Matye 8

Yeesu wabelusi mungë bwaasi

(Mak 1.40-45; Lik 5.12-16)

1Yeesu wusë kulumukë limoongo i mpaapë baatu bisë n'laandë. 2Mungë bwaasi kum'belëmë i wusë kufukumë fë ntwaalaandi i wutubë : « A Fumu, mooti wulizolisi, njeeyi wum'podi kun'lyomisi. » 3Wusë n'taambë kooko, kun'siimbë i kutubë : « Miinu yilizolisi, we lyoomi! » Wusë sundilë kulyoomë mu bwaasi bwaandi. 4Yeesu wusë n'kaambë : « Bilii, wulë bulilë lukuungu yi muutu ko. Kasi, yeendë we yileesi ke ngangë-Nzaambi, we vaani mpaku bunë bën'lombilë n'kaakë Moyiizë, bwiinji baatu booso bëzaabë ti njeeyi wabelukë#8.4 Lev 14.2-32..»

Yeesu wabelusi ciseelu ci n'kuluutu-mësodaadi

(Lik 7.1-10; Za 4.43-54)

5Bunë Yeesu kwe koti ku Kapelënawuumë, n'kuluutu-mësodaadi wu Loomë wusë m'belëmë i wusë n'loombë mu kun'zudi. 6Wutubë : « A Fumu, ciseelu cyaami cinuukë ku n'zo, binamë byavolë i wuke beenë mu mpasi. » 7Yeesu wusë n'kaambë : « Miinu yin'kwisë mu kum'belusi. » 8Kasi n'kuluutu-mësodaadi wusë n'vutulilë : « A Fumu, busye fwanëkënë ko njeeyi mu kukotë ku n'zwaami. Kasi vumukë vwiili cikumë cimweekë i ciseelu cyaami cim'belukë. 9Licyelikë, miinu yin'tumu ke bëkuluutu i yike yivaamë mësodaadi mu lutumu lwaami. Ningë yibe kaambë wun'viipë : “Yeendë!” Naandi kweendë. Ningë yibe kaambë wumesë : “Yiisë!” Naandi kwiisë. Ningë yibe kaambë n'dongwaami : “Vaangë ali!” Naandi kulivaangë. » 10Bunë kwayuwu bikumë obyo, Yeesu wusë ba mu liyaanji i wusë kaambë banë bëyen'laandaangë : « Licyelikë yilukaambë : miinu yimweeni vyaasi ko muutu yi ciminu ci mpilë oyo, ku Islayeelë. 11Miinu yilusisimini, mpaapë bën'fuminë ku mëselukulu më ntaangu i ku mësindulu maandi, i bën'kalë fë meesë fë cimweekë yimunë Abalaamë, Isaakë i Zakoobë ku Lwaangu lu mëyilu. 12Baanë bë Lwaangu bëm'bumu ku ngaandë ku citoombi, kunë bën'lililë i bën'kweetë meeno. »

13Yeesu wusë kaambë n'kuluutu-mësodaadi : « Yeendë, abu watuulë ciminu! » Ciseelu cyaandi cisë bëlukë mu zoolë beenë.

Yeesu wabelusi mpaapë bibeedo

(Mak 1.29-34; Lik 4.38-41)

14Yeesu wusë kweendë ku n'zo Pyeelë. Na ke takënë n'kwekisi Pyeelë wulambëmë fë ciikë. Libaawu lyabë yaandi. 15Kwan'siimbi mu kooko, libaawu lisë m'botukë i naandi wusë telëmë i wusë kun'salilë.

