Banɔkpɛkpɛ Axɔ̃ɛ 27

Paulo Agã Kelĩabha Kidzo Avɛ̀ Roma

1Kibeɛ gɛ bebhui kibui mɛ ɔsɛ bɔbàgã kelĩabha kidzo ɔvɛ Italia nɔ̀, balɔkɔ Paulo nɛ̀ ɔɖavũmɛ azazã anɔ teli kpɛ ahɔɛ akɔ keyuiza anɔ gbagbla gɛ alɛ buyuadɛdɛ akpã ulũ pɛ bezekulu yɛasɛ Yulio ahɔɛ mɛ, anɔ gɛ ewuli akà kpasɛ keyuiza ovolo toli mɛ. 2Buku kelĩabhaohu odenɔ Adramiteo, ɔsɛ tɛ̀ bɔgã aƒuɔ ogbogboɔ nɛ kelĩabhahuɔ ɔtɔkɔ gɛlɛ Asia bɔdɔ̃ mɛ, kɛlɛ bɔbàlɔ tɔnɔ aƒuabha idzoɔ. Aristaxo gɛenu Makedonia eyì gɛede Tesalonika tsyɛ azã aplɛnɔ ɔlɔ.

3Gɛ keliɛ azaa, budizhi nɛ Sidon, kɛlɛ Yulio abhɛtɛ ɛyamɛ gbangbã akɔ Paulo, kɛlɛ akɔ yɛidzo asɛ avɛ yɛɔbhia alɛ ɔkɔ tɛ̀ bakɔyɛ kɛdɔ̃ nɔnɔ gɛ apɛɛ nɔ̀. 4Denɔ ɛkɛlɛ, bɔzɛlɔ tɔnɔ kelĩabha kidzoɔ kɛlɛ aƒuilɛ nɔ lɔkɔ ɔlɔ ɔvɛnɔ Kipro ogbogbòɔ ɔmɔsɛ aƒuilɛ nɔ̀ yalɛ̀ bɔlɔ. 5Gɛ bɔgã tsakɛ aƒuɔ gɛ akpasɛ Kilikia ogbogbò ibeɛ nɛ̀ Pamfilia nɔ̀, budizhi nɛ Mira gɛ akpasɛ Likia mɛ. 6Ɛkɛlɛ keyuiza anɔ gbagbla amɔ Aleksandro kelĩabhaohu gɛ lɔvɛ Italia, kɛlɛ akɔ bukù ɔlɛ. 7Bɔgã kidzoɔ kɛbɔɛ ɛbɔɛ nɛ ewui gelee mɛ kɛlɛ bɔmɔ bɔtɔ flogo pɛ̀ budiku Knido. Gɛ kɛlɛɛ fufùɔ gɛkɔ bɔlɔ kidzò ɔsɛ tɛ̀ bɔvɛ̀ otugbàa, bɔgã Kreta aƒuɔ ogbogbòɔ gɛ lotsyinà kede ɔkpɛ Salmoniɛ. 8Bɔgã ogbogbò ɔlɛ nɛ bɔtɔ̀ mɛ, kɛlɛ budiku ɔkɔ toli gɛ bekulu asɛ, Ɔtsɛkɔ Gbangbã gɛ lotsò ɔplɛnɔ Lasea ɔmãa.

9Butizĩ kibè bafala nɔ, kɛlɛ kelĩabha idzo gagã tsyɛ zikuifù, ɔmɔsɛ olugbũ nyanyã gɛonu Tɛdɔdɔfala Kiwuiɛ tɛfala. Kliso Paulo akpɛ ɔshà akɔ alɛ asɛ, 10“Baanyɛ mɔ, ɛmɔsɛ bɔlɔ kelĩabha kidzogagã ɛlɛ bamanà buluhũ, kɛlɛ bɔlɔ kelĩabhaohuɔ, etukuɔ, nɛ̀ bɔlɔ ɛkpã tsyɛ bazĩ.” 11Pɔ keyuiza anɔ gbagbla, gɛ agɛ pɛ asɛ tɛ̀ elũ Paulo ibuiɛ soɔ, avɛ edilũ agɛ yɛegè kelĩabhaohuɔ nɛ̀ ɔlɛ elete nɛibuiɛ. 12Gɛ kelĩabhaohuɔ ɔtsɛkɔ ɔtɛpɛ̃ nɛ ekukù mɛ soɔ, banɔ kpekpèɛ abadɛmɛ atɔɖɔ ɛlɛ abha sɛ bɔvɛ kidzoɔ tɛgagã nabha, kɛlɛ buziɖi kidzo mɛ ɔsɛ tɛ̀ budiku Foenike tɛ̀ bɔzã ɛkɛlɛ nɛ ekukùɔ mɛ. Ɛkɛlɛ onù kelĩabhaohu ɔtɔkɔ nɛ Kreta gɛ obu bamɛ ɔkpɛ kanɔ nɔ̀ bɔpialɛ gɛɔvɛ kiwuiɛ ɔdɔkɔ ɛbé nɛ̀ kanɔ nɔ̀ bɔpiabha ɔkɔ gɛɔvɛ̀ kiwuiɛ ɔdɔkɔ ɛbeɛ.

