Marku 4
4
Uyutimasara rese
1Asui uyupiru umbue ainta lagu rimbiwa upe. Asui siya miraita uyumuatiri suaki, ape uwiye igara upe uyatiku, asui panye kuaita miraita siyawaita aintauiku parana rimbiwa iwi rese.
2Asui umbue ainta inyenga irumu umbue aramawaa ipupe ainta, unyee ainta supe:
3—Pesendu senyenga; yepe apigawa usu uyutima.
4Asui uyutima rame uiku yepeyepe mitima karusu uwari pee rimbiwa kiti, asui kuaita wirá miri umbau ae.
5Asui yepeyepe mitima karusu uwari itatiwa upe, kuaira iwi ape asui usini kutara maa tiipiima iwi ape.
6Asui kurasi usemu umuturi saku asui ukukui maniwa nyãse tiuriku sapu.
7Asui yepeyepe mitima karusu uwari puxuwerawa upe, asui sipu uyukiriari umamana ae, ape timaa uriku iya.
8Asui yepeyepe mitima karusu uwari purangawaa upe iwi, uyukiriari puranga asui uriku iya puranga, yepeyepe uxari trinta iya, yepeyepe sesenta asui yepeyepe uxari sem iya.
9Asui unyee:
—Kua urikuwaa iapisa kuara urikute usendu.
Mayesawa kua nyenga uyutimawaa rese
10Asui Jesus uiku rame yepenyu aintasui kuaita miraita siyawaita asui kuaita uikuwaita suaki umbuewaita irumu aintaupurandu irumu sese kua inyenga umbuewaa.
11Unyee ainta supe:
—Haxari pekuawa arama kua nyenga aintauyumimiwaa kuxima maye Deus imiraita arama ainta, maa kuaita amuita hambue ainta inyenga irumu hambue aramawaa ipupe ainta.
12Aintaumaa arama maa timaa aintaukuawa maataa kua aintaumaawaa, aintausendu maa timaa aintaukuawa mayesawataa ae, yawaite maa aintautrukari aintaumanduarisawa hamburi arama aintasui aintapekadu.
13Asui unyee ainta supe:
—Maitaa tiserá pekuawa mayesawataa kua inyenga hambeu aramawaa ipupe? Maitaa kuri pekuawa mayesawa panye hambeuwaa?
14Kua apigawa hambeuwaa sese yawesawa uyutima kua inyenga purangawaa.
15Kuaita uwariwaa pee rimbiwa kiti yawesawa kuaita usenduwaita kua inyenga asui Yurupari uri uyuka aintasui kua inyenga purangawaa.
16Yawesawa kuaita uwariwaita itatiwa upe aintausendu rame kua inyenga suuri aintausuanti ae.
17Maa tiaintauriku aintarapu aintapia upe, tisanta aintauiku, asui puxuwerawa usika aintarese, asui amuita umuruanyana ainta sesewara kua inyenga anyunte aintauxari ae.
18Kua uyutimawaita yuutiwa upe kuaye aintayawe kuaita usenduwaa kua inyenga purangawaa.
19Maa anyunte aintaumanduari kua mundu rese, seẽ aintaumanduari aintamaa rese, asui kua aintaumanduariwaa umamana kua inyenga aintapia upe asui timaa uriku iya.
20Kua uyutimawaita iwi purangawaa upe aintate kuaita usenduwaita kua inyenga asui aintauriku aintaiya, yepeyepe uxari trinta iya, yepeyepe uxari sesenta iya asui yepeyepe uxari sem iya.
Inyenga kua turi rese
21Asui upurandu ainta:
—Maitaa puranga yaxari yaneturi kaxa upe u yanemakira uirupi? Maitaa tipuranga yasupiri uwapika sendawa upe iwate?
22Panye kua uyumimisawa upewaa yamaa kuri ae, asui muiri kua aintaumunyawaa uyumimisawa upe uyukuawa kuri.
23Kua urikuwaa iapisa urikute usendu.
24Asui unyee ainta supe:
—Pesendu puranga kua pesenduwaa, kuaye pemediriwaa yawe amu supe yawete yuiri kuri aintaumediri penye arama, asui aintauxari kuri turusu piri penye arama.
25Nyãse kua urikuwaa aintaumee kuri ixupe, asui kua tiwa uriku aintauyuka kuri isui kua urikuwaa kuaira.
Inyenga mitima karusu rese
26Asui unyee:
—Yaneruixawa Deus uikuwerawaa upe iyawe kua apigawa umusaĩwaa mitima karusu iwi upe.
27Asui usu ukiri, asui upuamu pituna rame ara rame yuiri, asui kua mitima karusu usemu asui uyukiriari maa timaa ukuawa mayetaa.
28Asui iwi uxari uyukiriari uyupiru asui usemu sawa asui iya asui ikarusu yakira.
29Asui tiaru rameana iya anyunte uyutika ae nyãse usikana sangawa.
Inyenga mustarda karusu rese
30Asui unyee xingare:
—Maa yawetaa kua yaneruixawa Deus uikuwaa upe? Maa inyenga upetaa yambue sese?
31Iyawe kua mustarda karusu yayutimawaa iwi upe, kuaira xinga ae panye mitima karusu sui kua mundu upe.
32Yayutima rame ae uyukiriari ipukupiri panye mitima sui, uyukiriari sakanga ipuku asui wirá miri umunya suka arama sakanga rese.
Inyenga umbue arama ipupe ainta
33Asui umbue ainta inyenga irumu umbue arama ipupe ainta kuaye aintaupuderiwaa yawe aintausendu.
34Anyunte umbue ainta inyenga irumu umbue arama ipupe ainta, asui umbeu ainta supe umbuewaita puranga mayesawataa ainta anyuirawaa upe.
Umpitu trevada
35Nyã ara karuka rame Jesus umbeu umbuewaita supe:
—Yasuana lagu ruaxara kiti.
36Asui aintaumbeu aintaresewara ainta kuaita siyawaita asui aintaurasu ae uikure igara upe ae, yepeyepe igara usu sakakuera.
37Asui usika iwitu aintarese, asui gapenu upeteka kirimbawa kua igara rese, asui parana uwike umuteresemu aintaigara.
38Maa Jesus uyenu uiku igara yakumã (ganti) upe ukiri traveseru rese, asui aintaumbaka ae aintaunyee ixupe:
—Inde rembuewaa yande, maitaa timaa arama reputari yasu tiipi kiti?
39Asui Jesus upaka umundu kirimbawa kua iwitu asui unyee parana supe:
—Repituwana. Asui iwitu upitu asui parana uikuntuana.
40Asui unyee ainta supe:
—Marantaa pesikie? Marantaa tiperuyari Deus?
41Asui aintausikie aintauyupurungita aintapawa:
—Awataa kua apigawa aintauruyari arama inyenga kua iwitu parana yuiri?
Currently Selected:
Marku 4: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
