Marku 9
9
1Asui unyee ainta supe:
—Supiwa hambeu penye arama, yepeyepe pesuiwara timaa kuri aintaumanu senundere aintaumaa aintauxariana aintaruixawa arama kirimbawa kua Deus.
Jesus ipira uyutrukari
2Asui seis ara rire Jesus urasu irumu Pedru Tiagu Juão yuiri, urasu ainta iwitera rese akiti ipira uyutrukari aintaumaa.
3Asui irupa umuturi kirimbawa purangawaa murutinga piri panye sui, tiyamaa ike mundu upe upetekawaa murutinga piri isui.
4Asui aintaumaa Elia Muize yuiri, aintaupurungita Jesus irumu.
5Asui Pedru unyee Jesus supe:
—Inde umbuewaa yande, purangate yaiku ike, purangate yamunya musapiri baraka, yepe inde arama amu Muize supe amu Elia supe.
6Tiukuawa mayesawataa umbeu nyãse aintausikie.
7Asui yepe nuvẽ uwiye aintaarupi asui aintausendu yepe inyenga nuvẽ pitera sui, umbeu:
—Aete seraira hagustariwaa, pesendu ixupe.
8Asui kutarantu aintauyereu aintaumaa aintaruaki nẽ awa aintaumaa anyunte Jesus.
Uri kua Elia
9Asui aintauwiye iwitera sui Jesus umbeu ainta tiarama awa supe aintaumbeu kua aintaumaawaa anyunte kuri aintaumbeu ae usemu rire kuri manusawa sui kua usemuwaa umaa kua ara.
10Asui aintauyumimi ainta supe arama aintapia upe ae, asui aintaupurandu aintapawa mayesawataa kua umbeuwaa usemu manusawa sui.
11Asui aintaupurandu ae:
—Marantaa kuaita umpinimawaita umbeu urikute uri primeru kua Elia?
12Asui umbeu ainta supe:
—Kua Elia urikute uri umukaturu arama panye, nyãse yawe aintaumpinima sese kua usemuwaa umaa kua ara urikute upurara urikute uxari aintaumutenyuntu ae.
13Maa ixe hambeu penye arama:
—Uriana kua Elia asui aintaumunya ixupe kuaye aintauputariwaa yawe maye aintaumpinimawaa yawe sese kuxima.
Umukaturu yepe kurumi urikuwaa demuniu
14Asui aintauyuiriana kuayentuana aintasui amuita umbuewaita aintaumaa siya miraita aintaruaki, asui kuaita umpinimawaita aintauyusuaxara ainta inyenga irumu.
15Asui anyunte kuaita siyawaita aintaumaa rame Jesus aintaakayemu asui aintauyana ipiri aintausuanti ae.
16Asui Jesus upurandu ainta:
—Maa resewarataa peyusuaxara?
17Asui yepe aintasuiwara kuaita siyawaita usuaxara ae:
—Inde rembuewaa, haruri nepiri seraira uriku yepe demuniu uxari inyengaimawa ae.
18Mame uwari sese umburi uwari iwi upe tie usemu iyuru sui usuu sanya uyumpiranta ipira, asui hapurandu rembuewaita aintaumburi arama ae maa timaa aintaupuderi.
19Asui Jesus unyee ainta supe:
—Penye miraita kuiriwaita tiwaita peruyari, ate mairametaa haikure peirumu peruyari arama? Ate mairametaa hawaguentari peirumu? Peruri ixe arama ae.
20Asui aintaururi ixupe ae, demuniu umaa irumu Jesus uxari taina uriri kirimbawa asui uwari iwi upe uyereyereu asui tie usemu isui.
21Asui Jesus upurandu taina ipaya unyee ixupe:
—Mairame kuerataa uyupiru ixupe? Asui ipaya unyee:
—Tainare rame ae.
22Siya viaji umburi uwari tata kiti parana kiti yuiri uyuká arama ae, repuderi rame ape pirasua remaa yande arama reajudari yande.
23Asui Jesus unyee ixupe:
—Marantaa rembeu repuderi rame maa? Kua uruyariwaa upuderi umunya panye maa.
24Aramete taina paya usuaxara ae:
—Haruyari, reajudari ixe haruyari arama puranga piri.
25Jesus umaa irumu kuaita siyawaita uyumuatiri ipiri umundu kua demuniu ikiawaa unyee ixupe:
—Inde demuniu rexariwaa inyengaimawa iapisaimawaa yuiri ae, hambeu inde resemu isui kua taina, tikuri mairame rewike mukuĩsawa ipia upe.
