Romanɛ 1
1
1Mɛ Paulo, Kristo Yesu yɛaxɔ̃ɛdɛ gɛ bekulu asɛ tɛ edzi anɔkpɛkpɛ, pɛ bebu elu akɔ Owusoso Akaa Ibui Gbangbã. 2Kibui Gbangbã gɛ atɔɖɔ elu akpɛ otugbà ɔgana yɛebuiɖɔluanɛ nabha, nɛ Kibui Dadalɛ mɛ 3nɛ Yɛeyianyɛ shu, gɛ nɛ yɛ anɔdzyrame mɛ tɛzazã ulũɔ, David yɛeshui yɛedzi, 4kɛlɛ, gana Ɔfɔfuĩa dadalɛ mɛɛ, bebui akasɛ nɛ ohumi nɔ mɛ ɔsɛ, yɛenu Owusoso Akaa Yɛeyi, gana yɛtɛlɔlɔ odenɔ bekpuɔ mɛɛ, yɛenu Yesu Kristo, bɔlɔ Apaleteɛ. 5Gana yɛabha, kɛlɛ nɛ yɛinye mɛɛ, bɔmɔ tibhui bhuibu kɛlɛ budzi banɔkpɛkpɛ sɛ tɛ bukulu banɔ odenɔ bagɛ betinu Yudanɛ pete ishi mana batɔ̃ lulũ gɛ bede tɛyɛyɛkɛŋã mɛ. 6Kɛlɛ wɔnɔ Romanɛ tsyɛ nɔkpasɛ bagɛ bekulu asɛ bedzi Yesu Kristoanɛ nɛishi.
7Wɔnɔ banɔ dadalɛ pete nɛ Roma gɛ bekulu, pɛ Owusoso Akaa adɛmɛ nɔɔ,
Tibhui bhuibu nɛ̀ ishuyɔyɔ odenɔ bɔlɔ Owusoso Akaa nɛ̀ Apalete Yesu Kristo ɔkɔ kɔ wɔnɔ.
Paulo Yɛtɛpɛpɛ Ɔsɛ Tɛ Avɛ Roma
8Iputɔ, ihu mɛ Owusoso Akaa ahɔɛ nɛ wɔnɔ ɛtakpu ɔgana Yesu Kristo abha, ɔmɔsɛ baɖɔ wɔnɔ tɛyɛyɛkɛŋã ibui afala nɔ nɛ kanɔ nɔ̀ mɛ nyɔ̃ɔ. 9Owusoso Akaa, anunɔ gɛ yɛaxɔ̃ɛ mɛdɛ nɛ̀ mɛitúɔ nyɔ̃ɔ nɛ Yɛeyi Nɛibui Gbangbã tɛɖɔɖɔ mɛɛ, yɛabà dalɛ mɛishu nɛ kɛbakà gɛ ɛbakà wɔnɔɛbui ibe nyiɛ beɛ 10nɛ mɛ Owusoso Akaa tikukulu kiwui nyiɛ wui mɛ, kɛlɛ mɛ tɛpɛpɛ otsi alɛ kɛlɛ nu ɔsɛ tɛ Owusoso Akaa adalɛ idzo akɔ mɛ tɛ mɛba wɔnɔ ɔbha.
11Mɛ tɛpɛpɛ kɛlɛinu ɔsɛ tɛ mɛmɔ ɔnɔ, sɛ tɛ mɛlɔkɔ ɔfɔfuĩa mɛ bɔdɔ̃ kɔkɔ tuli kɔ ɔnɔ tɛ nɔmɔ ohumi. 12Kɛgɛ ɛɖɔ, pɛ ɛpɛ nɔ, kɛlɛ inu sɛ tɛ bɔlɔkɔ bɔlɔ Owusoso Akaa abha tɛyɛyɛkɛŋãa kpɛ bagɔlɔ ohumi nɔ. 13Mɛelɛ alɛ mɔ, ɛpɛ sɛ tɛ kɛzã tititì mɛ kɔ ɔnɔ ɔsɛ anɛ obo mɛtɔɖɔ wɔnɔ ɔkɔ tɛbaba ibui flogo (pɔ ɛgɛzɛmɔ ɛdzo ɔmana otsiɛ) tɛ mɛmɔ ɛdzo tɛ mɛibu atɔwui nɛ ɔnɔ mɛ, asɛ ibu gɛ itibu atɔwui teli gɛ letinu Yudanɛ nɛ ɛkɔ tili ana.
