Romanɛ 2
2
Owusoso Akaa Yɛebhu Gbangbã Tikukulu
1Klisoɔ wɔɛtakpu kɔkɔ nanà ma, wɔ anunɔ gɛ okulu ebhu ɔkɔ anɔ teliɛ, ɔmɔsɛ kibui nɔnɔ́ idi gɛ ɔlɔkɔ okulu ebhu ɔkɔ anɔ bhlatɔ nɔɔ, kɛlɛ wɔ tsyɛ ɔlɔkɔ obu ishui ipɔ nɔ, ɔmɔsɛ wɔanɔ gɛ obhui ibui mɛ tsyɛɛ, ɔbhɛtɛ kibui ɛlɛ nɛidi. 2Bunyi otsi alɛ ɔsɛ, Owusoso Akaa yɛebhu kukulu nɛ̀ bagɛ babhɛtɛ ebui alɛ nɛidiɛ nu kibui gɛlɛ ɛlɛ ɔzãkɔ nulũ. 3Kliso onupɛ wɔ anɔ wɔ̃a obu banɔɛ ɛpɔ, pɛ wɔ tsyɛ ɔbhɛtɛ ebui alɛ nɛidi keɛ pɔ, buɖi woɖi ɔsɛ ɔbɔlà obu tɛtsɛɖɛ mɛ nɛ Owusoso Akaa ebhu kukulu nulũɔ dza? 4Pɛnɔsɛ mabomabo nɔlɔkɔ ɔkɔɛ nɛ yɛyamɛ gbangbã tɛbhɛbhɛtɛ, yɛemi kpɛkpɛ nɛ̀ yɛtɛdɔdɔ fɔ̃ɔ ɔkɔ ɔnɔɔ shu, pɔ nɔtɛ ɔmɔsɛ yɛyamɛ gbangbã gɛ abhɛtɛɛ kɛkɔ ɔsɛ notsyina etú mɛɛ dza?
5Pɔ nɛ wɔnɔ atɔ̃ gagalĩ nɛ̀ ɛtúɔ mɛ gɛ nogitsyina shuɔ, noshogò ɔmɔpɔɛ olu ɔkɔ ishu nɛ Owusoso Akaa ɔmɔpɔɛ iwui nabha gɛ ebèbu yɛebhu kukulu gbangbã akasɛ. 6Owusoso Akaa aɖɔ asɛ, “ebebhui ibui mɛ akɔ anɔ nyia anɔ nɛ kɛgɛ abhɛtɛ nulũ.” (Psalomo 62.12) 7Bagɛ gana balɛ emi kpɛkpɛ mɛ pɛ baabhɛtɛ ebui gbangbã, pɛ bazapɛɛ inye gbangbã nɛ̀ bobo akɔ Owusoso Akaa, pɛ bazapɛ asɛ tɛ bazã nɛ̀ ɛkpã ɖaa nɔ, abakɔ alɛ ɛkpã tihɔɔ. 8Pɔ bagɛ bapɛ balɛyɛ ete tɛpɛpɛ, pɛ bashɛ nɛ ahɔɛ nɛ kibui gɛlɛ ɛlɛ ɔzãkɔ shu pɛ balɛ ebui kpa edeɛ, batɔ̃ pɔpɔ̃ gagalĩi nɛ̀ ɔmɔpɔɛ ɔlɛ ɔkɔ alɛ. 9Bɔtɔ nɛ̀ ɔwɔ̃nyɔnɔ ɔbɔba anɔ nyia anɔ gɛ azã nɛ ɛkpã zizĩ nabha, banɔ gɛ eputɔɔ enu Yudanɛ, flogo pɛ ɔkɔ bagɛ betinu Yudanɛ tsyɛ, 10pɔ ishu dadalɛ, bobo nɛ̀ ishu yɔyɔ ɔkɔ anɔ nyia anɔ gɛ abhɛtɛ ibui gbangbã. Banɔ gɛ eputɔɔ enu Yudanɛ, flogo pɛ ɔkɔ bagɛ betinu Yudanɛ tsyɛ. 11Ɔmɔsɛ Owusoso Akaa xɔnɔ etiɖi ananà amɛ.
12Banunɔ nyɔ̃ɔ gɛ Mose yɛɔsha gɛnyã alɛ pɛ bazã nɛ̀ ɛkpã kpaa, batɛ balɔkɔ ɔsha ɔlɛ àpɔ batɔ̃ akɔ alɛ nɔ, pɔ banunɔ nyɔ̃ɔ gɛ alɛ Mose ɔsha ɔlɛ nìesi pɛ babhɛtɛ ebui kpaa, babalɔkɔ ɔsha ɔlɛ ekulu ebhu akɔ alɛ nɔ. 13Ɔmɔsɛ anɛ bagɛ belũ ɔshaa balɛ enu banɔ dadalɛ nɛ Owusoso Akaa yɛamɛ, pɔ bagɛ aabhɛtɛ ɔsha nabhaa, balɛ Owusoso Akaa ebebu akasɛ asɛ benu anɔ dadalɛ. 14(Onupɛ ɔsha ɔlɛ ɔma bagɛ betinu Yudanɛ ahɔɛ, pɔ asɛ banɔdzyrame ana pɛ bazã nɛ̀ ɛkpã nɛ ɔsha nulũɔɔ, kɛlɛ bedzi banɔ gɛ bakpɛ ɔsha ɔkɔ ishu, gɛ ɔsha pɔ ɔma balɛ ahɔɛ flogo, 15pɔ nɛ balɛ tɛgagã nɛ ɔsha lũɔɔ, kɛkasɛ ɔsɛ bafɔnɔ ɔsha nɛ balɛ etúɔ mɛ, kɛlɛ balɛ etúɔ mɛ ebui tsyɛ adalɛ alɛ shu, kɛlɛ balɛ ekpeɖekpeɖeɛ mɛ ebhui alɛ ulũ, kɛlɛ kidzo ɛlɛ nabhaa yɛebu balɛulũ tsyɛ.) 16Kɛbàba kɛlɛ mɛ nɛ kiwui nabha gɛ Owusoso Akaa ebekulu ebhu nɛ banɔdzyrame ebui kpukpũɔ, ɔgana Yesu Kristo abha asɛ ɛɖɔɔ gɛ mɛibui gbangbã ɖɔ luɔ ana.
