Banɔkpɛkpɛ Axɔ̃ɛ 26
26
1Kɛlɛ Agripa etseɖe Paulo asɛ, “Kidzo lɛ kɔwɔ ɔsɛ tɛ̀ ɔɖɔ kaɖɔ obù wɔshu ulũ nɔ̀.” Kliso Paulo ebú yɛɔhɔɛ akasɛ pɛ akpà yɛishu ulũ bú asɛ, 2Ekusi Agripa, ɛmɔsɛ mɛtakpu pɛ̃, gɛ ɛlɔɛtití nɛ wɔamɛ oboɔ, pɛ ibù mɛishu ulũ nɛ ebuiɛ petee gɛ Yudanɛ alɔkɔ ebhui mɛulũɔ nɔ shu, 3ɛɖɔ anà ɔmɔsɛ, onyi Yudanɛ ɛkɔɔ piapii nɛ̀ ebui nɔnɔ gɛ alɔɛtití nɛ ɛlɛ shu. Klisoɔ, ɛkɔwɔ kɛtakpu ɔsɛ tɛ̀ olù kitu esi tɛ̀ olũ mɛ kibuiɛ.
4“Yudanɛ petee enyi kana gɛ ɛzanà mɛkpã odenɔ mɛ kinuvɔbè gɛ ɛkpɛ mɛkpã esi, nɛ mɛ kesiakpa nabhaa nɛ̀ Yerusalemuɔ tsyɛ. 5Benyi mɛ kibè dzlolo nɛ ɛlɛ, kɛlɛ babalà aɖɔaɖɔ adalɛ kɛlɛ shu, onupɛ badɛmɛ, sɛ idzì Farisieyi, banɔ gɛ bagagalĩ nɛ ɔshaa gɛ̀ ɛlɛ kpà plɛnɔ bɔlɔ ɛkɔɔ shuɔ mɛ. 6Kɛlɛ otsiɛ nɔ, kidzoɔ mɛ gɛiɖi ɔkɔ kɛgɛ Owusoso Akaa atɔɖɔ elú akɔ bɔlɔ akaalɛ sopɛ beekulu kebhu nɛ̀ mɛ oboɔ. 7Kibui tɔtɔɖɔlu ɛlɛ shù, bɔlɔ egbogbo lɔfɔ nɛ̀ taabha eɖì kidzo mɛ ɔsɛ kɛbà ba ɛlɛ mɛ sopɛ baakpɛ kɛtakpu esi akɔ Owusoso Akaa kemuze nɛ̀ elishi. O Ekusi, kibui ɛlɛ gɛ buɖì kidzo mɛ kɔ sopɛ Yudanɛ alɔkɔ kibui nɛ mɛishu. 8Kiɖeso pɛ kɛlɛ ɔsɛ wɔnɔ ɔmayɛmɛ teli, akɔ ɛlɛ kɛsɛnɛ ibui ɔsɛ Owusoso Akaa efeke bekpuɔ?
9“Mɛtsyɛ kibui ɛlɛ gɛikù mawɔ flogo, kliso ɛbhɛtɛ kɛka nyia gɛ ɛbalà tɛ ɛlɔɛtití nɛ Yesu Nazaretieyiɛ shu. 10Kibui ɛlɛ mɛzɛ bhɛtɛ nɛ Yerusalemuɔ. Ɔganà banɔlũazazã gbagbla nabhaa, ɛkpɛ banɔ dadalɛ gelee nɛ ɔɖavũ mɛ, kɛlɛ gɛ bezeyi alɛ, ɛzɛ tɔɖɔ ahɔɛ nɛ kɛlɛ abha. 11Ewuimɛ ewuimɛɛ, ɛlɔ odenɔ ɛtsyɔakɔ ɔvɛnɔ ɛbhlatɔ ɔsɛ tɛ bapɔ̃ batɔ̃ akɔ alɛ, kɛlɛ izitũilɛ kpɛ balɛulũ asɛ tɛ̀ baɖɔ ebusoebui. Mɛ ɔmɔpɔɛ nɔ nɛ balɛishu soɔ, ɛtɔnɔ baliede vɛ amadi bhlatɔ tsyɛ mɛ.