Kɛlɛɛ Gagalĩ Tifufù

13Gɛ kɛlɛɛ gidè kanɔ nɔ̀ bɔpialɛ ibeɛ kpɛ tifufù esi kɛbɔɛ ɛbɔɛ nɔ, abhɛtɛ balɛ xɔnɔ asɛ bamɔ kɛgɛ bapɛ̀ɛ nɔ̀, klisoɔ bebú ɔɖaa gɛ lɔnyanà kelĩabhaohuɔ kɛlɛ bɔgã kelĩabha kidzoɔ ɔvɛ̀ Kreta ogbogbòɔ. 14Kibè gulũi tili edeɛ, kɛlɛɛ gagalĩ tili gɛ bekulu asɛ, “Kɛlɛɛ nɔ gide kanɔ nɔ̀ bɔpiabha ɔkɔ gɛɔvɛ kiwiɛ otukɔ, “kɛyalɛ̀ odenɔ Kreta aƒu ketukpɔ nabha. 15Kɛlɛɛ nɔ vũ kelĩabhaohuɔ kɛlɛ lɔzɔkɔ̀ làvɛ otugbà kliso bashɛnɛ ahɔɛ nɛ ɔlɛ shu pɛ kɛlɛɛ nɔ̀ gbana ɔlɛ̀ vɛnɔ. 16Gɛ bɔdɛ falà nɛ ogbogbò tolì nɛ aƒu kesiakpa gɛ bekulu asɛ Klauda shuɔ, abagagalĩ akɔ bɔlɔ flogo pɛ bɔbà kpakà ɛkpã ohu ɔlɛ. 17Gɛ banyɛ akpakà ɔlɛ elu ebekeɛ, baganà ihuiɛ nɛ kelĩabhaohuɔ niesi pɛ banyana ɔlɛ evunɔ. Gɛ kifù sisi zã ɔsɛ ayisɛ ebevũ ɔlɛ nɛ Libia soɔ, beboele ɛɖaa gɛ kpakà kelĩabhaohuɔ, pɛ kɛlɛɛ nɔ̀ gbanà ɔlɛ vɛnɔ. 18Kɛlɛɛ fufùɔ hɔhɔlɛ bɔlɔ gɛ akɔ asɛ gɛ keliɛ abazaa, bakpà etukuɔ ebú atɛɛ akpɛ aƒuɔ mɛ. 19Nɛ kiwui tramɛ nabhaa, bebu ɛɖaa nɛ̀ ihuiɛ gɛ nyanà kelĩabhaohuɔ ovunɔɔ atɛɛ akpɛ aƒuɔ mɛ nɛ̀ balɛ ahɔɛ. 20Gɛ kiwuiɛ nɛ̀ awɔɛɛ etikekoeyì nɛ ewui gelee mɛ pɛ kɛlɛɛ nɔ̀ pɔ kafùɔ, bɔgaɖi idzomɛ ɔsɛ bɔbà zã nɛ̀ ɛkpã.

