Banɔkpɛkpɛ Axɔ̃ɛ 17
17
Paulo Avɛ Tesalonika
1Gɛ bagã edi yi nɛ Amfipoli nɛ̀ Apolonia nɔ, bebe yi nɛ Tesalonika, ɛkɛlɛ Yudanɛ ɔtsyɔakɔ toli ɔzã. 2Kɛlɛ asɛ gɛ abhɛtɛɛ ana, Paulo avɛ ɔtsyɔakɔ, kɛlɛ nɛ Emoelewui tata abhaa, azagã Owusoso Akaa ebuiɛ mɛ nɛ alɛ, 3pɛ ezebu ebui mɛ pɛ ebu akasɛ asɛ kɛlɛ ɔsɛ Yesuɔ amɔ bɔtɔ flogo tɛ̀ befeke yɛ edenɔ bekpuɔ mɛ. Aɖɔ asɛ, “Yesu alɛ gɛ yɛibuiɛ mɛɖɔɔ yɛenu Kristoɔ. 4Kesilulũ abakɔ Yudanɛ teli kɛlɛ betsyina atɔnɔ Paulo nɛ̀ Sila, kidzo ɛlɛ nabha Helanɛ kpekpèɛ teli gɛ besi Owusoso Akaa nɛifùɔ ɔlɔkɔ ɔplɛnɔ ɛzãkɔ elete gɛenu badzɛ kpekpèɛ tsyɛ abhɛtɛ ɛlɛ ana.
5Pɔ kabhã wɔawlɔakɛ afala eku Yudanɛ teli mɛ, kliso bagbana banɔ kpa teli nɛ kedziɛ mɛ pɛ babhɛtɛ kɛza tili gɛ ɔmɔpɔɛ ɔzã balɛ mɛ, pɛ badɛkpɛ kititì lɔlɔ esi nɛ ɔmamɛ. Bebu tɛtsɛɖɛmɛ avɛnɔ Yason bɔpã mɛ tɛ̀ badɛpɛɛ Paulo nɛ̀ Sila tɛ bagbana alɛ amana banɔɛza ɔkɔ. 6Pɔ gɛ bagɛ damɔ alɛɛ, bagbana Yason nɛ̀ ɔhamɛanɛ teli amana balɛ banɔ gbagbla namɛ nɛ̀ ozĩ kpɛkpɛ asɛ, “Banyɛ alɛ gɛ bamana buluhũ nɛ kanɔ nɔ̀ petee mɛ tsyɛ atɛba ɛkɛlɛ, 7kɛlɛ Yason ayɛkɛ balɛ akpɛ yɛɔpã mɛ. balɛ petee etso Kaizaro Klauda yɛɔshaa, pɛ baaɖɔ asɛ ekusi bhlatɔ alɛ gɛ bekulu yɛasɛ Yesu yɛenu ekusiɛ.” 8Gɛ belũ kibui ɛlɛ, ebela ebeku banɔɛza nɛ̀ ɔma banɔ gbagbla nɛishi. 9Kɛlɛ bakɔ Yason nɛ̀ banɔ gɔgɔɛ abhɛ kɛlɛ bashɛnɛ ahɔɛ nɛ balɛishu.
Paulo Avɛ Beroea
10Gɛ keliɛ ebele koɔ, badzya akpɛ Paulo nɛ̀ Sila nɛ Beroea. Gɛ bediku ɛkɛlɛ, bavɛ Yudanɛ ɔtsyɔakɔ. 11Otsi nɔ Beroeanɛ bezhinì balɛ ishu esi ɔdɛ Tesalonikanɛ, ɔmɔsɛ bayɛkɛ kibuiɛ nɛ̀ samè kɛlɛ bazapɔɛ kɛlɛ mɛ kiwui nyiɛ wui tɛ̀ beɖi asɛ kibuiɛ gɛ Paulo aɖɔ kpasɛ kɛlɛ mɛ ana dza. 12Yudanɛ kpekpèɛ ayɛkɛ aŋã, kana ɛzãkɔ elete gɛenu Helanɛ badzɛ nɛ̀ ɛzakɔ elete banyɛ tsyɛ ayɛkɛ aŋã.
