Romanɛ 9
9
Bagɛ Owusoso Akaa Ebuɔ
1Ɛɖɔ kɛgɛ lɛ kɛlɛ ɔzãkɔ nɛ Kristo mɛgɛ ɛtɛsɛ asɛnɛ, mɛitú mɛ ebuiɛ atɔɖɔ ahɔɛ nɛ kɛlɛ abha nɛ Ɔfɔfuĩa Gbangbã mɛ. 2Ɛmɔ ɔwɔ̃nyɔnɔ toli idi kɛlɛ bɔtɔ tii bele mɛitúɔ mɛ. 3Pɔ kɛta dzi mɛ tɛpɛpɛ ɔsɛ tɛ baɖɔ kibui akpɛ mɛ, kɛlɛ tɛ bebhui mɛ atɛɛ nɛ Kristo shu nɛ mɛelɛ alɛ, nɛ̀ mɛepi anɛ, 4gɛenu Israelanɛ, nɛ ɛtakpu. Balɛ Owusoso Akaa etsyina ayɛkɛ asɛ beyi pɛ ebu yɛishu dadalɛ akasɛ alɛ, anya olugbũ nɛ̀ balɛ pɛ bayɛkɛ yɛɔshaa, akasɛ alɛ kɛtakpu esi ɔkpɛkɔ, nɛ̀ yɛebui tɔtɔɖɔ olu ɔkɔ alɛ. 5Bashuĩ gbagbla eyimɔmɔ alɛ benu, kɛlɛ balɛ mɛ Kristo edekoeyì asɛ anɔdzyrame ana, bɔbakpɛ Owusoso Akaa gɛ aŋã kɛka nyia ka abha nɛinye nɛitití ɔvɛnɔ tihɔ tihɔ! Amen. 6Anɛ gɛ Owusoso Akaa yɛibuiɛ gɛ wɔa ɛxɔ̃ɛ. Ɔmɔsɛ anɛ anɔ ka nyia ka gɛ ede Israelanɛ ishopoɔ mɛ balɛ enu Israelanɛ. 7Pɛnɔsɛ gɛ bede Abraham yɛigbogbo mɛ soɔ bedzi yɛeyi alɛ. Baɖɔ elu asɛ, “Wɔeyimɔmɔ alɛ ebedekoeyì nɛ Isak yɛeyi alɛ mɛ.” 8Nɛibui mɛ dadalɛ ulũɔ, anɛ beshui ka nyia ka balɛ enu Owusoso Akaa yɛeyi alɛ, pɔ beyiɛ gɛ Owusoso Akaa atɔɖɔ elu asɛ bedzi Abraham yɛeyi alɛ, balɛ enu yɛtsyɛ yɛeyimɔmɔ alɛ. 9Kibuiɛ gɛ atɔɖɔ eluɔ kɛli inu ɔsɛ, “Nɛibe tɔtɔɖɔ lu nabhaa, ebatsyina ba kɛlɛ eyianyɛinuvɔɛ abazã Sara ahɔɛ mɛ.”
10Kɛgɛ zɛplɛnɔ tsyɛ nu ɔsɛ, akaa tenikpo yɛalɛ akɔ Rebeka yɛeyi alɛ, kɛlɛ akaa tenikpo alɛɛ, yɛenu bɔlɔ akaa Isak. 11Pɔ flogo tɛ baba mɔ́ taabhaeyiɛ alo pɛ babhɛtɛ kibui gbangbã tili alo kɛkpa, sɛ tɛ Owusoso Akaa ɛtakpu mɛ tɔtɔɖɔ lu nɛ yɛanɔ bubuɔ shu vɛ ɛlɛ abhaa, 12anɛ̀ nɛ kɛxɔ̃ɛ wɔawɔa ulũ, pɔ nɛ anunɔ gɛ ekului nɛibui nulũɔ, etseɖe Rebeka asɛ, “Esheshèɛ ebedzi anuvɔ yɛaxɔ̃ɛdɛ.” 13Ɔmɔ asɛ kɛfɔ̀nɔ gɛ bafɔnɔ elu asɛ, “Yakob yɛenu anunɔ gɛ ɛdɛmɛ nɔ, Esau pɔ ɛgɛ dɛmɛ yɛibui.”
14Kiɖuwoe lu bɔbaɖɔ nɛ kɛlɛ shu? Tɛbɔɖɔ ɔsɛ, Owusoso Akaa enu anɔ gɛ eɖi banɔ amɛ dza? Ao, anɛ ana! 15Ɔmɔsɛ aɖɔ etseɖe Mose asɛ,
“Ɛbaɖi ashagabui ɔkɔ anunɔ gɛ ɛsɛ iɖi ashagabui ɔkɔ,
kɛlɛ ɛbabhɛtɛ ɛyamɛ gbangbã ɔkɔ anunɔ gɛ ɛpɛ sɛ tɛ ɛbhɛtɛ ɛyama gbangbã ɔkɔ.”
16Kitinu anɔ teli yɛtɛdɛdɛmɛ ulũ alo yɛemikpɛkpɛ ulũ, pɔ kinu Owusoso Akaa yɛashagabui tiɖiɖi ulũ. 17Owusoso Akaa etseɖe Farao asɛ, “Kɛgɛ ɛliso pɛ idzu wɔ bukusi kɛli nu ɔsɛ, tɛ mɛgã wɔabha tɛ mɛibu mɛohumi nɔ kasɛ, kɛlɛ sɛ tɛ mɛinye yi fala nɛ kesiakpa nyɔ̃ɔ abha.” 18Kliso Owusoso Akaa eɖi ashagabui akɔ anunɔ gɛ apɛ asɛ tɛ eɖi ashagabui akɔ, kɛlɛ anunɔ gɛ apɛ asɛ ɛtakpu mɛ gagalĩ zã yɛ, akɔ ɛlɛ mɛ gagalĩ.