21Gɛ banyɛ agɛŋã bɔdɔ̃ nɛ ewui gelee mɛ nɛ kɛlɛɛ nɔ gifùɔ shu soɔ, Paulo abalɔɛtití nɛ balɛishi pɛ aɖɔ asɛ, “Banyɛ mɔ, nɔotolũ mɛibuiɛ gɛ ɛɖɔ ɔsɛ tɛ butì gè kelĩabhaohuɔ nɛ Kreta nɔ̀, tsyɛ alo bɔtɔ ɔlɛ̀ nɛ̀ bɔdɔ̃ gizĩ kɔ ɔlɔ gɛtà ba ɛlɛ mɛ ana. 22Pɔ otsiɛ nɔ ɛɛkpɛ wɔnɔ kemì ɔsɛ tɛ̀ nɔkpɛ kité, ɔmɔsɛ wɔnɔ ɔmaɛyɛmɛ nanà ɛkpã tɛbà yala, kelĩabhaohuɔ ete ɔlɛ obozĩ. 23Kivũɔ elishiɛ, Owusoso Akaa axɔ̃ɛdɛ teli gɛ ɛkpɛ kɛtakpu esì ɔkɔɔ ebu yɛishu akasɛ mɛ 24pɛ aɖɔ asɛ, ‘Paulo, tɛosi kifù. Kɛlɛ ɔsɛ ɔbà kebhu mɛ nɛ Romanɛ Ekusi Gbagbla namɛ, kɛlɛ Owusoso Akaa etibhui wɔnɛ bagɛ nɔgã kelĩabha kidzoɔ ɛkpã ebú.’ 25Kliso banyɛ mɔ, nɔzã kitè kpɛkpɛ nabha, ɔmɔsɛ ɛyɛkɛ Owusoso Akaa nabha ɔŋã ɔsɛ kɛbà ba ɛlɛ mɛ asɛ kana gɛ etseɖe mɛ ana. 26Pɔ, kɛlɛɛ nɔ̀ bafù bɔlɔ ɔvɛnɔ aƒu kesiakpa tieli abha pɛ aƒumɛ ayisɛ ebevũ bɔlɔ.”

Kelĩabhaohuɔ Tɛyɛyɛ̀ɛ

27Nɛ ɛgɔnɛ tɛbha mɛɛ, kɛlɛɛ nɔ̀ kafu bɔlɔ vɛnɔ, odzinì ɔmanà nɛ aƒu nɛishitɛbhà, asɛ elishi teti flogo pɛ bagɛ balɛ egè kelĩabhaohuɔ abamɔ asɛ beetso aplɛnɔ kesiakpa. 28Batɛɛ ohui tolì gɛ ɔɖa kpasɛ ɔlɛ ulũɔ kpɛ kelĩɛ mɛ kɛlɛ bamɔ asɛ, kalɛ tidzudzuɔ mɛ lɛ asɛ bɔtsɛɖɛkpɔ kɛkpã zɛzɛ nɛ̀ afɛtaabha ana. Kɛlɛ nɛ kibè gulũi edeɛ bazata ɔɖaihui nɔ akpɛ kɛlɛ bamɔ asɛ tidzudzuɔ mɛ lɛ bɔtsɛɖɛkpɔ afɛetezhita ana. 29Gɛ kifùsisi zã ɔsɛ bɔbàdɛ yalɛ̀ ɛxɔa soɔ, batá ihui tɛlɛ̃ɛ gɛ kpakà kelĩabhaohuɔ vunɔɔ akpɛ keliɛ mɛ kɛlɛ buzikulu kititiayɛ asɛ akɔ tɛ̀ kelìɛ aza nɛ̀ ɔlɔ. 30Gɛ bazabhɛtɛ asɛ tɛ̀ ebù tɛtsɛɖɛ mɛ ekoeyì nɛ kelĩabhaohuɔ mɛ soɔ, kelĩabha adɛdɛ akɔ kelĩabhaohuɔ ozhiku aƒuɔ mɛ kesiɛ, babhɛtɛ kɛlɛ asɛ gɛ onupɛ babàta ihuiɛ gɛ lɛnyanà kelĩabhaohuɔ vunɔɔ ɔganà kelĩabhaohuɔ otugbà ɔkɔ ibeɛ akpɛ̀ kelĩɛ mɛ ana. 31Kɛlɛ Paulo etseɖe keyuiza anɔ gbagbla nɛ̀ buyuadɛdɛ asɛ, “Odiyinɔ̀ ɔsɛ banyɛ alɛ azã kelĩabhaohuɔ mɛɛ, bɔtɛ bazã nɛkpã.” 32Klisoɔ, buyuadɛdɛ ebhuĩ ihuiɛ gɛ nyanã ɛkpã ohuɔ vunɔ kɛlɛ lozhioku keliɛ mɛ.

