Taruparea̧ Ma̧ȩ 19
19
Ütë tjamo̧ ja̧ mu̧i̧tjoi̧ judiro̧ ma̧ȩ yürepea̧diro̧jo̧ȩ Oto ju̧i̧
1Ja̧dëa̧ ji̧ gȩnȩpea̧rä Ütë tjamo̧ ja̧ mu̧i̧tjoi̧ judiro̧ yo̧a̧ri̧rȩ, a̧dëriji̧ri̧ mu̧i̧tjoi̧ pio judiro̧ go̧düdärärëreji̧ri̧dirȩ Chodoma bë ma̧ri̧räpȩ. Ado Oto judi daea̧dejȩrȩ. Bë ma̧ri̧räpȩ yu̧a̧rea̧ joë ya yuroro chamȩrȩ daea̧dejȩrȩ. Ado ji̧ri̧ daea̧ ëte cjitëno̧a̧de. Ado jäeno̧a̧dejȩrȩ. Ado ji̧ri̧ ja̧ dëbëräpȩ juchatura̧ tjätjäpë china̧därärëremȩde jibëa̧ daito oa daburäpȩ yuro.
2Ado Oto judi yo̧a̧dejȩrȩ:
—Jana̧nȩrȩ. Danȩrȩ, jätärȩ ca̧ bëräpȩ. Pio ju̧ri̧pȩ cjiadiäpanȩrȩ mo̧a̧pea̧ oa. Ju̧ri̧pȩ dibëa̧ ta oa joarea̧ dapanȩrȩ. Ado dopea̧rä, jabechji̧ chjadëri̧ go̧dürea̧ dapanȩrȩ. Danȩrȩ, dibëa̧ mu̧i̧tjoi̧mi̧ darë yo̧requededibe —yo̧a̧dejȩrȩ.
Jabo judiro̧ dëbë yo̧tea̧diro̧jo̧ȩ Oto ju̧i̧:
—Cjäri̧ marea̧rȩ. Jabechji̧ dairäpȩ cjiadiäparea̧rȩ —yo̧a̧diro̧jo̧ȩ.
3Jabo Oto judi cjiadiädëmȩrȩ yabëno̧a̧ oaiä, jabechji̧ cho̧rë järëreji̧ri̧diro̧jo̧ȩ ju̧i̧ ja̧ bëräpȩ. Ado Oto judi chjadëri̧ jëdanȩ yürürëremȩdejȩrȩ jurarea̧ oa. Ado peaja̧di chja̧pe oa jape yürüa̧dejȩrȩ. Pjuru chiari̧ cjitëdëmȩ chja̧pe oa yürüa̧dejȩrȩ. Ado jura̧diro̧jo̧ȩ.
4Ado judiro̧ pea jura̧ duri oa jabë mo̧a̧dëa̧rä, Chodomaräpȩ cjo̧ro̧ji̧ri̧ oari pio judiro̧ a̧doparëreji̧ri̧dirȩ Otorë cjo̧ro̧mȩräpȩ. Acji tai̧ji̧ri̧rȩ tjoro tänȩrëreji̧ri̧diro̧jo̧ȩ Oto ja̧ bë oa. Oari ütama̧i̧ judiro̧, oari pëi̧ pio judiro̧borë a̧dopea̧dirȩ ütëborë. 5Ado taruparëreji̧ri̧dirȩ Oto pio ju̧i̧ ëna̧diäpea̧ ji̧, ja̧di ta̧rëri̧ yo̧ji̧ri̧rȩ:
—Danȩ, pio mȩa goë daera̧pea̧ oari judiro̧, pea yabo gȩnȩrä jana̧reji̧ri̧ pio judiro̧, ¿tjana̧räpȩdirȩ? Go̧dü tänȩjȩrȩ. Pio ji̧ri̧ yürüibe. Ëba mo̧a̧tämi̧ cjiarea̧ro̧jȩrȩ —ëna̧ quirati̧ cjiaji̧ri̧rȩ yo̧a̧diro̧jo̧ȩ.