16Mësikë matuuci, bënatë ke Yeesu mpaapë baatu bëvwaatu ke biluunzi bibi. Mu libuungu lyaandi na wukulë biluunzi bibi i wubelusi sincyeenzu syakë syooso. 17Naandi wusë livaangë bwiinji buvangënë libuungu be lyoolyo li m'bici Ezayi : « Naandi wuboongë simpasi siitu, i wusë botulë sincyeenzu siitu.#8.17 Ezy 53.4. »

Banë bën'vwa n'ciinzë kulaandë Yeesu

(Lik 9.57-62)

18Yeesu bunë kwamoni nkoongë baatu yinenë yin'zukë, naandi kuvaanë lutumu ke bilesi mu kusabukë yaandi ku samu-simu li liyaangë. 19N'loonji n'kaakë kum'belëmë i wusë n'kaambë : « A Fumu, miinu yikulaandë fosuku fanë wun'kwendë. » 20Yeesu wusë n'cikuninë : « Mibaku yike yi mëbulu, i sinuni si yilu sike yi maanzë maawu, kasi Mwaanë Muutu wukeeli ko fo fë kunukinë i fë kuvundilë. »

21Wun'ka mu nkoongë bilaanzi kutubë ti : « A Fumu, mbiici ye ziicyoobo tataami. » 22Yeesu kun'cikuninë : « N'daandi, biikë sinvuumbi beziikë sinvuumbi syaawu! »

Yeesu wabutikë mpeemo-ngudi

(Mak 4.35-41; Lik 8.22-25)

23Yeesu wukandëmë mu bwaatu i bilaanzi byaandi kun'laandë. 24Kususukulabu, mpeemo-ngudi yipukë mu m'bu, masi nkanë makun'waalë mu bwaatu, kasi naandi tolo kulë nuukë. 25Bilaanzi byam'belëmi, bisë n'kotulë i bisë tubë : « A Fumu, tuvuuci! Twakun'fwa! » 26Naandi wusë bëkaambë : « Beeno boomë bu mbici? A bangë ciminu ciciici! » Oboobo, naandi wusë manë n'telë, kutundilë mpeemo i m'bu i n'sikë wunenë wusë ba. 27Baatu bakë booso bisë bwa libobo i bisë tubë : « Mpilë mbici muutu owo, mpeemo i m'bu bëkun'yuwulu#8.27 Twi 65.8; 89.10; 107.23-32.? »

Yeesu wabelusi baatu bwaali bëvwaatu ke biluunzi bibi

(Mak 5.1-20; Lik 8.26-39)

28Bunë kwatuuci ku samu-simu, ku lweeku lu libweeti li Ngadala#8.28 Ngadala lyabë kuve livulë li Sizwiifë, lyaawu lyabë mu kuumi kwaasu li mitakë ku waandë li mëselukulu më ntaangu ku liyaangë li Nazaleetë kaambofo li Ngalilee., baatu bwaali bëvwaatu ke biluunzi bibi bëbasikë fë meeyi bizyaami. Baawu babë bubaalu, muutu ve wulëpodi kuvyokilë mu nzilë be yooyi. 29Baawu bisë losukë : « Njeeyi mbi wun'toombë ke beeso, a Mwaanë Nzaambi? Njeeyi wakwiisë mu kutunyokulë ntaangu kufwaanë mpe? »

30Fisë ba mwa n'takë, n'kaangu singulu#8.30 Mak 5.11. wulë ke toombaangë ndiiwu. 31Biluunzi bibi bisë bondililë Yeesu : « Ningë njeeyi wun'toombë kutukulë, tufili mu n'kaangu singulu osyo. » — 32Naandi wusë bëkaambë : « Yendaanu! » Baawu bisë basikë i ke kotë mu singulu. Mëlengë-lengë, n'kaangu wooso wusë nengëmukë libiindu kusuundilë ke yifwaangë mu m'bu i baawu bisë fwa mu masi. 33Banë bëlëlikilaangë singulu kutiinë i bisë kweendë ku livulë, ke lëlë saangu mu makë mooso i mo mëmonikinë bo bëvwaatu ke biluunzi bibi. 34Livulë lyooso lisë kubasikë mu kudyengënë Yeesu. Abu bam'moni, baawu kum'bondililë, bwiinji kutabilë cinaanu yi mitotwaawu.

Currently Selected:

Matye 8: NTVIL

Highlight

Copy