12“Nɛ kidzo ɛlɛ tinikpo gagã mɛɛ, ɛzã kidzo mɛ ɛvɛ Damaskoɔ nɛ banɔlũazazã gbagbla ɔsha kɔkɔ ulũ. 13Oo, ekusi asɛ ɛɖàtata lɔfɔ nɛ̀ tɛbha mɛ anaa, gɛ itsiɖi kidzo nabha vɛɛ, ɔmɔ kifù odenɔ kititiɛ gɛ kitsè dɛ kiwuiɛ, pɛ kɛba kanà mɛ nɛ̀ mɛɔbhia alɛ. 14Bɔlɔ nyɔ̃ɔ wɔlɛdɔ kesiakpa, kɛlɛ ilũ kaɖɔ tieli gɛ ketseɖe mɛ ebuiɛ nɛ Aramaik buluhũɔ mɛ asɛ, ‘Saulo, Saulo, kiɖe sopɛ ɔtɔnɔ miede ana? Abagagalĩ akɔwɔ tɛ ɔlɔkɔ wɔtsɛɖɛ tá ɔɖà tsɔtsɔ̃.’
15“Kɛlɛ mɛibisi ɔsɛ Apalete, wɔonu afana?’
Apaleteɛ ebuiliulũ asɛ, ‘Mɛinu Yesu, anɔ gɛ yiede wɔtɔnɔɔ.’ 16‘Otsi alɛ lɔzã wɔɛtsɛɖɛ abha. Ibu mɛishu kasɛ wɔ, ɔsɛ tɛ̀ ibu wɔ asɛ axɔ̃ɛdɛ, nɛ̀ asɛ anɔ gɛ abaɖɔaɖɔ, nɛ kɛgɛ wɔmɔ nɛ mɛishuɔ, nɛ̀ kɛgɛ ɛzɛbà bùkasɛ wɔ shu. 17Ɛbà yɛkɛ akɔwɔ odenɔ wɔanunɔ, nɛ̀ bagɛ betinu Yudanɛ ahɔɛ mɛ. Ɛɛkpɛ̀ wɔ nɛ balɛ ɔkɔ 18tɛ̀ ɔkpà balɛ awuhũɔ, tɛ̀ otsyinà alɛ odenɔ otumũ mɛ̀, ɔmana kanɔ dadalɛ mɛ̀, nɛ̀ odenɔ Satana yɛohumi ahɔɛ mɛ̀, ɔmana Owusoso Akaa ɔkɔ. Sɛ tɛ̀ balɔkɔ ebui kpa etsye alɛ, tɛ̀ bamɔ ɔzãkɔ nɛ bagɛ badalɛ balɛ ishu ɔganà mɛabha tɛyɛyɛkɛŋã mɛ.’
19“Kliso nɔ̀, Ekusi Agripa, ɛgɛ gagalĩ batɔ̃mɛ nɛ kibuiɛ gɛ bebu akasɛ mɛ odenɔ kititíɛ shu. 20Iputɔ dɛ bagɛ alɛ Damasko ɔkɔ, kɛlɛ ɛbavɛ Yerusalem nɛ̀ Yudea petee, nɛ̀ bagɛ betinu Yudanɛ ɔkɔ tsyɛ, ɛɖɔ kibuiɛ tseɖe balɛ ɔsɛ̀ tɛ betsyina avɛ Owusoso Akaa ɔkɔ, tɛ̀ bakasɛ balɛ tìtsyitsyina ɔganà ebui bhɛbhɛtɛ mɛ. 21Kibui ɛlɛ shu sopɛ Yudanɛ evũ mɛ̀, nɛ Akaavũɔ shu, pɛ bapɛ asɛ tɛ̀ beyì mɛ. 22Pɔ Owusoso Akaa aplɛnɔ mɛ, oboyinɔ obo kiwui ɛlɛ abha, kliso ɛlɔɛtití nɛ ɛkɛlɛ pɛ ɛdalɛ ebui mɛ ɔkɔ bunɔ bhlui bhlui nɛ̀ behohoeɛ petee shɔshɔɛ. Ɛtɛɛɖɔ kibui nanà falanɔ kɛgɛ ebuiɖɔluanɛ nɛ̀ Mose aɖɔ elúɔ asɛ kɛbàba ɛlɛ mɛ shu, 23sɛ Kristoɔ abamɔ bɔtɔ, kɛlɛ asɛ anɔ gɛiputɔ gɛ abàlɔ edenɔ bekpuɔ nɛishi, abaɖɔ kanɔ mɛ dadalɛ ɛbui etseɖe yɛanɔ nɔ̀ nɛ̀ bagɛ betinu Yudanɛ.”