6Ado pio ji̧ri̧ ta̧rëa̧ oaiä, go̧dürëremȩde Oto judi oari pio ji̧ri̧ nö̧ta tuti ni̧bäpea̧ oa. Ado joë ya oa chjadëri̧ tuti cara ëte yo̧a̧dejȩrȩ:
7—Danȩrȩ ca̧ oti̧, yürüdëparequededibe pio coa goë daera̧pea̧ji̧ri̧ pio ji̧ri̧. Jabechji̧ a̧dë chjäte chjai̧dëri̧ japadëchji̧vä. 8Danȩrȩ, cüdë ëbarequedejȩrȩ ca̧ jabi ji̧ri̧. Yo̧a̧ri̧ oa ëbarequedejȩrȩ cja̧rȩmȩ co oarirë ëba mo̧a̧dëa̧ji̧ri̧ pio ji̧ri̧. Jabechji̧ pio ji̧ri̧ yürüparequededibe. Pio ji̧ri̧ mitëchji̧jȩrȩ. Mȩnȩro̧ jo̧rȩtami̧ japaeji̧ri̧renȩro̧jȩrȩ, jabo pio coa goë daera̧pea̧ji̧ri̧ pio ji̧ri̧, jabechji̧ yürüdëparequededibe. Chjadëri̧ jidaparequedejȩrȩ —yo̧a̧dejȩrȩ.
9Jabo judiro̧ Oto ju̧i̧ ta̧rë cjiadiädëa̧diro̧jo̧ȩ. Ado yo̧a̧diro̧jo̧ȩ ja̧dëa ji̧:
—Jabechji̧ jachi cjiavä. Pio a̧ro̧rȩ cjo̧ro̧rea̧ yürüa̧ oa cjo̧ro̧mȩpea̧renȩ ibëa̧ chjarerä. Jabo cjäri̧ marenȩibe, tjaoërimȩrȩ tjamo̧ cjo̧ro̧mȩmi̧ dari̧ japatarenȩibe. Jabo cjäri̧ marea̧rȩ, na̧ ma̧ȩrä cjo̧ro̧dërea̧rȩ. Ado mȩnȩ ja̧di dari̧ japea̧ oaiä, jabechji̧ a̧ro̧rȩ pio jiro oari ji̧ri̧ ma̧i̧ dari̧ japatärea̧ ji̧, jabechji̧ pio mȩa ano̧ mire japaparea̧ro̧mȩ yaba̧. Pio mȩa a̧dë chjäte ma̧i̧ dari̧ japaparea̧ro̧mȩ —yo̧a̧diro̧jo̧ȩ.
Ado chjaodëri̧ acji bagureno̧a̧diro̧jo̧ȩ Oto ju̧i̧. Joë yaräpȩ yuro gi̧de ae cji̧däa̧diro̧jo̧ȩ. 10Ado joë ya oa yarëtaji̧ri̧ oa, tuti japea̧diro̧jȩrȩ a̧dëriji̧ri̧ mu̧i̧tjoi̧ judiro̧, Oto pio ju̧i̧ goëdaera̧pea̧ji̧ri̧ pio judiro̧. Ja̧dëa̧ ji̧ joë ya oa are iëno̧ji̧ri̧rȩ chjaodëri̧ mu̧i̧ gatëa̧diro̧jo̧ȩ Oto ju̧i̧ jo̧ tjoräpȩmo̧ yu̧a̧ tänȩpea̧ oa. Ado ja̧dëa ji̧ chjaodëri̧ tuti cara̧diro̧jo̧ȩ joë ya oa. 11Ado ja̧dëa ji̧ joë ya oa chjuari̧ tuti cara ëte, da coto tänȩa̧diro̧jȩrȩ dairäpȩ cjiadiäa̧ji̧ri̧ pio ji̧ri̧. Ado joë ya oa darea̧mi̧dëri̧ da coto maearë cjiadiäa̧dirȩ ütëbodärärë, ütama̧i̧ judiro̧ ado pëi̧ chja pio judiro̧borë. Ado da cotoji̧ri̧borë ichira̧ ga̧rȩ ga̧rȩ taratea̧diro̧jo̧ȩ joë ya oa jënȩro̧ järätä tjamo̧pea̧rä yuro.
