Luka 4
4
Yurupari uputari uganani Jesus
1Asui teresemu Jesus Espiritu Santu irumu uyuiri Jurdão sui, asui Espiritu urasu ae kampu kiti.
2Asui kuarenta ara pituna yuiri Yurupari uputari uganani ae, asui nyã kuarenta ara timaa umbau asui arirewara sasi ixupe yumãsi.
3Asui Yurupari umbeu ixupe:
—Deus raira rame inde remuyereu inde arama kua ita pão arama.
4Maa Jesus umbeu ixupe:
—Yawe aintaumpinima kuxima, tikuri sikue kuaita miraita pão resewarantu.
5Asui Yurupari usupiri ae iwate kiti umukame umaa arama yepe viaji kutara panye tuixawaita rendawa aintamiraita yuiri panye mundu upe.
6Asui Yurupari unyee ixupe:
—Haxari kuri aintaruixawa arama inde haxari kuri inde arama panye aintamaa purangawaa nyãse seyaraita ainta, asui hamee kuri ixupe ae awa haputariwaa.
7Neyara kuri ainta panye remunya rame ixe arama benditu.
8Maa Jesus usuaxara ae umbeu ixupe:
—Kuxima aintaumpinima, rerikute remunya benditu neruixawa Deus supe, rerikute repuraki ixupenyu panye sui.
9Asui urasu ae, Jeruzalẽ kiti uxari upuamu templu rakapira rese asui umbeu ixupe:
—Deus raira rame inde repuri templu sui,
10Nyãse kuxima aintaumpinima, uxari kuri ianjuita aintausaru inde.
11Aintaumukaturu kuri inde aintaipu irumu yawaite renupa neipi ita rese.
12Asui Jesus usuaxara, umbeu ixupe:
—Kuxima aintaumbeu yuiri, teresikari reganani neruixawa Deus.
13Asui Yurupari umbawa rire uputari uganani ae panye ugananisawa irumu uyuiri isui ate amu ara kuri.
Jesus uyupiru umbue
14Asui Jesus uyuiri Galileya kiti Espiritu ukuawasawa irumu, asui sesewara usika aintapiri panye tetama kiti.
15Asui umbue ainta sinaguga upe, asui panye aintaumbeu purangawaa sese.
Ianamaita tiaintauputari ae
16Asui usu Nazare kiti mame uyukiriariwaa, asui sauru rame uwike sinaguga upe kuaye umunyawerawaa yawe, asui upuamu uleri arama.
17Asui aintaumee ixupe ilivru kua utitikawaa Izaia, asui upirari irumu kua livru uwasemu kua umpinimawaa,
18Yaneruixawa espiritu uiku serese, nyãse uxari hambeu kua nyenga purangawaa ainta supe kuaita pirasuawaita, umundu ixe hambeu arama ainta supe kuaita prezuwaita uyurawa kuri ainta, haxari arama aintaumaa kuaita sesaimawaita, hayurawa arama kuaita upurarawaita.
19Hambeu arama ainta usikana yaneruixawa rangawa umunya arama turusu purangawaa.
20Asui umusikindawa rire kua livru umuyuiri ae ixupe kua uajudariwaa ae, asui uwapika asui panye sinaguga upewaita aintaumaa ixupe.
21Asui Jesus umbeu ainta supe:
—Uyi ara hamunya kuaye kua inyenga umbeuwaa yawe pesenduwaa upe muiri penye.
22Asui aintaumbeu purangawaa sese asui aintaakayemu aintausendu kua inyenga purangawaa usemuwaa iyuru sui, asui aintaupurandu:
—Maitaa tiserá Juze raira kua?
23Asui Jesus unyee ainta supe:
—Hamanduari pembeu kuri ixe arama kua nyenga, inde umpusangasara reyumpusanga indepawate, panye kua yasenduwaa remunya Kafarnaum upe remunya yuiri kuri nerendawa upe.
24Asui umbeu xinga ainta supe:
—Supiwa hambeu penye arama, kuaita utitikawaita tiaintausuanti ainta puranga aintarendawa upe.
25Supiwa hambeu penye arama siya kuera viuvaita Israel upe Elia tempu rame iwaka uyumusikindawa musapiri akayu seis yasi yuiri watari rame aintaumbau arama panye kua mundu upe.
26Maa timaa Elia usu aintapiri yepenyute usuwaa ipiri kua viuva Sarepita Sidum upewara.
27Siya kuera yuiri lepruzuita Israel upe itempu rame kua utitikawaa Elizeu, maa nẽ yepe aintasuiwara ikatu isui kua Naamã Siria suiwara.
28Asui aintaipiaiwa kuaita uikuwaita sinaguga upe kuaita usenduwaita kua inyenga.
29Asui aintaupuamu aintaumburi ae aintarendawa sui, asui aintaurasu ae iwitera rese aintaretama uikuwaa upe aintaumburi arama ae iwitera sui tiipi kiti.
30Maa Jesus usu aintapitera sui uyuiri arama aintasui.
Umukaturu urikuwaa demuniu
31Asui usu Kafarnaum kiti kua tetama Galileya upewaa asui umbue ainta sauru rame.
32Asui aintaakayemu aintausendu inyenga umbuewaa nyãse upurungita ukuawawaa yawe.
33Ape sinaguga upe yepe apigawa urikuwaa yepe demuniu ikiawaa ipia upe asui usasemu kirimbawa.
34Maataa reputari yaneirumu inde Jesus Nazare suiwara? Maitaa reyuiri remukanyemu yande? Hakuawate indete kua purangawaa Deus suiwara.
35Maa Jesus umukiriri ae umbeu ixupe:
—Rekiririntu inde, resemu isui kua apigawa, asui kua demuniu umburi uwari kua apigawa iwi upe aintapiterupi panye, asui usemu isui tiana umunya ixupe puxi.
36Ape panye aintaakayemu aintaumaa, asui aintauyumbeu aintapawa:
—Maataa kua inyenga? Nyãse kirimbawa umundu kuaita demuniu ikiawaita asui aintausemu.
37Asui sesewara usika aintaretama kiti panye suakintuwaita.
Umukaturu Pedru sugra
38Asui usemu sinaguga sui usu Simão ruka kiti. Ape imãsi uiku kua Simão sugra uriku takua turusu, asui aintaupurandu ae sese.
39Asui uyawika iarupi umpitu kua takua asui takua uxariana ae, asui aramete upuamu uajudari ainta.
Umukaturu siya miraita
40Asui kurasi uwike irumu panye kuaita urikuwaita aintaanamaita imãsiwaita aintaurasu ainta ipiri, asui uxari ipu aintarese aintayaweyawe asui umukaturu ainta,
41Asui demuniwita yuiri aintausemu siyawaita sui, aintausasemu, aintaunyee:
—Indete Deus raira. Maa Jesus umukiriri ainta nyãse aintaukuawa Kristu ae.
Jesus usu iyaraimawaa kiti
42Asui kuemaite usu asui iyaraimawaa kiti, asui kuaita miraita siyawaita aintausikari ae asui aintausu suaki, asui aintaupurandu ae tiarama uxari ainta.
43Maa umbeu ainta supe:
—Harikute hambeu kua nyenga purangawaa sese mayetaa aintaruixawa arama kua Deus panye ainta supe kuaita amuita tetamaita yuiri, nyãse sesewara umundu ixe.
44Asui umbue ainta sinaguga upe Judeya kiti.
Currently Selected:
Luka 4: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