Yudanɛ Nɛ̀ Ɔshaa
17Wɔ, onupɛ okulu ishu ɔsɛ Yudaeyi wonu, pɛ olu awɔ̃ nɛ ɔsha nabha, pɛ ofeke ishu nɛ wɔ Owusoso Akaa yɛeyi dzidzì shu, 18onupɛ onyi Owusoso Akaa tɛtɔtɔɖɔ lu, pɛ ɔdɛmɛ ɔtɔɖɔ ɛlɛ abha, ɔmɔsɛ ɔkpasɛ kɛlɛ odenɔ ɔshaa mɛ, 19ɔmɔ ishu ɔsɛ onu awuhũpu agbagbana nɛ̀ kifu ɔkɔ bagɛ balɛ otumũ mɛ, 20gɛ onu adɔkasɛ ɔkɔ bawaga, nɛ̀ adɔkasɛ ɔkɔ bunuvɔɛ, ɔmɔsɛ bùbuti nɛ̀ kibui gɛlɛ ɛlɛ ɔzãkɔɔ, kɛlɛ kpasɛ wɔ mɛɛ. 21kɛlɛ wɔ gɛ ɔkasɛ banɔ bhlatɔ ɔdɔ̃ɔ, ɔtɛ ɔlà kasɛ wɔshu udɔ̃ dza? Wɔ gɛ ɔsɛ beti zuruɔ, wɔ ozuruɔ dza? 22Wɔ gɛ ɔɖɔ ɔsɛ banɔ batɛ dɛ ɔmamɛɛ, wɔ ɔdɛ ɔmamɛɛ dza? Wɔ gɛ ɔtɛ ɔdɛmɛ obudi ibuiɛ, wɔ ozuru nɛ obudi ukã mɛɛ dza? 23Wɔ gɛ ofeke ishu nɛ ɔsha shuɔ, wɔtɛɛ Owusoso Akaa olu pɛ ɔta esi nɛ ɔsha shuɔ dza? 24Asɛ kɛfɔnɔ gɛ bafɔnɔ elu asɛ, “Wɔnɔ Yudanɛ wɔnɔ ɔkɔ ɔsɛ bagɛ etinu Yudanɛ baɖɔ ebusoebui nɛ Owusoso Akaa shu.” (Yesaya 52.5).
25Kɛhɔ̃a bhui bhui pɛ popopo onupɛ ɔbhɛtɛ ɛlɛ tibhui bhui ɔsha nabha, pɔ onupɛ ɔta esi nɛ ɔshaa shuɔ, kɛlɛ ɔshɔnɔ anɔ gɛ egibhui kɛhɔ̃a. 26Onupɛ bagɛ begibhui ahɔ̃a akɔ, pɔ balɛ nɛ̀ ɛkpã nɛ ɔsha nulũɔ, kiɖeso pɛ batɛ balɔkɔ alɛ asɛ anɔ gɛ bebhui ahɔ̃a akɔ anaa dza? 27Anunɔ gɛ begibhui kɛhɔ̃a akɔ anii, pɔ aagã nɛ ɔsha nabha piapii nɔ, ebebu wɔ gɛ ɔshaa tɛtɔtɔɖɔ lɛ wɔahɔɛ pɛ onu kɛhɔ̃a bhui bhui elete, pɔ onu anunɔ gɛ ɔta esiɛ.
28Anɔ etinu Yudaeyi onupɛ ishupi mɛ ete ko yɛalɛ, pɛnɔsɛ kɛhɔ̃a bhui bhuiɛ nu ishudzya mɛ ibui ete ko. 29Ao, anunɔ gɛ enu Yudaeyi tututuɔ yɛenu anɔ gɛ alɛ yɛishu mɛ, kɛlɛ yɛhɔ̃a bhui bhuiɛ nu kitúɔ ɛhɔ̃a bhui bhui odenɔ ɔfɔfuĩa mɛ, kɛlɛ anɛ nɛ ɔsha gɛ bafɔnɔ eluɔ nulũ. Anɔ alɛ nɛidi inye kpɛkpɛ nɛititíɛ, anɛ banɔ ɔkɔ kide pɔ Owusoso Akaa ɔkɔ.
Currently Selected:
Romanɛ 2: nyb
Highlight
Share
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