14Kɛxɔ̃ɛ kinu ɔkɔ mɛ sɛ tɛ ibu Helanɛ nɛ̀ bagɛ betinu Helanɛ, bebuitinɛ nɛ̀ bagɛ betinyi ibui. 15Kliso pɛ kinu kibui gɛ kɛdzã kiwuhũ ɔkɔ mɛ sɛ tɛ mɛɖɔ ibui gbangbã ɔkɔ ɔnɔ agɛ ɔlɛ Roma tsyɛ.
16Ɔmɔsɛ Kibui Gbangbã tinu kiwuĩbui ɔkɔ mɛ, ɔmɔsɛ kinu Owusoso Akaa yɛohumi ɔkɔ, anɔ nyia anɔ gɛ ayɛkɛ aŋãa yɛtibubu. Putɔ nɔɔ, ɔkɔ Yudanɛ flogo pɛ bagɛ betinu Yudanɛ. 17Ɔmɔsɛ denɔ Kibui Gbangbã mɛɛ bebu kɛlɔkɔ gɛ Owusoso Akaa alɔkɔ anɔ teli asɛ enu anɔ dadalɛ, gɛ kinu tɛyɛyɛkɛŋã ibui odenɔ kesi kpɛkpɛ mɛ ɔvɛnɔ ɔtɔ̃kɔ, asɛ kɛfɔ̀nɔ gɛ bafɔnɔ ɛlɛ elu asɛ, “Anɔ dadalɛ abazã nɛ̀ ɛkpã ɔgana tɛyɛyɛkɛŋã mɛ.”
Owusoso Akaa Yɛɔmɔpɔɛ Nɛ Banɔdzyrame Shu
18Bebu Owusoso Akaa yɛɔmɔpɔɛ nɛ banunɔ nyɔ̃ɔ gɛ betisì yɛifuɔ akasɛ odenɔ kititíɛ ke, kɛlɛ kɛtakpu mɛ gagalĩeleteɛ gɛ ezhinɔ kibuiɛ gɛlɛ ɛlɛ ɔzãkɔ akpɛ esi ɔgana balɛ ɛtakpu mɛ gagalĩ ebui bhɛbhɛtɛ mɛɛ, 19kɛgɛ ɛlɛ sɛ beti odenɔ Owusoso Akaa shu pɔ lɛ tititì mɛ ɔkɔ balɛ kukuku flogo, ɔmɔsɛ Owusoso Akaa atɛ dalɛ kɛlɛ mɛ akasɛ alɛ. 20Denɔ kanɔ mɛ esi kpɛkpɛ mɛ keɛ, Owusoso Akaa tɛzazã gbangbã gɛlɛ tikpukpũ mɛ, nɛ̀ yɛohumi tihɔɔ nɛ̀ yɛ ɔfɔfuĩa nɔ tɛzazã mɛɛ, bɔmɔ alɛ mɛ tɛdadalɛ, kɛlɛ esi lulũ alɛ akɔ ebuiɛ odenɔ kɛgɛ babhɛtɛ mɛ, kliso kɛtakpu kɔkɔ ma ɔkɔ anɔ nanà sɛ etinyi ebuiɛ.
21Gɛ benyii ɔmɔ asɛ Owusoso Akaa tsyɛ elo, batɛkpɛ yɛinye nɛ itití alo pɛ behu yɛahɔɛ, balɛ ekpeɖekpeɖe mɛ bhɛbhɛtɛ edzi kɛlɛ́, kɛlɛ balɛ bɔga dɔdɔ etúɔ mɛ eku otumũ. 22Beɖi asɛ bebuitinɛ benu, pɔ bebedzi baga, 23sɛ tɛ bakpɛ Owusoso Akaa gɛ alɛ nɛ ɛkpã tihɔɔ nɔ̀ inye nɛititíɛ, betsyina ɛlɛ akɔ bɔdɔ̃ gɛlɛ asɛ banɔ tsitsí, bɔzhɔɛ, bagã nɛ̀ bagã gɛ betsì nɛ esiakpa boŋ.