24Gɛ aɖɔaɖɔ eku ɛkɛlɛ, Festo abaɖɔaɖɔ ebhui Paulo kibuiɛ nulũ. Akpɛ ozĩ asɛ, “Paulo, ɔma piapii, wɔ bɔdɔ̃ gbagbla tɛkpakpasɛ pɛ sɛ kɔ wɔamɛ ezĩ.”
25Paulo ebuiliulũ asɛ, “Mamɛ etiezĩ, bɔlɔ Ekusi Gbagbla Festo, kibuiɛ gɛ ɛɖɔɔ, nu kibui gbã kɛlɛ kesilulũ alɛ kɛlɛ mɛ. 26Ekusiɛ enyi ebui alɛ, kɛlɛ ɛbalà ɖɔ kaɖɔ nɛ alɛishu kɔɛ fãa. Inyi sɛ ebui alɛ ɔmayɛmɛ nanà ama matì mati mɛ ɔkɔɛ, ɔmɔsɛ batɛ abhɛtɛ alɛ nɛ okpukpũ ɔkɔ. 27Ekusi Agripa, ɔyɛkɛ ebuiɖɔluanɛ nabha aŋã dza? Inyi sɛ ɔyɛkɛ ɔŋã.”
28Kɛlɛ Agripa ebisi Paulo asɛ, “Ɔyɛkɛ ɔŋã asɛ nɛ kibè gulũi ɛlɛ mɛɛ, ɔbɔlàwɔɛ mɛulũ pɛ ɛbàdzi Kristoeyi dza?”
29Paulo ebuiliulũ asɛ, “Kibeɛ dzi gulũio kizidze tsyɛ elo, itikulù Owusoso Akaa ɔkɔ wɔ ete, pɔ ikului ɔkɔ bagɛ ataatɔ̃ nɛ̀ mɛ oboɔ petee ɔsɛ tɛ bazã asɛ mɛ ana, pɔ batɛ̀kpɛ̀ ɛɖahui ɛlɛ nɛ balɛ xɔnɔ shu.”
30Ekusiɛ alɔ, yɛ nɛ̀ kɛmadì ekusiɛ nɛ̀ Bernike ɔplɛnɔ bagɛ bazã ɛkɛlɛ aplɛnɔ alɛ. 31Bekoeyì nɛ buvũɔ mɛ, kɛlɛ gɛ bazaɖɔaɖɔ nɛ̀ bagɔlɔ mɛɛ, baɖɔ asɛ, “Anyɛ alɛ atɛ abhɛtɛ kibui nanà gɛ shɔnɔ ɔkɔ butsí alo ɔɖavũmɛ zazã.”
32Kɛlɛ Agripa etseɖe Festo asɛ, “Pɛ otɛɔsɛ anyɛ alɛ agɛ vɛnɔ kibuiɛ nɛ Romanɛ Ekusi Gbagbla ɔkɔɔ, tsyɛalo bɔtà shɛnɛ ahɔɛ nɛ yɛishu.
Currently Selected:
Banɔkpɛkpɛ Axɔ̃ɛ 26: nyb
Highlight
Share
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