26Usasemu rire umuriri rire kirimbawa ae asui usemu isui, asui kua taina uyenu umanuwaa yawe asui siya miraita umbeu, umanuana.
27Maa Jesus upisika ae ipu irumu usupiri upuamu.
28Asui uwike irumu uka kiti umbuewaita upurandu ae anyuirawaa upe:
—Marantaa tiyapuderi yamburi isui kua demuniu?
29Asui unyee ainta supe:
—Kuaita iyawewaita timaa yapuderi yamburi ainta tirame yapurandu Deus irumu.
Mukuĩsawa umbeu umanu kuri
30Asui aintausemuana asui, aintausasawa Galileya piterupi, timaa uputari miraita ukuawa maa kiti usu.
31Nyãse umbue kuaita umbuewaita, unyee ainta supe:
—Kua usemuwaa umaa ara uyuxari kuri ainta supe kuaita apigawaita aintauyuká arama ae asui musapiri ara rire umanu rire uyuiri kuri upaka.
32Maa tiaintaukuawa mayesawa kua umbeuwaa, asui aintausikie aintaupurandu ae.
Awataa serakuena piriwaa aintasui
33Asui aintausikana Kafarnaum kiti uiku aintairumu uka kiti upurandu ainta kuaita umbuewaita unyee ainta supe:
—Maa resetaa pepurungita pee rupi?
34Maa aintaukiririntu nyãse pee rupi aintauyupurungita aintapawa awataa serakuena piri aintasui.
35Asui Jesus uwapika usenui ipiri kuaita duziwaita umbeu ainta supe:
—Kua uputariwaa serakuena piri ae urikute aintarakakuerawara kuri ae, urikute uiku aintamiraita yawe uajudari arama ainta panye.
36Asui ururi yepe taina uxari ae aintapiterupi asui uyumana ae umbeu ainta supe:
37—Awa usuanti yepe taina iyawe seresewara usuanti kuri ixe, awa usuanti ixe timaa ixe usuantiwaa maa usuanti ae kua umunduwaa ixe.
Tepesaisu aintaumunya puranga
38Juão umbeu Jesus supe:
—Inde umbuesarawaa yande yamaa yepe apigawa umburi demuniu nerera rese ape yasaisu umunya yawewaa nyãse tiyanerumuara ae.
39Maa Jesus usuaxara:
—Tepesaisu ae nyãse kua umunyawaa milagri serera rese timaa upuderi umbeu puxi serese.
40Awa tiumuruanyana yande yanerumuarate ae.
41Nyãse kua umeewaa peu arama ii yepe kupu serera rese Kristu iyaraita resewara penye, supiwa hambeu penye arama urikute kuri sikuyara.
Uxariwaita amuita umunya puxuwera
42Kua uxariwaa aintaumunya puxuwera aintasuiwara kuaita tainaita uruyariwaita purangate maa yapukuari iayura upe ita turusuwaa yamburi arama ae parana piterupi.
43Yepe ruaxara neipu uxari rame remunya puxi remunuka nesui ae, maa puranga piri rewike iwaka kiti yepe ruaxara neipu yawaite rewike infernu kiti mukuĩ ruaxara neipu irumu tata kiti tiwa uwewaa.
44Mame tiwa aintaumanu kuaita tapuru, tiyuiri uwewaa kua tata ape.
45Yepe ruaxara neipi uxari rame remunya puxuwera remunuka nesui ae, maa puranga rewike iwaka kiti yepe ruaxara neipi irumu yawaite aintaumburi inde infernu kiti mukuĩ ruaxara neipi irumu.
46Mame tiwa aintaumanu kuaita tapuru, tiyuiri uwewaa kua tata ape.
47Yepe ruaxara neresa uxari rame remunya puxuwera repikuĩ nesui ae, maa puranga arama rewike kua yaneruixawa Deus uikuwaa kiti yepe ruaxara neresa irumu yawaite aintaumburi inde infernu kiti mukuĩ ruaxara neresa irumu.
48Mame tiwa aintaumanu kuaita tapuru, tiyuiri uwewaa kua tata ape.
Mundu yukira
49Maa aintaumusembika kuri penye tata irumu muiri penye.
50Purangawaa kua yukira, usasawa rame isui isembikasawa, mayetaa maa yapuderi yaxari sembika yuiri ae? Perikute yukira perese ape perikute peiku timaarese muiri penye.
Currently Selected:
Marku 9: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