19Wɔnɔmɛ anɔ teli ebebisi mɛasɛ, “Kɛlɛ kiɖeso pɛ Owusoso Akaa ekebu ulɔ ɛpɔ? Afana gɛ abalà lɔ itití nɛ kɛgɛ atɔɖɔ asɛ abhɛtɛ shu?” 20Pɔ, anɔdzyrame, afana wonu sɛ tɛ obu kibui ulũ ɔkɔ Owusoso Akaa? Pɔ kɛdɔ̃ tili gɛ anɔ teli abhɔ nɛ̀ tɛbhɔɔ balà bisi anunɔ gɛ abhɔ ɛlɛ asɛ, “Kiɖeso pɛ abhɔ mɛ asɛ kɛlɛ gɛ ɛlɛɛ dza?” 21Bɔdɔ̃ abhɔbhɔɔ pɔ, agɛmɔ idzo asɛ tɛ alɔkɔ tisiɛ gɛ etuɔ tili abhɔ kɛdɔ̃ gbangbã tili gɛ kɛpɔ ɖi alo sɛ tɛ alɔkɔ abhɔ kɛka nyia ka idi ɔkɔ kɛlɛ ishu axɔ̃ɛ wɔawɔaa dza?
22Kɛlɛ onupɛ Owusoso Akaa apɛ asɛ tɛ ebu yɛɔmɔpɔɛ nɛ̀ ohumi akasɛɛ, adɔ fɔ̃ɔ akɔ bagɛ alɛ shu yɛakpɛ ɔmɔpɔɛ nɔ, bagɛ abálɛ elu akɔ titsitsíɛ. 23Kɛlɛ kɛbazã onupɛ Owusoso Akaa apɛ asɛ tɛ ebu yɛehoeyiudɔ̃ gɛlɛ yɛishu dadalɛ mɛ akasɛ bagɛ eɖi ashagabui pɛ etiputɔ abalɛ elu akɔ yɛishu dadalɛ, 24bɔlɔ gɛinu yɛanɔ kukulu tsyɛ elo, anɛ bagɛ benu Yudanɛ ete, pɔ denɔ banunɔ gɛ betinu Yudanɛ tsyɛ mɛɛ dza? 25Asɛ kɛɖɔ gɛ aɖɔ elu ɔgana Ebuiɖɔluanɔ Hosea abha asɛ,
“Ɛbaklu balɛ ɔsɛ ‘mɛanɔ benu’ gɛ betinu mɛanɔ flogo,
kɛlɛ ɛbakulu adzɛ sɛ ‘adzɛ gɛ ɛdɛmɛ nɔ’ anunɔ gɛ etinu anɔ gɛ ɛdɛmɛ nɔ flogo,”
26Kɛlɛ,
“Kɛbàba ɛlɛ mɛ ɔsɛ ɛkɛlɛ tututu gɛ baɖɔ etseɖe balɛ asɛ,
‘Gɛnɛ mɛanɔ nonu,’
bebekulu balɛ asɛ, ‘Owusoso Akaa enunuɔ yɛeyi alɛ.’ ”
27Yesaya azakpɛ ozĩ nɛ Israel itakpu asɛ,
“Gɛ Israelanɛ tɛkaklà kpè asɛ ayisɛ nɛ aƒu nɔtɔ̃ tsyɛ elo,
banɔ gɛ bebu eluɔ ete ko.
28Ɔmɔsɛ Apaleteɛ abalɔkɔ
yɛebui gɔgɔɛ mɛ tibhui bhui akɔ esiakpaa nɛ̀ tɛhɔahlɔa kɛlɛ kɛka nyia ka ba bele.”
29Ɔmɔ asɛ kɛɖɔ gɛ Yesaya atɛɖɔ afala nɔ asɛ,
“Pɛ otɛ ɔsɛ anɛ Apalete Ohumieleteɛ
gɛ yɛakɔ beteli agɔ̃ akɔ ɔlɔ tsyɛ elo,
alo buti tsyina edzi asɛ Sodom ana
bɔtazã asɛ Gomora ana.”
Israelanɛ Mayɛkɛ Mayɛkɛŋã
30Kiɖuwoe lu bɔbaɖɔ? Gɛ bagɛ betinu Yudanɛ agɛ tɔnɔ tɛzazã piapii ede tsyɛ elo, bamɔ tɛzazã piapii ɔgana tɛyɛyɛkɛŋã mɛ, 31pɔ Israel gɛ azatɔnɔ ɔsha nabha tɛbhɛbhɛtɛ edeɛ, akamɔ tɛzazã piapii nɔ. 32Kiɖuwoe lu so? Ɔmɔsɛ bagɛ lɔkɔ tɛyɛyɛkɛŋã atɔnɔ ɔlɛ abha tɛbhɛbhɛtɛ edeɛ, pɔ beɖi asɛ gana balɛ ahɔɛ axɔ̃ɛ wɔawɔa mɛ. Kɛkɔ ɔsɛ bakpatà “kɛklagbu gɛ bakpatàa.” 33Asɛ kibuiɛ gɛ bafɔnɔ elu asɛ,
“Dio, ilu kɛklagbu gɛkɔ sɛ anɔ akpata pɛ adɔ oboeɛ nɛ Zion
ɔxɔa gɛ lɔkɔ ɔsɛ banɔ bakpata tɛ badɔ oboe,
anɔ gɛ elu awɔ̃ nɛ Owusoso Akaa nabhaa, batɛ bakpɛ yɛalɛ awuĩ.”
Currently Selected:
Romanɛ 9: nyb
Highlight
Share
Compare
Copy
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
