjo̧ro̧ji̧ri̧ pio ji̧ri̧bo?
Ado Ano̧mȩ judi dëbë yo̧mȩrȩ yo̧a̧dejȩ:
—Danȩ, cüdë ta chjö̧na̧i̧ pumȩ oa coëma cjiari̧ cjo̧ro̧ji̧ri̧ i̧ra̧ darä judi, jabechji̧ pio ji̧ri̧iä bë ma̧ri̧ oa cjiadiädëri̧ yuropadëtäremȩreconȩ pio jiro bë ma̧ri̧ oa. Jabechji̧ pio ji̧ri̧iä cjiadiätäremȩrequede.
32Jabo Abaraa̧ judi ji̧dë u̧i̧ iëno̧ë ta̧rëtämi̧ cjiamȩrȩ iëno̧ë ta̧rëa̧dejȩ ado:
—Ca̧ Ano̧mȩ, ërecjiadëcoe. Cjäri̧ri̧ cjia dacoe. Ji̧dë ma iëno̧ë ta̧rë chjaodëparequedemȩ, jabo pio yoamo̧i̧ iëno̧ë ta̧rërequedemȩ ado judiri iëno̧ë ta̧rë chjaodëparequedemȩ. Danȩ, coëma cjiari̧ cjo̧ro̧ji̧ri̧ judiro̧ ji̧ra̧ tjamo̧dërä judi, jabomo̧ ichi chjö̧na̧i̧ pumȩrȩ cjo̧ro̧rä judi, pio ji̧ri̧iä cjiadiädëtäremȩnȩ?
Ado Ano̧mȩ judi dëbë yo̧a̧dejȩ Abaraa̧ ju̧i̧:
—Dëdë, pio ji̧ri̧iä cjiadiätäremȩrequede. Bë ma̧ri̧räpȩ cjo̧ro̧ji̧ri̧ judiro̧ coëma cjiari̧ quëna̧rä judi, ichi chjö̧na̧i̧ pumȩrȩ quëna̧rä judi, dëdë, pio ji̧ri̧iä cjiadiätäremȩrequede. Pio jiro bë ma̧ri̧ oa cjiadiädëri̧ yuropadëtäremȩreconȩ. 33Ado Jeova judi Abaraa̧ pio ju̧i̧ nö̧ta ni̧bä chjao ëte baärëremȩde. Ado Abaraa̧ judi peaja̧di baärëremȩde jibëa̧ bëräpȩ.
Currently Selected:
Taruparea̧ Ma̧ȩ 18: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