12Ja̧dëa ji̧ Oto ju̧i̧ goë daera̧pea̧ji̧ri̧ pio judiro̧ iëno̧ë ta̧rëa̧diro̧jo̧ȩ:
—¿Na̧ pumȩ ji̧ri̧, o ji̧ri̧, pio yoaiä a̧de ëbadënȩ? Na̧ ja̧ȩtȩ ji̧ri̧, na̧ jabi ji̧ri̧ ¿ëbadënȩ? Na̧ pumȩ ji̧ri̧ pio yoa bë ma̧ri̧rä cjo̧ro̧ji̧ri̧ ira̧ ¿ëbadënȩ? Danȩrȩ, mȩnȩ ëbarä judi, jabechji̧ jo̧ȩra̧pe ma̧ȩ yüreno̧jȩrȩ mȩnȩro̧ ütëborë go̧düpea̧ oa. Aja̧, jo̧ȩra̧pe ëba baäeno̧jȩrȩ jachi tjamo̧räpȩ yuro. 13Jabechji̧ a̧ro̧rȩ pio yoa bë ma̧ri̧ oa cjiadiädëri̧ yuropapea̧ ji̧ querediä tjamo̧de. Jabechji̧ pio yoa bë ma̧ri̧räpȩ cjo̧ro̧ji̧ri̧ pio judiro̧ a̧dë chjäte chjai̧dëri̧ japea̧ pio ju̧i̧ chjiari ta̧rë chjaoa̧de davä Jeova judi peadëri ja̧. Ado pio ju̧i̧iä chjadüa̧diibe. Tjamo̧ davä. A̧ro̧rȩ pio yoa bë ma̧ri̧ oa cjiadiädëri̧ yuropapea̧ oa chjadüa̧diibe. Ado pio ju̧i̧iä yo̧rea̧ro̧mȩ jo̧ȩra̧pe go̧dütä na̧ pumȩ pio ji̧ri̧ nö̧ta —yo̧a̧diro̧jo̧ȩ.
14Ado Oto judi pio ji̧ri̧iä ta̧rë ëte, jäeno̧a̧dejȩrȩ jibëa̧ ja̧ȩtȩpaji̧ri̧ pio ji̧ri̧iäpȩ, jibëa̧ jabi ëbapaji̧ri̧ pio ji̧ri̧iäpȩ. Ado yo̧a̧dejȩrȩ:
—Cjitëno̧chji̧vä. Jo̧ȩra̧pe go̧düchji̧vä jachi oa baäpea̧ oa. Jabechji̧ Jeova pio judi cjiadiädëri̧ yuropapadejȩ pio yoa bë ma̧ri̧ oa. Go̧düchji̧vä —yo̧tea̧dejȩrȩ.
Jabo cjäri̧ madirȩ, ta̧rë ja̧bodëa̧diro̧jo̧ȩ Oto ju̧i̧. Jabomo̧ chjaoriärämi̧ cjiarëreji̧ri̧diro̧jo̧ȩ.
15Ja̧dëa̧ ji̧ dopea̧rä, ji̧dë u̧i̧ jëreeaji̧ri̧rȩ yo̧a̧diro̧jo̧ȩ Oto ju̧i̧ a̧dëriji̧ri̧ mu̧i̧tjoi̧ judiro̧:
—Jo̧ȩra̧pȩvä. Cjitëno̧vä. Pio yudiri go̧deno̧vä. Na̧ iei̧ pio ji̧, na̧ jabi ji̧ri̧ ëba go̧deno̧jȩrȩ. Jabechji̧ mȩnȩ, na̧ pumȩ borë bë ma̧ri̧räpȩ cjo̧ro̧ji̧ri̧ pio ji̧ri̧ nö̧ta ja̧bodëri̧ cjiarä judi, Ütë tjamo̧ judi pio yoa bë ma̧ri̧ oa bape chjaoa̧ oaiä ja̧bodëri̧ cjiarä judi, jabechji̧ jo̧ȩra̧pe go̧deno̧vä —yo̧a̧diro̧jo̧ȩ.
16Jabo Oto oa, cjiadiä cjiadiä cjiamȩ oa daea̧ oaiä, jabechji̧ jibëa̧ ichi oa mitëji̧ri̧rȩ mu̧i̧ go̧dë cji̧därëreji̧ri̧diro̧jo̧ȩ. Jibëa̧ iei̧ pio ji̧, jibëa̧ jabi pio ji̧ri̧ ichira̧ pio ju̧ri̧ra̧ mu̧i̧ go̧dë cji̧däa̧diro̧jȩrȩ bë ma̧ri̧ dairäpȩ yuro. Jabechji̧ Jeova judi Oto pio ju̧i̧ cjäri̧ri̧ cjia da̧ oaiä, jabechji̧ chjätärea̧ yürürëremȩdejȩrȩ. 17Ado judiro̧ bë ma̧ri̧ dairäpȩ go̧düdäräa̧ ji̧, a̧dërimȩ mu̧i̧tjoi̧ pio judi cja̧rȩmȩrȩ yo̧a̧dejȩrȩ:
—Danȩrȩ, goae tarari̧ bagureno̧chji̧vä yaba̧. Mȩnȩro̧ ja̧bodëri̧ cjiarä judi baäeno̧chji̧vä. Dibëa̧ duriräpȩmo̧ mire darea̧ decjiari̧ bagureno̧chji̧vä. Ya̧mi̧ chjarerä a̧rȩmȩ chiriräpȩ cjiadiädë machji̧vä, jabo ya̧mi̧rȩ cjiamȩräpȩ yuro baäeno̧chji̧vä. Mȩnȩro̧ ja̧bodëri̧ cjiarä judi, baäpea̧ chianȩrȩ ya̧mi̧rȩ cjiamȩräpȩ yuro. Jo̧ȩra̧pechji̧vä —yo̧a̧dejȩrȩ.