13Kibeɛ gɛ Yudanɛ gɛ alɛ Tesalonika elũ asɛ Paulo aɖɔ Owusoso Akaa nɛibuiɛ nɛ Beroea nɔ, bavɛ ɛkɛlɛ tsyɛ, kɛlɛ badaakpɛ ebelà nɛ balɛishi. 14Odunu ɔlɛ badzya akpɛ Paulo asɛsɛ aƒuɔ shu, pɔ Sila nɛ̀ Timoteo xɔnɔ azã Beroea. 15Banyɛ gɛ bagbana Paulo evunɔɔ agbana yɛ avɛnɔ Atene kɛlɛ Paulo akɔ banyɛ ɔklasɔ̃ asɛ tɛ̀ betseɖe Sila nɛ̀ Timoteo asɛ tɛ badɛ taplɛnii odunu ɔlɛ.
Paulo Avɛ Atene
16Kibeɛ gɛ Paulo ezepo Sila nɛ̀ Timoteo nɛ Ateneɛ, kɛbà tɔɖɔ yɛabha gɛ amɔ asɛ ibudi yuku ɔmamɛ. 17Kliso ababhɛtɛ ekpeɖekpeɖe mɛ nɛ̀ Yudanɛ nɛ ɔtsyɔakɔ. Ɔplɛnɔ Helanɛ gɛesi Owusoso Akaa nifùɔ nɛ̀ bagɛ azã budziɛ mɛ kiwui nyiɛ wui ɔlɔkɔ nɛ̀ bagɛ alɛ ɛkɛlɛ. 18Epikoroanɛ teli gɛ beshogò ishu ɔplɛnɔ Stoanɛ teli gɛenu bebutìnɛ abakpà kibui wlɔãkɛ nɛ̀ Paulo. Balɛ mɛ beteli ezebisi yɛasɛ, “Kinuvɔ ibui ɖuwoe idi yɛaɖɔ ana?” Bagɔgɔɔ tsyɛ aɖɔ asɛ, “Abhɛtɛ asɛ aɖɔaɖɔ tɛ alɔkɔ ebu amadi bhlatɔ ibudi ulũ nɔ.” Baɖɔ kibui ɛlɛ ɔmɔsɛ Paulo azaɖɔ kibui gbangbã nɛ Yesu shu, nɛ̀ tɛlɔlɔ odenɔ bekpuɔ mɛ shu. 19Kɛlɛ bagbana yɛ amana Areopago besheshèɛ kɛtakpu ɔtɔ̃kɔ toli, ɛkɛlɛ betseɖe yɛasɛ, “Ɔtɔɔkɔ buti kibui tili odenɔ bɔdɔ̃ kakasɛ vɔvɔlɛ gɛ bɔlɛishu wɔɖɔ kaɖɔ dzã? 20Ɔmana ebui teli gɛ bɔkà lũɖi ɔbɔkpɛ bɔlɔ atɔ̃mɛ, kɛlɛ bɔpɛ ɔsɛ tɛ̀ bulũ alɛ esi.” 21(Atenanɛ nɛ̀ befùɔ petee gɛ azã ɛkɛlɛ agɛza lɔkɔ balɛ kibeɛ abhɛtɛ kɛnanà nɔ ɔdɛ tɛ̀ baɖɔaɖɔ tɛ̀ bataatɔ̃ nɔ nɛ̀ ebuivɔvɔ alɛ gɛ beluɔ.)
22Paulo aba lɔɛtití nɛ beshesheɛ kɛtakpu ɔtɔ̃kɔ pɛ aɖɔ asɛ, “Atenanɛ banyɛ, ɛmɔsɛ kɛtakpu esi kpɛkpɛ kpasɛ wɔnɔ mɛ̀ nɛ kawɔ̃pɛ ka nyia ka. 23Ɔmɔsɛ kibeɛ gɛ ɛgã fala pɛ iɖi bɔdɔ̃ɔ gɛ nɔkpɛ kɛtakpu esi ɔkɔɔ, ɛmɔ bɔdɔ̃ ɔpɔɛkɔ toli gɛ bafɔnɔ atɔɖɔ asɛ, akaa gɛ butinyiɛ ɔdɔ̃ ɔpɔɛkɔ. Otsiɛ kɛdɔ̃ gɛ nɔkpɛ kɛtakpu esi ɔkɔ pɛ nɔotinyi kɛlɛ, ɛba ɖɔaɖɔ nɛ kɛlɛ shu ɔkɔ wɔnɔ.