33Flogo tɛ̀ olizatɔ ɔbɔnaa, Paulo akpalà balɛ nyɔ̃ɔ asɛ baŋã bɔdɔ̃. Etseɖe alɛ asɛ, “Ɛgɔnɛ tɛbhà nɛɛlɛ gɛ ɔwɔ̃nyɔnɔ ɔzã wɔnɔ mɛ pɛ nɔkɔ ɔŋã bɔdɔ̃, nɔgɛŋã kɛdɔ̃ nanà. 34Otsi alɛ ɛkpalà wɔnɔ ɔsɛ nɔŋã bɔdɔ̃ tɛ̀ nɔzã nɛ̀ ɛkpã. Wɔnɔ maɛyɛmɛ nanà kɛtakpu tɛkã tinikpo tsyɛ tɛbà yalà odenɔ yɛtakpuɔ.” 35Gɛ aɖɔ kibui ɛlɛ ebekeɛ, alɔkɔ kifufulũ tili kɛlɛ ehu Owusoso Akaa ahɔɛ nɛ ɛlɛ ɛtakpù nɛ balɛ nyɔ̃ɔ amɛ. Kɛlɛ aya ɛlɛ mɛ̀ pɛ akpaatã. 36Kemì kpɛkpɛ ebeku balɛ nyɔ̃ɔ mɛ kɛlɛ baŋã bɔdɔ̃ 37Bɔlɔ banunɔ petee gɛzã kelĩabhaohuɔ mɛ azã akpã taabha nɛ̀ afɛtegegene nɛ̀ tehlo. 38Gɛ baŋã bɔdɔ̃ asɛ gɛ bapɛ nɔ̀, bebù nikpèe etukuɔ atɛɛ akpɛ bulĩɛ mɛ asɛ tɛ̀ lɔzã foelee.

39Gɛ kiwiɛ bakoeyiɛ, betikènyi kesiakpa gɛ kalɛ abha bekuɔ tsyɛ, pɔ bamɔ ɔkɔ toli gɛ ayisɛ eyukù, ɛkɛlɛ bapɛ asɛ tɛ̀ begè kelĩabhaohuɔ adɛ vɔbɔ akpɛ ayisɛ mɛ̀ onupɛ babalàa. 40Gɛ bebhui ihuiɛ gɛ nyana kelĩabhaohuɔ bekeɛ, bashɛnɛ ahɔɛ nɛ ɔlɛ shu kpɛ aƒuɔ mɛ, kidzo ɛlɛ abha bebhui ihuiɛ gɛ nyanà kɛpɔtɛ tsyɛ vunɔ nɛ adamɛ ɔkɔɔ. Kɛlɛ basɔ̃ kɛpɔtɛɛ gɛ kɛkɔ pɛ lɔgãa nɛ ɔlɛ shù kɛlɛ bekoeyì nɛ ɔlɛ mɛ aba ogbogbòɔ. 41Pɔ kelĩabhaohuɔ ɔdɛ yalɛ̀ ayisɛ kɛlɛ lɔwɔ́ ɛkɛlɛ. Kelĩabhaohuɔ otugbà ɔkɔ ɔdɛ yalɛ̀ ayisɛ kɛlɛ lɔzɔ lagã, kɛlɛ ɔlɛ kede ɔkɔɔ ibeɛ ɔyɛ̀ɛ wluiwlui nɛ aƒulĩɛ gɛitsùɔ shu so.

42Buyuadɛdɛ anɔ nɔ̀ atɔɖɔ ɛlɛ asɛ tɛ̀ beyì ɔɖavũmɛ azazã, tɛ balɛ ɔmayɛmɛ anɔ nanà etibè de bulĩɛ tɛ ebù tɛtsɛɖɛmɛ ashɛ. 43Pɔ gɛ keyuiza anɔ gbagbla apɛ asɛ tɛ̀ ebù Paulo xɔnɔ eyìnɔ nɛ ɛlɛ mɛ soɔ, agɛkɔ balɛ kidzò. Etseɖe bagɛ babalà bulĩɛ edoɔ asɛ beputɔ̀ atɛɛ ekoeyì nɛ kelĩabhaohuɔ mɛ tɛ̀ bavɛ kesiakpa. 44Bagɔgɔɛ nɔ xɔnɔ azã isikpã nɛ̀ kelĩabhaohuɔ gɛɔyɛɛ nɔ̀ busipɛ̃ nabha, kɛlɛ nɛ kidzo ɛlɛ abhaa, aka nyia aka ezhi eku kesiakpa nabha nɛ ishu yɔyɔ mɛ.

Currently Selected:

Banɔkpɛkpɛ Axɔ̃ɛ 27: nyb

Highlight

Copy

Want to have your highlights saved across all your devices? Sign up or sign in

Learn More About Nyangbo New Testament

Popular Bible Verses from
Banɔkpɛkpɛ Axɔ̃ɛ 27

Video for Banɔkpɛkpɛ Axɔ̃ɛ 27

Acts 13-28

The Bible Project

Banɔkpɛkpɛ Axɔ̃ɛ 27

Popular Bible Verses from
Banɔkpɛkpɛ Axɔ̃ɛ 27

Video for Banɔkpɛkpɛ Axɔ̃ɛ 27

Acts 13-28

Bible:

Tutrugbu

Version: Nyangbo New Testament - nyb