18Jabo Oto judi yo̧a̧dejȩrȩ:
—Jabo cjäri̧ marequede ca̧ ütëti̧. Cjäri̧ri̧ cjia dachji̧coe. Jachi tjamo̧ oa bagura tänȩdëchji̧coe. 19Danȩrȩ, chjadëri̧ jape chjaoa̧renȩro̧coe davä. Chjadëri̧ a̧doa̧renȩro̧coe. Chjaji̧ri̧rȩ chjätärea̧ yürüa̧renȩro̧coe. Jabo danȩrȩ, cüdë ya̧mi̧rȩ cjiamȩräpȩ yuro bagurarea̧mi̧dërequede. Jachi tjamo̧de. Ado ju̧ri̧pȩ chjadëri̧ go̧düdärärea̧ dadëa̧ oaiä, 'jabechji̧ jabë baädärädëmȩ oa, jabë no̧ropȩmȩ oa acji cjatäpai̧ dadicoada, ja̧boemȩ jiroquëda' quëna̧ jo̧rȩtarequede ca̧ ütëti̧. Ado pio ju̧i̧iä jabechji̧, cjäri̧ri̧ cjia dachji̧coe —yo̧a̧dejȩrȩ—. 20Danȩrȩ, pio ju̧ri̧pȩ a̧rȩde davä bë ma̧ri̧ üdë jachi tjamo̧dëräpȩ. Bë ana̧ tjamo̧dëde. Pio ju̧ri̧pȩ baärea̧ yürüchji̧coe. Jabechji̧ pio ju̧ri̧pȩ chjadëri̧ chjätärea̧ datäremȩrequede —yo̧a̧dejȩrȩ Oto judi.
21Ado pio ju̧i̧ ta̧rëa̧ oaiä, a̧dërimȩ mu̧i̧tjoi̧ pio judi dëbë yo̧a̧dejȩ Oto ju̧i̧:
—Aja̧, ta̧rërequedemȩ. Jabechji̧de ado ja̧di. Ja̧dira̧ baävä. Pio jiro bë ana̧ tjamo̧dëräpȩ baävä. Pio ju̧i̧bo cjiadiädëri̧ yuropatärea̧ ji̧, jabechji̧ yuropadëpareconȩ pio mȩaiä. Jabechji̧ pio ju̧ri̧pȩ baävä. Jachidëde. 22Jabo goae tarari̧ bagureno̧chji̧vä. Pio jiro bë ana̧ tjamo̧dëräpȩ yuro goae tarari̧ bagureno̧chji̧vä. Jabechji̧ mȩnȩro̧ juri̧pȩ chjadëri̧ go̧düdäräa̧rämo̧ tarupapai̧ darequede cjiadiädëri̧ yuropapea̧ ji̧. Pio ju̧i̧iä jabechji̧ bagureno̧chji̧vä jo̧ȩra̧pe —yo̧a̧dejȩrȩ.
Ado pio jiro bë ana boi̧chji̧ üdë Choa quȩmȩde bë ji̧ra̧ oa chiadë tara. Ja̧dira̧ bagureno̧rëremȩde Oto judi, jibëa̧ pumȩborë.