24“Owusoso Akaa gɛ abhɛtɛ kanɔ nɔ̀ nɛ̀ kɛka nyia ka nɛ kalɛ mɛ yɛenu Apalete akɔ kititiɛ nɛ̀ kesiakpa kɛlɛ atɛzã okulukɔ gɛ babhɔ nɛ̀ anɔdzyrame ahɔɛ. 25Kɛlɛ gɛnɛ anɔdzyrame ahɔɛ balɔkɔ akpɛ kɛtakpu esi akɔɛ nɔ, asɛ gɛ onupɛ apɛ kɛdɔ̃ tili ana, ɔmɔsɛ yɛakɔ banɔdzyrameɛ petee ɛkpã, ɔfɔfuĩa nɛ̀ kɛka nyia ka. 26Gana anɔ tenikpo mɛ yɛabhɛtɛ banunɔ petee nɛ̀ amadiɛ, sɛ tɛ̀ beyuku kanɔ nɔ̀ mɛ petee. Kɛlɛ yɛatɔɖɔ kibeɛ kɔ alɛ nɛ ɔkɔ nyia ɔkɔ gɛ babazã shu. 27Owusoso Akaa abhɛtɛ kibui ɛlɛ asɛ tɛ banɔ apɛ yɛidzo tɛ̀ bamɔɛ, pɔ gɛnɛ gɛ alɛ odzlolo ɔkɔ nɛ bɔlɔ ɔmayɛmɛ nanà ɔbha flogo. 28Asɛ kana gɛ bagɛ bafatɛ ɛdzɛ nɛ wɔnɔ ɛshiɛ aɖɔ asɛ, ‘Ɔmɔsɛ yɛmɛ bɔlɛ nɛ̀ ɛkpã pɛ bɔfalà pɛ bɔlɛ ishu ahɔɛ mɛ.’ ‘Yɛmɛ bude koeyì.’
29“Klisoɔ gɛ Owusoso Akaa mɛ bude koeyiɛ, kɛma ɔsɛ tɛ buziɖi ɔsɛ ɔfɔfuĩa mɛ anɔ nɔ̀ edzi asɛ sikãɛkpã, sikãfufu alo kɛklagbu ana, bɔdɔ̃ tata gɛ anɔdzyrame alɔkɔ yɛahɔɛ abhɛtɛ nɔ. 30Kuku ibeɛ, Owusoso Akaa ezedzini awɔ̃ atɔɖɔ ebui alɛ gɛ noɔtinyiɛ nabha, pɔ otsiɛ xɔnɔɔ akpɛ ɔsha akɔ aka nyia aka asɛ betsyina nɛ balɛ etúɔ mɛ. 31Ɔmɔsɛ atɔɖɔ kiwuiɛ gɛ ebekulu kebhu nɛ̀ kanɔ nɔ̀ mɛ petee nɛ̀ kebhuɔ gɛ kalɛ alɛ ɔzãkɔ ɔgana anunɔ gɛ yɛabha yɛatɔɖɔ ahɔɛ. Ebu kibui ɛlɛ akasɛ banunɔ petee ɔgana yɛ tifefeke odenɔ bekpuɔ mɛ shu.”
32Gɛ belũ kibuiɛ odenɔ bekpuɔ tɛlɔlɔ shuɔ, beteli amɔ̃ɛ yɛ, pɔ bagɔgɔ xɔnɔ aɖɔ asɛ, “Bɔpɛ ɔsɛ buwlui lũ wɔ kaɖɔ ɖɔɖɔ nɛ kibui ɛlɛ shu kidegba.” 33Kɛlɛ Paulo abashɛ nɛ kazãa ɔbha. 34Banɔ bhlui teli ebedzi Paulo yiedeazazã kɛlɛ bayɛkɛ aŋã. Balɛ mɛ banɔ nɔ teli balɛenu, Dionisio gɛenu Areopago yɛ kɛtakpu ɔtɔ̃kɔ anɔ, nɛ̀ adzɛ teli tsyɛ gɛ bezekulu yɛasɛ Damaris nɛ̀ banɔ kasasà tieli.
Currently Selected:
Banɔkpɛkpɛ Axɔ̃ɛ 17: nyb
Highlight
Share
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