24Kliso nɛ balɛ etúɔ tɛdɛdɛmɛ ɔkɔ ebui kpa bhɛbhɛtɛ ulũ soɔ, Owusoso Akaa ashɛnɛ ahɔɛ nɛ balɛishu akɔ kɛgɔlɔ ŋaŋã ebui nɛ̀ atsɔ̃ ebui bhɛbhɛtɛ nɛ̀ bagɔlɔ. 25Batsrakɛ Owusoso Akaa ibuiɛ gbangbã nɛ̀ asɛnɛ sɛsɛ, kɛlɛ baakpɛ ɛtakpu esi pɛ baadɛ axɔ̃ɛ akɔ banɔdzyrame ɔdɔ̃ bhɛbhɛtɛ, ɔdɛ ɔsɛ tɛ bakpɛ ɛtakpu esi akɔ Kititíayɛ gɛ ebu bɔdɔ̃ɔ, anunɔ gɛ kɛlɛ bakpɛ yɛinye nɛitití tihɔɔ nɔ. Amen.
26Nɛ alɛ shu soɔ Owusoso Akaa ashɛnɛ ahɔɛ nɛ balɛishu akɔ awuĩ ebui gɛ badɛmɛ nɔ. Balɛ adzɛ etsyina awɔsɔ̃ nɛ bagɔlɔ, gɛ kitinu agɛ ebu alɛ tɛtɔtɔɖɔ flogo. 27Nɛidzo ɛlɛ nabhaa banyɛ tsyɛ ashɛnɛ ahɔɛ nɛ balɛ adzɛ gbagbana shu, pɛ bawɔsɔ̃ nɛ̀ balɛ banyɛ ɔhagbo alɛ. Banyɛ abhɛtɛ atsɔ̃ ebui nɛ̀ balɛ banyɛ ɔhagbo alɛ kɛlɛ bayɛkɛ balɛ atɔ̃pɔpɔ̃ nɛ ebuiɛ gɛ kɛma sɛ babhɛtɛ pɛ babhɛtɛɛ shu.
28Otsi nɔ, gɛ bagɛmɔ asɛ kinu ibui gɛ kɛyɛkɛ edzi sɛ tɛ bayɛkɛ Owusoso Akaa bubuti akpɛ ishu mɛ soɔ, etsyina balɛ ekpeɖekpeɖeɛ mɛ etũ, sɛ tɛ baabhɛtɛ ebuiɛ gɛ lama ɔbhɛtɛ kɔɔ. 29Banunɔ mɛ eyuku nɛ̀ atakpu mɛ gagalĩ, ebui zizĩ, mɛete ɛyɛ tɛpɛpɛ̃ nɛ̀ banɔ tidzyidzyini ɔkpɛ, alɛ ayɛkɛ alɛ mɛ. Ebui kpa bhlatɔ enu awuhũ dzadzã nɛ banɔ shu, banɔ yiyí, ebla pɛpɛ, banɔ wɔɛwɔ̀ɛ nɛ̀ ɔhagbo shu tizizĩ. Benu olugbũedzi agagã anɔ, 30kaɖɔ kpa ɖɔɖɔ nɛ banɔ shu, banɔ gɛ anyana Owusoso Akaa akpɛ ɛya mɛ, banɔ gɛ bakɔala anɔ, befeke ishu pɛ beku ishu awɔ̃, bapɛɛ edzo nɔnɔ abha gɛ babagã abhɛtɛ ibui zizĩ, batɛkpɛ ɛtakpu esi akɔ balɛ akaa nɛ̀ balɛ elĩ alɛ, 31bubuti nɛ̀ tɛyɛyɛkɛŋã ma alɛ, betiɖi anɔ ashagabui, pɔɔ bagagalĩ atakpu mɛ. 32Gɛ benyi piapii ɔsɛ Owusoso Akaa ɔsha gɛ akɔ ɔɖɔ ɔsɛ bagɛ bazã nɛ ɛkpã ɛlɛ nɛidiɛ, babapɔ̃ balɛ atɔ̃ nɛ̀ butsí tsyɛ elo, bavɛ ɛlɛ abha azã nɛ̀ ɛkpã kpa ɛlɛ, kɛlɛ bakɔ asɛ tɛ banɔ bhlatɔ tsyɛ azã nɛ̀ ɛkpã ɛlɛ.
Currently Selected:
Romanɛ 1: nyb
Highlight
Share
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