Jeova judi cjiadiädëri̧ yuropadejȩrȩ bë ma̧ri̧ ji̧ri̧
23Ja̧dëa̧ ji̧ do üdë pea uëpea̧rä, Oto judi Choa quȩmȩ bë ana̧ tjamo̧dëräpȩ chjadëri̧ go̧düdärärëremȩde. 24Ado judirä, Jeova pio judi a̧dëri pio judiri gu̧ro tänȩrëremȩdejȩ cjo̧dë oa. Cjo̧dë chiamȩ ta̧dë oa peaja̧di gu̧ro tänȩrëremȩdejȩ. Chodoma quȩmȩ bë ma̧ri̧ oa, Gomora quȩmȩ bë ma̧ri̧ oa acji cjatä tänȩrëremȩdejȩrȩ. 25Cjiadiädëri̧ yuroparëremȩdejȩrȩ davä, pio jiro bë ma̧ri̧ oa. Ado ya̧mi̧ chjarerä a̧rȩmȩ chiri oa, bea Joroda̧ yuroro a̧rȩmȩ chiri pio ju̧i̧ chjö̧na̧i̧ oa cäa marëremȩdejȩ. Tjamo̧ davä. Pumȩrȩ cjiadiädëri̧, torë cjiadiädëri̧, cärärë cjiadiädëri̧ cäarëremȩdejȩ chiri oa. 26Ado judirä Oto ja̧ iei̧ pio jini̧, ëbamȩ ja̧ duri oa bagurayi̧rȩ Chodomaräpȩmo̧ mire daea̧nȩ. Jabo cjäri̧ manȩ, chjaodëri̧ yagoemȩ mapea̧nȩ to jujuarë cjiami̧ dari̧.
27Ado ja̧dëa̧ ji̧ Abaraa̧ judi pea dopea̧rä, jäeno̧rëremȩde. Jënȩ Jeova ju̧i̧ dëbë cjiarërea̧räpȩ ju̧ri̧ jäeno̧a̧de. 28Ado judiri dae cjiamȩrȩ gatë darëremȩde Chodomaräpȩmo̧, Gomoraräpȩmo̧. Bea Joroda̧ yuroro a̧rȩmȩ chiri oa darëremȩdejȩ ma̧i̧ dari̧ chjä cjiamȩ oa. Chiriri pio judiri cjitëmȩ oa daea̧de davä ma̧i̧ da chjä oa. 29Ja̧di dari̧ japamȩrȩ japarëremȩde Ütë tjamo̧ judi. Cjiadiädëri̧ yuroparëremȩdejȩrȩ pio jiro bë ma̧ri̧ chjö̧na̧i̧ oa. Otorë cjo̧ro̧rërea̧räpȩ üdë jabechji̧ jiro decjiapea̧de. Jabo Abaraa̧ judi Ütë tjamo̧ pio ju̧i̧iä goë cjo̧dëa̧ oaiä, jabechji̧ chjadëri̧ jidarëremȩdejȩ Oto ju̧i̧, jibëa̧ pumȩ pio ji̧ri̧bo. Tjamo̧ davä. O pio ji̧ri̧ nö̧ta ja̧bo tänȩtärea̧ ju̧i̧, ja̧bo tänȩdëa̧dejȩrȩ jabo chjadëri̧ chjätärea̧ yürürëremȩdejȩrȩ.
Oto ja̧ jabi jini̧ro̧ ma̧i̧ dari̧ japarëreji̧ri̧ni̧ro̧jo̧ȩ jäja pio ju̧i̧
30Ado Oto judi Choa quȩmȩräpȩ cjo̧ro̧pea̧ ji̧ uaparëremȩde. Jabechji̧ ju̧ri̧pȩ cjo̧ro̧ji̧ri̧ pio ji̧ri̧ uapamȩrȩ daea̧dejȩrȩ. Pio ju̧i̧iä ëba baärëremȩdejȩrȩ jibëa̧ jabi ji̧ri̧, yo̧a̧ri̧ i̧ra̧. Ya̧mi̧rȩ china̧mȩräpȩ baärëreji̧ri̧dirȩ. Ado ja̧dëa ji̧ ya̧mi̧ puëräpȩ ju̧ri̧ bëpea̧dirȩ ya̧mi̧ cjürërë cjiamȩräpȩ ju̧ri̧, jo̧mi̧ daräpȩ ju̧ri̧. 31Ja̧dëa̧ ji̧ japamitë chjätä ëte jojabi yaboyi̧ pio jini̧ yo̧a̧nȩjȩ duriyi̧ ji̧:
—Dame, ibëa̧ ama̧i̧ judi ütama̧i̧ tjamo̧pea̧di. Ado chiriräpȩti̧ oa cjo̧ro̧ji̧ri̧ judiro̧ ütëborë, jabechji̧ ëbaji̧ri̧rȩ cjo̧ro̧ madiro̧, jabo a̧ro̧rȩ pio yoaiä cjo̧ro̧a̧ oaiä, cjäri̧ maa̧ro̧, üi̧ ëbarea̧mi̧dëa̧ro̧. Jabechji̧ oari decjiaräpȩ cjo̧ro̧a̧ro̧. 32Ja̧di tara yo̧cama̧ mȩa. Yu̧i̧ tjamo̧ tänȩpea̧ chiaa̧ro̧ju̧i̧ ibëa̧ ama̧i̧ ju̧i̧. Ado ja̧dëa ji̧ yu̧i̧ tjamo̧pea̧mȩ oa ëba mo̧a̧paa̧ro̧ju̧i̧. Ibëa̧ bori̧ pio ji̧ri̧ nö̧ripea̧ oa jabechji̧ ëba mo̧a̧pea̧ chiaa̧ro̧ju̧i̧ —yo̧yi̧rȩ yo̧rëreyi̧nȩjȩ yaboyi̧ jini̧ duriyi̧ pio ji̧iäpȩmo̧.
33Ja̧dëa ji̧ gȩnȩpea̧rä yu̧i̧ tjamo̧, tänȩa̧ ëte ëba mo̧a̧rëreyi̧nȩjȩ jibëa̧ ama̧i̧ ju̧i̧ yaboyi̧ pio jini̧. Ado Oto judi yu̧i̧ tjamo̧ cjia̧ oaiä, 'jabechji̧ ja̧di dari̧ japani̧coada' quëna̧ dabadëa̧de. 34Ado ja̧dëa ji̧ dopea̧rä yaboyi̧ pio jini̧ yo̧a̧nȩjȩ duriyi̧ pio ji̧iäpȩmo̧:
—Damȩ, pe gȩnȩrä ëba mo̧a̧cuni̧ ibëa̧ ama̧i̧ ju̧i̧. Ado yaba̧ gȩnȩrä, peaja̧di ëba mo̧a̧ju̧i̧. Yu̧i̧ tjamo̧ tänȩ ëte jabechji̧ chjadëri̧ ëba mo̧a̧rea̧ dapamu̧ni̧. Ado ja̧di dari̧ japea̧ oaiä, jabechji̧ ibëa̧ bori̧ pio ji̧ri̧ chjadëri̧ nö̧rirea̧ dapaa̧ro̧, i̧bëa̧ pumȩ pio judiro̧ ütëborë yuropatärea̧ ji̧ —yo̧a̧nȩjȩ duriyi̧ pio ji̧iäpȩmo̧.
35Ja̧dëa ji̧ gȩnȩpea̧rä, ado japarëreji̧ri̧ni̧ro̧jo̧ȩ jibëa̧ ama̧i̧ ju̧i̧. Ado yu̧i̧ tjamo̧pea̧mȩ oa ëba mo̧a̧rëreyi̧nȩjȩ duriyi̧ pio jini̧. Ado Oto judi yu̧i̧ tjamo̧pea̧ oaiä, 'Aja̧, ja̧di dari̧ ëba mo̧a̧ni̧coada' quëna̧dëa̧de. 36Ado Oto ja̧ jojabi jini̧ro̧ ja̧di dari̧ japea̧ oaiä, boma̧i̧ji̧ri̧rȩ cjo̧ro̧rëreji̧ri̧ni̧rȩ. Jabechji̧ pio jibë nö̧rimȩ pio ju̧i̧iä boma̧i̧ji̧ri̧rȩ cjo̧ro̧rëreji̧ri̧ni̧rȩ. 37Ado japamitë chjätä ëte, yaboyi̧ pio jini̧ ararëreyi̧nȩjȩ jibëa̧ boi̧chji̧ oa, üi̧ boi̧ oa. Ado Moabo quȩpea̧nȩjȩ. Pio ju̧i̧iä taruparëreji̧ri̧dirȩ moabita quȩji̧ri̧ pumȩ pio judiro̧. 38Ado duriyi̧ jini̧ peaja̧di japamitë chjätä ëte, ararëreyi̧nȩjȩ jibëa̧ boi̧chji̧ oa, üi̧ boi̧ oa. Ado Benami̧ quȩpea̧nȩjȩ. Ado Benami̧ quȩmȩ pio ju̧i̧iä taruparëreji̧ri̧dirȩ amonita quȩji̧ri̧ pumȩ pio judiro̧.
Currently Selected:
Taruparea̧ Ma̧ȩ 19: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
